Ulangan 32 - Eipomek

Musa birye, mot weibuka sebuk yupu

¹ Musa birye, mot sebuk yupu ara, ani. Im tam ulul ning nirya, na yupu nyapnuna ati, anggunda kekepnululume. Tonda, tukwak ulul ning ap, ninye ap, na yupu nyaniba, anggun nirya kekepnululume.

² Na peterepnusin yupu ara, weik melinamsila anya arye, mok purwu saklamla atonun upnamsile. Tonda, kurye dei saklirye, maning deice palilamla atonun upnamsile. Tonda, winiryuk koupmakce maning tuku deice, mok purwu saklamla atonun upnamsile. Tonda, na peterepnusin yupu ara, winipnamsile. Winipmanto ara, din yala kouamikiba, mok weika arye cepliba, aning bongoplirye, pabuka duk teleb moulamle touk, na peterepnusin yupu ara, melinamsile.

³ Nun ni koproba Allah, el si Yahweh nyanamne. Tonda, nun ni koproba Allah ara, weik mambul ulul ning ap, el mikip weik ulul ning ap ati ara, ‘Elda pia telebe,’ nyabuka, el siuk erebibirye, unamabe.

⁴ Nun ni Allah, yuk-yuk kum ulule. Elda keil pala yangalamla atonunuk ulule. Weik keil pia aulye touk, Allah babye, pia aulule. El tenena ap, el winilye ning ap ara, yuk-yuk kum ulule. El pil dolye ning ara, pia telebuk winilule. Tonda, el winilul ning nirya ara, dipkoprob kibuka diksukumuk winilule. Allah el pil dolul ning ara, ‘Ton tam nang, teleb kipnirye, ton tam ara, namin kipnamne,’ kum tenelirye, el nyalul touk, nirya pil dolule. Malye ning tonok babye, ton kum winiptue. El winilul ning nirya ara, yamubuka diksukumuk winilule. Ninye winilamak touk, elce teleb kibuka, yupu diksukumuk bokolisulule. Ati ara, el si erenyabe.

⁵ Winilul bukni, wini talak ninye ara, el dam malye ning wininyak nang ara, el mapu tuba kum unyake anya arye, alye weik asa unamake. Wini talak unyak ninye ara, Allah kum tenelye bisik, kwalin bisikuk yakce ninye arye, malye weik wininyake.

⁶ Allah, el si Yahweh arye anggunti, teleb asa arye meliamsuk bukni, anggunda elti, tamubuka amalye winiplum ning ara, yata ati do? Amalye winiplum ning ara, teleb do? Anggunda, pia walwal nang atonun, kanye tenelina kumce, kel kum bikmanto ninye atonun winiplume. Anggun ni koproba Allah arye, anggun Israel ninye ati, ‘Na tenena ninye unamak’ tenen, kum kwepdeipsuk do? Elda Israel ninye kwemdina deiyoknye kum ulul do?

⁷ Ati ara, minop talak anggun nong ninye winilamik ning, tuba tonap tenilenamlulume. Minop talak ulamik ninye ati, tenilenamlulume. Tonda, anggun kel kina ati, anggun ni yapu ap, sik wisi-wisi nang ap, ulamik talak Allah arye pil dolamuk ning ati, asipdemunba, sikce laka nyapnamsiake.

⁸ Atalak ara, mikip ning nirya deice tam ululnye Allah ara kwelinanye, ninye yuk-yuk aulamik touk, sik talipnamik ning nirya bokuka areamuk. Tonda, sik apu koproba Yakub bukni, el si ton Israel, el mapu aulamik touk, nukukabukce, sik talibuka unamik mutuku babye, yuk-yuk bokeibuk.

⁹ Ura, Allah arye awinibuk ning deiyok ara, el mambul tenelye ning ara, elce wibuka meliamuk ninye uka. Allah el ‘Naʼ tenen ning ara, Yakub elce deibuka, dadeipdanin balamik ninye diamuk. Ara, Israel yala nang ara, Allah elce wipdeibuk nang uka.

¹⁰ Sik anang ulamik mutuku ara, telebak kum bukni, mek ap, ninye ap, kum ulamik mutuku noutam binuka, dililamukak aninye eibuk. Amutuku ara, aning-aning nirya kouptinga babye, kum paptue. Pata mutuku ulamikba, Allah arye binuka, anang eibuka melilamuk. Allah aryuk sik patalamuk ning nirya ati, melibuka arelamukce, tuba kaliklamuk. Ara, ninye arye, sik asing duk ati, ‘Tuluksilyak’ tenen, pia moubuka kaliklamak touk, Allah arye Israel ninye ati, pia moubuka kaliklamuk.

¹¹ Winilamuk talak ara, winipmanto ning ton nyapnusine. Ara, bip maka mi waluk bukamlibuk, el lin birye, lakuka bana ati, yan nenena ati winiplirye, aik domlya sirya tam yanuka buklirye, benbenep dongopliba, el mi lukdanuka, dung-dung aplirye, bamlang-lang aliba, el lin birye, pol deice deibuka, lakalamle atonun, Allah arye Israel ninye ati, pia moubuka kalikuka melilamuke.

¹² Israel ninye tuba-tuba melibuka bobalamuknye bira, yuk talye Isa arye kume. Allah el dem arye kalikuka melilamukce, neika ulamik. Yuk mutuku ninye arye, si erelamik isa arye kume.

¹³ Allah arye meliamukba, Israel ninye arye, mutuku welebuka balamik. Allah arye Israel ninye ati, melilamuka ani, sik bidamang wa wiamika aning-aning weika arye, duk moubukba, libuka dilamik. Tonda, aning-aning kum mutuku, pia malye mutuku noutam ulamik bukni, Allah arye melibuka arelamukba, Israel nang ara, sik patalamuk ning ayala-yala nirya, teleb ning dobuka dilamik. Tonda, Allah arye meliamuka deice arye, sik elamikba, keil kan-kan arye mong mek elamikce, mong mek kwebuka dilamik. Tonda, keil weik tuku deice, sik zaitun yo koulamikba, Allah arye meliamukba, zaitun yo duk moulamukba, el duk dakuka, minyak ton purubuka dilamik.

¹⁴ Tonda, Allah arye melilamukba, sik sapi basam ap, kambing basam ap, moum yung mek weik aubukba, dololamikce dilamik. Tonda, domba basam ap, kambing ap, nong weik ning areamukba, obuka tup diamuk dilamik. Ton ning ara, Basan mutuku domba yim ning, pia teleb ning ton areamukba, obuka dilamik. Tonda jagung atonun din ning, gandum ap, tonda anggur mek teleb ninguk, areamukba dobuka dilamik.

¹⁵ Allah el ‘Naʼ tenen, ninye, Israel nang ara, aning-aning nirya dilamikba, sik nong nena ara, nong kalimna dongopna arye, weik arye nelamik. Aning-aning telebuk ulamuka ani, sik Israel ninye arye, malye kibuka, minop talak arye, sik kwepdeiamuknye Allah ati, ‘Nun like’ tenen, batakik. Tonda, sikti, lyepdomuknye Allah ara, el si yanibuka bataklamik. Ninye arye, ‘Yu nang arye opsicak’ tenen, tonda, ‘Weik mutuku pala keil leleipnamsil’ tenen, akeil donga duknulbalamik touk, sik lyena deiyoknye Allah ara, weik mutuku yangan keil atonun ulamsuk bukni, sikce elti, bataklamik.

¹⁶ Allah ati bataklamikce, amutuku noutamak ulamik ninye si erelamik isa mer, pia malye-malye isa mer, sik siuk erelamika deice, Allah arye Israel ninye ati, yu kilina ap arye, weik ulamukce, malye kanye bolamukce, sikti, kanye wililamuk. Isa mer nirya ati, pia malye unyaka anya arye, Allah arye, ‘Aning ara na like,’ tenelamuke.

¹⁷ Tonda, Israel ninye arye, Allah ati kum bukni, talye isa mer si ati, sik kam un ning obuka, arelbalamikce, isa mer siuk erelamikce, ulamik. Israel ninye arye, Isa Mutuku Dongonye si erelamik ning ara, minop talak arye, kel kum bikamik. Aisa si nirya ara, winiryuk talak amutuku nang arye laka nyalamikba, kel bikamik. Aisa mer nirya ara, Israel ninye, sik apu yapu arye, aning pia si kum erelamikba, sikti, ilil kum ulamuk.

¹⁸ Mutuku yangan keil ara, pia bulamle touk, anggun ni koproba Allah ara, pia meliamsukce, kum batakamsuk bukni, anggun Israel ninye kwepdeiamsuk Allah ara, bataklumce, luba kiplume.

¹⁹ Anggunda, Allah el mapu ap, el kilmapu ap, atonun ulamlum ninye bukni, Allah bataklumba, Allah eipsukce aning ara, anggunti kanye talimauk dilamukba, yu ubuka, anggunti, ‘Dauplye’ tenen, bataksuke.

²⁰ Yu ubuka ati ara, Allah arye nyapsuk. Sik dam arye, na nong ara duknupniba, sik tonap kum eipnamniake. Winipniba, sikda upra balamikca, sirya talak ara, ‘Yata wiripnamak do?’ tenen, dinamne. Sik bataknamna ara, talye ati kum bukni, deiyok ara, sik wini talak unyak nang ara, dipkoprob ning ton, kum wininyake. Malye mapu arye, sik ni yapu kum kekekirye, malye ninguk winilamak touk, atalak ninye arye, na batakuka, na nyapse atonun kum dukdongobuka unyaka ati, narye sik bataknamne.

²¹ Sik dipkoprob Allah kum bukni, Isa Mutuku Dongonye si erenyaka deice, na ning ara, ‘Se, yata ati, na siuk tuba kum erenyake’ tenen, sikti bouku sukupnukce, malye kanye bonune. Tonda, talye ning, Isa Mutuku Dongonye si erenyaka deice arye, yu weik unulule. Sik wininikca ati ara, na minop talak kum wiamse ninye bukni, talye yala ninye melipnyopura, Israel ninye arye, ‘Se, yata ati do? Nun kum melisulul bukni, yuk talye yala ninye melilula ara, yata ati do?’ tenen, talima wilibuka, malye kanye bonamake. Aning atonun, yuk yala ninye ara, dipkoprob nati, teleb ubuka, min kel bikamnik ninye bukni, sikti melilamniba, Israel ninye arye, ‘Yata ati do?’ tenen, yu upnamle.

²² Aning nirya winipnamana deiyok ara, ani. Na yu ara, uku buk dilamle atonun kibuka, dipra balamlya ani, akunum dibuka binamik nang mutuku, tukwak amu tam babye, dipra banamle. Na yu, uku buk atonun ning ara, tukwak mutuku nirya babye, ninye koulamikce ning nirya babye, ninye talinyak ning nirya babye, dipnamle. Ton ning ara, weik mutuku nirya, tuku pum tam babye, uku diplirye, sirya dakuka anirya dipnamle. Ara, ninye arye, ‘Amambul ning min kum winipmanto ning,’ tenenyak ning nirya ara, narye kum kipdeipnamne. Allah arye nyabuk.

²³ Nyabukce, ayupu ton nyabuk. Ninye arye, sik mal olan nang ati, mal sik dam yanuka dobikirye, maralamak touk, narye tup-tupa pia kanye imun ninguk, weika arye arepneba, dolonamake.

²⁴ Winilamunya ani, narye arepneba, wa win dam kipmanto ning kum kiplyopura, sik din pataplya deice arye, sik nong mitang upliba, uk diplya deice arye dibinamake. Tonda, narye arepneba, weik kanye imun uk talilamlye buk, narye batakniba, dibinamake. Tonda, narye arepneba, yuk-yuk ning, bai mutuku unyak ning arye, anang obuka dipnamake. Tonda na arepneba, kel-kel an tuku deice balamle yu kwatima arye, si topliba, ninye weika arye dibinamake.

²⁵ Tonda, narye arepneba, sik aik dam bisik noutamak nirya, sik mal olan nang arye, parang ya arye, opdanin bakirye, sik mapu weika arye dibinamake. Sik mapu kum upnamake. Winibikiba, asik unmakce nang nirya ara, ilil unamle. Wininamak talak ara, wel kilapu ap, wel nang ap, wisi nang ap, pia mitik mapu ap, sik nirya ara dibikiba, kum daneipnamne.

²⁶ Narye nyamse, “Narye sikti, yakdonokniba, sik nirya kum upnamake. Yuk nang nirya arye, sik si tuba kum tenenamake. Anang ati luba kipnamake. Sik unyak ning, tonap tukwak nang arye, kum teneipnamake.”

²⁷ ‘Wininamne,’ tenepsirye nyamse bukni, narye Israel ninye nirya obuka sirya dakniba, sik mal olan nang arye, walwal ubikirye, malye ubikcopura, ‘Allah el si Yahweh ara, mikip weiknye binye, nyanyak bukni, Yahweh arye aning kum ulamuke. El mapu Israel ninye nirya, nun babye mikip aniryuk obupe,’ nyabuka, ‘Kanye erebikcak’ tenen, teniltonune.

²⁸ Sik Israel ninye ara, teleb ubuka kum tenenyake. Weik kel nang kum unyake. Sikce, ‘Aning winiptibye, aning ara, kum winiptibye. Teleb ning ara ani, malye ning ara ani,’ tenen, kel kina ara, kum unyake.

²⁹ Se, sikce, ‘Tuba malye winibipyopura, aminyan talak imun kanye bobuka unamabe’ tenen, kel kiptingopura, teleb uptinge bukni, aning kum kel biknamake. Aning ara, dipkoprob kel kiptingopura, teleb upnamting bukni, kum upnamake.

³⁰ Tonoknye biryuk, seribu yin nang ati, dobol bitu do? Aning atonun, bitinye nang aryuk, 10.000 yin nang ati, obisiptiringce, ‘Minopce bindoplulume,’ nyaptiring do? Kume, aning ara, kum winipmanto. Dipkoprop sikti, Allah arye anang ara, ‘Dauaplye, sik oploptinge’ tenen, kum nyaplyopura, aning kum winipmanto. Anggun ni Yahweh arye, ‘Israel ninye oploptinge’ tenen, kum nyaplyopura, yuk mutuku nang arye, kum obuka sirya daktinge. Weik mutuku tikne keil, pia aulamle touk, sik ni koproba Allah babye, pia kaliklamuk bukni, Israel ninye, sik wenena ati, Allah arye sikti batakamukba, sik mal olan nang arye, obuka sirya daklamike.

³¹ Ati ara, kel kiplulume. Yuk mutuku nang arye, si erenyak ning ara, mikip kum ning bukni, nun ni koproba Allah mikipnye, weik mutuku yangan keil atonun ulule. Sik talye si erenyak ning atonun kume. Israel ninye, sik mal olan nang babye, aning nyanyake. ‘Kume, Allah el si Yahweh ara, dipkoprob mikip weiknye, el atonunye, yuk ton kum ulule,’ nyanyake.

³² Winipmanto ning ara, nyapnune. Dipkoprop malye anggur tapu, yating malye ning aryuk palamle ning atonun, apia malye ulamik ninye babye, malye nang aryuk delilamik. Sik apu yapu ara, Sodom mutuku nang atonun ulamik. Aning atonun, malye anggur tapu ara, malye tukwak arye palamle ning atonun, sikda pia malye mutuku, Gomora mutuku atonun mutuku arye yangalamik. Sik winilamak ning ara, pia malye anya arye, winipmanto ning ara, anggur tapu duk ara, teleb mek kum ulamle bukni, ninye on mek atonun aulule. Sik anggur tapu duk ara, tou kum lelul bukni, sike weik lelulba, dipmanto kum unyake.

³³ Aning atonun, sik anggur mek kintininyaka ara, ninye on kwatima duknubuka, mapmalya ani, ninye si toplirye, yu maka ninye nong tam dongopliba, ninye dibilamaka atonun unyake. Aning nirya deiyok ara, sik wininyak ning nirya ara, pia malye wininyaka ati, nyapne.

³⁴ Na Allah arye nyapsine. Narye sikti, wenebuka winipnamne ning ara, tuba kum tenenun do? Aning ara, kum bataknamne. Ninye arye, sik dekna weik ning, ‘Kum dasilyak’ tenen, pia teleb touk dokola deibikirye, kunci bisik bublan dikilongolamaka atonun, sikti, wenepnamne ning, tuba tenenune. ‘Atalak ani,’ tenepnyopura, anang wenepnamne.

³⁵ Wininyak nang, sik menenga ara, na Allah arye, sik malye pil donyak atonun kiklibuka, weik arye wenepneba, sik weik imun kanye bobuka unamake. Ninye kot dam arye, sakuka olamle atonun, sik malye winilamaka ati, aminyan talak, narye anang ati, wenepnamne. Sik anang on talak ara, akunum dam upmale. Anang opnirye, sirya daknamne talak ara, minopce yanamle, akunum dam kipmale. Allah arye nyabuk.

³⁶ Allah el si Yahweh arye, el mapu sik malye ning ati, yupu lipsisikuka, wenenamle bukni, sik mikip kum daliba, anang akunum kum danin bacopura, ila tuba tonap, bico tenepnamle. El mapu, yuk nang amu tam unyakce, talye piluk donyak nang babye, ura, sik bidamang kanye aryuk, pil donyak nang babye, kum dacopura, Allah eiplirye, bico tenepnamle. Bico teneplirye, el amu tam unyak nang, Israel ninye ati, tuba tonap, kanye namin upliba, bico teneplirye, lyepnamle.

³⁷ Winiplyopura, Allah arye el mapu ati, “Sikce Isa Mutuku Dongonye ati, ‘Nun ni koproba, mikipnye,’ nyabuka, si erelamlum ning ara, wini talak danak unyak do? ‘Ninye opsikcak’ tenen, mutuku yangan keil donga, ninye duknulamak touk, anggunce talye ning ati, ‘Melipnamsiyak,’ tenelamlum bukni, wini talak ara, aning dan do?” nyabuka asipdenamle.

³⁸ “Anggun Isa Mutuku Dongonye si erena ati, Isa Mutuku Dongonye si erelamlumce, kam ning obuka, meta dobuka arelbalamlume. Tonda, aisa si eren ati, anggur mek ap dobuka, arelbalamlum bukni, wini talak ara, aisa yukupmunba, sik adiparyuk yanuka melipnamsiyak do? ‘Kanye imun ning yangasulul’ tenen, atalye ning yukupmunba, yanuka melipsiting do, kum do?” Allah arye nyapnamle.

³⁹ Wini talak ara, anggun nirya arye, na kel biknululume. Dipkoprop anggun ni Allah ara, na tonok unune. Yuk Allah ton, pia kum ulule. Ati ara, naryuk kam una deiyok ap, dipna deiyok ap, aresunune. Aning atonun, teleb winina ap, malye winina deiyok ap nirya ara, naryuk aresunune. Narye, ‘Opnamsine,’ tenepnyopura, opnamsine. ‘Kwetepnamsine,’ tenepnyopura, aninguk wininune. Yata ning do nirya, ‘Naryuk talibuka wenepnamne,’ tenepnyopura, yatanye birye lyepsutu do? Kume, yuk nang arye ton, yupu kum seknitingce, kum lyepsitinge.

⁴⁰ Tonda, ninye nirya eibikirye, ‘Se, pia dipkoprob nyapsile, tenepnamniyak’ tenen, na taruk erepna arye, dipkoprob nyapne. Dipkoprop, nara, Kam Una Deiyoknye bira, na tonok unune. Nara, pia unamne.

⁴¹ Ati ara, narye sik wenena ap, ona ap ati, parang ya kintinipniba, parang ya yu arye, mele dangdanganamle. Aya bopnamne ning ara, ‘Allah ara, nun like,’ tenenyak ninye ara, wenebuka ona ati, kintinibuka deipnamne. Sik malye nang arye nati, malye winilamnik touk, sikti wenebuka, yupu lipsisikuka bokeipnirye, oplopnamne.

⁴² Sik nirya arye nati, ‘Nun like,’ tenenyak ninye ara, opnyopura, na mal deice ara, sik ininguk upnamle. Na parang ya arye, sik opnyopura, sik nong nirya sekuka, sirya daknamne. Winipnamne talak ara, sik tapu koubuka, wenena aik dongolamik ninye babye, opneba sik ining banamle. Tonda, na mapu Israel ninye ati, sik mal olan nang, sik deiyok nang ara, ‘Pia yin talin nang unamap’ tenen, kisok potong kum kolamik nang ati, sik ngang seklopniba, sik kisok daksaklibuk, sik ining binamle. Allah arye nyabuk.

⁴³ Ati ara, anggun mutuku-mutuku nirya ululum ninye ara, anggun nirya arye, Allah el mapu ap, kanye deibuka, kil-kil asa arye unamlulume. Deiyok ara, malye nang arye, Allah el pil don nang weik olamikba, sik ining balamuk. Ati ara, Allah arye, amalye nang, sik wenena ati, oplopnamle. Allah arye elti, ‘Nun like,’ tenenyak ninye ati ara, yu tenebuka onamle. Elce sikti, wenebuka opnamle. Ara, malye nang arye, Allah el mutuku ap, el mapu ap ati, malye weik winilamik ning ara, Allah arye lipsisikuka doplirye, lyepnamle. Aning nirya, teleb kipdeipnamle. Musa birye, amot yupu sebukba, Israel nang arye kekebik.

⁴⁴ Musa birye, amot sebuk talak ara, el ap, ninye si Nun, el mi Yosua ap, Israel ninye dam neika yayik. Musa birye, Allah ati teleb kilinmokce, amot senmokba, sik Israel ninye nirya arye, kekenmek.

⁴⁵ Musa birye, Israel ninye sik dam, amot yupu nirya akunum sebukopura, Israel ninye nirya arye, kekebikopura, elce sikti, nyabuk.

⁴⁶ “Na wini talak nyapsin ning ara, moubuka kekepmunce, kel bikuka unamlulume. Winipnamluma deiyok ara, ani. Ara, narye anggunti, ‘Aning ara, wininamlulume. Aning ara, pia kum wininamlulume,’ nyabuka, nyapmasin yupu nirya ara, anggunce anggun mapu ati, peterepmunyopura, anggun mapu arye, ayupu nirya moubuka kekebikirye, aninguk diba tenebuka, upre banamake.

⁴⁷ Ati ara, anyapmasin yupu ara, talye ati kum nyapsine. Bukni, anggun kam una ati, nyapsine. Ayupu kekepmunce, dukdongobuka kanye lamapdongobuka, ulamunyopura, ayupu deice arye, Yordan mek koubuka, otam binuka unamlum mutuku noutamak arye, keting tamun weika arye, teleb ubuka, kam pia unamlume.” Musa arye nyabuk.

Mutuku si Nebo mutuku dup arye, “Musa dipnamle,” nyabuk yupu

⁴⁸ Musa birye, ayupu akunum nyabukopura, asum aniryuk, Allah el si Yahweh arye, Musa biti nyabuk.

⁴⁹ Moab mutuku tam bukni, weik mutuku dup bukukak ara, Abarim mutuku welepnulyame. Ara, asik domikak, kota Yeriko mutuku otam, atam lilun Nebo mutuku deice welepnulyame. Welepminyopura, Yordan mek otam dipdenulyame. Ara, Nebo mutuku welebimince, Israel ninye arepnaman mutuku, Kanaan mutuku otam eipnulame. Kanaan mutuku wekikirye, amutuku talibuka unamake. Amutuku ara, sik mutuku koproba kipnamle.

⁵⁰ Aning nirya, akunum eipminyopura, an amutuku Nebo mutuku dup arye dipnalame. Dipminyopura, an apu yapu diamikba, tuku lukamikba, sik kanya binamik mutuku, binuka unalame. Aning atonun, an du Harun babye, Hor mutuku deice diamukba, tuku lukamikba, el apu yapu mutuku binamuk touk, an babye winipnalame.

⁵¹ Winipnalama deiyok ara, nyapnukine. Deiyok ara, anggun bitinye yuk-yuk bukni atonun, narye, ‘Wininamnurume,’ nyapsise yupu, dib tenena kumce, anggun yuk teneprum ninguk winiprumba, sik Israel ninye elilamik. Ara, mek ap, ninye ap, kumak ara, Sin mutuku bukni, mutuku si ara Meriba, tonda Kades mutuku dam arye, amalye ning winiprume. Sik Israel nang arye, ‘Allah ara, pia malye ton winina kumnye ulule,’ tenelamniting bukni, anggun malye winiprum ning eibika deice arye, aning ara, kum tenelamnike. Winiprum ning ara, na nong ap, na yupu ap, yanina atonun anya arye, an Musa biti, wini talak wenepnamakine. Nati, dib tenebuka kum winipdeipnuluma deiyok arye, dipnulame.

⁵² Ati ara, otam mutuku, Kanaan mutuku ara, kum binalam bukni, yukak arye, asinguk eipnamalame. Allah arye, Musa biti nyabuk.