Ulangan 28 - Eipomek

“Allah arye nyapdeibuk yupu, moubuka talibikirye, unamak nang ara, telebuk unamake,” nyabuk yupu

¹ Musa birye, sik Israel nang nirya ati, nyabuk. Anggun Israel nang ara, anggunce si erelulum Allah, el si Yahweh, el tibuk mikip arye talimunce, elce, “Aning ara, wininamlume. Aning ara, pia kum wininamlume,” nyapdeibuk yupu, moubuka kekepmunce, wininamlume. Ati ara, arup narye anggun kekenak laka nyapdeipsin yupu, moubuka talimunce, aninguk dipkoprob winimunyeura, anggun si erelulum Allah, el si Yahweh arye, anggun erepdeipsilyeura, mutuku-mutuku nirya unyak nang arye, anggun si biksikirye, si erenamsiake. Anggunda, yuk mutuku nang nirya ara, sik deice tam unamlume. Sik yuk mutuku unyak nang ara, anggun amu tamuk unamake.

² Anggun ni koproba Allah Yahweh, el yupu uk, moubuka talimunce, wininamlume. Eluk talimunce, umunyopura, pia teleb ning yala-yala nirya ara, yamubuka arenamsile.

³ Winipsilyopura, anggunce weik asik dobuka unamlumak nirya ap, tonda anggun wa winak nirya ap, binuka unamlumak ap nirya ara, elcuk talipsilirye, teleb kilinamsile.

⁴ Tonda, Allah arye teleb kipdeipsilyeura, anggun nong babye, teleb kipdeipsiliba, anggunce deipmunyeba, deipdanin banamak nang nirya ara, weik unamake. Tonda, tuku deice arye wibuka, koun ning yala-yala nirya ara, nonguk unamsile. Aning atouk, anggun kambing basam ap, domba basam ap, sapi basam ap, ura anggun weilulum ayam maka ap, yuk yala weilulum maka ap nirya babye, yamubuka arepsilyeura, weik unamsile.

⁵ Allah elce yamubuka arepsilyeura, anggun gandum duk dakmunye ning babye, weik unamsile. Tonda, gandum duk teikmunce, aning ap, yuk roti yuna deiyok ning ap, tabakuka dapnamlum din babye, weik tonun unamsile.

⁶ Tonda, Allah elce yamubuka arepsilyeura, anggunce anggun aik batakuka bai bana do? Yuk mutuku bana do? Teleb kibuka arisilyeba, telebuk unamlume. Aning atouk, yuk mutuku daulamunya ani, aminyan talak, anggun asik tamubuka yanamlum talak ara, teleb kibuka kaliksilyeba, telebuk unamlume. Danaka do nirya, anggun unamlumak ap, banamlumak ap ara, Allah aryuk melipsilyeura, telebuk unamlume.

⁷ Tonda, Allah elce teleb kibuka melisilyeba, anggun mal olan nang arye, ‘Anggun ti optibyeʼ tenen, mal olyanganamsiyak bukni, Allah elcuk anggun mal olan nang nirya ara, obuka sirya daknamle. Anggun onlan nang arye, anggunti, ‘Winibuka-winibuka bibyeura, opnamap,’ tenebikirye, tonok bisik deice arye, yanuka opnamsiyak bukni, Allah elce melipsilirye, el mikip arepsilyeura, sik anang ara, ilil uplilyeura, anggun dam arye, batakuka bikbik abuka, yuk-yuk bisik weik, tekbarye bisik deice arye, walwalap danuka, bindopnamake.

⁸ Anggun ni koproba Allah aryuk, anggun pil donamlum ning nirya ara, yamubuka arisilirye, teleb kibuka delinamsile. Tonda, anggun din ning gandum duk dakuka, dina aik noutam binuka deipnamlum ning babye, adiparyuk langdinamsile. Tonda, Allah elce anggunti, yamubuka arepsilyeura, anggunce, ‘Aning winipnamabe, aning pil dopnamabe,’ tenebuka, pil donamlum talak ara, elce melisilyeura, aning nirya ara, teleb kipdeipsilyeura, telebuk wininamlume.

⁹ Allah Yahweh el tibuk, mikip arye talimunce, el Allah Yahweh arye, “Aning ara, wininamlume. Aning ara, pia kum wininamlume,” nyapdeibuk yupu kekebuka wininamlume. Winipmunya deice arye, anggun si erelulum Allah Yahweh arye, “Anang ara, ‘Naʼ tenen, nang unamaka ati, anggunti wipdeipnirye, pia melinamsine,” nyabuka, nyalin yupu deice arye nyapsuk ning atouk, anggunda Allah el mapu koproba unamlume. Ati, Allah arye nyalin yupu deice arye nyapdeiamsuk atouk, pia telebuk unamlume.

¹⁰ Winibuka umunyopura, yata mutuku nang do nirya, yuk-yuk mutuku, dana-dana tam unyak nang nirya arye, anggunti eibuka biksikirye, ‘Se, dipkoprob Israel nang, sikda Allah Yahweh, elce wipdeibuk nang unyake. El mapu koproba unyakce, el siuk erenyakʼ tenen, ilil unamle. Ati, anggun Israel nang ara, pia si bikinamsiake.

¹¹ Allah Yahweh, elce anggun melisilirye, aning-aning nirya telebuk unamsile. Tonok ning ara, anggunce talye mangkau kibuka, mapu weik tonun arepsilyeura, weik upnin banamake. Tonda, anggunce talibuka weinamlum ning, yala-yala nirya babye, weik tonun deibikiba, dadeipdanin bakcopura, pia weik unamsile. Tonda, sik delilamsik nang ati, Allah elce, nyalin yupu nyapdeiamuk ara, “Narye anggun Israel nang ati arepnamsin mutuku ara, aning-aning weik mutuku arepnamsine,” nyapdeiamuk touk ubuka, anggun apia teleb mutuku ulamunce, tuku deice wa wibuka kounamlum ning yala-yala nirya babye, nonguk uplyeura, weik tonun unamsile.

¹² Allah Yahweh elce, mok kintinibuka, im noutam deibuk ati, anggun mutuku mok cen li kiplyeura, Allah arye areplirye, mok dopkwetepsilye ura, cenamsile. Adeice arye, anggun pil donamlum ning yala-yala nirya ara, telebuk unamsile. Winipsilyopura, anggunce winimlum ning ap, talinamlum ning ara, pia weik tonun unamla ati, tia talak ati, yuk mutuku nang ati arenamlume. Anggunce yuk mutuku nang ati, arena ara, telebe uka. Bukni, anggunce yuk nang ati, “Nun ti, anggun weilulum ning ton, tia talak ati, arepsululume,” nyana ara, pia kum nyanamlume. Awinin ning ara, pia malye atia.

¹³ Anggun ni koproba Allah arye, ninye deiyok nang kipdeipsiliba, ninye yala yuk-yuk ulamikce noutam, talibuka unamlume. Ati, anggunda yuk nang ati, sik amu tam talye melin nang kum unamlume. Anggunda, weik deiyok talibuka unamlulume. Yuk mutuku nang ara, anggun amu tamuk unamake. Ati ara, anggun adiparyuk Allah arye, “Aning ara, wininamlume. Aning ara, pia kum wininamlume,” nyapdeipsuk ning, arup arye nyapsin yupu ara, moubuka talimunce, pia dobolbanauk winimunyopura, anggun unamlum mutuku nirya ara, pia telebuk unamlume. Ton kisikdakuka, yukak kum binamlume.

¹⁴ Tonda, anggun aunamlum noutamak ara, Allah arye, “Winibuka unamlume, aning ara, kum wininamlume,” nyapdeipsuk yupu ara, talye yaniplobuka, kum bataknamlume. Tonda, talye ning ati, ‘Nun ni aniʼ tenen, aning si erena ap, si erena ati pil dona ap, pia kum wininamlume. Musa birye, sik Israel nang nirya ati, nyabuk.

“Allah arye nyapdeibuk yupu yanibice nang ara, ikin ning dolonamake,” nyabuk yupu

¹⁵ Bukni, anggun ni koproba Allah Yahweh elce, “Aning ara, wininamlume. Aning ara, kum wininamlume,” nyapdeipsuk ning, arup arye nyapsin yupu anyak, anggunce moubuka talipmunce, pia kum dobolbamunyopura, anggun unamlum mutuku nirya ara, ikin pia weik ning, anggun deice yanganamsile. Asum, narye anggun dam laka nyapse ning, diba tenebuka, kum talipmunyopura, anggun dam ara, ikin-ikin ning yaliba dopropmunce, kanye imun unamsile. Kanye ikin unamsil ning ara, ani.

¹⁶ Anggunce weik asik dobuka unamlumak nirya ap, anggun wa winak nirya ap, binuka unamlumak ap nirya ara, elce ikin-ikin ning areplyeura, dopropmunce, kanye imun unamsile.

¹⁷ Allah arye, ikin weik tonun arepsilyeura, anggun gandum duk daknamlum ning ara, mitik kipnin banamsile. Allah arye anggunti, ‘Likʼ tenebuka, supdongopsiliba, ‘Roti lipnamapʼ tenen, gandum koululum ning nirya ara, malmalipnamle. Tonda, gandum duk teikmunce, aning ap, yuk roti kwaning dana ati deiyok ning ap, tabakuka dapnamlum roti din ara, kum danin banamsile. Ara, anggun roti bun memenamlumak ap, roti dapmunce, delilulum ning, el si keranjang ap ara, lo dem upnamle.

¹⁸ Tonda, Allah arye, anggun nong deice supdongopsilyeura, anggun kilapu mi bolamakak ap ara, supliba malmalipnamle. Winibuka malye kipdeipsiliba, anggunce deipmunyeba, dadeipdanin banamak nang nirya ara, mitik tonunuk unamake. Tonda, tukwak arye wibuka, koun ning yala-yala nirya nong ara, mitik tonunuk unamsile. Aning atouk, anggun kambing basam ap, domba basam ap, sapi basam ap, ura anggun weimunye ayam ap, yuk yala maka ap weimunye nirya babye, Allah elce ikin ning areplyeura, dopropmunce, kanye imun unamsile. Deiyok ara, anggun delimunye mapu ap, anggun weimumnye ning nirya ap ara, pia mitik tonun kipnin banamsile.

¹⁹ Tonda, Allah elce ikin ning arepsilyeura, anggunce yuk nang asik wekelbinamlum talak do, panabuka anggun asik tamubuka binamlum talak do, nirya ara, ikin kanye bobuka, ilil weik unamsile. Aning atouk, yuk mutuku daulamunya ani, aminyan talak, anggun asik tamubuka, yanamlum talak ara, ninye ton kum kalekmasice buk, ikin deiceuk tamubuka yanamlume. Danaka do nirya, anggun unamlumak ap, banamlumak ap ara, Allah arye anggunti, ikin weik ning arepsilyeura, dopropmunce, ilil asa unamlume.

²⁰ Anggunce, el yupu moubuka kum talimunce, aning yanibuka, kum dobolbamunyopura, anggunda malye winin ninguk, talibuka winilamunce, anggun ni koproba Allah ati, “Nun like,” nyabuka batakmunyopura, anggun dam ara, dipkoprob teleb una deiyok ning ton, kum unamsile. Winipsilirye, anggun dam ara, kanye imun una deiyok ninguk, talibuka ulamunba, ikin ninguk yanganamsile. Ara, ‘Se, yata wiriptibye doʼ tenen, ilil weik unamlume. Tonda, yata pil don ning do nirya, ‘Aning winipnuyabeʼ tenen, apil-apil nirya piripdemunba, winipmanto kum uplyopura, pia kanye teniltonauk unamlume. Tonda, anggun kam una ati, lo ton weik tonun kum arepnamsile. Adeice arye, anggun nirya ara, kum daneipnamsile. Yu nang arye, anggun nirya ati, obuka kum daneipnamsiyaka atia. Aning nirya winipnamsila deiyok ara, anggun deice auple. Ara, anggunce na Allah ati, ‘Nun likeʼ tenen, akunum yaniplopmanuluma ati, nyapsine.

²¹ Allah Yahweh arye, anggun wenena ati, kanye imun uk, anggun dam deipsiliba, uk talepsilirye, anggunce dakdongopdanin banamlume. Anggun unamlumak ara, kanye imun weikuk, yala-yala nirya, deiyok tuba-tuba yalyeura, dopropmunce, ikin weik deiceuk unamlume. Winibuka ulamunya deice aryuk, anggunce, ‘Amutuku dopropnuyabe, asukumuk unamabeʼ tenen, bimunye noutam ara, dibinamlume. Adeice arye tonoknye babye, anggun unamlum mutuku noutam arye, ton kam kum unamlume. Auk dilamsilya deice arye, anggun nirya ara, dibina dem unamlume.

²² Allah Yahweh arye, anggun wenena ati, kanye imun uk, anggun dam deipsiliba, uk talepsilirye, anggunce dakdongopdanin banamlume. Adeice arye, amalye un ning babye, nong uptabaknin banamle. Tonda, auk disilyeura, dakdongopdaninban ning arepnamsile. Aning ara, ani. Nong bola deice nena ap, nong bol nirya malye una ap, tonda talina uk ap, nong buppu una ap, uk yala weik tonun arepnamsile. Tonda, anggun koulamlum ning nirya ara, koluna deiyok ning aripsiliba, kolunamsile. Atouk, mikip kumanya arepsilyeura, anggun koun ning yala nirya, lokuka poupnamsile. Aikin weik ning, anggun dam yasilyeura, dolonamluma deice arye, anggun nirya ara, dipnin balamunya ani, kum kipdeipnamsile.

²³ Atalak nirya ara, Allah arye anggun wenena ati, mok mitik tonun ton, pia kum arepnamsila ati, mok ton anggun mutuku kum cenamsile. Mok kum ceplya arye, anggun unamlum mutuku noutam nirya ara, sisal sepnamle. Adeice arye, tuku nirya ara, mikuka diliklirye, pia darapnamle.

²⁴ Aning atouk, Allah Yahweh arye, im deice arye, mok arisulul touk ubuka, ton kum arepnamsile. Ato kum bukni, anggun unamlum mutuku noutam ara, tuku kel-kel abuka, butbuta ulamle ning arepsiliba, im deice arye, anggun deice saklyopura, anggun nirya ara, kum danamlume.

²⁵ Tonda, anggun ni koproba Allah Yahweh arye, nyapdeibuk yupu kum kekepmunce, batakmunyopura, elce anggun bataksiliba, anggun ona ati, yuk asik nang yakirye, obuka sirya daknamsiyake. Winipsikceura, anggunce anggun mal olan nang ati, ‘Optibyeʼ tenen, moubuka kalikmunce, tonok bisik arye kalikil binamlum bukni, anggun mal olan nang aryuk yakirye, opsiksiceba, ilil weik upsiliba, bikbik abuka, yuk-yuk tekbarye bisik, bokwalwalap danuka, bindopnamlume. Winipmunyopura, anggun mutuku dana-dana tam unyak nang arye, anggun malye winimunye ning eipsikirye, ‘Se, aning ara, dipkoprob, sikda malye winilamik deice arye winibukʼ tenen, sik kanye pum tam tenenamsiake.

²⁶ Anggun opnamsiyak nang arye, anggun Israel nang oplopsikirye, malya kipsikcopura, anggun dipmunye talak ara, anggun nong nirya, maka yala-yala ap, bai noutam ulye malye kam ning ap nirya, yakirye, sik din kipnamsiake. Tonda, amalye kam ning arye, anggun nong yanuka, dinamsiak talak ara, yuk nang arye, aning ton yanuka kum yakdonoknamake.

²⁷ Tonda, Allah Yahweh arye, minop talak Mesir mutuku nang, sik wenena ati, sik nong deice areamukba, torok moulamuk atonun, anggun babye atouk winipnamsile. Tonda, anggun nong bola deice ara, pukle korodoma aryuk amupnamsile. Atouk tonda, nong bola deice nirya ara, kice uk arepnamsile. Winipnamsil talak ara, akorodoma kwetelina ati, obat ton dinamluma babye, pia kum lopnamsile.

²⁸ Tonda, Allah Yahweh arye, anggun deice ara, motona talin ning arepnamsile. Tonda, asing kuna arepnamsile. Winipsilya deice arye, aning nirya moubuka kum elinamlume. Aning eipmunce, bita kum bikinamlume. Tuba walwal yupu nyana ap, walwal una apuk unamsile.

²⁹ Winipsilya deice arye, yana keting noutam kipmalya babye, anggun asing arye moubuka elilkatana kumce, asing kun nang kulkakalamak atouk unamlume. Adeice arye, anggun ban bisik ara, bita kum elinamlume. Tonda, anggunce pil donamlum ning nirya ara, nong kum unamsile. Kum kilonamsile. Sik yuk nang arye, anggun ning nirya ton, atalak-atalak nirya, alulonamsiake. Anggun ning alubuka dopropnusice talak ara, yuk nang arye anggunti, kum melinamsiake.

³⁰ Anggun ni koproba Allah, elce nyapdeipsuk yupu ati, diba kum tenemunya deice arye, anyapmasin ikin ning nirya ara, anggun dam yaliba dolonamlume. Anggun moun dilamunye kil ati, ‘Dopnuyap,’ tenepmunye talakuk, amoun dilamunye kil, yuk nang arye alubuka dobikirye, neika manamake. Tonda, anggun aik dopnalum bukni, adopmunye aik, kum unamlume. Tonda, anggun anggur wa wibuka koupnamlum bukni, el nong ara, anggunce libuka, kum dinamlume.

³¹ Tonda, anggunce weilamlum sapi basam, anggun dam arye opnamak bukni, el nong kalibuka ton, kum arepnamsiake. Tonda, sik keledai basam nirya ara, anggun asing dinmamunyak aryuk, yuk nang arye kirikdongobuka, bobanamak bukni, tamubuka kum boyanganamake. Tonda, anggun domba basam nirya babye, anggun mal olan nang damuk arepnamake. Winipnamsiak ning nirya ara, yuk nang arye eibikirye, ‘Bicoʼ tenen, kum melilyanganamsiake.

³² Anggunce deipnalum mapu nirya babye, anggun dinmamunye sukum aryuk dobuka, pera mutuku unyak ninye asik nang melibuka pil dona ati, arebikiba bobinamnyake. Winibikceura, asum-asum nirya ara, anggun mapu ati, ‘Se, nun mapu eiptibyeʼ tenen, enmamunyeba, asinguk dinamsile. Winibuka pia enamlum bukni, anggun mapu ara, kum eipnamlume. Tonda, anggun dam tamubuka, kum yanamsiake. Talyeuk enamlume. Anggun mitanguk unamluma anya arye, anggun mapu nirya bobinamyak talak ara, anggunce, ‘Se, yata winiptibye do?’ tenenauk unamlume.

³³ Tonda, anggunce deibuka, pil domunce, tuku deice koulalum ning nirya ara, anggun kum bikamlum nang, yuk pera mutuku arye yangan nang yakirye, yanuka anggun wa tuku nirya doropnamsiake. Bukni, anggun ning ara, ton kum dopropnalume. Tonda, yuk nang arye yu uplyeura, anggun dam tuba-tuba ikin ning delinamsiake. Anggun ti, olbisinauk wininamsiake.

³⁴ Aning nirya winipsica deice arye, motona talin nang atouk unamlume. Deiyok ara, anggun dam ikin weik ning yaliba, dolonamluma deice arye, unamlume.

³⁵ Tonda, anggun si erelulum Allah Yahweh arye, anggun yan nirya ara, torok uk arepsilyeura, uk talipnamsile. Auk talipnamsil ning ara, kwetepmanto kum ning ati, min kum lopnamsile. Tuba uk talinauk unamsile. Tonda, anggun torok uk talipnamsila ara, yan tatang arye dipdongobuka, kisok potong nirya ara, auk aryuk dinamsile. Min kum lopnamsile.

³⁶ Anggun ap, anggun deiyoknye ap ara, Allah Yahweh arye bobuka, yuk mutuku nang unyakak ara, anggun walwal mutuku bobinamsiake. Tonda, anggun apu yapu nang babye, sik bikina kum mutuku bobinamsiake. Winipsiliba, amutuku noutam binuka umunce, amutuku nang sikce, keil ap, yo ap dobuka, ninye urasin atouk kibuka, ‘Nun ni aniʼ tenen, talye ning, isa si erelamik touk, anggun babye, atalye ning, isa si erenamlume.

³⁷ Allah Yahweh arye, anggun bobinuka deipsilyeura, unamlum mutuku noutam ara, sik dana-dana tam unyak nang, yuk-yuk mutuku nang arye, anggun eipsikirye, ilil pia weik unamle. Tonda, Allah elce wilibuka, talye-talye kipdeipselyeura, sik yuk nang arye, akutusikirye, nalinamsiyake. Ton ning ara, ‘Se, aning ton winipsilyakʼ tenen, ilil asa ubuka unamake. Anggun ikin weik upnamsil ning ara, yupu talibikcak arye, yuk mutuku nang ati nukunamake.

³⁸ Anggun ni koproba Allah, elce nyapdeipsuk yupu ati, diba kum tenepmunce, kum talibuka ulamunyopura, adeice arye, ikin ning weik tonun, anggun dam yaliba dolonamlume. Ara, anggun wa wibuka, yala weik tonun koupnamlumba, palamle bukni, nong ara, mitik touk dolonamlume. Deiyok ara, anggun wa wibuka koupnamlum ning nirya ara, sul kwising arye, dilamlya deice arye, kum kinamsile.

³⁹ Anggun wa wiamunyak ara, anggur duk dokmunce, kalikinamlum bukni, duk kum dakanamlume. Atouk anggur mek babye, kum dinamlume. Deiyok ara, anggur yo nirya ara, bulbula arye dibuka, sirya daknamle.

⁴⁰ Tonda, anggun ulamlum mutuku noutam nirya ara, zaitun yo duk moulamle yo ara, weik tiklamle bukni, duk nirya ara, ayo dub aryuk lupsakanamle. Winiplyopura, anggunce zaitun minyak mek kum dolonamlume. Ati ara, ‘Mambul pil donamakʼ tenen, ninye dina ati, zaitun minyak mek kwebuka, anggun kisok deice kum dikililanamlume.

⁴¹ Tonda, anggun mapu ap, kilmapu ap, deipnamlum bukni, anggun on nang arye yanuka opsikirye, anggun mapu nirya ara, dalubuka doropsikirye, sik pera mutuku noutam bobinuka, wenen aik dongolbikiba, anggun nirya ara, mapu kum deiamice nang atouk, kibuka unamlume.

⁴² Tonda, yo duk, din yo yala nirya koupnalum ning ap, koun ning yala nirya kounamlum ning ap nirya ara, yo bok din ning arye dilamle atouk, din ning sekna arye sekenamle.

⁴³ Yuk pera mutuku nang yanuka, anggun kan-kan unyak nang arye, mikip asa tonap talinamsiake. Winipsica deice arye, sik anang, weik deiyok nang unamake. Bukni, anggunda mitang ninye kipdeipnamsiake.

⁴⁴ Winipnamak talak ara, sik anang ara, yo bok weik upnamle ati, “Anggunce, nun Israel nang ati, uang ton tia arepsululume,” nyabuka moropmunyeura, sikce arenamsiak bukni, anyarepnamsiak ning ara, anggunce tamubuka kum arenamlume. Tonda, anggunce aninye asik nang ati, tia talak ati, uang ton kum arenamlume. Deiyok ara, anggunda aning-aning babye kum nang ati, adoropmamunye ning pununa ara, dobuka arepmanto ning ton, kum upnamsile. Winipsilya deice arye, anggun nirya ara, sik ninye asik nang aryuk, talinamsiake. Anggun ni koproba Allah, elce nyapdeipsuk yupu ati, diba kum tenemunya deice arye, anyapmasin ikin ning nirya ara, anggun dam yaliba, dolonamlume.

⁴⁵ Winipmunya deice arye, tuba-tuba ikin ning, anggun deice yaliba, dolomunya deice arye, anggun nirya kum kipnamsile. Deiyok ara, anggun ni koproba Allah Yahweh arye, “Aning wininamlume. Aning ara, pia kum wininamlume,” nyapdeipsuk yupu ap, “Teleb winina ara, ani,” nyapdeipsuk yupu ap ara, batakluma atia. Tonda, elce nyapdeipsuk yupu, kum kekebuka winiluluma ati, ubuka winipnamsile.

⁴⁶ Kanye ikin ning, anggun dam tuba-tuba yanganamsila deiyok ara, anggun malye wininamluma dekna ara, Allah arye, anggun deice delinamsile. Tonda, anggunce deipmunyeura, deipdanin banamak nang nirya ara, pia aninguk dolonamlume. Aikin ning upsilyopura, anggunce, ‘E, dipkoprob nun nirya ara, nun ni Allah, el yupu yaninauk winilamupu ati, awinilamupu deice arye, aikin ning ara, laka kilin ning atouk ati, tuba-tuba yanganamsileʼ tenen, biknamlume.

⁴⁷ Anggun ni koproba Allah Yahweh, elcuk anggun winin ning ara, yata yala nang nirya ara, akunum meliamsukce, teleb kibuka, pia weik tonun teleb ning deiamsuke. Bukni, anggunce elti, ‘Nun ni telebe,’ nyabuka, kanye kum deiplumce, elce nyapdeiamsuk yupu nirya ara, anggunce teleb kanye bobuka, talima lamakdongobuka, kum talibuka wininamluma ati, elcuk anggun wenena ati, deken ning arenamsile.

⁴⁸ Ati ara, Allah Yahweh elce, anggun on nang dopdeipliba, anggun olyanamsiyak nang arye, sikce obuka, sirya daksicak arye, sik talipsiceura, sik anang amu tam umunyak arye, sik piluk talye donamlume. Adeice arye, anggunda dina ap, mek ap, patanauk ulamsiliba, unamlume. Tonda, anggun ongon baju kum upliba, nong banang dem unamlume. Aning atouk, anggunda aning yala-yala nirya ara, kum dasiliba, urdemuk unamlume. Allah el yu upliba, adiparyuk anggun wenena ati, ikin ning anggun nong deice deipsiliba, imun kanye bobuka ulamunya ani, kum kipnin banamsile. Winipmanto ning ara, malye winibice nang ati, rantai tapu arye koubiceura, wenen aik pum tam dongalamak atonun, ikin ning pia weik, anggun deice delinamsile. Winipnamsila deice arye, anggunda mitik tonun kipnin balamsilyopura, amenda talak anggunda, kum kipnamsile.

⁴⁹ Winipnamsila ati, Allah Yahweh elcuk, anggun yupu kekena kum nang, yuk pera mutuku daunyak yu nang, mutuku sirya, im sirya, daunyak nang arye dopdeipliba, anggun olyangana ati yanamake. Winipmanto ara, talye karin arye, Bib maka lakuka yangaliba, ninye ilil ulamle atouk, sik pera mutuku yu nang arye, anggun dam minopce olyanamsiyak talak ara, ilil weik upnamsile.

⁵⁰ Adobuka deipnamle pera mutuku nang ara, urasin yu weik unyake. Ati, anggun mutuku wisi nang ap, kilapu ap, mapu nirya ap ati ara, ton bico kum tenepnamake. Anang nirya ati, mikip aryuk, yu uplirye, olataknauk winipnamsiake.

⁵¹ Tonda, ayu nang arye, mal olyanamsiyak talak ara, anggun domba basam do, sapi do, maka do, anggun weilulum ning yala-yala nirya ap, tonda anggun koululum ning nirya ap ara, kum kipdeipnamsiake. Winibikirye, daupnin balamica ani, anggun din ning yala-yala nirya kum kipdeipsicopura, anggun babye ton, obuka kum daneipnamsiake. Ara, anggun gandum duk nirya ap, tonda anggur duk ap, anggur mek ap, minyak zaitun mek ap, tonda anggun weilulum sapi basam ap, kambing basam ap, domba basam ap, aning nirya kum kipdeipsikiba, aning nirya ara, kum dalirye, anggun nirya babye dipnalume.

⁵² Allah Yahweh arye, anggun wenena ati arepsiliba, olyanamsiyak nang ara, yu weik arye yakirye, warikuka opnamsiake. Ara, anggun ni koproba Allah Yahweh arye, ‘Ateleb mutuku unamakʼ tenen, areamsukba, anggun asukumuk ululum mutuku noutam nirya ara, anggun on nang arye yanuka, warikuka opnamsiake. Winipsikirye, weik cang keil poka domlumce, ‘Aning ara, kum ulupmanto. ‘Nun mal olan nang arye, aning kum welebuka opsitinge,’ tenemunye ning nirya, amutuku-amutuku noutam nirya ara, dipkoprob uluplobikirye, opnamsiake.

⁵³ Anggun mal olan nang arye, anggun ululum mutuku yanuka wariksice talak ara, anggun din ning nirya, kum kipdeipsikiba, din patapsilye ati, anggunce, ‘Seʼ tenimunce, talima uk dipnamsile. Winipsilya deice arye, anggun ni koproba Allah Yahweh arye, ur talye arisulul mapu nirya ara, din kum ati umunce, anggun mapu ap, anggun kilmapu ap, opmunce dipnamlume.

^54-55 Tonda, yata nang do nirya, el amutuku kopropnye, el talima namin ulirye, yuk nang nirya ati, yu una kumce, pia bico tenebuka, weik tonun melilulnye babye, yuk nang ati, din bokuka kum arenamle. El aik unyak nang babye, kum bokuka arenamle. Atonunye bira, ‘Dotalak kanye imun upnamnil,’ teneplirye, kintinin ning nirya kintinibuka ululnye babye, ikin kanye boplirye, yuk nang nirya ati, pia kum melipnamle. El babye, ‘Se, yata ati wariksiyak do?’ teneplirye, el mapu koprop, obuka dipnamle. Ara, dina yuk ning ton kum upnamle ati, winipnamle. Tonoknye birye, el mi obuka, dinmalye ning sekdoba ara, el kayapu koproba yuk nang do, atouk el domlye kil, bico tenelamle kil do, tonda el mapu koproba, tuba kam unmace mapu do, nirya ara, aobuka dinmalye mi kalimna ara, kum bokuka arenamle.

⁵⁶ Aning atouk ton, amutuku kobrob kil, pia kanye teleb kil, tonda pia namin kil ara, akil arye, ‘Se, yata winiptinye deice arye, yuk talak ara, teleb uptinye do?’ teneplirye, tuku deice yanibuka, talye kum balul kil babye, atouk winipnamle. Ara, sik mal olan nang arye, ‘Israel ninye opnuyapʼ tenen, sik mutuku wariklamik talak ara, sik din ning nirya kum daliba, akil babye din patapliba, din ati, ‘Yata winiptinye do?’ teneplirye, dungnubuka, el mi bukni, winiryuk deipmalye mi uk obuka, mi dei sekdoba nirya dipnamle.

⁵⁷ Tonda, el domlinye ap, el makal kil ap ati, bico tenelanyak bukni, atalak ara, ikin weik upmalya ati, el akanye birye bico tenelulnye ap, el makal kil koproba ap, el mapu tuba kam unmace nang ap ati, din mitik tonun auplyeura, aning ton bokuka, sikti, kum arepnamle. ‘Naryuk dipnirye, sirya daknamneʼ tenen, unamle. Sik pera weik mutuku yu weik nang arye, warikuka olyanganamak talak ara, anggun Israel nang ululum mutuku, mutuku nirya ara, ikin ning weik unamluma ati, anggun patan ning yala-yala nirya kum danamle. Ati, arup nyapmasin kil atouk kilapu nirya ara, mi deipnamak talak ara, mi deiyok dilamle ning babye, dungnubuka dopnamake. Tonda, mapu ton deipliba, akil ara pia namin kil bukni, ami oplirye, duknubuka dipnamle. Deiyok ara, yuk din ning tonok ning babye, kum dalya ati winipnamle.

⁵⁸ Ati ara, anggun Israel yala nang nirya ara, anggun ni koproba Allah, el si Yahweh arye, “Aning ara, wininamlume. Aning ara, pia kum wininamlume,” nyapdeibukba, abuku noutam sekeibik ning, moubuka kum talipmunce, anggun ni koproba Allah Yahweh, el weik mambul si ululnye, elti, weik tonun si kum erepmunyopura, elce wenepnamsile. Yahweh arye, aning-aning nirya talilirye, Weik Erenanye ulula ati, el siuk kum erepmunyopura, wenepsilirye, weik ikin ning ton arepnamsile.

⁵⁹ Anggun ni Allah Yahweh, elce anggun deice ap, anggunce deipmunyeura, deipdanin banamak nang deice ap nirya ara, kanye imun weik un nakina arepnamsile. Amalyeuk dina deiyok ning ara, pia talinamsile. Anakina ara, ton talak ton lopmasilya ani, talipmasilya kum kinamsile. Winina ara kum buk, auk ara, pia talinauk unamsile.

⁶⁰ Ara, el siuk teleb kibuka erepmunce, el yupu kum talibuka winipmunyopura, anggun Mesir mutuku ulalum talak ara, kanye imun weik uk din ning areamukba, anggun asing eiyamlum atouk uk ara, elcuk arepliba, anggun dam yalyeba, doropnamlume. Winipnamlum bukni, atalipnamsil uk ara, kum lopmanto kipnamsile.

⁶¹ Allah arye ninye wenena ati, uk yala weik, anggun dam arepnamsile. Ara, kanye imun weik ning, Allah Yahweh elce nyapdeibukba, yayuk ning ara, abuku noutam kum ubuk ning babye, elce arepliba, aminyan talak ara, anggunti auk talinamsile. Talilamsiliba, dipnin balamunya ani, doupnamle talak noutam ara, anggun Israel yala nang ara, adiparyuk kum dandopnamlume.

⁶² Dipkoprob nyapsine. Anggun Israel yala nang ara, ninye yupa ara, kurya im deice weik, nukmanto kum tiklamle touk ululum bukni, aminyan dowininamle talak ara, kam unamlum nang ara, mitik tonun unamlume. Deiyok ara, talye ati kume. Ara, anggun ni koproba Allah, el si Yahweh arye, “Aning ara, wininamlume. Aning ara, pia kum wininamlume,” nyapdeibuk yupu ati, dukdongobuka kum winilamluma deice arye, kum kipdeipnamsile.

⁶³ Tonda, Allah Yahweh, elce anggunti, kanye deipsukce, teleb kipdeipsukba, anggunce deiplumba, dadeipdanin, yangalamunya ani, anggun mapu ara, pia weik, nukmanto kum ulamlume. Bukni, anggunce, Allah el nyabuk ning moubuka kum talipluma ati, anggun dam ikin ning arepsiliba, dopropnalume. Ara, ikin ning doropnamluma deice arye, anggun yala nang ara, mitik tonun upnin banamlume. Anggun yupa weik ulamunye ning ara, kum danamsile. Tonda, anggunce, ‘E amutuku wekibirye, talibuka teleb asa unamabeʼ tenen, binuka tia talak unamlum mutuku ara, Allah arye, tamubuka dopropnamsile. Amutuku noutam ara, weik kum unmamunye buk, tamubuka dopropnamsile.

⁶⁴ Tonda, Allah Yahweh arye anggunti, amutuku noutam arye yakuka donoksiliba, ninye yuk mutuku nang unyaka noutam, binuka unamlume. Tukwak mutuku noutam, mutuku-mutuku nirya binuka unamlume. Amutuku binuka umunye talak ara, sik amutuku unyak nang arye, talye keil ap, yo ap, yuk teleb ning ap, dobuka memebukabikirye, sikce, ‘Nun ni aniʼ tenen, talye ning atibuk, si erenamake. Atalye ning ara, anggun babye, anggun apu yapu babye, kum bikamlum ning buk, talibuka, isa si erenamlume.

⁶⁵ Tonda, yuk-yuk mutuku nang ulamak mutuku noutam, binuka unamlum talak ara, namin asa, teleb deice un mutuku, ton pia kum eipnamlume. Ikin kanye bobuka unamlume. Tonda, anggunce, ‘E, amutuku ara, teleb ati, amutuku nun pia talibuka unamap mutuku atiaʼ tenen, pia kum unamlume. Ato mutuku ton kum eipnamlume. Poka dona teleb mutuku ton, kum eipnamlume. Pia banauk unamlume. Deiyok ara, nun ni koproba, Allah Yahweh arye, ikin ning arepsiliba, anggunce, ‘Se, yata ati winipsil do?’ tenen, talima uk diplyeba, kanye bokoltonamsile. Adeice arye, ‘Nunda winipnamabeʼ tenen, kanye ton kum bopnamlume. Kanye teneniltonauk unamlume. Amutuku noutam ara, anggun asing ara, ikinuk upnamsile. Tonda, anggun talima dakalsaklamsil touk, unamsile.

⁶⁶ Anggun aunamlum talak nirya ara, ikin ninguk yasiliba, pia imun kanye bobuka unamlume. Keting noutam babye, lukunyan babye, ‘Se, dipnamap do, opnamsiak do?’ tenen, ililuk usilyebuk, unamlume.

⁶⁷ Winibuka unamluma ati ara, yata talak do nirya, pia ikin kanye bobuka unamlume. Ati, dan talak do nirya, anggun ilil upsiliba, talima noutam ara, duk-duk apnamsile. Winipsiliba, beren tam talak aryuk, ‘Se, minop iniptu,’ tenenamlume. Aning atouk tonda, lukunya talak ara, ‘Se, minop berektu,’ tenenamlume. Deiyok ara, anggun asing arye eipnamlum ikin ning ap, kanye imun ning ap, eipnaluma deice arye, anggun talima noutam ara, pia malye-malyeuk tenelanamlume.

⁶⁸ Doupnamle talak ara, anggun ni koproba Allah arye, tamubuka mek kwen deice, kapal arye bobuka, Mesir mutuku bodeipnamsile. Mesir mutuku arye, bobuka binusuk talak ara, Allah arye, “Kume, anggunda, Mesir mutuku tamubuka kum yanamlume,” nyapdeiamsuke. Tonda nyabuk. “Mesir mutuku noutam tamubuka binamlum talak ara, anggunce, ‘Se, yata wiribuka kam uptibye do?’ tenen, anggun mal olan nang ati, “Nun sal babye, kilapu babye, yo bok deice arye deksumunye ura, anggun pil talyeuk dopnusiabe,” nyabuka, moropnamlum bukni, tonoknye babye, ton kum deknamsiake. ‘Anang ara, nun like, daupmalye,’ tenenamsiyake.