Ulangan 5 - Eipomek

Allah arye, “Aning ara, wininamlume. Aning ara, pia kum wininamlume,” nyabukce, deiyok yupu 10 ning arebuk ati, nyabuk yupu

¹ Musa birye Israel nang nirya ati, “Anggun nirya bulubuka weklulume,” nyabukba, bulubikopura, anang ati nyabuk. “Se, na kayapo, anggun Israel nang nirya ati, na nyapnusin yupu ara, moubuka kekenamlulume. ‘Aning ara, winibuka-winibuka unamlume,’ nyan yupu ap, tonda ‘Aninguk wininamlume,’ nyan yupu nirya ara, arup arye nyapnusine. Ara, anyapmasin ning nukuka, bikmunce, ayupu uk, pia ati moubuka talipmunce, winipnin banamlume.

² Ayupu ara, nun ni Allah Yahweh, Sinai mutuku deice arye nunti, “Narye teleb kipdeipsinirye, pia talipsinirye, kum bataknamsine. Anggunda, winibuka-winibuka wininamlume,’ nyabuka, mambul yupu nyabukce, nun teleb winilina ati, nyalin yupu deice arye nyapdeiamsuke.

³ Ura, Allah Yahweh arye, ayupu nyamuka ara, nun apu yapu atibuk, kum nyapdeiamuk bukni, nun tuba wini talak unmap nang ap, tonda otalak upnin banamak nang nirya ati, “Narye teleb kipdeipsinirye, pia talipsinirye kum bataknamsine. Anggunda winibuka-winibuka wininamlume,’ nyabuka, anyalin yupu nyapdeiamsuke.

⁴ Allah Yahweh arye, anyalin yupu nyapdeibuk talak ara, nun ap, el ap, min dam unmapua ani, anggun urasin deipnamlum mutuku deice arye, weik uku buk dinmoka kan-kan arye, yanuka tikukce, ayupu ara, anggunti nyapdeiamsuke.

⁵ Ayupu nyanmok talak ara, weik uku buk dinmokba, anggunda aning eiplumce, ilil weik wamsuka anya arye, anggunda amutuku dam kum binamlume. Bukni, anggunda atam bulubuka kekenmalum buk, Allah otam tikuka, weik uku buk dimoka kan-kan arye nyanmoka ani, anggun dana tam, Allah dana tam, anoutamuk tikmasirye, naryuk Allah arye nyanmok yupu kekenmasirye, anggunti laka nyanmasise. Allah Yahweh arye, nyapdeiamsuk yupu ara, ani.

⁶ “Nara anggun ni koproba Allah Yahweh unune. Anggunda, Mesir mutuku ulamlum bukni, narye anggun bobuka, amutuku dam boyanamsise. Ara, Mesir mutuku nang arye, weik ikin pil dilamsikba, imun kanye bobuka, ulamlumce, dolona kumce, sik Mesir nang piluk, talye dolamlume.

⁷ Ati, anggunce, na Allah siuk ernamnulume. Yuk-yuk isa do, yuk mikip ning do, yuk mutuku nang arye, talye-talye ning ati, ‘Nun ni Allah ani,’ nyabuka, si erenyak ning ara, anggunce pia kum si erenamlume. Natibuk, si erenamnulume.

⁸ Aning atonun, anggun kanye arye, ‘Aning arye melipnamsilʼ tenen, ‘Winipnuyabe,’ tenebuka, anggun taruk arye memebuka, yuk ning ninye urasin atonun ubuka deipmunce, si kum erenamlume. Ara, im deice tam ulye ning do, tukwak mutuku noutam ulye ning do, mek pum noutam ulye ning do, tukwak mutuku ulye ning do, aning-aning nirya ara, urasin atonun memepdeipmunce, anggun arye aning si kum erenamlume.

⁹ Anggunce anyapmasin ning atonun ati, si pia kum erenamlume. Tonda, aning yala-yala nirya ara, si erena ati, anggun kutam tuku deice dipdongobuka, si pia kum erenamlume. Nara anggun ni Allah Yahweh ara, aning atonun kum unune. Nara, anggun ni koproba Allah unune. Nara, Yahweh unune. Anggunda, ‘Naʼ tenen nang ululuma anya arye, anggunce yuk talye ning ati, ‘Aning arye, melipnamsilʼ tenen, si eremunyopura, pia malye kanye bobuka, anggunti, yu weik upnamnile. ‘Na tenen nang ara, na si tonok ati, erenamniyake,’ tenenuna ati, nyapsine. Yata nang do nirya arye, atalye ning ati, si erebikirye, nati, ‘Nun like,’ tenebikirye, na yupu yanipnamniyak nang nirya ara, pia ati wenepnin balamnya ani, sik anang arye deibikiba, dadeipdanin, balamikca ani, daunamak mapu nirya babye, pia ati wenenamnarya. Ara, el li birye deipliba, el mi arye deipnamle mi, anye mi arye deipnamle nang, anang arye dadeipnamak mapu babye, ninye dika like winilye ning ap, tonda ninye dika dumu ning ap, dotalak unamak nang, sik dam ikin ning deibuka, wenenauk wininamne. Ara, talye ati kum bukni, nati, ‘Nun lik,’ tenebikirye, na yaninamniyak nang ati, nyapsine.

¹⁰ Bukni, yata nang do nirya, ninye nirya arye natibuk, ‘Allah elda, nun ni koproba ululeʼ tenen, nati kanye deipnikirye, na nyalinye yupu kekebikirye, aninguk talibuka nimalye arye, na amu tamuk upnin banamak nang nirya ara, pia kum bataknamne. Sik anang ara, batakna kumce, pia bico tenepnirye, melinauk usinirye, pia teleb kipdeipnamsine. Tonda, ‘Naʼ tenen, nang arye deibikiba, dadeipdanin banamak nang nirya ara, yupa pia weik nukman kumto, beribu-ribu otalak unamak nang ati, bico tenepnirye, pia telebuk kipdeipnamsine.

¹¹ Tonda, anggun ni koproba Allah, na Yahweh ara, deiyok ton kum upmalibuk, na si talye-talye pia kum sisinamninyake. Deiyok ara, nara anggun ni Allah Yahweh ununa ati nyapne. Yatanye do nirya, na si talye-talye, na si sisipnilinye bira, elda dipkoprob pia malye ning upmalul anya arye, narye anye biti, wenebuka opnamne. Ato nang ara, kum bataknamne bukni, anggun wenena ati, ikin ning anggun nong deice uk delinamsine.

¹² Tonda, nara anggun ni koproba Allah Yahweh arye, anggunti nyapsise touk, na si kina ap, na si erena ap ati, pil dona kumce, na si erenamnulum sum noutam, ‘Sabat sum ara, asum weik mambul sum,’ tenebuka, kintinip deipmunce, teleb ubuka winipmunce, dikdik senauk unamlume. ‘Yuk pil don sum nirya ara, asum atonun kume. Asum ara, pia mambul sum,’ tenepmunce, nati si erepnumunce, na siuk erenamnulume. Nara, anggun ni Allah Yahweh arye, ‘Asum ara, winibuka wininamlume,’ nyapdeipsise touk, aninguk wininamlume.

¹³ Anggun pil yala-yala nirya dona ara, like nakub barye (6) sum noutam ara, lo weik arepsine.

¹⁴ Bukni, like tekbarye (7) sum kunum uplyopura, talye pil dona kumce, dikdik sen sum anya arye, kintinip deipmunce, dikdik senamlulume. Asum tekbarye ning ara, nara, anggun ni koproba Allah Yahweh ati, na si eren sumuk unamake. Asum noutam ara, ninye tonoknye babye, pil ton kum donamlule. Ara, anggun babye, anggun mapu nirya babye, tonda anggun pil melin nang babye, atonun tonda anggunce talibuka weilulum domba ato ning babye, tonda, yuk mutuku arye, tikilyanganamak ninye asik nang babye, talye pil kum donamlume. Ara, anggun babye, anggun ap neika unamlum nang nirya babye ati, nyapsine. Winibuka winipmunyopura, anggun babye, anggun pil don nang babye, sik dikdik sen sum noutam ara, pil pia kum donamlume. Anggun nirya ara, dikdik senauk wininamlum touk, anang babye, atonun wininamake.

¹⁵ Aning wininamluma deiyok ton nyapnusine. Ara, anggunce pia moubuka teninalume. Ara, ‘Minop talak, nunda Mesir mutuku ulamupu talak nirya ara, amutuku nang, sik amu tamuk ulamupuba, ikin weik pil aruklamsik ati, sik talye pil melin nanguk ulamupu ani, nun ni Allah Yahweh, el mikip weik ap, el mikip weik taruk deice arye boyanamsuke,’ tenenalume. Ati ara, narye anggunti, ‘Wininamlume, anggun dikdik sen sum, Sabat sum kintinipnamnulume,’ nyapdeipsise touk, dikdik sen sum, Sabat sum yuk, wibuka kintinipmunce, na Allah ati, si erenamnulume.

¹⁶ Anggun mapu nirya arye, anggun ni yapu nirya ap, anggun nin yapu nirya ap arye, sik nyabikce yupu, moubuka kekemunce, aning talibuka wininamlume. Ayupu ara, narye anggun ni Allah Yahweh arye, nyapdeipsise touk wininamlume. Anggunce ayupu kekebuka winimunyopura, anggun kam una ara, keting tamun tonap, lo weik tonun arepnamsine. Tonda, anggunce ayupu kekebuka winimunyopura, anggun ni koproba Allah narye, ‘Ateleb mutuku arepnamsine,’ nyalin yupu deice arye, nyapdeiamsise mutuku ara, amutuku talibuka unamlum talak ara, teleb updeipsiniba, teleb kanye bobuka umunce, telebuk unamlume.

¹⁷ Tonda, ninye talye ona meme,

¹⁸ Kil ton ubula yona meme,

¹⁹ Ubula dona meme,

²⁰ Tonda, ninye yupu bokolin talak ara, deiyok kum upmalibuk, anggun kayapu yuk nang ati, ‘Sikda malye unmake,’ nyabuka, tilila yupu nyana pia meme.

²¹ Tonda, anggun kayapu yuk nang domikce kilapu ati, kanye deipmunce, ‘Se, akil ara, na ton doptinye,’ tenena pia meme. Tonda aning atonun, anggun kayapu nang, sik asik do, wa tuku do, sik asik pil melin kil do, ninye do, tonda yuk nang arye weilamak domba ato ning do, keledai basam do, sapi basam do, yata yala ning nirya, anggun kayapu nang arye weilamikce ning ati, ‘Se, nara aning doproptinye,’ tenena pia meme. Nun ni koproba Allah Yahweh arye, anggun Israel yala nang nirya ati, ayupu nyapdeiamsuke.

²² Ura, ayupu nirya ara, anggun nirya, weik mutuku dup Sinai mutuku dam bulupmalumce, yanuka weklum talak ara, Allah Yahweh arye, anggunti, “Aning wininamlume. Aning ara, pia kum wininamlume,” nyapdeiamsuk ning ara, ani. Ayupu nyapdeiamsuk talak ara, dua kan-kan ap, tonda, weik uku buk dimoka ap, lukunyan atonun bukni, pia kunuknak noutam ap, awinilye ning noutam arye, Allah el yupu ara, liman lelamle touk, weik yupu deice arye nyanmokba, anggun ton kekamlume. Ara, anggun dam, yupu yuk ning ton kum nyapdeiamsuk bukni, anggun dam ara, “Aning wininamlume. Aning ara, pia kum wininamlume,” nyan yupu uk, nyapdeiamsuke. Nyapdeipsuk yupu ara, Allah el taruk arye, keil pala bitinye deice sekdeibukce, na Musa dam areamnuke. Musa birye, sik Israel nang ati, nyabuk.

Allah arye, Israel nang sik dam yayukba, ilil weik uamuk ning ati, nyabuk yupu

²³ Musa birye, sik Israel nang ati, ayupu ton dukdongobuka nyabuk. Atalak ara, amutuku nirya uku dinmokce, weik dua kunukmoka kan-kan noutam arye, Allah el yupu nyanmokba, kekeplum talak ara, anggun Israel nang, yala yuk-yuk ulamlum nang ap, nun Israel nang nirya ati, ninye deiyok talibuka ulamlum nang ap nirya ara, na damuk yanamlume.

²⁴ Yalumce nyamnulume. “Se, nun ni Allah Yahweh, el mikip weik ap, weik dirina ap, weik mambul pil dolul ning ap ara, akunum laka kipmalamba, eipmabe. Atalak ara, weik uku buk dimaua kan-kan, Allah arye yanuka tikukce, yupu nyapdeiamsukba, nun kekepmapu. Tonda, arup arye, Allah el yupu nyapmalba, ninye ton kekepmap bukni, nun kam tuba unmabe.

²⁵ Bukni, yata deiyok ati, nunda asukumuk dipnuyap do? Ara amutuku noutam ara, weik uku buk dinmala anya arye, ‘Auku arye dipsiliba, dipnamabeʼ tenen, ilil upmasile. Tonda, nun ni koproba Allah Yahweh, elce tonap nun dam yanuka, yupu nyapliba kekebipyopura, adiparyuk dibibyake.

²⁶ Aning ara, talye ati kum nyabape. Deiyok ara, yata nang do, yata kam unyak ning yala-yala nirya do? Allah Kam Una Deiyoknye birye, weik uku buk kan-kan noutam arye, el yupu nyapliba, ninye kekebikirye, kam upting do? Kum, ati, nun babye, ‘El yupu ton nyapliba, kekebipyopura, nun ton adiparyuk dibibyakʼ tenen, ilil upmasila ati, nyapkiyabe.

²⁷ Ati ara, wini talak Musa anda, Allah Yahweh el dam bimince, nun ni Allah elce nyapsilye yupu ara, ancuk moubuka kekepmince, nun dam yanuka nyapnamsilyame. Yata yupu nyapnamsilan do nirya, elce an dam nyapdeipmakil yupu nirya ara, kekepmince, nun dam nyapnamsilyame. Nyapsiminyeba, dipkoprob ayupu nirya, nun kekebibirye, moubuka talibibirye unamabe.” Anggun Israel nang arye nyamnulume. Musa birye nyabuk.

²⁸ Nyabukopura, ayupu ton dukdongobuka nyabuk. Anggun Israel nang arye, nati ayupu nyamnulum ning ara, Allah Yahweh arye kekebuk. Kekebukce, Allah arye tamubuka, nati nyapnuke. “Anang sikce, anti nyapmakiyak yupu nirya ara, na akunum kekepne. Sik nyapmak yupu nirya ara, dipkoprob yupu nyapmake.

²⁹ Se, sik Israel nang ara, arupce, ‘Allah arye nyapmal yupu kekebibirye, moubuka talibibyeura, pia aunamabe,’ nyapmaka ara, sikce tuba aning atonun kanye bobikirye, tuba winiptingura, narye sikti, teleb updeipsiniba, sikda pia teleb unamake. Ara, na yupu moubuka kekebikirye, natibuk, ‘Se, Allah ara, mambul weiknye ululeʼ tenen, ilil upliba, natibuk si erebuka ukirye, na ap, na nyapman yupu ap atibuk kekebuka, nimalye arye, amu tamuk upnin bacopura, anggun ap, anggunce deipnamlum nang nirya ap ara, pia ati, telebuk unamake.

³⁰ Ati ara, wini talak an adiparyuk, sik anang nirya ati, sik dam binuka, ayupu lak nyalbinulyame. ‘Anggun sapi bol arye doltakne tenda aik, yuk-yuk aumunye touk, tamubuka bilulume,’ nyapminyeba, binunyake.

³¹ Sik aik yuk-yuk tamubuka binamak bukni, Musa anda, na ap neika asukumuk unamaname. Asukumuk tiknulyame. Asukumuk unimirye, narye anti, ‘Aning ara, wininamlume. Aning ara, pia kum wininamlume,’ nyapman yupu ap, ‘Teleb winina ara, ani. Aninguk talibuka, pia wininamlume,’ nyapnamasin yupu ap ara, an dam lak nyapnukine. Anyapkin yupu ara, ance sik Israel nang nirya kekenak binuka, petereminba, kekebuka biknamake. Bikikirye, narye sikti, ‘Ateleb mutuku ara, arepnamsine,’ nyapnamsin mutuku ara, obinuka unamak talak babye, ayupu uk moubuka talibikirye, pia ati wininamake.

³² Ati ara, anyapnusin yupu ara, ance, Israel nang ati, lak nyalbinulyame. Winipminyopura, an ap, anggun Israel nang nirya ap, aning nirya moubuka talipmunce wininamlume.” Allah arye Musa biti, nyabuk. Nyabukba, Musa birye, sik Israel nang dam binuka lak nyabuk. “Na kayapu Israel nango, nun ni koproba Allah Yahweh arye, akunum nyapdeipmasil yupu nirya ara, moubuka kekebibirye talibipyopura, elce teleb kipdeipsiliba, telebuk unamabe. Allah elce diksukum yupu nyalisilye ning ara, batakuka moupdopmunce, ‘Aning-aning, yuk ning ton winipnun do?’ kum tenebuka unamlume.

³³ Anggunce si erelamlum Allah, el si Yahweh arye anggunti, “Aning wininamlule. Aning ara, pia kum wininamlume,’ nyapdeipmasil yupu nirya ara, aninguk moubuka talipmunyopura, kam unamlume. Tonda, Allah arye anggunti, winiryuk arepmasil mutuku binuka, amutuku nirya malye kibuka, talipmunce, unamlum talak ara, ayupu uk talibuka winimunyopura, anggun keting tamun yupa weik tonun arepsiliba, pia telebuk unamlume.” Musa birye, sik Israel nang ati nyabuk.