Wahyu 17 - Eipomek

Ninye im sirya, mutuku sirya nirya arye, amalye kil ati, kel kiyamikce, talye-talye yolamik kil ati, nyabuk yupu

¹ Sik tekbarye malaikat, ara karu mek makau talipmek malaikat noutamak bukni, tonoknye na dam yanuka domona yupu deice arye nyapnuke. “Anda yalyame. Allah arye pia malye kil, talye yolamak kil, ninye nirya kel kiyamik kil ati, wenebuka opnamle ning kapdeipkiniba, eipnulame,” nyapnuk. Ayupu nyapnuka nong ara ani. Ara weik mek dana-dana weik asik domik mutuku, Babel mutuku noutamak ulamik ninye ara, Allah ati bataklamikce, pia malye weik winilamika ati, talye yolamak kil atonun ulamik.

² Babel mutuku noutamak ulamik ninye ap, im sirya, mutuku sirya nirya, weik ninye deiyok nang Raja-Raja nang ap, sik neika pia malye ninguk talibuka ulamikce, malye winilalamik. Ninye arye kanye wangalamak mek weik dinyak deice arye, sik kanye wangabikiba, kanye bona kum diparyuk pia malye winilamak touk, Babel mutuku ninye malye winilamika deice arye, yuk mutuku nang nirya kel biklamikce, sik babye atonun malye ninguk talibuka winilamik.

³ Amalaikat arye ayupu nyapnukba, Allah El Dib Kanye talipnuka deice arye, amalaikat arye dopropnukce, yukak bobenuk. Ara, mek ap, ninye ap pia kumak bobinukba, aning eipse. Eipse ning ara, nyapnune. Ara, pia malye kam ulul ning, el nong ara ining bi uamuk ning bukmokak, eipse. Amalye kam ulul ning el nong bol deice nirya ara, si sekamuk ning lak kibuk. Ninye arye asi nirya nyaptingba, Allah kekepturye, ‘Na like’ tenen, yu uptue. Ara, Allah el si yanina yupu ubuka ati nyapne. Asi nirya ara, Allah el yanina ati aning nong bol deice sekuka deiyamuk. Akam ning ara, el kisok tekbarye ubuk bukni, el kisok deice ara, sapi basam yang atonun ning sepuluh (10) ubuk. Malye Kam Ulul Ning balye tam ara, ninye nirya biklamikce, talye yolalamik kil bukmokak, eipse.

⁴ Akil ongopmok baju ara, pia teleb mirin ap, bi ap ubukba, abaju deice wipdeibik ning ara, emas ap, laut mekwen pum tam ulamle ning, dekna weik ning, el si ara mutiara ap, dekna weik mitik keil ap ubuk. Akil el taruk arye, karu mek makau emas arye memamek ning bopmok. Amakau pum bisik ara, akil arye pia malye-malye winilamuk ning ap, yuk ninye nirya talye-talye yolalamik ning ap ubuk. Teleb nang mutuku-mutuku nirya arye, ‘Akil winilul ning ara, pia malye ning ati, nun teleb unyap ninye arye aning ara, pia kum winiptibye,’ tenelamik bukni, akil arye aning nirya ati, kanye deiamukce, aninguk talibuka winilamuk.

⁵ Akil el asok deice sekuka deiyamik yupu ara, ani. “Akil el urasin ara, winipmanto kil ulul bukni, aning nong noutam ara sal arye, ‘Deiyok ara ani’ tenen, min kum biktinge. Weik asik domik mutuku si Babel mutuku tam kil talye-talye yolamak kilapu, sik nin deiyok kil ulule. Tukwak ninye arye pia tenepmanto kum ning, pia malye unyak deiyok kil ulule.” Ayupu dumbarye ara, akil el asok deice sekeiyamik ning laka ubukba, eipse.

⁶ Akil dipdesirye, kel bikse. Akil ara, diba tenen nang pia weik olamukba sik ining balamuka kwebuka dilamukba adeice arye, kanye deibukce, el kanye wangamuk. Ara, ninye arye kanye wangan mek weika arye dinyakba, sik kanye wangabikirye, teleb kanye bona kumce, malye winin ning talye luparabuka winilamak touk, akil ton winipmokba, eipse. Akil arye ninye olamuka ara, talye nang kum bukni, akil arye nyamukba, yu nang arye, Allah wiamukba, elti, diba tenelamikce, Yesus el yupu dobuka peterelamik ninye ati olamik. Yesus el yupu kekelamik ninye pia weik olamika ati, akil ara kanye deibuka ulamuka deice arye, el kanye wangamuk. Winibukba, epsirye, na kanye pia lukdase.

⁷ Lukdaseba, amalaikat arye nyapnuke. “An lukulanmalam ara, yata deiyok arye do? Ninye arye kum bikamik ning, aMalye Kam Ulul Ning el kisok tekbarye, el yang sepuluh (10) ululnye ap, el balye deice bukuka balamle malye winina deiyok kil ap ati laka nyapnukine,” nyapnuke. Nyabukce, ayupu dukdongobuka nyabuk.

⁸ “Yohanes ance eipmom ning pia Malye Kam Ulul Ning ara, min arye tukwak mutuku noutam balamuk. Wini talak tunimapliba, ninye kum elinyak bukni, aminyan talak ara, tukwak mutuku noutam tuku pum bisik bakamlyak douapce, kutukuka tiknamle. Aminyan tuku pum bisik arye weleplyopura, Kristus arye anye biti wenebuka oplopnamle. Allah arye aning-aning nirya kwepdeiyamuk talak arye, ‘Aninye lyepnamne’ tenen, Kam Pia Unamak Ninye Si Sekna Buku, sik si kum sekiamuk ninye ara, aminyan talak aMalye Kam Ulul Ning tuba tonap eipnamake. Minop arye tukwak mutuku balamuk bukni, wini talak kum elinyakbuk, aminyan talak tonap laka yalyeura, eipnamaka ati nyapkine. Malye Kam Ulul Ning ara, elinamak ninye ara, Allah arye ‘Sik kam pia unamak’ tenen, sik si kum sekiamuk ninye ara eibikirye, lukdanamake.”

⁹ “Aning nirya ara, weik kel kinyak nanguk, ‘Deiyok ani’ tenen, kel biktinge. Yuk talye nang ara, aning nirya ara, kum kel keptinge. Malye Kam Ulul Ning, el kisok tekbarye ulye ning ara, winipmanto ulul bukni, akisok tekbarye nong ara, ani. Ton ning ara, Talye Yolana Deiyok Kil arye mutuku kon deice bulul sukum tekbarye ulul ning ati kel kinyabe. Ton deiyok, ara sik tekbarye weik ninye deiyok nang, 7 Raja nang, pia malye ning talibuka unyak nang ati kel kinyabe.

¹⁰ Sik 7 Raja kan-kan ara, pamubarye malye Raja nang ara, akunum obuka sirya dakukba kum unmak bukni, tonok malye Raja tuba ulule. Tonok malye Raja ara, min kum yanmal bukni, aminyan talak akunum yalyopura, like mitik weika arye, anye birye tukwak ninye nirya talibuka unamle.”

¹¹ “Apia Malye Kam Ulul Ning minop talak kam ulamuk bukni, wini talak ara, kam kum ulule. El babye winipmanto ulul bukni, aning nong ara, pia malye ninye deiyoknye, Raja binye ulule. Sik yuk tekbarye pia malye ninye deiyok nang, 7 Raja nang arye, tukwak ninye talibuka ulamica ani, aminyan talak ara, sik kum dacopura, malye Raja binye arye tiklirye, tukwak nang talinamle. Anye babye, aminyan talak ara, Kristus arye wenebuka oplopnamle.”

¹² “Malye Kam Ulul Ning, el bol ining bi atonun ubuk ning ara, el kisok tekbarye deice ubuk yang eiplum ning ara laka nyapnune. El kisok deice 10 yang ara winipmanto ubuk bukni, aning nong ara ani. Ara, mitik tonun amu tam ninye deiyok nang, 10 nang ati ulule. Aninye deiyok nang 10 nang ara, min kum yanamaka ati, amalye deiyoknye birye, sik talinamak mutuku, 10 mutuku min bokuka kum arepmale. Bukni, aminyan talak sik deiyok nang 10 nang akunum yacopura, pia Malye Kam Ululnye sik deiyoknye birye, el amu tam sik 10 ninye deiyok nang arye talinamak mutuku, 10 mutuku bokuka arepliba, el amu tam bukuka unamake. Sikda like weik kum kam unamak bukni, sikce 10 mutuku talibuka unamak talak ara, mitik tonun dem uka.

¹³ Sik malye ninye deiyok nang, 10 nang nirya arye, ‘Ansinibuka unamake,’ tenebuka tonok kanyeuk tenebuka, neika unamaka anya arye, sik mikip ap, sik talinamak deiyok ning nirya ap, dobuka sikce pia Malye Kam Ululnye biti, arepnamake.”

¹⁴ “Arebikirye, amalye deiyoknye ap tabakicopura, Domba Mi Atonye biti, opnamake. ‘Domba Mi Atonye opnamap’ tenen, piripdenamak bukni, Domba Mi Atonye birye, sik nirya ati malye kibuka oplopnamle. Winipnamla ara, talye ati kume. Ara, yuk ninye deiyok nang weik aunyak bukni, sik deice tam Weik Ninye Deiyoknye bira, eluk ulule. Tonda, yuk Raja nang weik aunyak bukni, sik deice tam weik erena Raja Deiyoknye bira, Domba Mi Atonye bira, eluk ulule. Ati ara, Domba Mi Atonye birye, sik malye un ninye deiyok nang nirya ati obuka sirya daknamle. Atalak ara, Domba Mi Atonye elce, ‘Aninye na mapu unamak’ tenen, wiamukce, yukamukba, elti, diba tenelamikce, batakna pia kumce, el yupu talibuka dobolyanganyak ninye ap, el ap neika unamake.” Amalaikat arye na Yohanes ati aning nirya laka nyapnuke.

¹⁵ Lak nyapnukce, ayupu tonap dukdongobuka laka nyapnuke. “Arup sum Talye Yolana Deiyok Kil, weik mek dara bukmokak, eiplum ning babye, laka nyapnune. Weik mek dara ara, winipmanto ulul bukni, amek sik nong ara, ninye ayala-ayala nirya ap, yupu yuk-yuk nirya nyanyak ninye ap, weik mutuku noutamak yuk-yuk nirya unyak ninye negara-negara ap, yupa pia weik ati bikinyabe.”

¹⁶ “Apia Malye Kam Ululnye ap, el amu tam buknamak ninye deiyok nang, 10 nang ap arye, atalye yolalamik kil pia amalye kil ati, ‘Nun like,’ tenebikirye, akil ati male kipnamake. Elce talilye ning nirya dalubuka dopdobikirye, akil oplobicopura, nong demuk upnamle. Akil obikirye el nong kalebuka dinamake. Dinmaca ani, el nong kalebuka batakice ning ara, uku dongobikiba, uku arye dipnamle.”

¹⁷ “Winibuka unamake deiyok ara, ani. Ara sikda pia malye wininyak bukni, Allah arye, ‘Wininamme,’ tenyamse ning ara, sik talima pum tam dongopnyopura, sik 10 ninye deiyok nang arye, sik mikip ap, sik talinyak ning nirya ap, Malye Kam Ululnye deice deibicopura, elce amutuku nirya talibuka unamle. Unamla deice arye, ‘Na tenyamse pil nirya akunum dopnamniyake. Akunum dopnicopura, narye, bita merekuka,’ tenenamne. Narye, ‘Aminyan sirya talak unamle ning ara ani,’ nyabuka lak nyalamse yupu nirya, nong akunum uplyopura, narye amalye deiyoknye babye oplopnamne. Allah arye tenelule.” Amalaikat arye na Yohanes ati aning nirya laka nyapnuke.

¹⁸ “Talye Yolana Deiyok Kil eiplum ning ara, winipmanto ulul bukni, el nong ara, ani. Ara, pia weik asik domika Babel mutuku noutamak unyak ninye ati kel kinyabe. Babel mutuku unyak ninye arye, yuk mutuku deiyok nang Raja nang nirya ati, sik deice tam unyakce, ninye deiyok ning talinyake.” Malaikatnye birye laka nyapnuk touk, na Yohanes arye nyapsine.