Ulangan 3 - Eipomek

Israel nang ara, Basan mutuku taleamuka deiyoknye, Raja Og obik yupu

¹ Tonda, nunda Basan mutuku Utam mutuku beipue. Beipu talak ara, Basan mutuku ninye deiyoknye, Raja Og ap, el yin talen nang nirya ap arye, Ederei mutuku damuk, nun ap olana ati, kintinibuka yayik.

² Sik anang ara, ‘Israel nang ati opnamapʼ tenen, nun dam yayik bukni, Allah Yahweh arye nati, yanuka nyapnuke. “Musao, sik anang ati, ilil una kume. Na mikip ara, anggun deice akunum deiamsise. Ara, amutuku talibuka ululnye ap, el talibuka ulul mutuku ap, el yin talen nang ap nirya ara, anggun deice akunum deipsina anya arye, anang olbinamlulume. Ara, min talak Hesyebon mutuku ninye deiyoknye, Raja Sihon ap, sik Amori yala nang Hesyebon mutuku ulamik nang ap, omluma atonun ubuka, sik anang babye opnamlulume,” nyapdeiamsuke.

³ Ati ara atalak ara, nun ni Allah Yahweh arye, Basan mutuku taleamuk ninye deiyoknye Raja Og ap, el mapu ap, el yin talen nang nirya ap dobuka, nun deiceuk deipsukba, nunce anang nirya obuka, sirya dakupue. Tonok nang babye ton, pia kum batakupu.

⁴ Atalak aryuk, atam ulamuk mutuku nirya biburye, sik ulamik mutuku noutam dolamik asik nirya ara, obuka sirya dakupurye, alubuka doprobupue. Tonoknye babye, ton pia kum batakupu. Aning atonun amutuku ulamik nang nirya babye, obukabuburye sirya dakupue. Winibuburye, anyasik dolamika yupa ara, enam puluh (60) asik adobuka ulamik mutuku nirya ara, nuncuk alubuka doprobupue. Ara, Basan mutuku, Raja Og birye, ninye deiyoknye kibuka, Argob mutuku nirya taleamukba, ulamik mutuku ara, nunce obuka, sirya dakupurye, amutuku nirya nunuk dopromubu.

⁵ Obupu mutuku nang nirya ara, sik asik dana-dana tam nirya, weik cang keil poka ara, weik tonun erebuka, antanap dongobuka domikce, anyasik dolamikak wekel bana ati, bisik dam ara, weik cang besi arye, bublan nirya dobuka tirikamik. Tonda, abublan dobuka kintinip deiamik ning daralongona ning babye, besi beton atonun ubuka kintinip deiamikce, daralamik. Tonda, yuk mutuku mitik-mitik asik adobuka ulamikak ara, cang pia weik keil poka, weik tonun erebukabikce, antanap dongobuka kum domik. Anyasik nirya ara, talye karenuk daulamikba, obukabuburye, alubuka dopromubu.

⁶ Amutuku nirya binukabuburye, obuka atu kiplomupu. Ara, sal ap, kilapu ap, sik mapu ap nirya ara, obuka sirya dakamuburye, sik asik nirya ara ulubuka, sirya dakamupu. Aning ara, min talak Raja Sihon Hesyebon mutuku ulamukce, taleamuk mutuku nirya, binuka omupu touk, Basan mutuku babye atonun winibupu.

⁷ Bukni, sik amutuku nang arye domba do, sapi do, sikce talibuka weilamik kam ning yala-yala nirya ara, kam kipmanuk doprobupu. Tonda, sikce talibuka ulamik mutuku ap, sik dolamik asik noutam ulamikce, talilamik bona yala-yala nirya ap ara, aning nirya alubuka doprobuburye, nun ninguk kiamupu.

⁸ Atalak aryuk nunce ninye deiyok nang bitinye arye, talibuka ulamdik mutuku nirya alubuka doprobupu. Ara, Yordan mek koubuka keting panalyangan noutam bukni, Yordan mek duman tam ap, anyapce ubuka, Arnon mek duman arye dipdongobuka, deice tam mutuku dabu tam (ara utara) weik mutuku dup, el si Hermon mutuku dam, atam nirya dopromubu.

⁹ (Weik mutuku dup Hermon mutuku atibuk, sik Sidon mutuku noutam ulamik nang ara, ‘Siryon mutuku,’ nyalamik. Tonda, sik Amori mutuku noutam ulamik nang ara, ‘Senir mutuku,’ nyalamik bukni, amutuku ara, tonok mutuku atibuk, si bitinye nyalamik.)

¹⁰ Raja Og ara, basan mutuku ulamukce, taleamuk mutuku noutam nirya ara, nuncuk olamuburye, doprobupu. Ara, Gilead mutuku Nirya ap, anyapce deice tam, Basan tam nirya ap, amutuku noutam ara, bai tam erebuka bukamuk mutuku nirya ara, nunuk doprobupu. Amutuku arye dipdongobuka, mitik tonun eitam, iknapye tam (ara selatan) pera mutuku keting panalyangan tam asik dolamika el si ara, Salkha mutuku ap, tonda anyasik arye deice tam asik dolamika el si, Ederei mutuku ap, aning nirya babye, nunuk doprobupu. Minop talak ara, atam ap, anyasik bitinye nirya ap ara, Raja Og birye taleamuk.

¹¹ Sik nong cang weik yala nang, sik si ara, Refaim yala nang upnin yangalamika ani, siryanye bira, Raja Og ulamuk. Elce Basan mutuku ati, ninye deiyok kibuka taleamukce, ulamuk. Atalak amutuku nang sikce, el Raja Og biti, pia kat ning arye, el manak ati kintinip deiamik. Aning dobuka delilamik ning, el cang ara, empat meter ap, deice tam mitik tonun tonap dobuka delilamik. Raja Og el manak ati pala ara, dua meter atonun dolamik. Aning el meter nukuka dona ati ara, min arye, ‘Winibuka dopnamabe,’ nyabuka, nukikce nyapdeiamik atonun ubuka, dopnarye delilamik. Raja Og el manak ara, besi aryuk, dolamik ara, sik Amori yala nang dolamik asik, el si ara Raba mutuku, noutam adeiamik touk, tuba aulula anya arye, asukumuk eiptibye.

Yordan mek koubuka, otam keting panalyangan tam ara, Israel nang yala yuk-yuk ulamik touk, tuku bokuka doprobik ning ati, nyabuk yupu

¹² Musa birye sik Israel nang ati, nyabuk. Ura, Basan mutuku akunum dobuka, nun dopdobupu ura, narye bokuka, Ruben yala nang ap, Gad yala nang ap ati arepse. Sik bitinye yala nang ati arepse ara, Arnon mek duman tam outam arepse. Ara, asik dolamika el si Aroer mutuku dolamikak ap, anoutam bukni, outam (ara selatan) uamuk tam, Gilead mutuku ap, atam noutam dolamik yuk asik ap, dobuka arepse. Ara, Gilead mutuku nirya kum bukni, dan tam bokukapsirye, ton tam dopropsirye arepse. Winipsopura, narye sik yala bitinye nang unamikak ati areamse.

¹³ Tonda, Gilead mutuku bukni, dana tam ap, Basan mutuku nirya ap ara, tuba ton aupmok ning ara, narye bokukapsirye, Manasye yala nang bukni, sik yala noutam arye bokuka, Yordan mek koubuka keting panalyangan tam ulamik nang ati arepse. Basan mutuku ara, ninye deiyoknye, Raja Og birye taleamuk mutuku. Amutuku noutam nirya, el si ara, Argop tam ton nyalamik. (Aweik pala mutuku, el si Basan tam nirya ara, minop talak, ‘Atam ara, sik nong cang pia weik nang, sik Refaim yala nang ara, Basan mutuku ara, sik mutuku koproba anya,’ nyalamik).

¹⁴ Tonda, Manasye yala nang arye deiamiknye, el si Yair, aminyan talak, elce Argop mutuku nirya obukabukce, doprobuk. Ara, Basan mutuku nirya ati nyapne. Ara, Gesur yala nang ulamik mutuku, atam arye dukdongobuka, otam sik Maakha yala nang ulamik mutuku uamukak, anoutam uamuk asik dolamika nirya ap, mutuku ap nirya binuka doprobuk. Doprobukopura, amutuku noutam uamuk asik nirya ara, winiryuk si ton dobuk. Ara, el si atonun, Hawot-Yair nyapdeiamukba, sik nirya asi uk nyalamikce, atalak babye anyalamik touk, wini talak babye, tuba asi uk pia nyanyake.

¹⁵ Gilead tam ara, narye bokuka, Manasye birye deiamuknye, elce deiamukba, dadeipdanin, yangalamik nang, sik Mahir nang ati arepse.

¹⁶ Tonda, Gilead mutuku noutam ara, mutuku ton bokuka, sik Ruben yala nang ap, Gad yala nang ap ati arepse. Ara, Arnon mek duman noutam ubuk mutuku arye dipdongobuka, binamuka ani, otam balamuk mek, Yabok mek dam anoutamak uamuk mutuku bokukapsirye, sik ayala bitinye nang ati arepse. Ara, narye amutuku bokukapsirye, sik Ruben yala nang ap, Gad yala nang ap ati arepse. Sik mutuku wililongonak ara, Yabok mek balul sukum ara, sik Amon yala nang ulamik mutuku asukumuk uamuk. Amon yala nang ulamik mutuku arye, dipdongobuka otam mutuku ara, kum arepse.

¹⁷ Sik mutuku ara, Araba tam ton nyalamik ning arepse. Ara, weik laut mekwen el si Laut Mati outam mutuku (ara selatan) uamuk. Amutuku wilinak pia eitam, deice tam ara, Laut Mati keting kumulban tam uamukak, anyapce dipdongobuka, binamuka ani, deice tam ara (ara utara), Yordan mek dara tam yangalirye, Laut Mati wekelule. Tonda, anyapce ubuka, keting panalyangan tam ara, weik mutuku dup, el si Pisga mutuku bukamuk, tonda amutuku uk bukni, el si ati Nebo mutuku ton nyalamik mutuku bukamuk. Asukum bukni, utamna (ara selatan) uamuk mutuku, atam nirya dipdongobuka balamuka ani, Laut Mati dara tam, anyaba ubuka, outam ton (ara selatan) uamuk mutuku nirya ara, aning ton bokuka arepsiba doprobik.

¹⁸ Minop talak ara, narye anggun keting panalyangan tam unamlum nang ati, anggun yala nang ara, “Aning winipnamlume,” nyapsise. Anyapse yupu ara ani. “Anggun ni Allah Yahweh arye, Yordan mek koubuka atam keting panalyangan tam winiryuk arepmasil mutuku ara, aminyan talak, anggun amutuku noutamuk bimunce, talibuka pia unamlume. Bukni, atalak ara, amutuku noutam arye, Yordan mek koubuka otam, keting kumulban tam binamlume. Deiyok ara, anggun kayapu nang, Israel yala nang bukni, Yordan mek koubuka, otam keting kumulban tam unamak nang, sik melina ati, obinuka unamlume. Ara, anggun yin talen nang nirya ap, mikip weik nang nirya ap ara, yin bobuka bimunce, malye kibuka, menekuka Yordan mek koubuka, keting kumulban tam binumunyopura, anggun kayapu Israel nang, yuk yala nang nirya ara, sik aminyan melibuka binamnyake,” nyapdeiamse.

¹⁹ Tonda, anggun atam unamlum nang, anggun kilapu ap, anggun mapu ap, tonda anggun talibuka weilulum kam ning yala nirya ap, aning nirya ara, asukumuk unamake. Na kele, anggun dam ara, aning pia weik akwapsulula anya arye, anggunti arepsise asik nirya, amutuku noutam, sik asik dolamikak damak unamake. Anggun yin talelulum nang ara, Yordan mek koubuka keting okumulban tam mal olal binamlulume. Ara, anggun kayapu nang melina ati nyapne.

²⁰ Anggun kayapu ati melibuka bobinamlum nang ara, keting kumulban tam moubuka bikmunce, bobalamunya ani, sik ni koproba Allah Yahweh arye, ‘Sik ti amutuku arepnamsine,’ nyamuk mutuku binuka weknamake. Ara, Allah arye, sik arepliba unamak mutuku noutam ara, Yordan mek koubuka bikirye, keting kumulban tam binuka unamak mutuku ati nyapne. Winibikirye, otam nang obukabikirye, sirya dakikcopura, tonap olana kumce, teleb kanye bobuka unamake. Ara, anggun atam, keting panalyangan tam mutuku akunum malye kiplumce, amutuku nirya doproplumce, teleb kanye bobuka ululum atonun, anggun kayapu nang babye, Israel yala nang bukni, keting kumulban tam obinuka unamake. Anyapmasin touk, akunum winipmunyeba, anggun kayapu nang ninye olana kumce, teleb kanye bobuka, akunum winibikcopura, anggun tamubuka Yordan mek koubuka, keting panalyangan tam yamunce, anggunti areamsise mutuku tubakuk yanuka talipmunce, apia unamlume.

²¹ Tonda, atalakuk, narye Yosua biti nyapse. ‘Anggun ni koproba Allah Yahweh arye, aketing panalyangan tam nirya talibuka ulamik ninye deiyok nang, Raja-Raja ap, sik tam nang ap ati, malye kibukce, sik mutuku nirya alubuka doprobukce, sik Israel nang ati arepsuka ara, akunum elinmalumce, bikmalume. Allah arye winiliba elinmalum ning nirya ara, ance akunum eibuka kel bikamluma anya arye, Raja Sihon ap, Raja Og ap, abitinye ninye deiyok nang ati, malye winibuk ning ara, akunum bikamlume. Allah arye, abitinye Raja nang ati winibuk touk, otam Yordan mek koubuka, keting kumulban tam unyak Raja nang nirya ara, atonun upnamlarya. Ati, anggun kayapu Israel nang unmakak nirya ara, omutuku wekelbikcopura, omutuku binuka obukapmunce, sik unamak mutuku nirya binuka, dopropnamlume.

²² Amutuku noutam talibuka ulamikce, ninye deiyok nang ap, amutuku nang nirya ap ati, ilil kum unamsile. Deiyok ara, anggun ni Allah Yahweh arye, anggunti mikip weik arepsilirye, tonda, elce kalikuka pia melinmasilya deice arye, anggunce omutuku talibik nang nirya opnamluma ati nyapsine.

Musa kanaan mutuku kum biyuk yupu

²³ Atalak ara, narye Allah Yahweh ati, nyabuka moropse,

²⁴ “Diba na ni Allah Yahweh, anda aning-aning nirya erebuka, deice tam Weik Erenanye ulyame. Ance mikip weik arye winilyam ning ara, na an amu tam pil donanye birye, akunum elinirye bikinun bukni, weik tonun tonap bikmanto ning tuba aupmal buk, nara, mitik anunuk akunum bikamse. Anda, ninye kum winipmanto ning, minop talak arye deiyok koubuka winilamlum ning ap, tonda anoutam arye kanye imun weik ning winiminye ning nirya ara, ancuk winilyame. Yuk mikip weik ning, allah-allah nirya ap, isa ap, mikip ulye ning ap nirya ara, im deice do, tukwak mutuku do nirya, an uminya atonun ton, pia kum unyake. Ancuk weik mambul pil nirya dolyame.

²⁵ Ati ara, na nio, nara ance, ‘Telebe dabitue,’ tenepnutumba, Yordan mek koubuka keting kumulban tam bitinye. Diba na ni Allah, omutuku bitinirye, tuku pia teleb mutuku eiptinye. Tonda, Yordan mek koubuka, otam aubuk mutuku kon nirya ara, pia teleb mutuku ulule. Atonun, ‘Libanon mutuku babye, urasin pia teleb mutuku ulula ara, na ton eiptinyeʼ tenen, weik tonun patanulule. Ati omutuku ara, na ton bitinye,” nyabuka moryamse.

²⁶ “Nyabuka moropse bukni, nun ni Allah Yahweh arye, na yupu ton kum kekepnukce, nati yu ubuke. Deiyok ara, natibuk kume. Anggun Israel nang malye winilamluma deice arye, Allah Yahweh elce, nati yu ubukba, ‘Anda anyapmanilam yupu ara, tonap kum nyapnamnilyame, dauplye,’ nyabuka wenepnuke. Adeice narye elti, moropse ning ara kekebuka, ‘Telebe,’ kum nyamnuke. Nyabuka moropsiba, Allah arye nati, tamubuka nyapnuke. ‘Musa ance aning ati, tonap tamubuka kum nyapnamnilyame,’ nyabuka wenepnuke.

²⁷ Wenepnukce, ayupu ton nyapnuke. ‘Anda aniryuk, Pisga mutuku deice welepmince, an asing arye labuka, Yordan mek koubuka otam, keting kumulban tam ubuk mutuku ara, eitam ap, outam ap, tonda keting panalyangan tam ap, keting kumulban tam ap nirya ara, an asing aryuk dipdenulyame. Dipdemince, eipminyopura, ance moubuka biknulyame. Deiyok ara, anda Yordan mek koubuka otam, keting kumulban tam ara, kum binamlame.

²⁸ Aeipmaminye ning nirya ara, ance Yosua biti, ‘Nun ni koproba Allah arye winipnamsile. Kalikuka melipsilyopura, otam unyak Raja nang nirya ati, malye kibuka sirya daknamaba ati, aning-aning winipmalume,’ nyabuka, elti, melibuka mikip kilin yupu nyapnulyame. Deiyok ara, Yosua biryuk, anang sik Israel nang nirya ara, bobuka Yordan mek kouplirye, an asing eipmalam mutuku ara, keting kumulban tam bilirye, otam mutuku nirya ara, malye kiplirye, binuka alaplirye, sik Israel yala nang arye, amutuku nirya talibuka unamake,’ nyapdeiamnuke.

²⁹ Allah arye ayupu nyapdeiamnukba, nun nirya ara, asukum arye batakuka, asik si Bet-Peor mutuku otam uamukak, nunda atam amek duman banakuk, binuka ulamupu. Musa birye, sik Israel nang ati lak nyabuk.