Wahyu 11 - Eipomek

Allah el yupu laka nyana deiyok nang bitinye arye, wininamdak ning ati, nyabuk yupu

¹ Tonok kiklilen ning, pina cang atonun ning arepnukce, Allah arye nyapnuk. Akiklilen pina dobuka bimince, Allah el arena ap, el si erena ap ati domik aik, Yerusalem weik domik aik nong ara, ‘El cang ara ani, el pala ara, ani’ tenen, kiklildelbilyame. Tonda, aning atonun, Allah el si erena ati, nintong teleb ning, uku dongolamak emas meja ton, ‘El cang ara ani, el pala ara ani’ tenen, kiklipdemince, anyaik pum tam unyakce, Allah el si erenyak ninye, ‘Yata barye unyak do?’ tenen, nukdenulyame.

² Aning nirya kiklipdebuka, ninye nong nukuka deipnulam bukni, anyaik pum tam dana-dana ninye bulubicak ara, kiklildena meme. Deiyok ara, anyaik buru tam ara, sik Yahudi yala kum ninye, diba tenena kum nang arye wala yupa weik 42 wala noutamak nirya arye, Allah el wibuka deiamukce, kanye deiyamuk asik Yerusalem mutuku yanibikirye, malye-malye kibuka deipnamaka ati nyapnune.

³ Tonda, na yupu laka nyana deiyok nang bitinye ati ara, na mikip weik sik deice deipnyopura, yupa weik keting tamun winilye ap, tonda noutam ning tonap, atalak noutamak nirya arye (1.260 seribu dua ratus enam puluh sum) na yupu laka nyanamrake. Ayupu nyanamdak talak ara, pia malye baju, karung goni atonun ongonamrake. Ara, ‘Imun kanye bobuka, ninye nirya arye engenamak’ tenen, amalye baju ongonamraka ati nyapkine.

⁴ Abitinye nang ati ara, sik winipmanto ning ara, duk moulamle yo si ara, Ara yo bitinye ap, weisa delin ning bitinye ap, dobuka deibikba, aning-aning nirya ap, tukwak mutuku nirya ap talilirye, Weik Deiyoknye, el urasin tam deibikba dilule.

⁵ Abitinye yupu laka nyana deiyok nang arye, pil donamdak talak noutamak, yuk nang arye, ‘Anang ara, nun like ati ara opnuyabe’ tenen, piripdecebuk, abitinye nang sik si bam bol pum tam arye, uku buk weleplirye, sik malye ninye ati uku dipnamle. Sik bitinye ati opmanto upnamak nang nirya ara, uku arye dipnamle.

⁶ Anang bitinye ara, mikip deiyok ning, sik nong deice akunum ulula anya arye, sikce Allah el yupu nyanamdak talak nirya, sik nyapdica deice arye, mok pia kum cenamle. Tonda, sik tenepdice talak nirya ara, sik mikip deice arye yupu nyaprikba, tukwak mutuku mek nirya ara, ining biuk unamle. Tonda sikce nyapdicopura, tukwak mutuku im sirya, mutuku sirya nirya unyak ninye ati, kanye imun upnamle uk, ayala-yala nirya weik dinamle.

⁷ Allah el yupu laka nyana deiyok nang bitinye arye, yupu danyapnin balamrikca ani, akunum sirya dakdicopura, tukwak mutuku noutamak tuku pum tam arye, pia malye ning kam ulul ning weleplirye, abitinye nang ati opnin banmalya ani, sik abitinye nang pia oplopnamle.

⁸ Oploplyopura, abitinye nang sik nong dobuka kum weipnamake. Aning kum bukni, aweik asik domikak, sik Deiyoknye wanwanun yo deice obik mutuku, Yerusalem mutuku noutamak, ninye ban bisik noutam akuk, sik nong asukumuk bataklopmakiba aupnamle. Siria talak ara, Yerusalem mutuku nirya pia malyeuk unamla ati, domon yupu deice ara, el si Mesir ap, Sodom ap si bitinye ton nyanamake.

⁹ Anang bitinye oplomliba, sik nong ara bisik noutam akuk bataknamake. Ninye nirya kum bukni, mutuku-mutuku nirya unyak ninye ap, yupu yuk-yuk nyanyak ninye ap, ninye ayala-ayala nirya ap, weik mutuku yuk-yuk unyak ninye (negara-negara) ap, ton nang weika arye adiamdice nang, sik nong bitinye awamlya ak eilinamake. Eilinamak bukni, aninye kan-kan arye tonoknye babye, “Se, anang bitinye weipnuyabe,” kum nyanamake.

¹⁰ Aning kum bukni, tukwak mutuku im sirya, mutuku sirya nirya, atalak unamak ninye nirya arye, abitinye nang obuk ning ati, “Merekuka opmale. Ati nun kanye deipmabe,” nyabuka kanye deibikirye, kil-kil upliba, sik kayapu nang ati, urdem arin ning yuk-yukak nirya babye arilanamake. Deiyok ara, Allah el yupu laka nyan nang, kam ulamrik talak ara, kanye imun uk dina ap, tukwak mutuku mek nirya, ining ubuk ning ap, yuk ikin ning ap, ‘Nun nong deice wenebuka deipsirika ati, merekuka’ tenen, kanye deibuka arelanauk unamake. Aning nirya ara, like winilye sum ap, tonok sum noutamak ap arye wininamake. Awininamak ning nirya ara eipse.

¹¹ Bukni, lengdar atonun ning eipsa deice arye, asum winilye ap, tonok sum ton noutamak ap akunum ubukba, Allah arye kam una deiyok ning, sik bitinye ati aribukce, kam bukeibukba, tuba tonap kam bukuka tikrikce, aning dinmek ninye nirya ara, ilil weik ubukce, asok mek butubukce asok dama biyuk ak, anirya eipse.

¹² Allah el yupu laka nyana deiyok nang bitinye kam bukuka tikukrikba, im deice tam arye ninye yupu atonun arye, “Asukum weleyarurume,” nyabukba, sik adiparyuk dua kan-kan arye, im deice tam welebirikba, aunmek ninye nirya arye dinmek.

¹³ Dinmekbuk, atalak aryuk weik mutuku lulukna mikip arye lulukukba, Yerusalem asik domikak weike lokuka bindakuk. Aik pia weik lokuka bindakuk deice arye, ninye yupa weik 7.000 ninye oplobuk. Aning nirya winibuk ning ati, sik kam tuba unmekce, dinmek ninye ara, im deice tam talibuka ululnye Allah ati, “Anda pia mambule,” nyabuka si erenmekak, eipse.

¹⁴ Aning nirya eipsa deice arye kel bikse. Sik malaikat arye, “Bicoe,” nyabik ning ara, ‘Kanye imun ning bitinye ning akunum winibuk bukni, winilye ning ara minopce yanamle,’ tenepse. Utenen kel bikse. Na Yohanes arye nyapsine.

Tek barye malaikat arye el terompet lelim nyabukba, winibuk ning ati, nyabuk yupu

¹⁵ Anirya dinmasibuk, aminyan ara tonoknye ton, tekbarye malaikat arye, el terompet deice lelim nyabukura, im deice tam noutamak nirya, weik yupu arye nyanmekba, kekepse yupu ara, ani. Ayupu nyanmek. “Tukwak mutuku im sirya, mutuku sirya nirya talibuka ninye deiyoknye nang nirya ara, nun Ni kopropa Allah ap, elce dopkwetepsuk Ninye Lyena Deiyoknye Kristus ap, sik bitinye arye akunum malye kibuka, aning nirya talidurake. Ati wini talak arye dipdongobuka, aminyan doryanamle talak babye, aning-aning nirya taliprikirye, Weik Ninye Deiyok nang pia unamrake.”

¹⁶ Ayupu nyanmekba, Allah el urasin tam sik weik buna deice bukmek weik deiyok nang, sik 24 wisi deiyok nang ara, Allah dam gutam tuku dipdongobuka, Allah el si erena ati ayupu nyabik.

¹⁷ “Nun Ni kopropa Allah, anda aning-aning nirya, malye kibuka, aning nirya deice tam umince, weik mikipnye ulyame. Anda nun Weik Deiyoknye ulyame. Minop talak ulaluma ani, anirye dipdongobuka tuba kamuk ulyame. An weik mikip deice arye, aning-aning nirya akunum talibuka ulyama ati, nun nirya arye anti, ‘Telebe,’ nyapkiyabe.

¹⁸ Mutuku-mutuku nirya unyakce, diba kum tenenyak ninye arye, anti yu weik ulamukba, malye yupu weik nyakinyak bukni, wini talak ara akunuma. Anda sik min arye akunum diamik ninye ati, yupu lipsisikuka bokeipmince, wenepnulam talak ara, akunum uple.” “Tonda, an amu tam bukuka an piluk dolamikce, an nyamlum yupu laka nyana deiyok nang ap, ance wiamlumba, anti diba tenyamkik ninye nirya ap, sikce, ‘Allah elda mambul weiknye’ tenen, an si erelamkik ninye nirya ati ara, sik dekna ati menenga arepnulam talak akunum upsile. Ara, an mapu bukni, weik mambul nang babye, mitik mambul nang babye ara, sik nirya ati menenga arepnulyame. Tonda, yata ninye do nirya, sikce yuk tukwak ninye ati, malye kililamik nang nirya ati ara, weik arye wenebuka oplopnulam talak akunum upsile.”

¹⁹ Sik 24 wisi deiyok nang arye ayupu nirya nyabikba, kekepse. Kekepse talak aryuk im deice ning bukni, Allah el si erena aik buplan kukeibikba, anyaik pum bisik ara, marikna pum bisik deipmeka eipse. Amarikna pum bisik ara, minop talak Allah arye Musa ati, “Na mapu nirya ara, wininamak ning ara, ani, malye ati kum wininamak ning ara, ani,” nyabuka, pala keil deice sekiamuk ning deipmek ning ara eipse. Eipse talak ara, liman ap, bebeya una ap, lelim weik ap, mutuku lulukna ap, im noutamak arye dekne dukduka puru mok sakanmok ning ap, anirya eipse.