Wahyu 12 - Eipomek

Mambul weik kil ap, Mem Kwatima Atonun bukni, el nong ara, bi uamuk malye ning ap, eibuk ning ati, nyabuk yupu

¹ Aning-aning nirya akunum winibukba, tonok weik mambul ning ton, im deice tam noutamak kutukuka tikilyayuk. Aning nirya ara, ninye arye, ‘E, deiyok ani’ tenen, kum kel biktinge. Tonok weik mambul kil panalyayukba, el baju ara, keting dirina weik ulamle touk ubukba, eipse. El kisok deice deipmok ning ara, talye tiklamle kurya dukdongobuka antanapdongamuka ara, eipse. Akil el yan amu tam ara, wala bukukak eipse.

² Akil ara mi akunum bomuka anya arye, mi deiyok dinmokak, ‘Mi deipnun’ tenen, ngalukunmokba, kekepse.

³ Akil eipse talak aryuk, tonok weik mambul ning ton kutukuka tikilyayuk. Aning el urasin ara, yu weik mem kwatima atonun dayuk bukni, ining bi uamukba eipse. El kisok ara, tekbarye ubukba, akisok deice ara, weik ninye deiyok nang arye, sik kisok deice kalunyak ning el si ara mahkota, kisok kalun ning taku barye ubukba eipse.

⁴ AMem Yu Kwatima el amu cang mikip asa arye donmoka deice arye, im noutamak tuba uamuk kurya weika arye dobukabukce, tuku deice dopkwetebuk. Winibukopura, ami bomuk kil tikmokak, urasin dam tam kalikuka tikmok. Asukum tikmoka deiyok ara, ‘Akil arye mi deipkweteplyopura, na adiparyuk ami obuka dipnune,’ tenebukce, akil dam kalikuka tikmokak, eipse.

⁵ Kalikuka tikmokce dinmokba, akil arye sal mi deibuk. Sal mi deibukopura, adiparyuk asal mi dobuka, im deice tam Allah el dam bobiyik. Allah el bulyak bobiyik. Asal mi ara, talye mi kume. Ami arye aminyan talak ara, Allah ati diba tenena kum ninye, mutuku-mutuku nirya unyak ninye ati, mikip upliba, yu weik deice arye aninye nirya talibuka, sik weik deiyoknye unamle. Yata ninye do nirya, ami ati malye kipdeipmanto kum unamake.

⁶ Allah arye, ‘Akil kalikuka melipnamne,’ tenyamukce, mok ap, ninye ap, pia kum ulul mutuku noutamak ara, akil arye, ‘Allah arye kwepdeiyamuk sukumuk binun’ tenen, akil arye asukum bik-bik abuka biyuk. Akil bik-bik abuka biyukce, duknupmokba, Allah arye like yupa weik keting tamun winilye ap, tonda noutam ning tonap, (1.260 sum) noutamak arye, akil ati kalikuka melilamuk.

⁷ Atalak aryuk aning ton eipse. Im deice tam noutamak nirya ara, olanauk unmekak, eipse. Aning ara, Malaikat Deiyoknye, el si ara Mikael. Mikael el amu tam bukuka unyak malaikat ap, sik nirya arye, weik Mem Kwatima Atonye ap, amem kwatima el amu tam bukuka unyak malaikat ap, nirya olanauk unmekba, eipse.

⁸ Aweik Mem Kwatima Atonye ap, el mapu sik malye malaikat nang ap arye, Mikael tam malaikat ati, ‘Malye kipnuyap’ tenen, pirilelamik bukni, sik malye malaikat mikip mitik tonun uamuka anya arye, Mikael ap, el tam malaikat ap arye, Mem Kwatima el tam malye malaikat ati, malye kibuka nirya obik. Winibikba, weik Mem Kwatima Atonye ap, el mapu silip sik malye malaikat nirya ap dobuka, im deice ulamikak noutamak arye dobuka, bai tam dopkwetebikba, tukwak sakikce yayik.

⁹ Mikael ap, el mapu silip ap arye, weik Mem Kwatima Atonye ap, el amu tam ulamik malye malaikat ap malye kibikce, sik anang nirya tukwak dopkwetebik. El urasin Mem Kwatima Atonye bira, yuknye kume. El si ara, Isa Mutuku Dongonye, tonda Setan nyanyabe. Minop talak dipdongobuka wini talak noutamak nirya, elce tukwak ninye sik talima libuka bobalamla deice arye, ninye im sirya, mutuku sirya nirya, Allah el diksukum bisik batakikirye, kirikuka malye bisikuk banyake. Allah batakuka malye bisikuk banyaka deiyok ara, eltia.

¹⁰ Isa Mutuku Dongonye ap, el malaikat ap, tukwak mutuku dopkwetebikura, im deice tam tonoknye birye ayupu weik arye nyabukba, kekepse. “Wini talak ara akunuma. Diba tenenlamikba, nun weit yapu atonun unyak ninye ati, Isa Mutuku Dongonye arye, ‘Anggunda malye,’ nyabuka, malye yupu anggun nong deice delisilirye, lululisululnye bira, akunum malye kibake. Isa Mutuku Dongonye arye, diba tenen nang nirya ati, keting noutam babye, lukunyan babye nirya ara, asum-asum nirya, Allah kekelulak tiklirye, “Anggunda malye,” ululume, nyabuka lululisulule. Bukni, elda akunuma. Tukwak mutuku akunum dopkwetepmake. Ati akunuma. Nun Ni kopropa Allah arye, el mapu nirya ati lyepnule. Wini talak aryuk Allah el weik mikip deice arye, aning-aning nirya deice tam ulirye, talipliba, aning nirya el amutamuk unamle. Tonda, Allah arye, ‘Ninye nirya lyepnamle’ tenen, dopdeipsuknye Kristus ap, el Allah ap arye aning-aning nirya talibuka unamdake.”

¹¹ “Allah el mapu nirya ara, Domba Mi Atonye, el ining sik lyena ati arebuk deice arye, Isa Mutuku Dongonye malye kibik. Tonda, aninye arye, “Ninye lyena ati laka teleb yupu ani,” nyabuka lak akarye, peterelamika deice arye, Isa Mutuku Dongonye malye kibuka nirya obik. Aninye nirya arye, ‘Kume, nun kam unyaba ara weik mambule, nun kam una ara nun dokola ati ara, opsicak ati, Allah yupu nyanyaba ara bataknuyabe’ tenen, ilil kum ulamuk. ‘Malye nang arye opsica babye, telebe uka,’ tenelamik. Aning nirya winilamika deice arye, Isa Mutuku Dongonye ati, malye kibuka ulamik.

¹² Winibuka ulamika ati ara, im deice tam noutamak umunye ninye nirya ara, kanye deibuka pin-pin asauk unamlulume. Bukni, anggun tukwak mutuku ap, laut mekwen kup-kup ap, mekwen noutamak ap, umunye ninye nirya ara, anggun tonok ara bicoe. Allah arye Isa Mutuku Dongonye dobuka, im deice arye dokwetebukba, anggun dam tukwak mutuku saka yanmale. Malaikat arye, Isa Mutuku Dongonye dopkwetepmakba, tukwak mutuku koluku yanmala anya arye, el ap anggun tukwak mutuku ninye ap neika unamluma ati, imun kanye bobuka unamlume. Isa Mutuku Dongonye ara, ‘Se, na tuba talye luparabuka batinye tenepmal talak, tuba aupmanil ning ara, lo mitik tonunuka’ tenen, akunum kel kipmala ati ara, yu pia weik upmala ati, anggun tukwak mutuku tuba ululum ninye ara bicoe.” Tonok im deice ululnye birye nyabukba, kekepse.

¹³ Ayupu kekepsirye eipse ning ton nyapnusine. Ura, sik teleb malaikat arye, Isa Mutuku Dongonye malye kibikce, el dobuka tukwak mutuku dopkwetebikba, anye birye, weik Mem Kwatima Urasin Atonye birye tenebuk. ‘Kume, sal mi winiryuk deipmo kil ara, oplopnune,’ tenebukce, akil ati piribuka tomolbiyuk.

¹⁴ ‘Akil tomopnune’ tenen, bik-bik abuka biyukba, Allah arye akil ati, weik Bib maka pol atonun bitinye arebuk. Allah arye akil ati maka pol aribuka deiyok ara, ‘Akil el kalikna ati, mok ap, ninye ap, kum ulul mutuku noutamak kintinipdeiamsak mutuku lakuka bituba, anoutamak ara keting tamun winilye ap, tonok keting tamun noutamak ap, deice unamle,’ tenebuk. Allah arye, akil kalikuka melinamna deice arye, ‘Isa Mutuku Dongonye arye kum optue,’ tenebukce, Allah arye akil ati, Bib maka pol atonun bitinye aribuk.

¹⁵ Aribukura, anye birye, weik Mem Kwatima Urasin Atonye birye, el si bam bol pum bisik arye weik mek amupmoka paraplobukba kutukuka biyuk. Aparabuk mek ara, weik mek deiplirye, olamle touk winibukce, biyuk. Ara, ‘Amek opnin balirye, akil dipnul,’ tenebukce, el si bam bol pum bisik arye, weik mek amupmoka paraplobuk.

¹⁶ Paraplobukba, amek obukce, biyuk bukni, tukwak mutuku arye, ‘Akil melibuka lyepnun’ tenen, tuku dana-dana dilikukba, mek abisik wekukce, kum dayuk.

¹⁷ Winibukba, Weik Mem Kwatima Urasin Atonye birye akil ati, yu weik ubukba, ‘Akil min arye deiyamuk mapu nirya epnirye oplopnun’ tenen, yukak biyuk. Akil arye deiyamuk mapu nyabuk ning ara, yuk nang ati kume. Ara Allah arye, ‘Wininamlulume, aning ara kum wininamlulume,’ nyabuka, nyalisulul yupu diba tenebuka ayupu dobolbanyakce, Yesus el laka teleb yupu talibuka, pia peterenyak ninye ati nyabuk.

¹⁸ Weik Mem Kwatima Urasin Atonye birye, ‘Se, yata winiptinye do?’ tenebukce, malye kanye bobuka, laut mekwen kup-kup ak tikilbiyuk.