Ulangan 30 - Eipomek

Allah el si Yahweh arye, “Wininamlulume,” nyalamuk yupu, akunum kekepmunce, dipkoprob winipmunyopura, elce teleb kipdeipsiliba, aning-aning nirya, telebuk upnamsile, nyabuk yupu

¹ Musa birye, Israel ninye ati nyabuk. Wini talak ara, anggunti, akunum laka nyapmasine. Aminyan talak, Allah arye teleb ning ton arenamsile. Ton talak ara, kanye imun un ning ton arenamsile. Ati, anggun moubuka tenenamlulume. Aminyan talak ara, anggun ni Allah, el si Yahweh arye, anggun dopropsilirye, yuk-yuk mutuku nang kan-kan delinamsile. Deipsiliba, anggun yuk-yuk unamlum talak noutamak nirya ara, ‘Allah arye, nun wenena ati, kanye imun un ning arepmasil do? Teleb winibibiba, teleb un ning diamuk arepmasil do?’ Aning ara, anggunce moubuka tenenamlume.

² Anggun ap, anggunce deipnamlum mapu ap, ‘Nun ni koproba Allah, el si Yahweh, el dam tamubuka bibirye, elce nyapdeiamsuk ninguk, talibuka aninguk wininamabe,’ tenepmunye ning ara, anggun kanye talima nirya ap, anggun nong ap, Allah el deiceuk deipnamlulume. Ara, narye arup arye, ‘Wininamlulume,’ nyapmasin touk, Allah arye nyapdeiamsuk ning, moubuka kekepmunce, aninguk talibuka wininamlulume.

³ Winipmunyopura, anggun ni koproba Allah, el si Yahweh arye, bico tenepnamsile. Winibuka bico tenepsilirye, anggun min arye taleamlum ning, kum dayuk ning nirya ara, tuba tamubuka tonap arenamsile. Tonda, anggunce malye winilalum buk, anggun wenena ati, dobukapsukce, yuk-yuk mutuku nang kan-kan delilamsukba, yuk-yuk mutuku noutamak ulalum bukni, aminyan talak ara, anggun ni Allah arye, dopdeiamsuk noutam arye, tamubuka boyanamsile. Boyasilyopura, min arye kum dasuk ning, teleb ning nirya ara, tuba tonap arepsiliba, weik upnin banamsile.

⁴ Aminyan talak ara, Allah arye anggun dobuka, pera mutuku yakdonoksiliba, amutuku bimunce mutuku sirya, im sirya ulamunya babye, anggun ni koproba Allah, el si Yahweh arye, tuba tamubuka anggun bulubuka boyasilirye, tonokak deipnamsile.

⁵ Winipsilyopura, minop talak anggun apu yapu nang talibuka ulamik mutuku, talibuka unamlume. Tonda, anggun amutuku ulamunye talak ara, aning-aning nirya weik arepsiliba, weik upnin banamsile. Aning atonun, amutuku noutamak deipsiliba, ninye weik upra banamlume. Minop talak, anggun apu yapu nang, aning-aning mitik tonunuk talilamikce, ninye mitik anunuk ulamik bukni, anggunda aning atonun kum unamlume. Aminyan atalak, Allah arye, anggun dobuka, amutuku noutamak deipsilyopura, anggunda aning-aning pia weik talipmunce, ninye babye pia weik upnin banamlume.

⁶ Winipmunye talak ara, anggun ni Allah, el si Yahweh arye, anggun talima pum tam mambul pil donamsile. Ara, mitik mapu, ‘Allah el ninguk wininamak’ tenen, sik den bam bol sekenyak touk, Allah arye anggunti, winiryuk kanye talima arenamsile. Ara, anggun ap, anggunce deipnamlum mapu ap nirya ati, Allah el si Yahweh arye, elti, pia dib tenen kanye arepnamsile. Arepnamsil ning deiyok ara, ‘Anggun kanye talima ap, anggun nong ap, na Allah ati tamubuka arepnamniyake. Tonda, pia unamak’ tenen, winiryuk kanye talima arepnamsile.

⁷ Allah el si Yahweh arye, malye winina ati, anggun ning doproplirye, anggun mal olan nang ap, yu tenesinyak nang ap, yu deice arye ikin ning, anggun nong deice delisinyak nang nirya ati, sik deice sunamle.

⁸ Winiplyopura, aminyan talak, anggunda minop talak ulalum touk, Allah el si Yahweh arye, ‘Aning ara, wininamlulume. Aning ara, kum wininamlulume,’ nyapdeiamuk ninguk, tuba tonap kekepmunce, tamubuka batakamlum ning ara, el nyapdeiamsuk touk, dukdongobuka wininamlulume. Ara, arup arye nyapmasin ninguk, kekepmunce, moubuka talibuka wininamluma ati nyapsine.

⁹ Aning akunum winipmunyopura, anggun ni koproba Allah, el si Yahweh arye, melipsiliba aning-aning nirya telebuk upnamsile. Ara, anggun pil donamlum ning nirya, nong upra banamsile. Tonda anggun mapu delinamlum ning ap, wein ning weinamlum ning ap, tonda wa wibuka kounamlum ning ap nirya ara, Allah arye teleb kideipsiliba, weik upnamsile. Ara, Allah arye kanye deipsilirye, teleb kibuka deipsilyopura, aning-aning nirya, nong weika arye unamsile. Anggun apu yapu nang ati, minop talak, kanye deiamukce, weika arye areamuk touk, aminyan talak, anggun babye atonun, teleb ning ayala-yala nirya, weika arye arenamsile.

¹⁰ Bukni, aning ara, talye ati kum winipnamsile. Aning kum bukni, Allah el si Yahweh arye, ‘Aning ara, wininamlulume. Aning ara, kum wininamlulume,’ nyabuka, nyapdeiamsuk ning kekelamikce, mem yupu buku noutamak sekamik ning, anggun adiparyuk kekepmunce, dipkoprob talibuka winipmunyopura, melinamsile. Tonda, elti, dib tenepmunce, anggun kanye talima ap, anggun nong ap, el nong deiceuk deipmunce, dukdongobuka unamlulume. Winipmunyopura, Allah arye, kanye deipsilirye weika arye melinamsile. Musa birye Israel ninye ati, nyabuk.

“Dipna dopropnalum do? Kam una dopropnalum do?” nyabuka, asipdeyuk yupu

¹¹ Musa birye, Israel ninye ati nyabuk. Arup arye narye, ‘Aning ara, wininamlulume. Aning ara, kum wininamlulume,’ nyapsin ning ara, ikin weik kum ulule. Ati ara, anggunce, ‘Se aning ara, ikin ati kum uptibye. Aning ara, nun kum winipmanto ning nyapsile’ tenen, imun kanye bobuka teniltona meme. Tonda, ‘Aning ara, yukak anya arye, kum binuka doproptibnye,’ tenena meme.

¹² Allah arye nyapsukba, narye nyapmasin yupu ati ara, anggunce kum nyanamlulume. Ara, se, im deice ulula anya arye, nunce kum dolbitibye. Tonda, anggun bidamanguk, kum asilanamlulume. ‘Yatanye birye, im deice welebuka ayupu dobukapturye, tuba boyasuturye, laka nyapsutu do? Winipsutuba, nun kekeptibirye, dib teneptibye do?’ tenen, asilalalum bukni, winina meme.

¹³ Aning atonun, anyapmasin ning ara, ‘Laut mekwen otam ubuk do?’ tenen, anggun bidamanguk asilamunce, ‘Yatanye birye, otam koubuka biturye doyanuka laka nyapsutuba, kekeptibirye, kel kiptibye do?’ tenen, asilana meme.

¹⁴ Aning nirya kum tenenamlulume. Allah arye nyapsukba, narye laka nyapmasin yupu ara, anggun dam ulule. Aululba akunum kel kiplumce, nyalulume. Winiplumce, anggunce tenebuka kel kipdoplumce, anggun kanye talima pum tam, akunum aulula anya arye, aninguk talibuka wininamlulume.

¹⁵ Ati ara, anggun kekepnululume. Arup arye anggunce wipnamlum ning ara, akunum laka nyapdeipsine. Ara, teleb winina ap, pia kam una ning ap, wipnamlum do? Malye winina ap, dipna ning ap wipnamlum do? Tenipdemunce, wipnamlulume.

¹⁶ Aning ara, talye ati kum nyapsine. Deiyok ara, ani. Arup ara, narye anggunti, ‘Teleb ning ara, ani. Aninguk wininamlulume,’ nyabuka, akunum nyapdeipsine. Ara, anggun ni koproba, Allah el si Yahweh ati, kanye deibuka, el nyabuk ninguk dukdongobuka, wininamlulume. Tonda, Allah arye, ‘Aning ara wininamlulume. Aning ara, kum wininamlulume,’ nyapdeipsuk ning ara, “Allah mem buku deice sekeibuk ninguk, talibuka winimunce, dukdongobuka amu tam unamlulume,” nyapsine. Ara, winipmunya deice arye, anggun tuba unamlume. Tonda, anggunce deipmunyeba dadeipdanin binamlum nang nirya ara, weik upnin banamle. Aning akunum winipmunyopura, talye kum nyapsine. Anggun ni koproba Allah arye, ‘Arepsiniba binamlum,’ nyapdeiamsuk mutuku bana ati, wini talak akunum dam kipmala ati, amutuku binuka umunyopura, anggun ni koproba Allah arye, teleb ning arenamsila deice arye, telebuk unamlume.

¹⁷ Winipnamsil bukni, anggun kanye pum tam arye Allah ati, ‘Nun like,’ tenepmunce, el nyapdeiamsuk ning kekebuka, dib kum tenepmunce, Isa Mutuku Dongonye, el si erena ati, kanupdongobuka umunyopura, Allah arye anggunti, wenebuka oplopnamsile.

¹⁸ Arup ara, narye dipkoprob nyapsine. Allah batakuka, malyeuk winipmunyopura, elce anggunti, obukapsilirye, sirya daknamsile. ‘Yordan mek koubuka, otam mutuku wekibirye, amutuku talibuka unamap’ tenen, kintinipmalum bukni, Isa Mutuku Dongonye siuk erepmunyopura, Allah arye, dipkoprob anggun kum daneipnamsile. Tonda, malyeuk winipmunyopura, elce, ‘Arepnamsine,’ nyapdeiamsuk mutuku, binuka unamlum talak ara, anggun kam una ati ara, ouku weik kum mapnamlume. Mitik tonunuk upmunce, dipnamlume.

¹⁹ Wini talak ara, anggunce anggun ni koproba Allah, el si Yahweh arye, nyapdeiamsuk ning ara, kam una deiyok ning do, dipna deiyok ning do, tonda teleb winina deiyok ning do, ikin ning dolona ati minilongona deiyok ning do, aning nirya ara, narye akunum laka nyapmasina ati, anggunce wipnamlulume. Aminyan talak anggunce nati, ‘Aning kum laka nyapsulume,’ nyapnumunyak tenen, wini talak ara, narye im deice kam ulul ning ap, tukwak mutuku kam ulul ning ap yukupniba, anggun wipnamlum ning ara, eipnusine. Ati ara, “Kam un ninguk wipnamlulume,” nyapsine. Kam un ning wipmunyopura, anggun ap, anggunce deipnamlum mapu ap, kam unamlume. ‘Wininamlum’ tenen, nyapsine.

²⁰ Tonda, kam una deiyok ning wipmunyopura, ‘Anggunce anggun ni koproba Allah, el si Yahweh ati, kanye deipmunce, el nyalul yupu moubuka kekepmunce, eluk talibuka, dukdongobuka unamlum’ tenen, nyapsine. Wininamlum ning deiyok ara, Allah el si Yahweh ara, anggun Kam Una Deiyoknye ulula ati nyapsine. Winipmunyopura, anggun wekelbinamlum mutuku noutamak ara, anggun koproba ap, tonda anggunce deiplumba, dadeipdanin banamak ninye nirya ap, kam unamlum talak ara, lo weik arepnamsile. Ara, anggun apu yapu nang, Abraham ap, Isak ap, Yakub ap ati, Allah arye, ‘Amutuku arepnamsine,’ nyabuka, nyalilamuk mutuku ‘Bina unamlum talak ara, weik winipnamle,’ tenena ati, aning ara nyapsine. Musa birye Israel ninye ati, nyabuk.