Wahyu 16 - Eipomek

Allah arye malye winin ninye ati, el yu una ap, ninye wenena ap, ona ap ati, nyabuk yupu

¹ Aning nirya eipsopura, adiparyuk, Allah el si erena aik pum tam arye tonoknye birye, sik tekbarye malaikat ati weik yupu arye nyabuk. Elce nyabuk yupu ara ani. “Allah el yu una ap, ninye wenena ap, ona ap ati deiyok ning ara, anggun taipmalum ngolol makau pum bisik ulule. Ati anggun ngolol makau atonun bukni, emas arye memebik ning talipmalum ning nirya ara, tukwak mutuku unyak ninye deice dikilbilulume,” nyabukba, kekepse.

² Ayupu nyabukba, adiparyuk sik tekbarye bukni, minyuma malaikat arye el emas makau tuku deice diklobukba, atalak ulamik ninye deice ara, weik kanye imun torok moubuk. Ara, laut mekwen noutamak arye minyuma yayuknye, pia malye kam ululnye, el ap, el urasin atonun puturubuka deibik ning ap, tukwak ninye arye si erelamikce, el nomor sik nong deice seklamik ninye ati, torok pia weika arye aribukba, sik nong deice moubuk.

³ Winibukba, malaikat bitinya anye, el karu makau pum tukwak mutuku diklobukba, laut mekwen deice sakuka, laut mekwen nirya ara, sik dipmace ninye talima pum tam ining mekwen delilamle atonun, laut mekwen nirya ining mekwen deibuk. Winibukba, laut mekwen noutamak kam ulamuk ning ap mekin bal ayala-yala nirya ap adiparyuk nirya dibike.

⁴ Winibukba, malaikat winilinye, el ngolol makau pum uamuk ning tukwak mutuku tam diklobukba, akanye imun ning ara, tukwak mutuku noutamak balamuk mek ap, mek puak ap nirya adeice sakukba, amek nirya ining kibuk.

⁵ Amek nirya ining atonun ubukba, amek ap amekwen ap ulamik ning nirya dibikopura, amek aning-aning nirya talibuka ulamuk deiyok malaikat arye ayupu nyabuk. “Allah anda minop talak ulamluma ani, tuba kamuk ulyamnye bira, malye ning tonok babye akumuk ulula anya arye, anda Pia Telebnye ulyame. Ance tukwak mutuku ninye ati, kanye imun un ning arepmalamce, wenepmalam ara, bita merekuka wininmalame.”

⁶ “Aning ara, talye ati kum nyapne. Deiyok ara, amalye winin ninye arye an mapu weik oltakalamik. Ara, ance, ‘Aninye ara na mapu unamak’ tenen, wiamlumba, anti diba tenelamik ninye ap, an yupu lake nyana deiyok nang nabi-nabi nang ap, weika arye oltakalamik. Winibuka malye ulamika ati ara, ance nyapdeipmalamba, sik mek nirya ining mekwen danmalabuk, ining mekuk dinamake. Sikda malye ninye ati, ‘Bita merekuka wenepmalume,’ nyapne.” Mek deiyok talibuka ulamuk malaikat arye nyabukba, kekepse.

⁷ Anye birye ayupu nyabukba, Allah el aik pum emas meja damnye birye ayupu kekenmok ati, tamubuka nyabuk. “Dipkoprop nyaplame. Nun ni Allah anda aning-aning nirya malye kibuka, aning nirya deice tam umince, weik mikipnye ulyame. Yuk mikip ulul ning nirya ara, mikip mitik tonun ulul bukni, anda nun Weik Ninye Deiyoknye ulyame. Weik mambul pil dolalum ning ara, ninye kum winipmanto ning, pia teleb pil dolamlum ning nirya diksukumuk ulule. Ance tukwak ninye ati yupu lepsisikuka bokeipmalamce, ance aninye nirya wenebuka onmalama ara, pia diksukumuk ulyama anya arye, ‘Aning nirya ara, pia telebe. Bita merekuka onmalame’ tenen, nyapkine,” nyabuk. Allah el aik pum emas meja dam ululnye, ayupu nyanmokak, kekepse.

⁸ Ayupu nyabukba, Kekepsopura, malaikat dumunye birye el karu ngolol makau uamuk ning, keting deice diklobukba, keting yu pia weik ubukba, tukwak ninye sik nong bol deice tin weik teng-teng abuka deice arye, sik nong bol bupu nirya boubukce bol kobuk.

⁹ Sik nong bol tin weik ubukce, bol kobukba, akanye imun deiyoknye, Allah el si ati pia malye yupu weika arye nyanmek. Deiyok ara, sikce, ‘Akanye imun ning nun nong deice awinipmasila deiyoknye bira, Allah el uka,’ tenebikce malye yupu nyanmek. Allah El si ati malye yupu weik nyanmek bukni, sik malye-malye unyak ning ati, balye tam kibikce, kum batakik. Tonda, elti, “Anda pia telebe,” nyabuka, el si kum erenmek. Amalye winin ning nirya ara, tuba talibuka wininmekak anirya eipse.

¹⁰ Eipsopura, pamu malaikat arye el karwu ngolol makau ara, laut mekwen noutamak arye minyuma kutukuka yayuknye, pia malye kam ululnye, el talyamuk ning deice arye diklobuk. El karu makau pum uamuk ning diklobukba, Malye Ning Kam Ululnye, el talilamuk mutuku nirya ap, el talilamuk ninye ulamikak nirya ap, dana-dana nirya kunukuk. Dirina pia kum ubuk. Winibukura, elce talyamuk ninye nirya ara, sik torok weik ap, sik nong deiceuk yala nirya dilamuk ap ati, weik arye engebuka donmekce, sik mining sitang si tolanmek.

¹¹ Winibikce, Allah im deice tam ululnye biti, pia malye-malye yupu el nong deice delilamikce, sik malye ulamik ning ati ara, ‘Se, nun dipkoprop malyeuk winilamubu,’ nyabuka, sik balye tam kibuka amalye winin ning ati kum bataklamik. Kekena kumce bisibuka unmekce, malye winin ninguk talibuka unmekak, eipse.

¹² Nakup malaikat arye kanye imun ning el ngolol makau pum tam ubuk ning ara, weik mek si Efrat mek deice arye diklobukba, amek nirya adiparyuk ceprobukce, mikuk. Tuku kel-kel abuka deiyok ara, ‘Amek otam keting yangan tam ulamik ninye deiyok nang, Raja nang arye, abisik arye yanamak’ tenen, amek nirya adiparyuk ceprobuk.

¹³ Aning eipsopura, isa winilinye birye, yakai urasin atonun ubukce, yanganmekba, eipse. Tonok ning ara, Mem Kwatima Urasin Atonye tikukba, el si bam bol pum tam arye ayakai kutukuka yayuk. Bitinye ning ara, Pia Malye Ning Kam Ulul ning, laut mekwen noutamak arye kutukuka tikilyayuknye, el si bam bol pum bisik arye yakai kutukuka yayuk. Aning atonun, winilinye ning ara, Tilila Yupu Nyana Deiyoknye, el si bam bol pum bisik arye yakai kutukuka yayuk. Aisa yakai urasin atonun danmekce yanganmekak eipse.

¹⁴ Aisa winilye, tukwak mutuku tuba ulamik ninye deiyok nang dam balamikce, ninye kum winipmanto ning mambul pil weik dopra balamik. Tonda, awinilinye isa arye, tukwak mutuku ninye deiyok nang nirya bulubuka kintinipmeka deiyok ara, ‘Anang ap, sik mapu silip ap nirya arye, Allah el tam nang obuka sirya dakdenamak’ tenen, bulunmek. Aning ara, weik mikip ululnye, Allah arye ninye nirya ati yupu lipsisikuka, wenebuka opnamle sum ara, ‘Atukwak mutuku deiyok nang arye, Allah el yupu yanipdenamak’ tenen, bulupmekce ninye winipmanto kum pil donmekak, eipse.

¹⁵ Atalak aryuk Yesus arye ayupu nyabukba, kekepse. “Anggun nirya kanye mouplulume. Ubula don nang talya karin arye duknubuka yangalamak touk, anggun kum bikmamunye talakuk talye karin arye yanamne. Allah arye teleb updeiplirye, meliliba kanye deibuka unamlanye wininamle ning ara, lak nyapnusine. Winipmanto ara, ninye arye, ‘Nun mankau mapmabye talak, baju kum ongopmabibuk, nun kayapu yacopura, alye dakdapyak’ tenen, baju ongobikirye kanye moubuka kintinibuka dilamak touk, Allah arye melinamlanye babye kintinibuka dinauk unamle.” “Ayupu nong noutam ara, ani. Anggunce, ‘Nun ni kopropa dan talak dolyanamsil do?’ tenen, kintinibuka dinauk upmunyopura, aminyan talak ara, anggun alye kum dakanamlume. Tonda, winipmanto ara, kintinina kumopura, ninye dinmacak, talye nong demuk banyak ninye arye, alye dakaldalamak touk anggun babye kintinibuka dinauk kum upmunyopura, na tamubuka yanamne talak ara, alye dakdanamlume. Ati kanye mouplulume, nyapsine.” Yesus arye ayupu nyanmokak kekepse.

¹⁶ Ayupu kekepsopura, sik isa winilye arye, tukwak ninye deiyok nang nirya Raja-Raja nang nirya dobuka tonok mutuku bulubukabikce, mutuku si Harmagedon mutuku deibik. (Ara, Ibrani yupu deice arye, Harmagedon nyanyake.)

¹⁷ Bulubuka deibikura, malaikat teknye birye kanye imun ning, el karu makau pum bisik uamuk ning ara dobukabukce, im noutam akuk diklobukba, Allah el im deice tam si eren aik pum bisik arye, tonoknye weik arye yupu nyabuk. “Winira akunuma. Sirya dakle,” nyabukba, kekepse.

¹⁸ Nyabukura, adiparyuk liman ap, bebeya lakna ap, weik lelim ap, weik mutuku lulukna ap ubukba eipse. Allah arye aning-aning nirya kwepdeibukce, ninye kwepdeibukba tukwak mutuku noutamak deibuk talak arye dipdongobuka, wini talak anoutamak talak nirya ara, mutuku lulukna weik aulamuk bukni, anirya talak nirya ara mitik tonun luluklamuk. Bukni, asirya daknamle talak luluknamle ning ara, mikip pia weika arye luluknamlarya. Amutuku lulukna, weik arye lulukunmokak na Yohanes arye eipse.

¹⁹ Mutuku lulukna weik arye lulukukba, adiparyuk weik asik domik mutuku, el si ara Babel mutuku noutamak arye, tuku nirya dilikukce, bokuka winilye kibuk. Tukwak mutuku im sirya, mutuku sirya nirya noutamak arye, weik asik domikak nirya adiparyuk lokuka biyukce, atu atonun kiplobuk. Deiyok ara, Allah arye weik mutuku si Babel mutuku ninye arye, pia malye ulamik ning nirya ati, tuba tenebukce, amutuku ninye wenena ati, yu pia weik ulamuka ati, asirya dakne talak, yu pia weik ubukba, weik mikip arye oplobuk. Allah el yu upmanto ning ara, yu weik arye kanye wangalamak mek kwebuka, tonok mek makau pum tam weika arye dikdongobikirye, yuk nang ati, mikip arye sik si bam bol pum tam dikdongobicopura mek si amubuka lupdonokmanto kum winiptingopura, Ara, Allah arye weik wenena ning arebuk ati, sik Babel mutuku tam ninye lyepdanmanto kum unmekak eipse.

²⁰ Weik mutuku lulukna lulukukba, laut mekwen noutamak arye sekelongolamuk mutuku taram pulau nirya ara mekwen dibukba, adiparyuk kum dayuk. Mutuku kon mutuku kon nirya ara, weik arye lulukukba, tokna paklirye, yamultaklamle touk winibukce, amutuku-amutuku nirya sakukce lu kibuk. Mutuku kon nirya kum dayuk.

²¹ Im noutamak arye ninye nong deice sakuka obuk ning urasin ara keil atonun bukni, dekne dukduka puru mok sakuk. Es mok puru ara, dekne dukduka atonun yuk-yuk bukni, tonok ning ara, 45 kilo atonun ubuka sakuk. Aning ara pia weika arye sakanmokce, ninye pia weik obuk. Obukba, tukwak ninye nirya imun kanye bobuka unmekce, asakanmok dekne dukduka mok puru ati, Allah el nong deice pia malye yupu nyabuka derenmekak kekepse. Na Yohanes arye nyapsine.