Ulangan 9 - Eipomek

Israel ninye arye, ‘Kanaan mutuku wekelbinamak’ tenen, nyabuk yupu

¹ Musa birye, Israel ninye ati nyabuk. Se Israel ninye, anggunda moubuka kekeplulume. Wini talak ara, anggun Yordan mek koubuka, otam mutuku, Kanaan mutuku wekelbinamlume. Amutuku noutamak ara, ninye yala-yala mikip weik arye talibuka unyake. Amutuku nang ara, sik ninye yupa weik unyakce, sik mikip pia weik unyake. Bukni, anggun Israel ninye ara yupa ap, mikip ap ara, mitik tonun ululume. Tonda, anggun wekelbinamlum mutuku ara, weik asik min arye, kintinibuka domik asik anyak unyake. Sik weik asik dam ara, keil arye cang weik poka wibuka, antanap dongobuka denepdongobik poka ara, im bol pipmanto ulula anya arye, talye lukparabuka, kanam asa kum wektume. Winibik bukni, anggunce amutuku unyak ninye ara, malye kibuka yakmunce, anggun mutuku kibuka talipmunce, binuka unamlume.

² Amutuku noutamak tonok yala ninye, sik ninye yala ara, Anakim ninye. Yuk nang, sik Anakim mutuku ninye ati, yupu nyapdeibikba, anggun akunum kel bikamlume. Ara, sik nong ara, cang pia weik nang nenyaka ati, yuk nang nirya arye, sik Anakim yala ninye ati nyanyake. ‘Se, anang ara, yata ninye arye sikti, obuka malye kipting do? Kum winipmanto,’ nyanyake.

³ Winibuka nyanyak bukni, wini talak ara, tuba tamubuka teneipdelulume. Anggun ni Allah, el si Yahweh arye, el menekuka balirye, weik uku buk dilamle touk ulirye, anggun dinmamunyak, Allah arye aninye nirya ati, opnin baliba, sik nirya alye weik dakdakiba, obuka sirya daklirye, anang nirya bobuka, anggun Israel ninye, amu tam deipnamle. Allah arye wininamle talak noutamak ara, anggunce Anakim mutuku ninye ati, minopce malye kibuka onamlulume. Anakim ninye malye kibuka opmunyopura, anang kan-kan bukni, ton nang ara, Kanaan mutuku noutamak arye yaknamlume. Ton nang ara, obuka sirya daknamlulume. Anirya ara, Allah arye min yuma talak nyapdeiamsuk touk winipnamle. Musa birye, Israel ninye ati nyabuk.

⁴ Nyabukce, ayupu ton dukdongobuka nyabuk. Allah arye, Anakim mutuku ninye obuka yaklopura, anggunce, ‘Ura, nun pia teleb ubuka diksukumuk unyaba ati, Allah arye melipmasilba, amalye nang bindopmakba, wini talak ara, nunce teleb mutuku talibuka unamabe,’ tenelulume. Ara, anggun kanye talima erelanauk umunya ati nyapsine. Dipkoprop ning ara, anggun teleb nang ati kume. Sik yala yuk-yuk ninye ara, pia malye ninye unyaka ati ara, ‘Allah arye, malye kiplirye, amutuku noutamak arye opyaknamlarye’ tenen, laka nyapsine.

⁵ Dipkoprop anggun diksukum una ap, anggun kanye talima teleb tenena ap ati, Allah arye, amutuku ninye obuka, sirya dakliba, anggun mutuku binuka, talibuka kum unamlume. ‘Nunda teleb nang anya arye, Allah arye amutuku arepsile,’ tenena meme. Allah arye wininamla ara, anggunti kume. Allah arye, amutuku ninye yaknamla deiyok ara, ani. Ara, amutuku ninye arye, malye-malye winin ning weika arye wininyaka ati, Allah arye melipsilyopura anggunce, aninye obuka yakmunce, amutuku binuka weknamlume. Tonda, Allah arye wininamla deiyok ton ani. Ara, Allah arye anggun apu yapu Abraham ap, Isak ap, Yakub ap ati, Allah arye ‘Wininamsine,’ nyabuka nyalin yupu deice deiamuk yupu nyabuka atonun, winipnamla atia. Amutuku arepnamsila deiyok ara, aning uka.

⁶ Ati ara, anggun teneipdebuka, kel kiplulume. Anggunce diksukum una ap, anggun kanye talima teleb tenena ap ati, Allah arye, amutuku ninye kum obuka sirya dakliba, sik mutuku kum talibuka unamlume. Aning tenena meme. Ara, kum winipmanto. Dipkoprop, anggun Israel ninye ara, ilil pia kum nang umunya atia. Musa birye Israel ninye ati nyabuk.

Horeb mutuku noutamak Israel ninye malya kibuka, malye winilamik ning ati, nyabuk yupu

⁷ Musa birye Israel ninye ati, nyabuk. Anggunda, luba kina meme. Tuba teninamlulume. Mesir mutuku arye batakuka yangalalumce, ninye kum mutuku noutamak balalumce, Yordan mek dam yanuka, keting yangalamle tam, tuba ulalum talak nirya ara, malya kibuka malye-malye winilalumce, Allah el si Yahweh ati, malye kilalumba, anggunti lik ubukba, el yu weik ulamuk. Atalak ara, Musa birye, Yordan mek otam batakuka, Yordan mek koubuka, keting wekelbalamle tam, min kum binamlum tam ati, nyapne. Anggunce Allah el si Yahweh, el yupu yaniptabuka, malye ulamsuk buk, anggun kanye talima erelalumce, el yupu kum kekelalume.

⁸ Tonda, anggun Sinai mutuku unmalum talak ara, Allah ati malye winipluma ati, lik ubukba, derepsuke. Allah arye anggunti, yu ubukba, ‘Aninye wenebuka opnun do?’ tenebuk bukni, kum obuka sirya daksuke.

⁹ Tonda, nara Sinai mutuku dup deice welepsirye, Allah ap ulamnumurye, elce, ‘Israel nang ap, na ap, neika una ati, ‘Aning ara, wininamlulume. Aning ara, pia kum wininamlulume,’ nyabuka nyalilamnukce, keil pala bitinye deice, ayupu sekuka arepnuk. Ayupu dopse talak ara, like yupa tonok kepdopnye koklom dikin 40 sum ap, 40 lukunyan ap, Sinai mutuku deice pia ulamse. Ulamse talak ara, kwaning ap, mek ap, pia kum dilamse. Urdem ulamse.

¹⁰ Ura, Sinai mutuku deice ulamse talak ara, Allah el yupu, el taruk deice arye, keil pala deice bitinye sekukabukce arepnuke. Akeil pala bitinye deice sekeipsuk ning ara, Sinai mutuku amu tam bulubuka dilamlumba, weik uku buk dinmoka noutamak arye nyapdeiamsuk yupu uka, yuk yupu kume. Allah arye, ‘Aning ara wininamlulume, aning ara ton kum wininamlulume,’ nyapdeipsuke.

¹¹ Amutuku deice ulamsa ani, like yupa tonok keba koklom dikin 40 lukunyan ap, ton 40 keting sintara ap, akunum ubukba, Allah el si Yahweh arye, arup nyapmasin yupu, keil pala bitinye deice sekeipmok ning dobuka arepnuke. Abitinye keil pala deice elce, ‘Anggun ap, na ap, neika una ati, ‘Aning ara, wininamlulume. Aning ara, pia kum wininamlulume,’ nyabuka sekeiamsuke.

¹² Ayupu arepnukce, nyapnuke. “Atalak aryuk, an minopce koulukuka bilyame. Sik Israel ninye, Mesir mutuku ulamikba, bobuka yanamlum ninye nirya arye, na yupu batakikce, pia malye winipdeipdanmake. Narye, ‘Aning ara, wininamlulume. Aning ara, pia kum wininamlulume,’ nyapdeipse yupu, minopce akunum batakmakce, kat ning doprobikce, sapi basam urasin atonun ning puturubuka deipmakce, atalye ning ati, ‘Nun ni koproba ani,’ nyabuka, si erenyake.” Allah arye nyapnuke.

¹³ Tonda, Allah arye nyapnuke. “Ance boyanamlum ninye unyak ning, akunum minop talak dilamsirye, tuba elinunce, kel kinune. Aninye kanye talima kat deice, pia malye wininyake.

¹⁴ Winyaka ati, anda menekuka otam biminyeba, na Allah arye Israel ninye obuka, sirya daknirye, kum kipdeipnamne. Winipnyopura, sik si kiliplopniba, doryanamle talak noutamak unamak ninye arye, sik si ton tuba kum teninamake. Im tolyangabuk mutuku nirya, yuk ninye sik si kum teninamake. Bukni, Musa anda, dobukapkinirye, teleb kipkiniba, mapu deipminba, dadeipdanin banamak ninye ara, pia weik upnamakce, mikip weik upnamake. Israel ninye tonok ara, sikda mitik tonun dem ubikirye, sik mikip ara, mitik tonunuk unamake.” Allah arye nyapnuke. Musa birye nyabuk.

¹⁵ Nyabukopura, ayupu ton nyabuk. Allah arye ayupu nyapnuka ati ara, uku buk tuba dilamuk mutuku dup deice arye, tamupsirye, koulukuka yase. Koluka yase talak ara, Allah arye keil pala deice, bitinye sekeibukce arepnukba, taruk talibuka koluka yase.

¹⁶ Koulukuka yasirye, dinmasibuk, anggunce Allah si yanilamlumce, anggunce talye ning sapi basam mi, el urasin atonun kibuka kintiniplumce, kat ning arye puturubuka deiamlumce, ‘Nun ni koproba ani,’ nyabuka, aning si erelamlume. Winibuka ulamlumba, kel bikamsise. Anggunda minopce, Allah arye, ‘Aning ara, wininamlulume. Aning ara, pia kum wininamlulume,’ nyabuka, peterepsuk ning nirya batakuka, yuk bisik binuka malye winilamlume.

¹⁷ Ati ara, narye malye kibukapsirye, narye anggun dinmalumak arye, Allah nyalin yupu keil pala bitinye deice uamuk ning, na taruk bitinye mikip arye talibuka, tukwak pouklopsiba, ngilubukce, mitik kibuka, sice buklobuk.

¹⁸ Winibukba, narye nun ni Allah dam, gutam tuku dipdongobukapsirye, minop talak winyamse touk, like yupa tonok keba koklom dikin, 40 sum ap, ton 40 lukunyan ap ara, din ap, mek ap, pia kum dilamse. Winipse ning deiyok ara, Allah arye, ‘Amalye winina ara, na like,’ tenelul ning bukni, anggunce malye weik winibuka ulamlumba, Allah arye eipsukce, el kanye yu weik ulamuka ati, winipsuke.

¹⁹ Atalak ara, Allah yu weik ubukba, anggun wenebuka, obuka sirya dakmanto upsuke. Winipsukba epsirye, na pia ilil weik upnukce, yok siriptalipnuke. Ara, ‘Se, Allah arye Israel ninye oplopnamal do?’ tenen, upnuk. Winipnuk bukni, anggun melina ati, Allah moropsiba, kekepnuke.

²⁰ Tonda, atalak ara, Allah arye Harun biti, weik arye derebuka anya arye, opmanto ubukba, ‘Harun oplyak’ tenen, narye elti, Allah moropsiba, kekepnuke.

²¹ Winipsopura, anggunce, sapi mi atonun ning memebuka deiamlumce, si erelamlum ning ara, dobukapsirye, uku dongopseba, nong nirya uku dibukabukce, uku sice buklobukopura, narye auku sice dobukapsirye, amutuku balamuk mek pum tam dongopseba, bobiyukce, kum kibuk.

²² Aninguk kum bukni, yuk talak ara, Tebera mutuku ap, Masa mutuku ap, Kibrot-Tawa mutuku ap, anggunce Israel yala nang, malye winilamlumba, Allah el si Yahweh arye, anggunti yu ubuk.

²³ Aning atonun, Allah arye, ‘Mutuku si Kades-Barnea mutuku batakuka, winiryuk arepnamsin mutuku, binuka unamlume,’ nyapsuk bukni, nyapdeiamsuk yupu nirya ati, anggunce, ‘Nun like,’ tenebuka, tonda, ‘Allah arye melinamsile,’ tenen, dib kum tenelamlumce, el yupu batakuka, pia kum kekelalume.

²⁴ Ati ara, narye nyapsine. Min yuma talak arye deiyok koubuka, malye upna arye, Allah el si Yahweh ati, tuba-tuba kekena kumce, winilelamlumba, na akunum kel kiamsise. Musa birye Israel ninye ati, nyabuka wenebuk.

‘Yuk mutuku ninye arye, Allah ati, malye yupu nyabuka, nalipnicak’ tenen, Musa birye Allah morobuka ati, nyabuk yupu

²⁵ Musa birye Israel ninye ati nyabuk. Ura anggunce Sinai mutuku dam malye-malye winilamlumba, atalak ara, Allah arye yu ubukba, ‘Sik opnune,’ nyapsukba, kekepsirye, na Musa birye, like yupa tonok keba koklom dikin, 40 sum ap, 40 lukunyan ap, Allah dinmanukak, Allah el si erena ati, tuku deice malamsirye, anggunti Allah pia morolamsise.

²⁶ Na Musa birye, Allah moropsi yupu ara, ani. “Se na ni Allah, anda Erebuka Weik Deiyoknye. Anuk ulyam anye arye, ance ‘Winipnamne,’ tenelyam touk ulyame. Aning-aning nirya, talibuka ulyam bukni, ance wipdeiamlum ninye, ‘Na tenena ninye,’ nyabuka, wipdeiamlum ninye, Israel ninye ati, moropkine. Ara, ‘Ance, anang kum opnamlyam’ tenen, moropkine. Ance, ‘Aninye ara, ‘Naʼ tenen, ninye unamak’ tenen, Mesir mutuku noutam arye dobuka, an mikip weik deice arye, lyebuka boyanamlum ninye ara, kum opnalyame, na nio.”

²⁷ “Tonda na nio. Ance Allah akwamlumba, an si erebuka, an amu tam ulamik nang, nun apu yapu Abraham ap, Isak ap, Yakub ap ati, ananguk tenenamlyame. Sik diamuk ati, tenepmince, wini talak unyak ninye, sik malye winina ap, kanye erena ap, malye una ap nirya ara, pia kum tenenamlyame. Sik urasin ara, yupu kekena kum ninye unyak bukni, ‘Aning ara namin kipnamlyame’ tenen, moropkine na nio.”

²⁸ “Kumopura, Mesir mutuku ninye arye, nyanamsiyake. ‘Ura dipdelulume, Allah ara, ‘Israel ninye teleb mutuku bobinamne,’ nyabuka, bobalamuka ani, el mikip kum ati, kum winipmanto ubukba, ninye kum mutuku noutamak binuka opnamale. Elce sikti, ‘Na like,’ akunum tenelula atia.” Ura na nio, ‘Sik Mesir mutuku ninye arye nyapsicak’ tenen ati, moropkine. Deiyok ara, ‘Malye nang arye, an si ati malye-malye yupu nyapkicak’ tenen ati, nyabuka moropkine.

²⁹ “Naio, Israel ninye ara, ance pia tenipnamlyame. Allah ance, ‘Na mapu unamake. Na tenen ninye pia unamak’ tenen, wiamsulumce, Mesir mutuku noutamak, an mikip deice arye bobuka yanamlume. Ati, ‘Anang pia kum opnamlyame’ tenen, moropkine. Na Musa birye Allah ati moropse. “Nyabuka moropsa ati ara, wini talak ara, na Musa birye, anggun Israel ninye ati, ayupu laka nyapsine. Ayupu nyabukapsirye, Allah ati morolamsise. Musa birye Israel ninye ati, laka nyabuk.