Wahyu 10 - Eipomek

Mikip weik malaikat arye, mitik buku dobukba, Yohanes eibuk ning ati, nyabuk yupu

¹ Aning nirya eipsopura, adiparyuk mikip weik ubuk malaikat, im deice tam arye koluka yanganmokak, eipse. El nong dana-dana nirya ara, dua kiprobukba, el kisok deice ara manu senamnya deibukba, eipse. Amalaikat el urasin ara, keting dirin weik ulul touk, dirin weik ubukba eipse. El yan ara, weik aik ayukumna iklamak atonun ubuk bukni, ining bi ubukba, eipse.

² El taruk arye bopmok ning ara, mitik buku bukni, abuku urasin noutamak ara, pakubuka deiyamuka ani, yokoyukak eipse. Winibuk bukni, el taruk deice yoktalipmokak, eipse. Amalaikat tikukabukce, el sirik tam yan ara, laut mekwen deice yanibuk. El kwanim tam yan ara, tuku deice yanibuk.

³ Winibuka tikukce, weik yu kuse el si ara singa kus yupu nyalamle touk, ngalukukce, yupu weik arye nyabuk.

⁴ Nyabukura, liman tekbarye noutamak arye, ninye yupu atonun arye nyabikba, sik nyabik yupu kekepsirye, ‘Ayupu seknun’ tenen, kintinipmase bukni, im deice tam arye yuk ninye yupu atonun arye nyapnuke. “Kume, sik tekbarye liman arye nyanmak yupu ara, sekna meme. Ayupu ara, dungnupnulyame,” nyapnuka ati ayupu kum sekse.

⁵ Nyapnukba, adiparyuk asum eipmase mikip weik malaikat, dana tam yan arye tukwak ap, dana tam yan arye laut mekwen deice ap tikmok malaikat arye, el sirik taruk erebuk.

⁶ El taruk erebukce, ayupu mikip arye nyabuk. “Wini talak arye dipdongobuka, aminyan doryanamle talak noutamak, pia kamuk unamlanye bira, im deice tam ap, im noutamak ap, tukwak mutuku ap, laut mekwen nirya ap, ura, aning-aning nirya noutamak ulul ning, aning-aning nirya ap, kwepdeiamuka deiyoknye, el si deice arye ayupu nyapsine. ‘Lo pia awamsilya ani, aminyan talakuk sirya daknamsila’ tenena pia meme.

⁷ Lo tonap kum upnamsil bukni, tekbarye malaikat siryanye birye, el terompet nyapnulye talak noutamak ara, Allah arye, ‘Wininamne’ tenen, minop talak akunum tenyamuk bukni, duknyamuk ning ara, pil moubuka doplirye, sirya daknamle. Allah el pil don nang, ara el yupu laka len nang, sik nabi-nabi nang ati, “Na tenyamse ning sirya daknamne,” nyabuka laka nyalamuk touk, winira nong upmale,” nyabuka amalaikat arye nyabuk.

⁸ Elce nyapnuke yupu kekepseura, asum im deice arye nyapnuknye birye, tuba tonap ayupu nyapnuke. Ayupu nyabuk. Anda mikip weik malaikat tukwak ap, laut mekwen deice ap, tikmal malaikat dam bimince, el taruk arye bopmal mitik buku, kitibuk ning bukni, yokuka talipmal ning ara, dobuka talipnulyame,” nyapnuke.

⁹ Nyapnuka ati, amikip weik malaikat dam, el dam binuka moropse. “Mitik buku kitiplum ning bukni, wini talak an taruk deice yokuka bopmalam buku ara arepnunilyame,” nyabuka moropseba, elce nati tamubuka nyapnuke. “Teleb, amitik buku dobuka diplyame. Dipminye talak ara, an si pum bisik ara, mong mekto weik lelamle touk lepnul bukni, an mun pum tam wekilyopura, mitang upkilirye, sikin tong atonun ning welepnukile. Welepkilirye, sik lepnukile,” nyapnuke.

¹⁰ Nyapnukba, na Yohanes arye, amitik ketamuk buku dopropsirye, dipsiba, elce nyapnuk touk, na si bam bol pum tam mong mek atonun to lepnuk bukni, mun pum tam ara, mitang upnukce, sikin tong welepnuke.

¹¹ Winipnukba, amalaikat arye, “Anda, tukwak im sirya, mutuku sirya nirya unyak ninye ati, ayupu tonap laka nyanamlyame. Ara, mutuku-mutuku nirya unyak nang ap, yupu yuk-yuk nirya nyanyak ninye ap, ninye ayala-ayala nirya ap, weik mutuku unyak ninye (negara-negara) nirya ap, tukwak mutuku weik ninye deiyok nang, Raja nang nirya ap ati, aminyan wininamsil ning laka nyanamlyame,” nyabukba, na Yohanes arye kekepse.