Wahyu 1 - Eipomek

Allah arye, lakak laka nyapdeibukba, Yohanes arye sekeipsuk yupu

¹ Ayupu nirya ara, minop talak Allah arye duknyamuk bukni, ‘Aminyan talak Yesus Kristus arye wininamle,’ tenena ati laka nyabuk. Ara, ‘Yesus arye aminyan sirya talak wininamle ning laka nyapliba, el amu tam bukuka, elti, dobolbanyak ninye kekenamak’ tenen, laka nyabuk. Allah arye, el im deice pil donanye, malaikat tonok dobuka dopkwetebukba, Yesus el pil donanye Yohanes dam laka nyalyayuk.

² Malaikat arye aning nirya laka nyabuka kapdeipnukba, na Yohanes arye eipse ning ap, kekepse ning ap, abuku noutamak ara, laka nyabuka sekdeipse. Aning nirya ara, Allah el yupu ap, Yesus Kristus arye el dipkoprop nyalamuk yupu ap ati, laka nyabuka sekeipsise.

³ Abuku noutamak laka nyapsise ning nirya, nong upnamle talak akunum dam yanmasila ati, ninye kekenamakak abuku dobuka, aminyan wininamle ning ati, lakak laka nyanyak ninye ara, Allah arye melilyeba, kanye deibuka telebuk unamak. Tonda, ayupu nyanyakba, kekebikirye, ayupu nyasilye touk diba tenebuka, talibuka dobolbanamak ninye babye, Allah arye meliliba, kanye deibuka telebuk unamake. Anyapnusin yupu nirya, nong upnamsil talak dam akunum upmasila ati, na Yohanes arye nyapsine.

Yohanes arye, Asia tam, tekbarye (7) mutuku noutamak, Allah ati diba tenelamik ninye ati, nyabuk yupu

⁴ Amapo, na Yohanes arye, anggun Asia tam noutamak bukni, Allah diba tenebuka, tekbarye mutuku ululum ninye ati, “Telebe,” nyapsince, abuku sekeipsene. Na Yohanes arye, anggun Asia tam ululum ninye ati tenenirye, Allah morosunun ning ara, nyapnusine. Ara, Allah el kanye aryuk bico tenesilirye, melisilye ning ap, kanye imun kanye bona kumce, kanye deibuka teleb una ati arisilya deiyok ning ap, ‘Weika arye arenamsile’ tenen, Allah morosunune. Anyapmasin ning arenamsiak ninye ara nyapnusine. Allah ara, minop talak akunum ulamuka ani, anoutam talak ulirye, aminyan sirya talak ara, yanamlanye birye arenamsile. Tonda, aning-aning deice tam ulirye, weik Ninye Deiyoknye una ati, weik buna ning deice bukliba, el urasin tam ara, Allah el melina dib kanye tekbarye bunyake. Sik adip kanye arye ton arenamsiake.

⁵ Ura, Yesus Kristus ara, pia diksukumnye ulirye, batakna kum diparyuk, Allah ati pia dipkoprop yupu uk nyasulule. Yesus ara, dibuk bukni, Allah arye minyuma kam bukeibuknye bira, el Yesus uka. Tukwak mutuku noutamak ninye deiyok nang weik aunyak bukni, sik deice tam ulirye, aning-aning nirya talibuka weik Ninye Deiyoknye Yesus ara, elce ton anyapmasin ning arenamsile. ‘Allah ap, Yesus ap, Allah el dam bunyak dib kanye tekbarye ap, sik nirye arye anyapmasin ning arenamsiak’ tenen, Allah morosunune. Na Yohanes arye nyapsine. Yesus Kristus ara, weik arye bico tenyamsukce, el ining biyuka deice arye, nun malye un ning tapu kouamsuka noutamak arye lobuka lyepsuke.

⁶ Lyepsuka deiyok ara, ‘Na ni Allah el amu tam bukuka, elti, pil donyaka deice arye, yuk ninye im sirya, mutuku sirya nirya, Allah el yupu kekenamak’ tenen, Yesus teleb updeipsukba, Allah arye, ‘Anggunda na tenen ninye’ tenen, talisulule. Ati, ‘Ninye nirya arye Yesus el siuk pia erenamak’ tenen, Allah moronune. Ninye im sirya, mutuku sirya nirya arye, Yesus ati, “Elda weik mikipnye ulule. Dotalak nirya ara el siuk weik arye erenamabe,” nyabuka, ‘El ti si pia erenamak’ tenen, ‘Se,’ tenenune. ‘Aning ara dipkoprop nong upnamle’ tenen, “Amin,” nyapsine.

⁷ Anggun moubuka kekenululume. Aminyan talak dua kan-kan noutamak yanamsil talak ara, ninye mutuku-mutuku nirya arye eipnamake. El obik ninye babye, eipnamake. Yesus yaliba, el obik ninye ap, yuk ninye nirya ap, sik asing eibikirye, el obikba, dibuk ning ati malye kanye bobuka engenamake. ‘Dipkoprop Yesus Kristus eibikirye engenamak’ tenen, na Yohanes arye, “Amin,” nyapsine.

⁸ Aning-aning deice tam unirye, weik mikipnye unune. Nara, pia weik Ninye Deiyoknye Allah arye nyapsine. Aning-aning min kum uamuk talak ara, na akunum ulamse ati, na si ton, Alpa nyaninyake. Tonda, aning-aning nirya akunum kum uplyopura, nara pia kam unamne ati, na si ton Omega nyaninyake. Nara, minop talak ulamsa ani, anoutam talak unirye, aminyan doyanamle sirya talak ara, yanamne. Na Allah arye nyapsine.

Ninye Mi Koprop Atonunye eibuk ning ati, nyabuk yupu

⁹ Ura, nara diba tenepsa ati, anggun du kopropa atonun usunune. Tonda, anggun ap, na ap, diba tenebupa deice, Yesus arye talisiliba, el ap kanye talima dukdongobuka ubirye, el pil donyapa ati, ikin ning, nun nong deice weika arye delisinyake. Delisinyakba, kanye imun kanye usilya babye, batakna kum, pia pi dobuka, lamapdongobuka arye, el pil tuba donyabe. Anggun babye, na babye, anisibuka unyabe. Ura, Allah el yupu ap, Yesus arye dipkoprop nyalamsuk yupu ap, dobuka peterelamsa ati ara, tapu koubukapnikce, laut mekwen arye sekdongamuk mutuku, mek dum-dumak, el si Pulau Patmos mutuku deipnikba, ulamse.

¹⁰ Daulamsa ani, tonok minggu sum, Allah El Dib Kanye arye na kanye talima nirya talipnuke. Talipnukba, na donga tam arye, Allah el yupu nyabukba, lelim ara pong-pong ana ning el si ara terompet atonun, weik lelim nyabukba, kekepse.

¹¹ Kekepsiba, Allah arye nyapnuk. “An kekepnulam ning ap, eipnulam ning ap nirya ara, moubuka seklyame. Surat sekminyopopura, Asia tam noutamak diba tenenyak ninye ati, mutuku si tekbarye dopdeipnulyame. Amutuku si ara, ani. Efesus ap, Semirna ap, Pergamus ap, Tiatira ap, Sardis ap, Piladelpia ap, Laodikia ap, ulule,” nyabuk.

¹² Nyapnukba, ‘Ayupu nyapnilnye urasin eipnun’ tenen, tamubuka dipdesiba, weisa ubuka dirina ning tekbarye ubukba, eipse. Aweisa dirina ning, el nong ara emas uamukak eipse.

¹³ Atekbarye weisa dirina ning eipmase ning dana-dana antanapdongamuk noutam ara, Ninye Mi Koprop Atonunye tikmokbuk, eipse. El cang baju ongopmok ning ara, el yok bisipmok ak, el taram deice ara, cang baju kurun ning koupdongopmok ning ara eipse.

¹⁴ Anye el kisok ap, el kisok potong ap ara, pia teleb ulamukak, eipse. El kisok ap, el potong ap ara, pia lek ubuka ati, el nyalamak ning el si salju nyalamak touk, ubuk ak eipse. El asing ara, weik uku buk dilamle touk dirin weik ubuk.

¹⁵ El yan ara, besi ning dobuka uku noutamak dongobikiba, dawamlyani, tin weik uplirye, mereng-mereng alamle touk, ubuk. El yupu nyabukba, lelim nyabuk ning ara, weik mek oplirye, lelim weika arye nyalamle touk winibuk.

¹⁶ Anye el sirik taruk noutamak arye kurya tekbarye bopmok. El si bam bol pum tam arye weik parang ya, dana-dana tam si taca keten weik uamuk parang talipmokak, eipse. El urasin ara, keting arye mili daklamle touk weik dirina ubukba, eipse.

¹⁷ Anye epsirye, mambul kanye bobuka, ‘Si erebuka kipnun’ tenen, el yan dam bisirye, gutam ap, kisok ap, tuku deice dipdongobuka buksirye, pia yupu kum asa bukse. Winibuka buksibuk, anye el sirik taruk arye, na nong deice deibuka talipnukce, ayupu nyapnuke. Ara, ani. Anda ilil una meme. Aning-aning nirya, min kum uamuk talak ara, na akunum ulamse ati, nara Deiyok Kina Deiyoknye unune. Tonda, aning-aning nirya, akunum kum uplye talak babye, na pia kam unamne anya arye, nara Sirya Dakna Deiyoknye unune.

¹⁸ Minop talak dipse bukni, wini talak ara, kam unye touk, pia kam unamne. Nara, pia Kam Una Deiyoknye ununa ati ara, aminyan doryanamle talak babye, pia kamuk unamne. Nara, Ninye Dibina deiyok ning ap, akunum diamice ninye unyakak ap, talibuka una deiyoknye ununa anya arye, aning nirya ara talibuka unune.

¹⁹ Aning ati ara, an eipmalam ning nirya ara, seknamlyame. Ara, wini talak ulul ning ap, aminyan talak wininamle ning ap ati, seknamlyame.

²⁰ Na sirik taruk talipman kurya tekbarye ap, atekbarye weisa dirina kin ning emas ning ap ara, ‘Deiyok ani’ tenen, moubuka kum tenepmalam bukni, ‘Aning nong ani’ tenen, kel kipnulama ati, laka nyapnukine. Ara, tekbarye weisa dirina ning el nong ara, Asia tam noutamak, Allah diba tenebuka unyak ninye, mutuku si tekbarye jemaat ati ulule. Tek barye talipman kurya sik nong ara, Allah diba tenenyak ninye tekbarye mutuku jemaat, sik melina malaikat unyake. Anye birye, na Yohanes ati nyapnuke.