Wahyu 13 - Eipomek

Weik Malye Kam Ulul Ning eibukce, nyabuk yupu

¹ Mem Kwatima Urasin Atonye birye, laut mekwen kup-kup ak tikilbiyukba, na Yohanes arye eipse ning ara nyapnusine. Ara, laut mekwen noutamak arye, malye ulina ning, weik ning kam ulul ning kutukuka tikilyayuk. Aning el urasin ara laka nyapnune. El kisok ara tekbarye ubuk bukni, el kisok kalun ning, el si ara mahkota yuk-yuk uamuk ning ara, taku barye 10 ubuk. Tonda, el kisok tekbarye asok deice ara, si lakak ubuk. Asi sekuka deiamukba, lakak uamuk ning ara, ninye arye amalinye biti, el si siptingopura, Allah kekepturye, ‘Na like’ tenen, yu weik uptue. Amalinye el si nirya ara, Allah yanina yupu ulula ati nyapne.

² Kam ulul ning pia malye ning eipsa ara, el nong ara yu weik kuse, el si ara macam tultul atonun anya arye, el potong ara, botbotokna potong tikamuk. El yan tang ara, bai tam ulamle ning, el si ara beruang ato ning anya arye, el yan tang ara pala weik ubukce, el taruk kala ara jang weik ubuk. El si ara, yu weik kuse singa kus atonun ubuk. Weik Mem Kwatima Urasin Atonye birye, ‘Laut mekwen pum tam arye yanmal ning melipnunil’ tenen, el weik mikip ap, el ninye deiyok ning ap, el talyamuk ning ap, laut mekwen noutamak arye panabuka, tikilyanmok malye kam ulul ning deice deibuk.

³ Apia malye ning kam ulul ning, el kisok tekbarye ubuk bukni, tonok ning ara asok deice omika dila ubuk. Talinye ulamtopura, akunum deamtu bukni, omika dila niamukba, kam tuba unmokce, omika dila uamukba, eipse. Tukwak mutuku im sirya, mutuku sirya nirya tuba unmek ninye arye, amalye kam ulul ning ati, ‘Se, el kisok deice dila weik ning aubuk anya arye, akunum deamtu bukni, tuba kam ulule’ tenen, lukdayikce, el nyalamuk yupu kekebuka dobolbalamik.

⁴ Mem Kwatima Urasin Atonye birye, laut mekwen pum tam arye yanmoknye biti, el mikip weik aribuka anya arye, tukwak mutuku ninye weik arye Mem Kwatima Atonye biti si erelamik. Tonda tukwak nang weik arye, laut mekwen pum tam yanmok malye ning kam ulul ning ati, ‘Se, yata ning nirya ara, el ulul touk ulul do? Kume, el pia yuk ulirye, mikip pia weiknye ulula anya arye, yata ninye arye mikip uptuba, anya biti malye kibuka opnuyap’ tenen, ‘El ti obisipting do? Kume, anye bira kum optinge ati, el si babye erenamabe,’ tenenmekce, el si erenauk ulamik.

⁵ Mem Kwatima Urasin Atonye birye, laut mekwen pum tam arye yayuk ning ati, mikip weik aribukba, aning arye weik kwalina yupu ap, el bidamang kanye aryuk tenebuka erelana yupu ap, Allah ati yanina yupu ap, weika arye nyalamukce, tukwak mutuku ning nirya talyamuk. Aning nirya talyamuk talak ara, wala yupa weik 42 wala deice arye aning nirya talyamuk.

⁶ Atalak nirya noutamak arye, Allah elti, malye yupu nyalilamukce yanilamuk ati, Allah el si ap, Allah el un dam im deice tam ap, Allah ap im deice neika unyak ninye ap, im deice unyak malaikat ap, aunyak ninye nirya ati, pia malye lululina yupu weika arye nyalamuk.

⁷ Tonda, Isa Mutuku Dongonye arye amalye kam ulul ning ati, ‘Allah ati akunum dib tenyamik ninye ati, olbilirye, sik nirya yanipnamle’ tenen, el mikip aribuka deice arye, Allah el wiamukba, elti, diba tenelamikce, tukwak mutuku noutamak tuba unmek ninye ati, olbanauk ulamuk. Aning atonun, el mikip uamuka deice arye, im sirya, mutuku sirya nirya unyak nang, ninye ayala-ayala nirya ap, yupu yuk-yuk nirya nyanyak ninye ap, weik mutuku yuk-yuk unyak ninye nirya (negara-negara) ap ati, laut mekwen pum tam arye yanmoknye birye, elcuk malye kibukce, sik nirya talyamuk.

⁸ Talilamukba, atalak noutamak tukwak mutuku im sirya, mutuku sirya nirya, Allah ati dib kum tenyamikce, urdem unamak ninye nirya ara, el siuk erenamake. Bukni, Kam Pia Unamak Ninye Si Sekna Buku noutamak, Allah arye si akunum sekeiamuk ninye tonok ara, amalye kam un ning, el si kum erenamake. Allah arye aning-aning min kum kwepdeiamuk talak arye, ‘Ninye Lyenanye obica deice arye, diba tenenyak kile sal lyepnamne’ tenen, Allah arye Domba Mi Atonunye kintinipdeiamsukce, tukwak mutuku dopdeiyamsuknya bira, elce aninye si sekna buku talilule. Ara kam unamak ninye sik si seklamuk buku ara, el ning uka.

⁹ Na Yohanes arye nyapsine. Yata nang do nirya, amul aupmasiliba, anyapnusin yupu ati, ‘Deiyok ani’ tenen, kekepmanto ululum ninye nirya ara, anyapnusin yupu moubuka kekenamlulume. Ayupu ara, ani.

¹⁰ “Atalak tukwak mutuku noutamak tuba unamak ninye ara, Allah arye tenyamuk touk, aninguk unamake. Ara Allah arye, ‘Anang ara tapu koubikirye, wenena aik dongonamake,’ tenyamuk kili sala ara, dipkoprop tapu koubuka, wenena aik bobinamake. Tonda, Allah arye, ‘Anang ati ara, yuk nang arye parang ya dobuka oplopnamake,’ tenyamuk ninye ara, dipkoprop parang ya arye oplopnamake.” “Winibuka onamsiaka ati ara, talye kanye bobuka una ara bataklulume. Aikin ning unamsil ning ati ara, Allah arye wipdeiamukba, elti, diba tenenyak ninye nirya ara, ikin uptu babye, ‘Bataknuyap do?’ tenena pia kumce, pia pi dobuka mikip aryuk unamake. Bukni, ikin weik upsiliba, imun kanye bobuka, ‘Allah bataknuyap do? tenepmunyak’ tenen, Allah el yupu nyasilye touk, ayupu uk talibuka, pia darabuka unamlulume.” Na Yohanes arye nyapsine.

Malye kam un ning, tuku pum bisik noutamak arye, kutukuka tikilyayuk ati, nyabuk yupu

¹¹ Aminyan ara, yuk Malye Kam Ulul Ning, tuku pum tam arye kutukuka panalyayukba, eipse. Aning el kisok deice ara, mitik domba basam mi kisok deice yang ulul touk uamuk. El yupu lelim ara, weik Mem Kwatima Urasin Atonye birye nyalamuk touk, yupu nyanmokba kekepse.

¹² Minyuma ning ara, laut mekwen noutamak arye tikel yayuk malye ning kam ululnye birye, ‘Aminyan talak tuku bisik arye panabuka tikelyanmoknye birye melipnamnil’ tenen, el mikip ap, el deiyok ning ap dobuka, amenyan tuku pum tam arye yanmok malinye, el nong deice deibukba, amikip deiyok ning nirya talibuka apil dolamuk. Aminyan tamnye nyabuka deice arye, atalak tukwak mutuku tuba ulamik ninye, mutuku-mutuku nirya arye, minyuma tikilyayuknye Malinye biti el si erelamik. Ara, el asok deice omika dila uamuknye biti, el si erelamik.

¹³ Aminyan talak tuku pum tam arye kutukuka tikuknye birye, ninye kum winipmanto ning ap, weik mambul pil, ninye winipmanto kum pil ap dolamuk. Tonda, tukwak mutuku tuba unmek ninye nirya dinmekba, elce nyapdeibukba, im noutamak arye uku buk sakuka ak, eibik.

¹⁴ Minyuma yayuknye, malye ulirye, kam tuba ululnye birye, ‘Aminyanye birye melipnunil’ tenen, mikip weik aribukba, aminyan tuku pum tam arye, kutukuka tikilyayuk Malinye birye, pia mambul pil weik dolamuk. Amambul pil dolamuka deice arye, sik tukwak mutuku tuba ulamik ninye arye, eltilila nyalamuk yupu nirya dib tenelamik. Tilila ninguk dib tenelamika ati, aminyan talak tikilyayuknye birye nyapdeibukba, tukwak ninye nirya arye, minyuma yayuknye, el urasin atonun ning, sik bidamang taruk arye puturubuka memepdeibik. Ara el kisok tonok ning, ya arye cobuka obik bukni, kum diamukce, el kisok dilauk uamuknye, ‘El ti si erepnamap’ tenen, amalye kam ulul ning el urasin atonun puturupdeibik.

¹⁵ Sikce el urasin ato ning memepdeibikba, aminyan yayuknye birye, mikip weik aribuka deice arye nyapdeibukba, sik ninye arye puturupdeibik ning, talye ning uamuk bukni, kam bukuka isin panabuk. Isin panabukce, yupu ton nyalamuk. Yuk ninye arye, “Kume, ona dila ululnye bira nun like ati ara, el urasin atonun ning puturupdeipmasiak ning ara, nunce el si kum erepnuyabe,” nyabuka, batakik. Malye kam ulye ning urasin ato ning memebuka deipmek ning ati, ‘Nun like’ tenen, batakik nang ati, puturubudeibikba, kam bukuka isin panabuk ning arye, yupu nyapdeibukba, yuk nang arye aninye oltakalamik. Ara, ‘Talye ning el si kum erenamabe,’ nyalamik kili sal ati, yu nang arye olamik.

¹⁶ Tonda, aminyan talak tuku pum bisik arye yayuknye, el yupu nyabuka deice arye, tukwak mutuku noutamak tuba ulamik ninye nirya sik sirik taruk deice laka kilin ning sekuka delilamik. Sik sirik taruk deice pitin kilina ati, kum seklamik ninye ara, sik asok deice sekelilamik. Ati ara, aminyan talak tuku pum bisik arya yayuknye birye nyapdeibukba, ninye ayala-ayala nirya, sik nong deice aning sekelilamik. Ara, weik mambul nang babye, mambul kum nang babye, tonda bona uto-uto talin nang babye, talye bona utotoa kum ninye babye, tonda dekna doldona kumce, yuk nang ati pil donyak ninye babye, sik kanye aryuk, sik yuk pil donyak ninye babye, ninye ayala-ayala nirya, sik nong deice aning laka kin ning sekelilamik.

¹⁷ Lak kilina ati sekelilamik ning ara, talye ati kum sekelilamek. Deiyok ara ani. Ara minopce laut mekwen noutamak arye yayuknye, ‘Aninye nirya talilule, tenepnamniyak’ tenen, el laka kilin ning tukwak ninye sik nong deice sekelilamik. Aning ara, el si atonun, tonda el nomor atonun tukwak ninye, sik nong deice sekelilamik. Ton nang ara, sik kisok deice sekelilamik. Ton nang ara, sik taruk deice sekelilamik. Asekelilamik ning deiyok ara, ani. Ara yata ninye do nirya, sik asok deice do, sik sirik taruk deice do, minyuma yayuknye, pia malye kam ululnye, elti, laka kilin ning kum upmalyopura, aninye arye aning-aning nirya kum dektinge. Tonda, sik bidamang ning dobuka, ‘Yo bok doproptibye’ tenen, yuk nang ati kum dektinge. ‘Lak kilina sik nong deice seklamak ning kum uplyopura, bona nirya ara dekna ap, dolona ap kum upting’ tenen, tukwak mutuku noutamak tuba ulamik ninye, sik nong deice seklamik. Winilamik ning nirya ara, na Yohanes arye eipse.

¹⁸ Ura, na Yohanes arye arup sekmasin yupu ara, talye kanye bobuka unyak nang arye kum kel biktinge. Ayupu deiyok, nong noutamak ara, weik kel kina deiyok ning teleb talibuka unyak nang uka ara, moubuka kel biktinge. ‘Deiyok ani’ tenen, moubuka kel bikmanto nang arye, minyuma laut mekwen noutamak arye kutukuka tikilyayuknye, pia malye kam ulul ning el nomor 666 upmala ara, yinipnamake. Anomor ara, tukwak nang arye nyanyak nomor ati ara, laut mekwen pum tam arye tikilyanmoknye bira, el anomor ara, 666 aulule. Na Yohanes arye nyapsine.