Ulangan 8 - Eipomek

‘Anggun ni koproba Allah arye, weik arye melilamsuk ning ara, tuba tenenamlulume’ tenen, nyabuk yupu

¹ Musa birye, Israel ninye ati nyabuk. Allah arye, ‘Aning ara, wininamlulume. Aning ara, pia kum wininamlulume,’ nyapdeipsuk yupu nirya ara, kekebuka nimalyap asa arye unamlume. Arup arye nyapsin yupu, moubuka kekepmunce, aninguk talibuka dobolbanamlume. Winipmunyopura, Allah arye anggunti, teleb kipdeipnamsile. Winipsiliba, kam pia unamlume. Winipmunyopura, weika arye deiptapakra bamunyeba, anggun mapu pia weik unamake. Tonda, Allah arye anggun apu yapu ati, ‘Winiryuk mutuku nuknamsine,’ nyapdeiamuk mutuku, binuka talibuka unamlume. Anggun ni koproba Allah Yahweh arye, yupu nyapdeisuke.

² Moubuka tenenamlulume. Allah el si Yahweh arye, keting tamun yupa weik, empat puluh tahun deice arye, mek pia kum mutuku, mok ap, mek ap kum ati, buppu weik arye ninye kum ulamik mutuku bisik, Allah arye melibuka boyangalamsuk ning nirya ara, luba kina meme. Allah arye anggunce, ‘Sik kanye talima, namin asa arye unamak’ tenen, ikin ning areamsuke. Winilamsuk ning deiyok ara, ani. Ara, Allah arye, ‘Sik kanye talima noutamak ara, yata tenenyak do? Sik talima noutamak ara, narye, ‘Aning ara, wininamlulume. Aning ara, pia kum wininamlulume,’ nyapdeiamse yupu, dipkoprob talibuka wininamak do? Kum do?’ tenena ati, winilelamsuke.

³ Tonda, Allah arye anggunti, asilena ati areamsukba din patalamsuke. Winilamsukba, Allah arye, tuba tamubuka im deice arye, din ning el si manna kwaning, arepsukba dilamlume. Akwaneng ara, anggun apu yapu ap, anggun ap, kum elilamlume. Allah arye winilamuk ning ara, anggun kel bikna ati, peterelamsuke. Deiyok ara, ‘Ninye nirya tukwak kwaninguk dilamak deice arye, kam kum unamake. Allah nyasilye yupu deice arye kam unamap,’ tenebuka, ‘Kel kipnamak’ tenen, Allah arye winilelamsuke.

⁴ Tonda, anggun keting tamun yupa weik, empat puluh (40) tahun deice arye yangalalum talak ara, anggun baju ton, pia malye kum wamsuke. Tonda, anggun yan ton pia kum nelamsuke. Aning nirya babye, Allah aryuk meilyamsuka atia.

⁵ Moubuka bita teneipdelulume. Anggun kel anya arye, anggunce moubuka biknamlulume. Nun ni yapu arye sik mapu ati, moubukua peterelamsikibuk, malye winibipyopura, wenelamsiaka atonun, nun ni Allah el si Yahweh arye, moubuka peteresulul bukni, malye winibipyopura, wenesulule. Musa birye nyabuk.

Pia teleb mutuku ati, laka lebuk yupu

⁶ Musa birye nyabuk, “Allah arye, ‘Aning ara, wininamlulume. Aning ara, pia kum wininamlulume,’ nyapdeipsilye yupu, moubuka talipmunce, wininamlulume. Tonda, Allah el si Yahweh arye nyasilye touk, aninguk wininamlulume. Winipmunyopura, Allah elti, kibuka, ‘Se Allah ara, weik mambule’ tenen, el siuk erenamlulume.

⁷ Aning ara, talye ati kume. Deiyok ara, Allah arye, tuku teleb mutuku bobuka binamsile. Amutuku ara, mek diksukum balamle mek ap, puak mek ap, tuku pum bisik arye kutuklamle mek ap, mekwen ap, mutuku keil pum arye kutuklamle mek ap, anirya ara weik aulule. Ara, weik mutuku noutamak ap, lu mutuku noutamak ap, tonda mitik mutuku taram noutamak ap, mek weik aulule.

⁸ Amutuku noutamak ulamle ning ara, beras ap, gandum ap, aning ayala-yala nirya aulule. Tonda, anggur tapu duk ap, kwarang duk ap, delima yo duk ap, zaitun yo duk ap, mong mek ap, anirya pia aupnamle.

⁹ Amutuku noutamak ara, kwaning pia kum patapnamsile. Anggun patapsilye touk, dinamlume. Ton kumu kum danamsile. Amutuku noutamak ara, tuku pum tam palipmunyopura, keil noutamak ap, mutuku taram noutamak ap ara, palipmunyopura, kat dekna weik ning, el si ara tembaga ap, besi ap, aubuk ati, anggunce aning palibuka dolonamlulume.

¹⁰ Anggunce din ning yala-yala nirya dobuka dipmunyopura, nyapnamlume. ‘Allah an si Yahweh arye, teleb tukwak arepsulume,’ nyabuka, anggun kanye deibukab, Allah ati, “Telebe,” nyanamlume.” Musa birye Israel ninye ati nyabuk.

“Teleb ning nirya ara, Allah elcuk aresulul ati, luba kina meme,” nyabuk yupu

¹¹ Musa birye, Israel ninye ati nyabuk. Anggunda, luba kina meme. Anggun ni Allah, el si ara Yahweh ati, pia tenebuka unamlume. Tonda, Allah arye, ‘Aning ara, wininamlulume. Aning ara, pia kum wininamlulume,’ nyapdeipse yupu ara, ‘Luba kipmunyak’ tenen, nyapsine. Allah arye nyasilye yupu, arup arye nyapmasin ning nirya ara, tonok babye ton, kum bataknamlulume. Pia tenebuka banamlulume.

¹² Kumopura, anggun kanye talima erebuka, pia kwalinauk umunce, anggun ni koproba Allah arye nyasilye yupu ara, luba kinamlulume. Ura, yata teleb winin ning nirya ara, teleb updeipsilyopura, ‘E, nunda teleb nang unyabe,’ tenena meme. Tonda, anggun ni koproba Allah ati, luba kina meme. Ura, aning atonun, anggun din ning dipmunce, akunum boupsilirye, mun pum tam upsilyopura, anggun teleb aik dobuka manamlume.

¹³ Tonda, anggun sapi ap, domba ap, kambing ap, mi deibicopura, weik upra banamle. Tonda, anggun dekna weik kat ning, emas ap, perak ap tabakuka, weik upra banamsil ning ap, tonda anggun talinamlum ning ayala-yala nirya, pia tapakra banamsile. Winipsilyopura, anggun ni koproba Allah ati, pia luba kina meme.

¹⁴ Aning-aning nirya teleb upsilyopura, anggun kanye talima erebuka, kwalina pia meme. Aning kum bukni, ‘Nun ni Allah luba kibibyak’ tenen, moubuka kalikdamunce, namin asa arye unamlulume. Kumopura, anggun talima pum tam erepdamunce, ‘Nunda pia teleb ninye,’ tenepmunyopura, anggun ni Allah luba kipnamlume. Ara, Mesir mutuku ulamlum talak ara, ikin pil weik, anggun nong deice delilamsikba, talye piluk dobuka, kanye imun kanye bobuka ulamlum bukni, Allah arye lyepsuke. Ati, anggunce pia tenenamlume, ‘Nun ni Allah, el si Yahweh arye, lyebuka boyanamsuke,’ tenebuka, pia unamlume. El ti, luba kina pia meme.

¹⁵ Tonda, Allah arye meliamsuka deice arye, mek ap, ninye ap, pia kum uamuk mutuku noutamak arye, bobuka yangalamsuke. Amutuku noutamak yangalamlum talak ara, ninye on kwatima ap, ninye si tolamle sul kwising ap, awamuk bukni, Allah meliamsukba, si kum tolamsukba, telebuk balamlume. Tonda, winibuka balamlum talak ara, amutuku noutamak ara, mek pia kum uamuk bukni, Allah el mikip deice arye, kat keil noutamak arye, mek kutukuka sakukba, dinmalumba, bouamsuke.

¹⁶ Tonda, amutuku noutamak ara, wa ap, din ning ap, kum uamuk bukni, Allah el mikip deice, im deice arye manna kwaning areamsukba dilamlume. Akwaneng ara, anggun apu yapu babye, anggun babye, kum kel bikamlume. Allah arye aning-aning nirya, ikin ning babye, teleb ning babye, areamsuka deiyok ara, ‘Asipdeniba, sik talima mitang upliba, teleb updeipnamsin’ tenen, anggunti teleb kililamsuke.

¹⁷ Ati ara, aning-aning nirya, teleb upsilyopura, anggun kanye talima erepdamunce, ‘E nun bidamang mikip ap, weik kel kiamupe ning ap arye, ateleb ning ayala-yala nirya weik upsile. Ara, nun deice arya,’ tenena pia meme.

¹⁸ Aning kum bukni, moubuka teneipnamlulume. Allah elcuk minopce deiyok koubuka, weik kel kina deiyok ning arisiliba, adeice aryuk bona utotoa talin ning talibuka unyabe. Nun bidamang mikip aryuk kume. Ati, anggun ni Allah, el si Yahweh ati, pia teninauk unamlulume. Allah arye, minop talak arye dipdongobuka, wini talak babye, pia kintinibuka melisilya touk, pia arenamsile. Ara, anggun apu yapu ati, ‘Sik ap, na ap, teleb ubuka neika unamap’ tenen, ‘Wininamsine,’ nyalilamsuk yupu atonun, anggun wini talak ululum ninye ati, tuba melibuka arenamsile. Musa birye, Israel ninye ati nyabuk.

“Anggun ni Allah luba kipmunce, elti kum tenepmunyopura, ikin unamsile,” nyabuk yupu

¹⁹ Musa birye, Israel ninye ati nyabuk. “Ura kekepnululume. Anggunce, anggun ni Allah el si Yahweh ati, talye kanye bobuka, luba kina meme. El ti pia dib kum tenepmunyopura, anggunce tuba tamubuka yuk talye ning ati, ‘Nun ni koproba,’ nyabuka, aning si erepmunce, aning dam gutam tuku dipdongopmunce, el siuk erebuka kipmunyopura, ikin weik upnamsile. Ara, anggunce, talye ning si tamubuka erepmunyopura, Allah arye anggunti, weik arye wenebuka oplopsiliba, dipmunce, anggun nong kum danamsile.

²⁰ Anyapmasina ara, anggun dilamlum buk, Allah el si Yahweh arye, yuk mutuku ninye obuka kum kipdeiamuk touk, ‘Anggun babye, elti, batakmunyopura, Allah arye opsilyak’ tenen, nyapsine. Ara, talye ati kum bukni, el Allah ati, luba kipmunce, yuk ning si erepmunyopura, wenebuka opnamsile. Ati, kanye lamapdongobuka arye umunce, Allah el si Yahweh atibuk, erebuka, el nyasilye yupu kekenamlulume.” Musa birye, Israel ninye ati nyabuk.