Ulangan 31 - Eipomek

Yosua bira, Musa dolamuk pil dona ati, punubuk yupu

¹ Musa birye, Israel ninye ati nyabuk.

² “Wini talak ara, na unun keting tamun ara, yupa pia weik, dumbarye kepdopnye nakub dikin (120) keting tamun akunum mapsa. Ati, anggun deiyoknye tonap kum kiptinye. Ton ning ara, Allah el si Yahweh arye, nati akunum nyapnuke. ‘Musa anda, Yordan mek ara, koubuka otam kum binamlame,’ nyapdeiamnuke,” nyabuk.

³ “Ati ara, kekepnululume. Anggun ni koproba Allah, el si ara Yahweh, elcuk minopce menekuka, Yordan mek koubuka otam bobinamsile. Anggun dam balirye, anggun banamlum sukum unamak nang nirya ara, opnamle. Winipliba, anang sik ulamikce mutuku nirya ara, binuka dopropnamlulume. Winipnamlum talak ara, Allah nyalamuk touk, Yosua bira, anggun deiyoknye kiplirye, minopce menekuka, Yordan mek koubuka bobinamsile,” Musa birye nyabuk.

⁴ Nyabukce, ayupu dukdongobuka nyabuk. “Ati ara, Anggun ni koproba Allah, Yahweh el bidamnye aryuk, sik Amori mutuku ninye sik deiyok nang bitinye Shion ap, Ok ap ati oplobukce, sik taleamdik mutuku nirya obuka sirya dakamuk touk, Yordan mek otam ninye atonun winipnamle.

⁵ Allah el si Yahweh arye, omutuku ninye nirya oplirye, anang dobuka anggun taruk deice deipsilirye, arepsilyopura, narye laka nyapsirye, ‘Winipnamlulume,’ nyapse touk, aninye anggun adiparyuk opnamlulume,” Musa birye Israel ninye ati nyabuk.

⁶ Nyabukce, ayupu ton nyabuk. “Ati ara, anggun kanye talima pum tam ap, nong ap mikip kipdamunce, ilil kum asa aniryuk, ormutuku unyak nang ati, malye kibuka bisinauk wininamlume. Anggun banamlum sukum nirya ara, anggun ni koproba Allah, el si ara Yahweh arye, anggun dam melipsilyopura, neikauk banamlulume. Tonda, Allah pia kum bataknamsile. Ati ara, otam mutuku ninye ati tenepmunce, ilil pia kum unamsile,” Musa birye nyabuk.

⁷ Nyabukopura, Musa birye, Yosua biti yukubukce, Israel ninye nirya wekmeka noutamak arye nyabuk. “An kanye talima pum tam, pia moubuka tenepmince, an kanye talima pum tam ap, nong ap mikip kipdamince, ilil kumce, mikip asa unamlume. Deiyok ara, ani. Allah el si Yahweh arye, anggun apu yapu ati, ‘Amutuku arepnamsine,’ nyalamuk mutuku, Israel ninye dobuka bobinamlyame. Omutuku bimunce, ance amutuku nirya bokuka, Israel ninye nirya yuk-yuk nukminyopura, sikce amutuku dobuka, binuka talibikirye, pia daunamake. Allah arye amutuku arepsiliba, dobuka unamake atia.

⁸ An ni koproba Allah, Yahweh arye, an dam menekuka tiklirye, batakna kum, tuba pia melipkiliba, neika banamlume. Elce anggun nirya ati, pia kum bataknamsile. Tonda, ‘Anggunda daupmalye’ tenen, pia kum namin kipnamsila anya arye, anda, ‘Se, yata wiriptinye do?’ pia tenena meme. Ati ara, anda ilil upkiliba, kanye talima bokoltona meme. Pia teleb kanye bobuka unamlyame,” Musa birye, Yosua biti nyabuk.

Allah arye ninye ati, ‘Wininamlulume. Aning ara, pia kum wininamlulume,’ nyabuk yupu ara, “Keting tamun tekbarye kiplyopura, tuba tonap nuknamlulume,” nyabuk yupu

⁹ Allah arye, “Aning wininamlulume. Aning ara, kum wininamlulume,” nyapdeibuk yupu nirya ara, Musa birye ayupu akunum sekukopura, Allah el si eren aik pum tam pil dona deiyok nang, sik Allah ap, ninye ap, ansinilina deiyok nang ati, ayupu nyabuk. Ura, anang ara, Allah el si erena deiyok nang ara, Lewi yala nang arye delilamikba, Lewi yala nang ulamik. Tonda, anang ara, Allah el si Yahweh arye, “Wininamsine,” nyabuka, Israel ninye ati nyalilamuk yupu libuka, bobalamik yo marikna, el si ton bobalamik. Tonda, Israel ninye sik wisi-wisi nang, yupu lipsisikuka bokolina deiyok nang ati arebuk.

¹⁰ Musa birye, anang dam binuka, Allah yupu peterebukce, ayupu ton nyabuk. Keting tamun tekbarye akunum kiplyopura, mitik bai asik dopmunce, weik sum ati, Bai Asik Weik Sum nyapnamlulume. Atalak babye, ton ninye arye, yuk ninye ning tia ati bomikce bukni, tuba tamubuka min kum arelamak ning nirya ara, kilipnamlulume. Atalak noutamak ara, anggunce nyanamlum yupu ati nyapnusine.

¹¹ Wini talak ara, Allah el si Yahweh arye, ‘Asukumuk bulupnamlulume,’ nyapnamlak anyuk, Israel ninye nirya kintinibuka bulupnamake. Asukumuk, sik nirya yakiba, ayupu bobuka, tuba tonap anggun dam nukuka delinamlulume. Winipmunba, Allah arye, ‘Aning wininamlulume. Aning ara, kum wininamlulume,’ nyapdeiamuk yupu ara, Israel ninye nirya kekenamake.

¹² Anda, winipnamlyame. An arye nyapmunba, Israel ninye anggun sal ap, kilapu ap, mapu ap, tonda yuk mutuku arye tikilyangan nang, anggun mutuku yanuka unyak ninye nirya babye bulupnamake. ‘Anggunce yalulume,’ nyapmunyeba yacopura, anggun dam, Allah el mem yupu yinipmunyeba, aning kekebikirye, Allah el si Yahweh ati, ilil upliba, elce, ‘Aning ara wininamlulume. Aning ara, pia kum wininamlulume,’ nyalamuk ninguk kekebikirye, dukdongobuka pia moubuka unamake.

¹³ Tonda winipmunba, sik aminyan talak deipnamak mapu, Allah el mem yupu kel kum bikik nang babye, kekebikirye, aninguk moubuka kel bikikirye, sik ni koproba Allah atibuk, ilil upliba, el yupu talipnamake. Ara, anggun Yordan mek koubuka, otam binuka unamlum mutuku noutamak, omutuku talibuka unamlum talak nirya ara, Allah el si Yahweh atibuk, ilil kanye bobuka, unamlum ati nyapsine. Musa birye nyabuk.

Allah arye Musa ati, ‘Wininamlyame, wininamlyame,’ nyabuk yupu, sirya ning ati, nyapdeibuk yupu

¹⁴ Allah el si Yahweh arye, Musa biti nyabuk. “Dipkoprop, an dipna dam talak akunum dam kipla ati ara, Yosua yukupminyeba, anggun neika, na ap elana ati, Allah el si eren aik, cang kain aik domikca dam, binuka tikdumunba, narye Yosua biti, ‘Narye akunum wipkine. Aninguk wininamlyame,’ nyapnamane,” Allah arye nyabuk. Nyabukopura, Musa ap, Yosua ap, Allah el si eren aik, cang kain aik dam anyuk birikce, Allah el dam tikdik.

¹⁵ Birikopura, uku dinibikiba, weik kurun tulum kutukuka panalamle touk, weik dua Allah si erena cang kain aik bublan dam yanuka tikuk. Atikuk dua noutamak ara, Allah el si Yahweh, adua noutam yanuka tikmok.

¹⁶ Winibuka noutamak arye, Allah el si Yahweh arye, yupu tonok Musa biti nyabuk. “An dipnalam talak, akunum dam kipmala ati ara, an apu yapu diamik touk dipminba, sik ton weiamik sukumuk, tuku lukicopura, sik ap dikdik senamlume. Dipminyopura, Israel ninye talipluma batakminyopura, sikce nati, ton bataknikiba, sik binamak mutuku unyak ninye arye si erenyak Isa Mutuku Dongonyeuk, talibuka si erenamake. Na atibuk, ‘Nun ni koproba Allah,’ kum tenenamniyake. Winibicopura, narye sikti, ‘Dipkoprop wininamsine, aning ton wininamsine,’ nyapdeiamsise yupu ara, batakuka yanipnamake. Yuk ning siuk erepnamake atia.

¹⁷ Winibikcopura, atalak aryuk, na sikti, yu weik upnamnile. Winipniliba, sikti, bataknamne. Tonda, sik dam, na memepropnirye, sikti, melibuka kum kaliknyopura, yuk nang arye, Israel ninye obuka malye kipnamake. Tonda, weik mambul ning ap, ikin weik ning ap, tuba sik dam anyuk upliba, kanye imun ning, anggun dam deipnamsile. Ikin weik uplye talak ara, winipliba, sikce nyapnamake, ‘Se, weik mambul ning, nun dam usilye ning ara, nun ni koproba Allah ara, nun dam ton kum ulula ati, ikin weik usulul do? Dipkoprop Allah arye bataksuka ati, ikin usulule,’ nyabuka, malye nyabuka engenamake.”

¹⁸ “Nyabuka malye yupu nyabuka engenamak bukni, atalak ara, sik dam arye memepdopnirye, kum melibuka kalikinamsine. Aning nirya ara, sikce na batakuka, Isa Mutuku Dongonye siuk erebikirye, pia malye wininamaka deice arye, narye sikti, bataknamne,” Allah arye nyabuk.

¹⁹ Nyabukce, ayupu ton nyabuk. “Ati ara, anyapnusin mot ara, aning sekukapmince, Israel ninye ati, binuka laka nyapnulyame. Nyapminyopura, Israel ninye arye, amot senamake. Winibikirye, amot ara, narye sikti, wenen yupu pia upnamle. Ara, narye Israel ninye ati, telebuk winilamse bukni, sikce malye winilamikce bataknik ati, awenen mot nyapnusine.

²⁰ Winipnamak ning laka nyapnusine. Ara, narye anggun apu yapu nang ati, ‘Pia teleb mutuku arepnamsine,’ nyamse mutuku wekelbana ati, aninye bobuka bobinamne. Amutuku ara, aning-aning weik mutuku, pia teleb mutuku ati, ninye wein ning weik ulul mutuku anya arye, sapi basam ap, kambing basam ap, domba basam ap, aupmala ati ara, moum yung susu mek weik ulule. Tonda, mong ulul anye arye, mong mek ap pia weik ulule. Teleb ning yamubuka arepneba, sik patalamle touk weik dibikiba, bouplyopura, sik nong kalimna weik unamle. Bukni, kanye deibuka telebuk akunum ubicopura, sikce nati batakukba, Isa Mutuku Dongonye siuk erebikirye, kinamake. Isa siuk erenamake. Winibikirye, narye, ‘Wininamsine, wininamsine,’ nyabuka nyapse ning yupu ara, yanibikirye, nati like tenepnamniyake,” Allah arye nyabuk.

²¹ Nyabukce ayupu ton nyabuk. “Wini talak ara, weika arye weik mambul ning ap, ikin ning ap, tuba sik deice upliba, sik kanye imun unamle talak ara, winipliba, anyapnusin mot yupu ara, sikti, wenen yupu ning upnamle. Aning deiyok ara, amot nyapnusin ning ara, sekuka arepminyopura, sik deipkirik dabanamak mapu nirya kel kibikirye, amot sepdanin banamake. Aminyan talak babye, pia luba kum kipnamaka atia. Aminyan talak ikin ning weika arye, sik nong deice akunum uplyopura, amot yupu uk, sik tuba tonap tenenamake. Sik min kum winipmakce talak bukni, sik winipnamak ning ara, na akunum kele. Ara, narye, anggun apu yapu nang ati, ‘Na si deice arye nyapsine. Apia teleb mutuku arepnamsine,’ nyapdeiamse yupu, amutuku min kum bobinamsin talak ara, sik aminyan talak malye winipnamaka ara, na akunum kele.” Allah arye Musa ap, Yosua ap ati, nyabuk.

²² Nyabuka ati ara, Allah arye nyapdeibukba, Musa birye amot yupu nirya sekukopura, Israel ninye ati, laka nyabukba, kel bikik.

²³ Atalak arye, ninye tonok el si Nun, el mi Yosua biti, Allah el si Yahweh arye nyabuk. “An talima pum tam, pia moubuka tenepmince, an talima pum tam ap, nong ap mikip kipdeipmince, ilil kum aniryuk, mikip asa unamlume. Aning deiyok ara, ani. Na Allah arye, anggun apu yapu nang ati, ‘Amutuku arepnamsine,’ nyamse mutuku ara, Israel ninye dobuka bobinamlyame. Na Allah arye, an dam tiknirye, batakna kum, tuba pia melipkinirye, neika bananame. Narye anti, pia kum bataknamkine. Ati ilil pia kum asa unamlame,” Allah arye Yosua biti, nyabuk.

²⁴ Allah arye, “Aning ara, wininamlume. Bukni aning ara, pia kum wininamlulume,” nyapdeibuk yupu nirya, Musa birye tonok babye ton kum batakukce, tonok buku noutamakuk sekeibuk. Deiyok kounak arye dipdongobuka, sirya daknak babye, pia mambul kanye bobuka, sekuka nirya dakuk.

²⁵ Akunum sirya dakuka sekukopura, Lewi yala nang bukni, sikda Allah el si Yahweh arye, ‘Winipnamsine, anggun ton wininamlulume,’ nyabuk yupu dobuka, libik yo marikna, el si ara Peti Perjanjian bobuka balamik nang ati, Musa birye anang ati nyabuk.

²⁶ “Allah arye, ‘Wininamlulume, wininamlulume,’ nyapdeibukba, sekse yupu nirya ara, dopropnamlulume. Winipmunce, anggun ni koproba, Allah nyapdeiamuk yupu deiamik yo marikna pum bisik deibik sukumuk, binuka deipnamlulume. Winipmunba, pia aupliba, Israel ninye arye malye winibice talak nirya ara, ‘Ayupu ara, wenena yupu nyamsuke’ tenen, tuba aumlya arye tenenamake,” Musa birye nyabuk.

²⁷ Nyabukabukce, ayupu ton nyabuk. “Aning nyapmasina ara, talye ati kume. Na kele, anggunda ilil pia kum nang weik ap, ninye deiyok nang, yupu kekena kum ap ninye ululume. Tonda, na kam ulamne talak arye, anggun talilamse talak babye, anggun ni koproba Allah, el si Yahweh ati, malya kibuka el yupu kekena kumce, yanilamlume. Ati ara, na kele, na akunum dipnyopura, atalak babye, pia weika arye tonap, ilil pia kum nang kibuka, malye weik wininamlume.

²⁸ Ati ara, anggun Israel ninye nirya kekepnululume. Sik deiyok talibik nang ap, deiyok wisi nang ap ati, yukupmunba, na dam bulupnamake. Bulubuka na dam yakiba, na tenepse yupu nirya sik dam nyapniba kekepnamake. Kekebicopura, im deice unyak nang babye, tukwak mutuku unyak ninye babye, ‘Israel ninye ara, Allah el mem yupu akunum kekebake’ tenen, elinamsiake.

²⁹ Aning babye, talye ati kume. Deiyok ara, na kele, na dipnyopura, narye anggunti, ‘Aning ara meme,’ nyabuka, peterelamsise ning ara, batakmumce, yuk malye bisikuk binuka, pia malye-malye weik wininamlume. Tonda, Allah arye, ‘Aning ara, pia malye ning ati, na like,’ tenelye ning babye, aminyan talak, talye luba kibuka wininamlume. Ara, anggun bidamang taruk arye, kintinip deipmunce, puturubuka deipnamlum ning ati ara, Allah el si Yahweh arye, anggunti, pia malye kanye bobuka, yu kanye bopnamsile. Winipmunyopura, Allah arye anggun wenena ati, weik kanye imun ning, anggun nong deice deipnamsile.” Musa birye nyabuk. Atalak ara, Musa ayupu nirya, Israel ninye nirya kekenmikak nyabuka, sirya dakuk.

³⁰ Tonda, atalak ara, Musa birye, amot nirya sebuk. Ara, amot yupu deiyok kounak arye dipdongobuka, sirya daknak babye senmokba, sik Israel ninye nirya kekenmek.