Ulangan 34 - Eipomek

Musa dibuk yupu

¹ Musa bira, weik lu mutuku noutamak, mutuku si Moab mutuku batakukabukce, yuk mutuku si Nebo mutuku dup welebuk. Nebo mutuku dup bukni, mutuku dup pia deice tam ara, asukum si ati, Pisga mutuku nyalamik. Pisga mutuku dup welebuk. Pisga mutuku dup ara, Yordan mekin bukni, keting panalyangan tam ulule. Asik si Yeriko mutuku ara, ninye asik weik domikak, Yordan mekin otam keting wekelbalamle tam ulule. Pisga mutuku dup arye, keting wekelbalamle tam ara, ninye asik dolamikak Yeriko mutuku elinyake. Amutuku deice akunum welebukopura, Allah arye, Musa biti nyabuk. “Ura, narye arepnamsin mutuku nirya ara, keting wekelbalamle tam, otam oupmala atia. Omutuku nirya dipdelyame,” nyabuk. Nyabukura, Musa birye, Nebo mutuku dup deice bukni, otam eibuk mutuku ara, ani. Ara, utam ara, Laut Garam mekwen aubuk bukni, amekwen deice tam mutuku si, Gilead mutuku tam eibuk. Abukni, pia dipdongobuka itam mutuku, pera tonun Galilea mekwen deice tam bukni, ninye asik dolamik mutuku si ara, Dan mutuku ton eibuk. Amutuku nirya eibuk.

² Tonda, yuk mutuku ton eibuk ning ara, ani. Ara, pera mutuku eitam ara, Yordan mekin bukni, keting wekelbalamle tam, Dan mutuku bukni, otam ara, mutuku si, Naftali mutuku tam ton eibuk. Tonda, Naftali mutuku deice tam ubuka, outam ara, mutuku si, Manasye yala nang unamik mutuku ton eibuk. Anyapce utam ton, mutuku si Efaim tam, Efraim yala nang unamik mutuku ton eibuk. Anyapce utam ton, weik Garam Laut mekwen dam bukni, otam keting wekelbalamle tam, Yehuda yala nang unamikak, Yehuda mutuku tam ton eibuk. Anyapce dipdongobuka otam, keting wekelbalamle tam, weik laut mekwen ton oubuk buk, atam noutam uamuk mutuku nirya eibuk. Ara, Pisga mutuku dup bukni, keting wekelbalamle tam, weik laut mekwen otam anoutamak ulul mutuku nirya eibuk.

³ Tonda, amutuku ton eibuk. Ara, Yehuda mutuku atam upliba, utam dabu tam mutuku ton, mek kum ulul mutuku si, Negeb mutuku tam ton eibuk. Tonda, ninye asik weik dolamikak si ara, Yeriko asik mutuku ton eibuk. Amutuku ara, Pisga mutuku dup arye, keting wekelbalamle tam bukni, mitik alip tam uamukba eibuk. Yeriko mutuku ara, teleb lyu mutuku uamuk. Tonda, Yeriko mutuku ara, yo si korma yo duk moulamle yo weik palule. Yeriko mutuku anirye dipdongobuka, pera utam yukak dabu mutuku noutamak ton, ninye asik si ton, Soar mutuku uamukba, eibuk. Yeriko anirye, utam noutamak ara, Garam Laut weik mekwen uamukba, amekwen utam sirya tam ara, ninye asik Soar mutuku uamukba eibuk.

⁴ Allah arye Musa biti, amutuku-amutuku nirya kapdeibukba, Musa birye eibukopura, Allah arye nyabuk. “Narye Abraham ap, Isak ap, Yakub ap ati, ‘Amutuku arepnamsine,’ nyapdeiamse mutuku atia. Ara, narye anggunce, ‘Deipmunba, dadeipdanin banamak ninye ati, amutuku nirya dobuka arepnamne,’ nyamse mutuku atia. An Musa biti ara, kapdeipmakinba, an asing arye amutuku eipmalam bukni, anda Yordan mekin koubuka, otam ulul mutuku nirya ara, kum binuka unalame. Asukumuk dipnalame.” Allah arye Musa biti, nyabuk.

⁵ Allah arye, min yuma talak nyapdeiamuk touk, Allah el si Yahweh, el pil donanye Musa, Moab tam noutamakuk dibuk.

⁶ Musa dibukopura, Allah el si Yahweh arye, Musa el nong bobuka, Moab mutuku dup bukni, mutuku si ara, Bet-Peor mutuku weibuk. Bet-Peor mutuku atam, otam lu uamukak noutamak weibuk. Bukni, aweibukak ara, dotalak arye dipdongobuka, wini talak babye ton, Musa weibukak ara, pia kum elinyake.

⁷ Musa kam ulamuk talak ara, keting tamun yupa weik ulamuk ara, yupa dumbarye kepdopnye nakub dikin (120) tahun deice ulamuka ani, dibukba, weibuk. Musa dipnamuk talak ara, el asing tuba teleb uamukce, teleb arye ninye elilamuk. Tonda, el nong ap, el mikip ap, tuba teleb uamuk, malye bol kum bomuk diparyuk dibuk.

⁸ Musa dibukopura, Israel ninye arye, Musa el dibuk ning ati, Moab mutuku noutam bulubuka, like yupa tonok kepdopnye pamubarye (30) sum noutamak nirya arye, Israel ninye nirya bulubuka engelamik. Atalak engelamika ani, like yupa tonok kepdopnye pamubarye (30) sum akunum kibukopura, batakik. Sikce Musa biti engelamik ning ara, sirya batakik.

Musa ulamuk ning ati, nyabuk yupu

⁹ Ura, Musa tuba kam ulamuk talak noutamak arye, ‘Anye birye, na donun pil punuplirye dopnamle’ tenen, Yosua wipdeibuk. Yosua el li si ara, Nun nyalamik. Anye el mi Yosua biti, Musa birye, el dolamuk pil punubuka dona ati wibukce, el taruk Yosua deice deibukce, wipdeibukura, elti Allah morobuk. Winibukura, Allah arye Yosua bira, weik kel kina deiyok ning weik areamukba, weik kelnye ulamuk. Ati, Israel ninye arye, Yosua nyalamuk yupu kekelamikce, melibuka balamik. Ara, Allah arye, ‘Aning wininamlulume,’ nyabuka, Musa deice nyapdeibukba, Musa birye laka nyalamuk yupu nirya, kekebuka dobolbalamik. Allah arye Yosua deice meliamukba, Israel ninye bobuka balamukba, sik Israel ninye, el aminyan tam yangalamik.

¹⁰ Musa ara, Allah ap mining dam arye, yupu talilamdiknye ulamuk. Israel ninye noutamak arye, Musa ulamuka atonye ton, tonap pia kum ulamik. Musa el tonoka. Allah yupu laka nyalamik nang ton, Israel ninye noutamak ulamik bukni, Musa atonye ton, pia kume.

¹¹ Allah arye, Musa wibuka dopdeibukce, el mikip deice meliamukba, Mesir mutuku nang dam, Musa birye ninye kum winipmanto pil ap, ninye kum winipmanto ning ap, mambul pil dolamuk. Winilamuka deice arye, Mesir mutuku ninye nirya arye, ‘Se, dipkoprob Allah arye pil donmasile’ tenen, kel bikamik. Tonda, winilamuka deice arye, Mesir ninye deiyoknye Firaun ap, el amu tam ulamik deiyok nang ap, el tam ninye nirya ap, ikin weik ulamikce, amutuku ulamik ninye nirya, imun kanye bobuka ulamik.

¹² Tonoknye babye ton, Musa pil dolamuk touk, kum dolamik. Israel ninye noutamak ninye kum winipmanto ning ap, ilil weik kipdeipmanto ning ap, mambul pil kum dolamikba, kum elilamik. Musa ulamuk touk, yuk nang atonun nang ton, pia kum ulamik, ton kum unyake. El tonok ulamuk.