Wahyu 14 - Eipomek

Domba Mi Atonye ap, elce lyebuk ninye, sik yupa weik 144.000 ninye ap ati, nyabuk yupu

¹ Min nyapmasin ning eipsopura, na Yohanes arye aminyan eipse ning ton laka nyapnusine. Ara tonok weik mutuku dup, el si ara Sion mutuku, Domba Mi Atonye ap, elce akunum lyebuk ninye ap, sik yupa weik 144.000 ninye ap, amutuku dup deice tikmeka, eipse. Sik 144.000 ninye nirya ara, Domba Mi el si ap, el Li Kopropa Allah el si ap, sik asok deice sekdeiyamuk ning ara, eipse.

² Eipsirye, im deice tam arye weik lelim bitinye kekepse. Tonok ning ara, weik mek onmalirye, lelim weik lelamle touk lelim ap, weik liman lelamle atonun lelim ap lenmokba kekepse. Tonda, ninye yupa weik buluptingce, sik bingkong pong-pongana, lelim weika arye nyapnamting tonun, alelim ton nyanmokba kekepse.

³ Anirya kekepmaseba, sik 144.000 ninye, Domba Mi Atonye birye akunum lyebuk ninye arye winiryuk mot senmek. Winiryuk mot senmekce unmekak ara, Allah el weik bun ning deice bukmokak damak nyanmek. Tonda, sik dumbarye teleb kam unyak ning ap, sik 24 wisi deiyok nang ap asukumuk, Allah el urasin tam tikmeka damak mot senmekba, kekepse. Sik yupa weik 144.000 ninye nirya arye, winiryuk mot senmek bukni, yuk nang nirya arye sik senmek mot, winiryuk ning ara, kel kum bikmanto unmek. Bukni, Domba Mi Atonye birye, sik yupa weik 144.000 ninye, tukwak mutuku noutamak arye akunum lyelamuk ninye, sikcuk amot bikamikce nyanmek.

⁴ Aninye ara, sik yupa weik 144.000 unmek ninye ara, tukwak mutuku ulamik talak noutamak nirya ara, malye ning aning-aning nirya talibuka kum ulamika ati, talye yoltaklamek kilapu ap ubula kum yolalamikce, teleb diksukumuk ulamik. Domba Mi Atonye birye menekuka balibuk, el aminyan dobolbalamak ninye nirya ara, sik yupa weik 144.000 unmek ninye ara, adiparyuk elti, dobolbanyake. Tukwak ninye im sirya, mutuku sirya nirya noutamak arye, Domba Mi Atonye birye dekuka lyelamukce, Allah el si erena ati aninye dobuka Allah ati areamuk. Ara, wenye kwaning yongobuka, ‘Allah el si erepnamap’ tenen, arelamak touk, Allah el ap, Domba Mi Atonunye ap, sik bitinye si erena ati, sik yupa weik 144.000 unmek ninye dekuka lyelamukce, Allah ap, Domba Mi Atonye ap ati areamuk.

⁵ Sik yupa weik 144.000 ninye kan-kan nirya, tilila yupu tonok babye pia kum nyalamik atonun, atalak babye tilila yupu pia kum nyanmek. Dipkoprop yupu nyalamik touk tuba nyanyake. Yuk ninye nirya arye anang ati, “Sik malye winilamik ning ara, ani, anye nyabuka, sik nong deice, malye yupu lulubuka kum nyaptinge. Malye winin ning tonok babye, kum winilamika anya arye, deiyok kum ulula ati, yuk nang arye, sik 144.000 nang ati, malye yupu kum nyaptinge. Na Yohanes arye nyapsine.

Malaikat winilye ton eibukce, laka nyabuk yupu

⁶ Aninye nirya eipsopura, tonok malaikat ton im noutamak lakuka banmokak, eipse. Minop talak arye dipdongobuka wini talak noutamak nirya, Allah arye el laka teleb yupu, ninye lyen yupu nyalul yupu ara, amalaikat arye doprobukce, laka nyapra banmok. Nyapra banmoka ani, atalak tukwak mutuku im sirya, mutuku sirya nirya noutamak, tuba ulamik ninye kekelamik. Ara im sirya, mutuku sirya nirya unyak ninye ap, ninye ayala-ayala nirya ap, yupu yuk-yuk nyanyak ninye nirya ap, weik mutuku noutamak unyak ninye (negara-negara) ap, ‘Ninye lyena ati laka teleb yupu Kekenamak’ tenen, amalaikat arye ayupu nyapra banmokba, kekepse.

⁷ Amalaikat weik yupu deice arye ayupu nyanmokba kekepse. “Allah arye ninye mutuku-mutuku nirya ati, yupu lipsisikuka bokeipsilirye, wenepnamsil talak ara, akunum dam upmasila ati, anggun nirya arye Allah ati ilil asa unamlulume. Ilil upsiliba, Allah ati, ‘Se, anda pia teleb ulyame,’ nyabuka, elti, si erenamlulume. Yata ning do nirya, im noutamak ap, tukwak mutuku ap, laut mekwen ap, balamle mek nirya ap, aning-aning nirya kwepdeibuknye, Allah ati, anggun nirya arye el siuk erepnamlulume,” nyapra banmokce, amalaikat lakuka banmokba, na Yohanes arye eipse.

⁸ Minyuma malaikat lakuka banmokbuk, el aminyan tam tonok malaikat tonap aminyan lakuka yanganmokak, eipse. Bitinye yanmok malaikat ara, aminyan tam ton ayupu nyapra banmok. “Weik asik domikak, el si Babel nyalamik mutuku ara, akunum kum dale. Allah arye amutuku uamuk ning nirya dakuka atu atonun kiplopmale. Deiyok ara, Babel mutuku ulamik ninye arye, sik pia malye ning patalamukba, aninguk tenebuka pia malye winilamika deice arye, Allah bataklamikce, yuk talye ning talibuka malyeuk winilamik. Winilamek talak nirya ara, yuk mutuku ulamek ninye arye, sik malye winin ning eibuka kel bikamikce, sik babye pia malye winilamekce, Allah ati bataklamek. Aning ara, ninye kanye wangalamak mek weik arye dinyakba, sik kanye wangabikirye, pia malye winilamak touk winilamik. Winibuka pia malye weik winilamik ning ara, sik Babel mutuku ulamik ninye, sik deice ubuka anya arye, Allah arye amutuku uamuk ning nirya akunum dakloplirye, atu atonun kiplopmale,” nyabuk. Amalaikat arye nyapra banmokba, na Yohanes arye kekepse.

⁹ Aning eipsopura, malaikat winilinye ning ton yanganmokak, eipse. Sik bitinye minopce lakuka banmarikba, aminyan yanmok malaikat ara, weik yupu deice arye ayupu nyabuk. “Yata nang do nirya, laut mekwen noutamak arye tikilyayuknye, pia malye ning kam ululnye, el lak kilina ati nomor sik asok deice do, sik taruk deice do, sekdeibikba, amalinye ap, el urasin atonun puturupdeibik ning ap ati, kibuka el si erenyak ninye ara, sik pia bicoe.

¹⁰ Ara talya ati kume. Allah arye aninye nirya ati, yu pia weik upliba, weneplirye, sik nong deice ikin ning pia weika arye deiplirye, opnamle. Awininamle ning ara, winipmanto ning ati nyapne. Ara, yu weik arye ninye kanye wangalamak mek kwebuka, urdem mek ap tabakna kumce, tonok mek makau pum bisik weika arye dikdongobikiba, langdelsaklamle touk, Allah arye aninye weika arye wenenamle ning ara, ikin pia weik upliba, lyepdanmanto kum unamake. Allah arye kumasan bol kel, el si ara belerang, ara, uku buk tin weika arye dipliba, keil but-buta tong ara, siltong atonun weik lelamle ning dobuka, aninye sik nong deice deipliba, uku arye sik nong bol dilamliba, uk dilamlya ati pia donmakirye, engenamake. Engebuka donmakibuk, Domba Mi Atonye ap, Allah el im deice pil don nang, sik pia diksukum unyak malaikat nirya ap arye dinamake.

¹¹ Aninye dobuka uku dilamlya mutuku noutamak dongopliba, uku buk arye, sik nong dilamliba, tulum welenamla ara, pia min kum kum danamle. Aminyan yanamle talak nirya babye, auku pia dilamlirye, tulum weik welenamle. Pia Malye Kam Ulul Ning, el laka kilin ning, el nomor sik nong bol deice sekekirye, el bidamang ap, el urasin atonun puturup deipnamak ning ap ati kibuka, el si erenyak ninye nirya ara, sik dikdik sena ati, lo ton pia kum unamle. Auku noutam akuk, uku arye sik nong dinmaliba, pia engebuka donauk unamake.” Winilinye yanmok malaikat arye, lakuka banmokce, ayupu nyabukba, kekepse.

¹² Ati ara, moubuka kekenululume. Na Yohanes arye nyapsine. Ikin ning weik yanamla ati ara, Allah arye wiamukba, elti, diba tenekirye, el yupu talibuka dobolbanyak ninye nirya ara, ikin ning upsilya babye, batakna pia kum diparyuk, pia pi dobuka, eltibuk, diba tenemunce, Yesus ati pia talibuka unamlume. Ikin weik unamsil ning ara, min kum kum danamle ati nyapsine.

¹³ Amalaikat winilye dinmasiba, adiparyuk im deice tam arye, ninye yupu atonun yupu arye, ayupu ton nyabukba, kekepse. Ayupu ara, ani. “Ayupu seklyame. Wini talak arye dipdongobuka, aminyan yanamle talak noutamak nirya, Yesus ap talima dukdongobuka unyak bukni, aminyan talak dipnamak ninye nirya ati, Allah arye teleb updeipliba, kanye deibuka, pia telebuk unamake,” nyabuk. Nyabukura, Allah El Dib Kanye arye nyabuk. “Dipkoprop nyaplume. Sik pil teleb ubuka dolamikba, nong uamuk ning ara, Allah arye kel kilula ati ara, aninye dibikirye, el dam welebicopura, ikin ning, sik nong deice ulamukba, pil ikin arye dolamik ning nirya batakuka, dikdik sebikirye, teleb kanye deibuka unamake. Sik ikin tonap pia kum unamake.” Allah El Dib Kanye arye nyabukba, kekepse.

Sirya talak, Allah arye ninye nirya ati, wenebuka, yupu lipsisikuka bokeipnamle ati, domon yupu deice arye, nyabuk yupu

¹⁴ Na Yohanes arye kekenmase yupu ap, dinmasi ning ap ati, nyapnune. Na urasin tam ara, pia kurun dua unmokak, adua deice bukmoknye, el urasin ara, Ninye Mi Koprop Atonunye bukmokak, eipse. ‘Elda weik deiyoknye ulule, tenepnamak’ tenen, el kisok deice ara, emas arye wibuka, kisok kalupdeibik ning el si ara, mahkota deiyamik ning unmokak, eipse. Tonda, el taruk deice ara, yu weik parang ya talipmokak, eipse.

¹⁵ Aning kunum eipsiura, Allah el im deice tam si erena aik pum tam arye, tonok malaikat ton yayukce, Ninye Mi Koprop Atonunye binyak, weik yupu deice arye, adomon yupu nyabuk. “Winira akunuma. An yu parang talipmalama ara, dobuka tukwak mutuku ulul ning, ya sekelbilyame. Tukwak mutuku dokamik ning nirya, akunum wisibukce, ekenmala ati, sekuka delina talak, akunum upmala ati ara, ya sekuka delilbilyame,” nyabuk. (Adomon yupu nyabuka ara, malye ulamik ninye wenena talak akunum ubuka ati, nyabuk.)

¹⁶ Nyabuka ati, dua deice bukmoknye birye, el yu parang ya dobuka, tukwak mutuku im sirya, mutuku sirya nirya deice arye, ya piplupre yayuk. Winibuka deice arye, tukwak mutuku tam dokamikba, eklamuk ning nirya ara, ya sekuka batakuke. (Ayupu deiyok ara, ani. Eklamuk ning ara, ninye arye malye winilamik ning. Parang ya tuna ara, wenena ati nyabuk.)

¹⁷ Winibukba, adiparyuk Allah el im deice tam si eren aik pum tam arye, tonok malaikat ton yanmoknye bira, el babye, yu weik parang ya dobuka yayukba, eipse.

¹⁸ Aning atonun, Allah el si erena ati, nintong teleb ning, uku danyak sukum, emas meja dam, tonda Allah el un dam pil dolul malaikat, elda uku delina deiyoknye birye, Allah el si erena aik pum tam yayukce, yu weik parang ya talipmok malaikat ati, domona yupu deice arye nyabuk. “Tukwak mutuku im sirya, mutuku sirya nirya, noutamak dokamik anggur tapu nirya, akunum wisibuka ati ara, an bopmalam parang ya yu ning arye, atapu nirya seklopmince, anggur duk nirya daknin binulyame,” nyabuk.

¹⁹ Nyabukopura, parang ya bopmok malaikat arye, el yu weik parang, tuku tam nirya pibuka kiklipdeyuk deice arye, tukwak mutuku, anggur duk nirya dakuka libuk. Libuka bobiyukce, ‘Anggur duk yanibikirye, anggur mek binamle’ tenen, Allah el weik keil deice pum potokuka, yonggol kwepdeiyamik ning pum tam, anggur duk yamupdongobuk.

²⁰ Aweik ning, anggur duk darapdongobuka yanipmek ning, el nong ara, Allah el yu weik upliba, tukwak ninye nirya, weik arye wenebuka, yupu lipsisikuka bokeiplirye, opnamle ning ati ulule. Malaikat arye, anggur duk nirya, yanibuka kwangnalamak ning pum tam yamopdongobukura, anggur duk nirya daralyaninmekba, mek kwen banmok ning ara, urdem mek kume. Anggur duk yaninmekba, ining mekwen weika arye, banmoke. Pia weika arye banmoka ani, weik ining mekwen dana-dana deibuk ning, mitikto kume. Asukum arye, otam karen ara, yupa weik 300 kilometer mekwen deipra banmok. Aining karu ara, tonok meter ap, tonda noutam ning ap, satu setengah (1.5) meter mekwen weik deibukba, eipse. Na Yohanes arye nyapsine.