Ulangan 6 - Eipomek

Musa birye, Allah nyapdeiamuk yupu nyapnuyuk talak ati, min yuma nyabuk yupu

¹ Musa birye, Israel ninye ati nyabuk. “Anggun ni koproba Allah, el si Yahweh arye nati, ‘Aning wininamlulume. Aning ara, kum wininamlulume,’ nyapdeiamnuk yupu nirya, narye anggunti, nyapnusine. Ara, Allah arye, ‘Ayupu peterenalame,’ nyapnuk touk, nyapnusine. Allah arye winiryuk arepnamsil mutuku, Yordan mek koubuka, otam mutuku binuka dopropmunce, anggun amutuku pia talibuka unamlum talak ara, narye nyapnusin Allah yupu ara, ‘Pia talibuka wininamlum’ tenen, nyapnusine.

² Tonda anggunce, anggun ni koproba Allah, el si Yahweh ati, ‘Se, elda pia mambule, el siuk erenamabe,’ tenenamlum tenen, ayupu peterepnusine. Tonda, Allah arye, ‘Aning wininamlulume. Aning ara, kum wininamlulume,’ nyabuka, el yupu nyapdeiamuk ning ara, ‘Anggunce moubuka talipmunce wininamlulume,’ nyapsine. Tonda, anggunce deipmunyeba, dadeipdanin banamak ninye nirya ara, ‘Sikce Allah el yupu ati, dib tenebikirye, moubuka wininamak’ tenen, nyapsine. Winipmunyopura, Allah arye anggun kam unamlum talak ara, keting tamun ouku weik arepsiliba, pia unamlume.”

³ “Anggun Israel ninyeo, na yupu moubuka kekepnululume. Anyapnusin yupu nirya ara, moubuka kekepnumunce, pia talibuka wininamlume. Winipmunyopura, amutuku noutamak unamlum talak nirya ara, aning-aning nirya telebuk unamsile. Tonda, anggun ni koproba Allah, el si Yahweh arye, anggun apu yapu ati, nyalilamuk touk, anggun yala nang amutuku weik ubikirye, bona utotoa talin nang weik unamlume. Ara, Allah arye domon yupu nyabuka deice, amutuku ara, sapi basam weik ulamlaba, moum yung weik upnamle. Tonda, mong mek ap arepsiniba, dipmunyopura, kanye deibuka unamlume. Adomon yupu deiyok ara ani. Amutuku noutamak upnamle ning nirya ara, weik uplirye, telebuk unamla ati nyapsine.” Musa birye, Israel ninye ati nyabuk.

Allah arye, ‘Wininamlulume,’ nyapdeiamuk yupu deiyok ning ati, min yuma nyabuk yupu

⁴ Musa birye, Israel ninye ati nyabuk. “Na kwit capu Israel ninye ara, moubuka kekeplulume. Anggun ni koproba Allah, el si ara Yahweh, el tonok ulule. Yuk Allah ton, pia kum ulule.

⁵ Ati ara, anggunce Allah ati, anggun kanye talima pum tam nirya dobuka, el deiceuk delinamlume. Winipmunce, ‘Allah el diamuk na talinanye unulule, el tonok ara mambule, yuk ton kume,’ dib tenenamlulume. Aning atonun, anggun wininamunya nirya deice arye, Allah ati kibuka, el siuk erenamlulume.

⁶ Ati, wini talak ap, doryanamle talak nirya ap, anyapmasin yupu ara, luba kina kume. Anggun kanye talima noutamak ara, pia teninauk unamlulume.

⁷ Arup nyapnusin yupu ara, anggunce ayupu kekepmunce, anggun mapu nirya ati, tuba peterenamlulume. Ara, anggun aik bukmunyak ap, bisik banmamunyak ap, dikdik senak ap, mapnumunye talak ap, mapmamunya ani bukmunye talak ap, atalak-atalak nirya, ayupu nyapmunce, talibuka wininamlulume. Ara, anggun ap, anggun mapu ap ati, pia petereldanamlulume.

⁸ Tonda, anggunce anyapnusin yupu pia tenina ati, ayupu sekukapmunce, anggun bai tam ap, wa win dam ap banak ap, anggun asok deice ap, ketipdopnamlulume. Ara, ‘Allah el yupu ara, pia mambule’ tenen, ‘Pia tenenamlum’ tenen, nyapsine.

⁹ Aning atonun ton, anggun bublan yo deice ap, bublan dana-danatirikne yo deice ap, anggun aik poka bublan dam ap, Allah arye nyasulul yupu sekeipmunce, eipmunyopura, pia teninamlulume.” Musa birye, Israel ninye ati nyabuk.

‘Aning-aning nirya teleb upliba, Allah ati lupakibikirye, yanibicak’ tenen, nyabuk yupu

¹⁰ Musa birye nyabuk. “Allah arye, nun apu yapu Abraham ap, Isak ap, Yakub ap ati, ‘Anggun mapu ara, winiryuk mutuku arepnamsine,’ nyapdeiamsuk mutuku bimunyopura, anggun amutuku binuka dopropmunce, weik asik nirya, pia teleb kota-kota binuka unamlume. Akota-kota ara, yuk nang arye domik bukni, Allah arye arepsiliba, anyasik nirya talibuka unamlume.

¹¹ Aning atonun, anggun amutuku bimunyopura, pia teleb asik weik dopropnamlulume. Anyasik-anyasik pum tam nirya ara, pia teleb aik ap, bona ning ap aupnamle. Anggunce, aning-aning nirya kum dekuka deiamlum bukni, aning nirya binuka, dopropnamlulume. Tonda, anyaik dam, mok ceplirye, mekwen delina ati ara, anggunce ton kum palyamlume. Bukni, min arye aubuk ninguk dopropnamlulume. Yuk nang arye, palibik ninguk, Allah arye arepsiliba, anggunce binuka talibuka unamlume. Tonda yuk ninye arye, pil weik dolamika deice arye, sik wiamikce kouamik wa, anggur tapu duk ap, zaitun yo duk ap, dopropnamlulume. Awa noutamak aupmal ninguk, binuka dipra unamlume. Anggun patapsilye touk, talye kanye mangkau asa arye, weika tonun dipmunba, bounamsile.

¹² Ati, arup nyapmasin touk, aning-aning nirya wininamlum talak ara, moubuka umunce, kintinibuka dinamlulume. Anggun ni koproba Allah ati, luba kina pia kume. Anggunda, Mesir mutuku ulamlumba, anggun nong deice ikin pil dilamsikba, dolamlum ning ara, ur talye pil dolamlum bukni, Allah el si Yahweh arye, dobuka lyepsukce, boyanamsuk ning ara, luba kina meme. Allah ati, pia teninauk unamlulume.

¹³ Amutuku unamlum talak nirya ara, anggunce anggun ni koproba Allah, el si Yahweh ati, ‘Se, elda pia mambule, el siuk erenamabe,’ tenenamlulume. Allah ati el si erebuka, el amu tamuk namin asa arye unamlulume. Tonda, anggunce, ‘Wininamne,’ nyabuka, nyalin yupu deice nyanamlum talak ara, Allah el siuk erebuka, ‘Dipkoprop wininamne,’ nyabuka, nyalin yupu nyanamlume. Yuknye si ton, kum nyanamlume.

¹⁴ Tonda, anggun amutuku binuka unamlum talak ara, yuk yupu ninye amutuku noutamak unyak ninye, talye ning ati, si erenyak bukni, anggun Israel ninye tonok ara, yuk-yuk ning ton, kum si erenamlume. Amutuku unyak ninye arye, talibuka winilamice ning, anggun ap tabakukap kum wininamlulume.

¹⁵ Ura, ‘Yuk talye ning si erena pia kume,’ nyapmasin yupu deiyok ara, ani. Ara, urdem ati, kum nyapsine. Anggun noutamak ulul Allah ara, el si Yahweh arye, anggunti, ‘Na ninye, na mapu koprop unyake,’ tenesulula ati, anggunce, ‘Nun ni,’ nyabuka, yuk talye ning si erepmunyopura, Allah el yu, anggun nong deice deipsilirye, wenepnamsile. Tukwak mutuku noutam unamlumak nirya, wenebuka opsilyak arye, ‘Anggun nirya, sirya daksilyak’ tenen ati, nyapsine. Allah elda, yuk-yuk ning ulamla atonun una kumnye.” Musa birye, Israel ninye ati nyabuk.

“Anggun ni koproba Allah ati, winilina kume,” nyabuk yupu

¹⁶ Musa birye, Israel ninye ati nyabuk. Anggunce Allah el si Yahweh ati, ‘Aning dipkoprob winiptu do, kum winiptu do?’ tenen, kum winildenamlulume. Ara, mutuku si, Masa mutuku minop talak ulamupuak, mek kum ubukba, malye-malye nyabuka engelamlumce, Allah ati winildelamlum touk, tuba tonap pia kum wininamlulume.

¹⁷ Aning kum bukni, Allah el si Yahweh arye, ‘Aning ara wininamlulume. Aning ara, pia kum wininamlulume,’ nyapdeipsilye yupu nirya, moubuka talipmunce, pia talibuka wininamlulume. Tonok ning babye, kum bataknamlulume.

¹⁸ Allah el si Yahweh arye, ‘Winina ara, pia telebe, tonda aning ton winipmunyopura, na kanye deipnamsine,’ nyabuka peteresilye yupu nirya ara, aninguk kekebuka dobolbanamlume. Tonda, Allah arye disilyak nirya babye, teleb asa uk ubuka wininamlulume. Winipmunyopura, anggun winin ning nirya ara, telebuk unamsile. Aning nirya telebuk unamsile. Tonda winipmunyopura, Allah arye nun apu yapu ati, ‘Teleb mutuku arepsinyeura, amutuku pia talibuka unamlulume,’ nyabuka nyalilamuk mutuku, anggunti arepsiliba, bimunce kanye deibuka, asukumuk tuba unamlume.

¹⁹ Tonda, Allah arye nyapdeipsuk touk, amutuku ubikirye, anggun mal olan nang nirya ati, malye kibuka opmunce, aninye ati yakmunba, yuk mutuku bindopnamake. Anggun dam kum unamake. Musa birye Israel ninye ati nyabuk.

Anggun mapu ati, “Minop talak, nun ni Allah meliamsukce, winibuka winilamsuke,” nyabuka, laka nyanamlume, nyabuk yupu

²⁰ Aminyan doryanamle talak ara, anggun mapu arye, “Ura, nun ni Allah arye, ‘Aning ara wininamlulume. Aning ara, pia kum wininamlulume,’ nyapdeipsuk yupu ara, yata yupu do?” nyabuka asipdesicopura, nyapnamlulume.

²¹ “Kume, minop talak, Mesir mutuku noutamak, sik weik deiyoknye Firaun, el amu tam ulamuburye, talye yangalamik nang atonun ulamupuba, ikin pil weik, nun nong deice delilamsukba, ikin weik ulamupu. Winilamupu bukni, Allah el mikip deice arye lyepsukce, bobuka amutuku boyanamsuke.”

²² “Allah arye nunti, dobuka lyepdopsuk talak ara, el mikip deice arye, ninye kum winipmanto ning, pia mambul pil ton, dobuka arebukba, Mesir mutuku nirya ap, Firaun ap, Firaun el mapsilip nirya ap, amutuku ninye nirya ap, ikin weik ulamik. Elce awinilamuk ning deiyok ara, ‘Mesir mutuku nang arye, Allah el mikip weik ululnye, kel biknamak’ tenen, winilamuk. Allah arye, aning-aning areamukba, nun asing arye elilamupu. Nunce aning nirya eibupe.

²³ Ura, Allah arye, Mesir mutuku noutamak arye lobuka dopropsukce, boyanamsuka deiyok ara, ani. Ara, Allah arye nun apu yapu ati, ‘Winiryuk teleb mutuku arepnamsine,’ nyabuka nyalilamsuk touk, wini talak akunum arepmasilba, yanuka unmabe. Anggun mapu arye asipdesicopura, ayupu nyabuka, lak lenamlulume,” Musa birye nyabuk.

²⁴ Nyabukce, ayupu ton nyabuk. “Nun ni koproba Allah, el si Yahweh arye, ‘Aning ara, wininamlulume. Aning ara, pia kum wininamlulume,’ nyapdeipsuk. Ayupu nirya ati ara, aning ton nyapsuke. ‘Anggun Israel ninye nirya arye, na yupu moubuka talipmunce, dobolbanamlume.’ Tonda, nunce Allah ati, ‘Elda weik mambule, el siuk erenamabe’ tenen, pia winibipyopura, Allah arye nunti, aning-aning nirya teleb kipdeipnamsile. Elce nun Israel ninye nirya ati, pia kanye deibuka unamsile. Tonda el melipsilirye, kalikuka disiliba, pia telebuk ubuka, kam pia unamabe. Minop talak ap, do noutam talak ap, wini talak ap winisilye touk, aminyan talak babye, tuba wininamsile.”

²⁵ “Tonda Allah arye nyalisilye yupu nirya kekepmunce, kintinip deipmunce, moubuka talipmunce, winimunyopura, Allah arye kanye deipnamsile. Winiplirye, nun nirya ati, diksukum ninye uk kipdeipnamsile. Ara, nun ni Allah, el si Yahweh arye ‘Aning ara, wininamlulume. Aning ara, pia kum wininamlulume,’ nyapdeipsuk touk, dipkoprob akunum winibipyopura, elce nunti, diksukum un ninye kipdeipnamsile, nyapsine.” Musa birye, Israel ninye ati nyabuk.