Ulangan 7 - Eipomek

Allah arye wiamuk ninye, Kanaan mutuku dolona ati, nyabuk yupu

¹ Musa birye, Israel ninye ati nyabuk. “Allah arye, ‘Teleb mutuku arepnamsine,’ nyapdeiamuk touk, melipsilyopura, amutuku binuka unamlulume. Amutuku bimunyopura, amutuku noutamak unyak nang, anggun mal olan nang nirya eipnamlume. Bukni, Allah el melipsilya deice arye, aninye ati, obuka sirya dakmunce, aninye ati yakmunyeba, yuk mutuku bindopnamake. Aninye ara, yala yuk-yuk, tekbarye unyake. Anggun Israel ninye, anggun mikip ara, mitik tonune. Atekbarye yala nang ara, sik mikip weik nang unyake. Atekbarye yala nang, sik si ara ani. Het yala nang ap, Girgasi yala nang ap, Amori yala nang ap, Kanaan yala nang ap, Feris yala nang ap, Hewi yala nang ap, Yebus yala nang ap nirya ara, anggun Israel nang arye binuka opmunce, amutuku noutamak arye, yaknamlulume.”

² “Tonda, Allah el si Yahweh, el melipsilya deice arye, aninye nirya obuka, sirya daknamlume. Aninye obuka, sirya dakmunyopura, Allah arye ayala-yala unyak mutuku nirya arepsiliba, dopropmunce, amutuku unamluma ati, amutuku unyak ninye nirya obuka, sirya daknamlume. Tonda, anggun ap, ayala yuk-yuk ninye ap, yupu talilana meme. Ara, ‘Sik ap, nun ap, kanye deibuka neika uptibye’ tenen, kum nyapdeipdanamlulume. Aninye yuk-yuk nirya ara, tonok babye, ton bico tenebuka, kum bataknamlulume. Oltakna dem winipnamlume.”

³ “Aning atonun, anggun amutuku unamlum talak ara, anggunce amutuku kilapu ton, pia kum dopdanamlulume. Tonda, anggun Israel wel kilapu ap, wel nang ap ati ara, anggunce, ‘Amutuku wel kilapu ap, wel nang ap, talye dopdanamabe’ tenena ara, pia meme.

⁴ Ura, ‘Anggun ap, amutuku nang ap, dolana meme,’ nyapmasina deiyok ara, ani. Ara, anggun kilmapu ara, amutuku nang arye dobikcopura, amutuku ninye arye, yuk talye ning ati, ‘Nun ni Allah’ tenen, si erenyaka atonun, ‘Anggun kilmapu tabakuka winibikirye, dipkoprob Allah ati batakicak’ tenen, nyapsine. Anggun Israel mapu ap, kilmapu ap arye, yuk talye ning ati, si erebikcopura, Allah arye sikti, yu weik upliba, ‘Weik arye wenebuka minopce opsilyak’ tenen, nyapsine.”

⁵ “Ati ara, anggun amutuku binuka wekmunye talak ara, anggun mapu ap, kilmapu ap ara, aninye ap dolana meme. Aning kum bukni, amutuku ninye arye, sik talye Isa Mutuku Dongonye si erenyakce, domice aik nirya ap, Isa Mutuku Dongonye si erena ati, kam ning obuka, pala keil lelebuka yangapdeibikak nirya, el si mesba ara, dakuka uluplopnamlulume. Tonda, ‘Isa asukum ulule’ tenen, cang keil tikdeibik ning nirya ap, sik Isa Mutuku Dongonye si, ‘Asyera asukum tikilyayuke’ tenen, tikuka iklamik cang yo ara, sekuka uku dongopnamlulume. Tonda, keil arye, sik Isa Mutuku Dongonye tenen ning, ninye urasin atonun memebuka deiyok delilamak ning nirya ap, dakuka uluplopnamlulume. Yo arye puturubuka deiamica ara, uku dongopnamlulume. Aning-aning nirya, ‘Nun ni aniʼ tenen, si erenyak ning nirya ara, daklopnamlulume. Aning atonun, talye ning si erenyak ning nirya ara, adiparyuk ulubukapmunce, uku dapnamlulume.”

⁶ “Narye, ‘Talye ning si erenyak ning nirya, adiparyuk dakuka, uku dapnamlulume,’ nyapmasina deiyok ara, ani. Ara, anggun ni koproba Allah, el si Yahweh arye, akunum wipdeiamsuka atia. Anggunda, el ‘Naʼ tenen, ninye ati ara, yuk talye ning do, Isa Mutuku Dongonye do, aning-aning nirya ati, si kum erenamlume. Allah el siuk erenamlulume. Allah arye, ninye im sirya, mutuku sirya nirya ati, bico tenelul bukni, anggun Israel nang ati ara, weik arye bico tenesilirye, anggun diamuk ati, ‘Na tenena ninye dipkoprop’ tenesulule. Yuk ninye ton kume.” Musa birye, Israel ninye ati nyabuk.

Allah arye Israel ninye wipdeiamuka deiyok ning ati, nyabuk yupu

⁷ Musa birye, Israel ninye ati nyabuk. “Anggun nirya kekepnululume. Allah arye anggunti, tenebuka wiamsuka deiyok ara, ‘E Israel ninye ara, sikda mutuku-mutuku nirya weik yala unyake’ tenen, kum wipdeipsuke. Aning kum bukni, ‘Ninye ayala-yala nirya ara, weik daunyak bukni, Israel ninye ara, dipkoproba, ninye mitik tonun unyake ati, wipnamne,’ tenyamsuka anya arye, bico tenyamsukce, wipdeipsuke.”

⁸ “Allah arye anggunti, wipdeipsuka deiyok ara, ‘Anggunda ninye weik unyaka ati ara, wipnamne,’ kum tenelamuk bukni, deiyok ara ani. Ara, elce tuba bico tenyamsukce, elce anggun apu yapu ati, ‘Wininamsine,’ nyalilamsuk yupu ati, tuba tenelirye, anggun wini talak ululum ninye ati, wipdeipsuke. Minop talak, ‘Wininamne,’ nyabuka, akunum nyabuka ati, Mesir mutuku noutamak ikin weik ulamsuk buk, dobuka lyepsuke. Mesir mutuku weik deiyoknye Firaun, el mikip weik kibukce, anggunti taleamsuke. Winilamukce, ikin pil weik, anggun apu yapu nong deice delilamukba, ikin weik ulamik. Winibuka ulamik bukni, Allah el mikip weik deice arye, lyepsukce dobuka boyasuke.”

⁹ “Ati ara, anggun adiparyuk moubuka teneipdemunce, kel kipnamlulume. Pia tenenamlulume. Allah el si ara Yahweh, anggun ni koproba Allah, el tonok ulule. Yuk ton kume. Allah arye nyalilamuk yupu nirya ara, dipkoprob ulule. El nyalisilye yupu ara, tonok ning ara, kum batakalule. Yata ninye do nirya, sikce el deiceuk, sik kanye deibikirye, elce, ‘Aning wininamlulume,’ nyabuka nyasilye yupu, moubuka talibicopura, Allah arye sikti, tuba-tuba melilule. Elce sikti, ‘Wininamsine,’ nyalisulul yupu nirya ara, tonok ning babye kum bataknamle. Nirya awininamle. Ato ninye ati ara, sikce mapu deibikiba, dadeipdanin, banamak nang yupa ara, pia kum nukmanto, pia weik upre balamlya babye, pia melinamle. Sikce, mapu deibikiba, dadeipdanin banamak ninye yupa ara, ninye nel punun nang, generasi yupa weik, seribu kali lipat upre banamak ninye ati ara, Allah arye pia melinamle. Kum bataknamsile.”

¹⁰ “Bukni, yata nang do nirya, sikce elti, ‘Nun like,’ tenebice nang nirya ati ara, pia wenepnamle. Sik malye winibikce touk, Allah arye, ‘Bita merekuka’ tenen, wenebuka oplirye, aninye sirya dakalinamle. Ara, elti, ‘Nun like,’ tenenyak ninye ati, namin kum kiptue. Kume, anang nirya, sik wenena ati ara, namin asa arye kume. Minopce wenebuka oplirye, sirya daknamle.

¹¹ Allah ara, anyapmasin touk winilule ati ara, Allah arye, ‘Aning ara, wininamlulume. Aning ara, pia kum wininamlulume,’ nyapdeipsuk yupu nirya ara, kekebuka, kanye lamapdongobuka unamlulume. Asum arye nyapsin yupu ara, moubuka kekepmunce, aninguk talibuka dobolbanamlume.” Musa birye, Israel ninye ati nyabuk.

“Allah arye nyalul yupu kekepmunce, nimalyap asa arye, el amu tam ulamunyopura, elce anggunti, teleb kipdeipnamsile,” nyabuk yupu

¹² Musa arye ayupu yabukce, ayupu ton nyabuk. “Ura, anggun ni koproba Allah, el si Yahweh arye anggunti, ‘Aning ara, wininamlulume. Aning ara, pia kum wininamlulume,’ nyapdeipsilye yupu ara, kum bataknamlulume. Pia tuba kekepmunce, winipmunyopura, Allah arye anggun apu yapu ati, ‘Aning arepnamsine,’ nyalilamuk touk, anggun babye, aning arepnamsile. Ara, anggunti, dipkoprob tuba bico tenesilya atia.”

¹³ “Allah arye anggunti, bico tenepsilirye, anggun dam aunamsile. Tonda teleb kipsilirye, aning-aning weika arye arenamsile. Ara, anggun mapu weik arepsiliba, weika arye dadeipdanin, banamak. Tonda, anggun wa wibuka kounamlum ning weika arye melipsiliba, duk weika arye moulamliba, dakanamlume. Ura, gandum ap, anggur tapu duk ap, anggur mek ap, minyak zaitun yo duk ap, weika arye arenamsile. Tonda, anggun sapi basam ap, domba basam ap, kambing basam ap ara, mi weik delinamak. Ara, Allah arye, ‘Amutuku arepsinirye, aning-aning nirya weika arye arepnamsine,’ nyabuka, nun apu yapu ati nyalilamuk touk, arepnamsil mutuku noutamak arye arenamsile.”

¹⁴ “Aning ara, yuk mutuku im sirya, mutuku sirya nirya unyak ninye ara, mitik tonun aupmal bukni, anggun Israel ninye ara, weika arye arenamsile. Yuk mutuku nang aulye ning atonun kume. Sikda mitik tonun bukni, anggun Israel ninye ara, pia weike. Aning atonun, anggun kilapu nirya arye, mapu weik delinamake. You kilapu kum unamake. Sik ninye arya, mapu weik delinamake. Anggun weilulum kam ning ara, domba basam do, sapi basam do, kambing do, aning nirya, mi weika arye delinamake.”

¹⁵ “Tonda, Allah arye anggunti, anggun on ning do, uk ning ayala-yala nirya do, ‘Malye winin ning yalirye, uk diplyak’ tenen, el mikip arye anggunti, kalikuka melinamsilirye, kwetenamsile. Winipsiliba, aning nirya yukak bindopnamle. Tonda, anggunce dinmalum buk, Mesir mutuku ninye, sik wenena ati, sik nong deice, weik mambul uk dina deiyok ning, pirilen ning deiamuk ning ara, anggun dam ton pia kum upnamsile. Allah arye, ‘Na mapu malye ning yalyak’ tenen, kalikuka melipnamsil ati, nyapsine. Anggun dam ton, kanye imun ning weik kum delinamsil bukni, yuk mutuku nang arye, anggun Israel ninye ati, ‘Aninye nun like,’ tenenyak nang ati ara, Allah arye, sik nong deice, kanye imun ning delinamle,” Musa birye, Israel nang ati nyabuk.

Allah arye, “Malye winin ninye nirya opnamlulume,” nyabuk yupu

¹⁶ Musa birye, Israel ninye ati ayupu ton nyabuk. Ura, Allah arye anggunti, el mikip anggun deice deipsiliba, anggun binuka unamlum mutuku, yuk mutuku nang olbinumunyopura, aninye nirya obukapmunce, sirya daknamlulume. Amutuku ninye ati, bico tenebuka, batakna kume. Tonda, sik Isa Mutuku Dongonye si erenyak ning nirya ara, ilil tenena meme. Aning si kum erenamlulume. Winipmunyopura, wena tapu youlamle touk youpnamsila atia.

¹⁷ Yuk sum ara, anggunce aninye ati, ‘Se, nunda yupa mitik tonun ati ara, nun mikip kumce, mitang asa unyap bukni, sikda yupa pia weika arye unyaka ati, yata wiribuka optibirye, sik ning doproptibye do? Kume, aning ara, dipkoprob kum winiptibye,’ tenena kume. ‘Dipkoprop amutuku nirya dopropnamabe,’ tenenamlume.

¹⁸ Anggunce, amutuku unyak nang ati, ilil una meme. Anggunce elilamlume. Mesir mutuku weik deiyoknye Firaun ap, el mapu nirya ap, sik wenena ati, Allah arye anang nirya oploamuk ning ara, aninguk pia teninamlulume.

¹⁹ Ara, anggun asing koproba arye elilamlume. Allah arye, Mesir mutuku noutam, sik Mesir mutuku nang ati, pirilen ning weik arye arelamukba, batakdongopsike. Winilamuka deice arye, lyebuka dopropsukce, amutuku boyanamsuka ati, aning atonun tuba tonap wininamle. Ara, ‘Allah el mikip ara, weik mambule, tenenamak’ tenen, ninye kum winipmanto pil dolamuk ning ap, pia mambul uk deiyok ning arebuk ning ap, el mikip deice arye, ikin ning weik, sik nong deice delilamuk. Aning nirya winilamuka deice arye, Allah el mikip deice arye, anggun Israel ninye lyebuka dopropsukce, boyanamsuke. Ati yuk mutuku unyak ninye ati, ilil kum tenenamlulume. Abinamlum mutuku nang ati, ‘Nun ilile,’ tenepmalum bukni, anggun ni koproba Allah, el si Yahweh arye, ato pil doplirye, aninye ati wenebuka opnamle.

²⁰ Aninguk kum bukni, Allah el si Yahweh arye, el yu weik upliba, ‘Aninye wenebuka opnune,’ teneplyopura, adiparyuk sikce, ‘Se opsicak’ tenen, bikbik abuka, yuk mutuku binuka duknuptinga babye, kum winipmantoe. Winipmanto ning ara, duknupmake bukni, mong yalirye, si topliba, kum duknupmanto ulamak touk, Allah ara, ona deiyoknye ulula anya arye, anang ati dipkoprob opliba dipnamake.

²¹ Aning ati, anggunce mutuku-mutuku nirya unyak ninye ati, eipmunce ilil upsiliba, yok sirim talina kume. Anggun ni koproba Allah Yahweh ara, anggun noutamak aulirye mikip weik ap, weik mambulnye ulula anya arye, anggun ilil una meme. Allah elda, weik mambulnye. Elda aning-aning nirya talibuka ululnye biti, ninye tukwak nang nirya arye, elti, ilil ulule.

²² Tonda, mutuku-mutuku nirya unyak ninye ara, Allah el melisilya deice arye, anggunce nimalya ap asa arye, amutuku ninye yakanamlulume. Adiparyuk, tonok talak aryuk sik nirya kum obuka, sirya dakanamlulume. Winipmunyopura, amutuku talye bai tam kam ulamle ning nirya ara, anggun dam weik upnamle. Dana-dana tam ninye kum uplyopura, ‘Bai tam ning arye, opmanto upsilyak’ tenena atia.

²³ Allah arye anggun mal olan nang ati, kanye teniltona deiyok ning weik arepliba, sik kanye teleb arye tenipmanto kum upnamake. Winibuka el melipsilya deice arye, anggunce anang nirya opnamlume.

²⁴ Yuk mutuku ninye, anggun weik deiyok nang ara, Allah arye dobuka, anggunti arepsiliba, opnamlume. Aninye ara, im amu tam, tukwak mutuku noutam nirya ara, sik si tonok, ton pia kum upnamle. Tonoknye babye ton, anggunti, kum obuka sirya daksutue. Sik nirya ara, kam kum unamake. Aweik ninye nirya obuka, sirya daknamlume. Musa birye Israel ninye ati nyabuk.

Amutuku nang, sik Isa Mutuku Dongonye si erelamik ati, nyabuk yupu

²⁵ Musa birye, Israel ninye ati nyabuk. Amutuku noutamak, talye ning dobuka, ninye urasin atonun puturubuka, ‘Nun isa mer si berallah-allah,’ nyabuka, si erenyak ning nirya ara, uku dongopmunyeba, uku diplirye, sirya daknamle. Sik ninye urasin atonun ubuka puturubuka memenyak ning, uku diplyopura, aning deice uamuk emas ap, perak ap ara, anggun ton, ‘Se,’ tenepmunce, dolona pia meme. ‘Aning ton dopropmunyopura, malye winipmunba, wena tapu youlamle touk winipsilyak’ tenen, nyapsine. Aning nirya ara, anggun ni koproba Allah Yahweh arye, ‘Isa si erena ara, pia na like,’ tenelule. Ati, aning nirya, uku dongopnamlulume.

²⁶ Aning atonun ton, yata ning do nirya, Allah ning ara, ‘Aning ara, na like,’ tenelul ning nirya ara, isa si eren ning babye, yuk malye ning babye, anggun aik pum tam, pia kum deilinamlulume. Aning ara, Allah el kanye ara, ‘Na like,’ tenelula ati ara, aning ati wenebuka, kum kipdeipnamle. Aning atonun, anggunce, ‘Nun babye wenebuka opsilyak,’ tenena ati, amalye ning nirya dobuka, anggun aik pum dekana meme. Adiparyuk, uku dongopmunba, uku dipropnamle. Musa birye Israel ninye ati, nyabuk.