Ulangan 27 - Eipomek

Allah arye, “Aning wininamlume. Aning ara, kum wininamlume,” nyan yupu ara, keil pala deice arye, sekeibuk yupu

¹ Sik Israel nang deiyok kibuka taleamika deiyok nang ap, Musa ap, sik neika biyikce, Israel nang nirya, bulubuka unmekak, biyik. Biyikba, Allah arye nyapdeibuk yupu nirya ara, Musa birye, Israel nang dam binuka nyabuk. Ara, “Arup narye anggunti, nyapdeipsin yupu ara, anggun nirya arye, diba tenebuka talipmunce, unamlume. Tonok ning babye, kum batakanamlume,” nyabuk.

² Tonda, sik Israel nang, Yordan mek koubuka, otam Allah Yahweh arye, anggunti arepsuk mutuku binamunye sum ara, anggun adiparyuk weik keil bobinuka, akeil deice sekna ati, teleb kat tuku dobuka, keil deice taplak deipmunce, teleb kibuka moupdeipnamlume.

³ Winipmunyopura, anggunti kalekelul Allah, el si Yahweh arye, ‘Aning ara, wininamlume. Aning ara, pia kum wininamlume,’ nyapdeibuk yupu nirya ara, yuk-yuk akeil deice sekeipnalume. Anggun apu yapu si erelamikba, sikti, kaliklamuk Allah arye, teleb mutuku aning-aning nirya ubuk mutuku arepsiniba, amutuku uk unamlume,’ nyapdeiamuk mutuku ara, anggun akunum bimunce, binuka unamlume.

⁴ Ati ara, anggunce Yordan mek koubuka, otam mutuku noutam akunum binuka wekmunyopura, anggun adiparyuk, weik mutuku kon deice, el si Ebal mutuku dam binamlume. Asukumuk, anggunce pala weik keil dobuka, akeil deice sekna ati, teleb kat tuku dobuka, keil deice taplak deipmunce, teleb kibuka memepdeipnamlume. Ara, narye anggunti, asum arye nyapdeipsin touk, amutuku bimunye talak ara, binuka memepdeipnamlume.

⁵ Amutuku ara, adiparyuk anggun ni koproba Allah Yahweh, el si erena ati, uku dongonak memepdeipnamlume. Aning memena ara, besi ning arye, kum pakmakce keil aryuk, dobuka boyamunce, memepdeipnamlume.

⁶ Deiyok ara, anggun ni koproba Allah Yahweh, el si erena ati, kam ning opnarye, uku dongonak ara, pala weik keil aryuk boyamunce, memepdeipnamlume. Bukni, akeil el urasin teleb una ati ara, besi ning lingkis arye, kum memepnamlume. Ining ning obuka, uku dongonak, akunum memep deipmunyopura, adeiceuk anggun ni koproba Allah, el si Yahweh si erena ati, yanuka uku dongolyanganamlume.

⁷ Tonda, ‘Nun ap, Allah ap, epdabirye, teleb ubuka neika unamapʼ tenen, ansinilina ati ton, boyanuka arelyanganamlume. Aboyanuka erelyanamlum ning ara, mening dam adiparyuk, adin ara dipmunce, anggun kanye teleb deice arye, mot nyabuka, ‘Telebe,’ nyalamunce, anggun ni koproba Allah Yahweh, el dam unamlume.

⁸ Sekna ati, keil memepdeipmunya deice ara, Allah arye anggunti, “Aning ara, wininamlume. Aning ara, pia kum wininamlume,’ nyapdeipsuk yupu ara, teleb kibuka, lak arye akeil deice arye sekelinamlume.

⁹ Musa ap, Israel sik deiyok talibuka ulamik nang ap arye, ayupu akunum nyabikopura, ayupu ton dukdongobuka nyabik. Ayupu nyabik nang ara, Musa ap, tonda Allah el si erena ati, domik aik noutam pil don nang, sik Lewi yala nang bukni, imam pil talibuka dolamik nang ap arye, sik Israel yala nang nirya ati, binuka nyabik. “Nun kayapu, anggunce, yupu nyana kumce, moubuka kekemunce, moubuka kel biknamlume. Arup arye, anggunce si erelulum Allah, el si Yahweh, el mapu koproba atonun, akunum kipdeipmasila ati, anggun yupu ton kum nyanamlume.

¹⁰ Ati ara, arup anggun ni koproba Allah, el si Yahweh elce, ‘Aning ara, wininamlume. Aning ara, pia kum wininamlume. Tonda, teleb winina ara ani,’ nyapdeipsuk yupu nirya, narye boyanuka, anggun dam akunum nyapmasin yupu ara, moubuka kekepmunce, diba tenepmunyopura, anyapdeipsuk touk, ubuka wininamlume.

“Allah arye nyapdeibuk yupu kum kekebuka unyak nang ara, kanye imun ning dolonamake,” nyabuk yupu

¹¹ Arup aryuk Musa birye, sik Israel nang ati, ayupu nyabuk.

¹² Yordan mek koubuka otam akunum bimunyopura, anyapnusin deiyok ning ara, na ap, anggun ap, weik mutuku kon, el si ara Gerisim, eitam tikibirye, anggun Israel yala nang nirya ara, “Nun ni koproba Allah arye, sik Israel nang ati, teleb kipdeipnamsilamʼ tenen, moropkiabe,” nyabuka, teleb yupu nyabibyopura, anggun deice deipnamsiabe. Na ap, tiknamap nang ara, ani. Ara, Simeon yala nang ap, Lewi yala nang ap, Yehuda yala nang ap, tonda Isakar yala nang ap, Yusuf yala nang ap, Benyamin yala nang ap, sik nirya ara, adiparyuk Gerisim mutuku deice binuka tikibirye, amutuku unamlum nang nirya ati, ‘Teleb wininamlumʼ tenen, teleb yupu nyabuka, anggun deice deipnamabe.

¹³ Atonun ton, anggun Israel mutuku noutam ululum nang arye, Allah el yupu yaniplumce, malye-malye winimunyopura, anggun ni koproba Allah arye, anggun wenena ati, kanye imun weik ning, anggun nong deice deipnamsil ning ara, yuk yupu ton nyanamake. Anyapnusin yala nang ara, otam mutuku, el si Ebal mutuku, weik mutuku kon deice tiknamak yala nang ara, ani. Ara, Ruben yala nang ap, Gad yala nang ap, Asyer yala nang ap, Zebulon yala nang ap, Dan yala nang ap, Naftali yala nang ap, anang nirya ara, Ebal mutuku deice binuka tikikiba, Allah arye wenen yupu ton nyapliba, kekenamake. Ara, sik Israel yala nang arye, Allah el yupu yaniplumce, malye-malye kipdeipmunyopura, Allah arye, sun yupu nyapdeipnamsil ning ati, nyabibiba, kekenamake.

¹⁴ Ayala nang nirya kintinibuka tikikcopura, sik Lewi yala nang aryuk, yupu weik tonun laka nyabikiba, anggun Israel yala nang nirya kekepmunce, anggunce tamubuka, ‘Dipkoprob nyapmaluma ati, aninguk wininamabe,’ nyabuka nyanamlume.

¹⁵ Ati ara, sik Lewi yala nang arye, nyanamak ning ara, ani. “Allah el si Yahweh arye, talye ning si erena ara, pia malye weik ati, aning ara, na like. ‘Aning ara, pia malye,’ tenenun ning ati tenebuka, memebuka delina ati, keil ap, yo ap, tonda logam deice arye memebuka deibikirye, dungnubuka, si erenyak nang ara, Allah Yahweh arye anang ati, kanye imun weik ning, sik nong deice deipnamle. Ati, anggun Lewi yala nang arye, malye winin ninguk yasilyeba dolonamlume. Allah nyasilya deice arye, ikin ning anggun dam pia aunamsile,” nyabuka, yupu deice arye sunamsiake. Ayupu Israel nang nirya kekebikirye, diba tenebikirye, sikce tamubuka, “Yo, dipkoprob nyapmasuluma ati, akunuma nyababe,” nyabuka, nyanamake.

¹⁶ Tonda, “Yata nang do nirya, sik wisi nang ati, bico kum tenebikirye, anang ati, si erebuka kina kumce, batakikiba, talye kankan uk ulamikcopura, epdakca menenga ara, Allah arye arepliba, anang sik mapu dam, ikin ning yalyeba, dolonamake. Adeice arye dipnamake,” nyabuka, yupu deice arye, sun yupu nyanamake. Ayupu ara, anggun Israel nang nirya kekepmunyopura, anggunce tamubuka nyanamlum yupu ara, ani. “Yo, dipkoprob nyapmasuluma ati, nunce, “Aninguk winipnamleʼ tenen, ‘Akunuma,’ nyababe,” nyapnamlume.

¹⁷ Tonda, “Yata nang do nirya, tonoknye, el kwit wiamlye wa ati, ‘Awa tuku ara, sirya tam aniʼ tenen, keil delilamikce ning ara, tonap kisikuka bobinuka, yukak deiplinye biti ara, “Allah arye arepliba, anye el dam, ikin ning yalyeba, dolonamlule. Adeice arye dipnamle,” nyabuka, yupu deice arye, sun yupu nyanamake. Ayupu ara, anggun Israel nang nirya kekepmunyopura, anggunce tamubuka nyanamlume. “Yo, dipkoprob nyapmasuluma ati, nunce, “Aninguk winipnamleʼ tenen, ‘Akunuma,’ nyababe,” nyapnamlume.

¹⁸ Tonda, asing kuamlinye biti, ‘Sakuka puptuʼ tenen, malye bisik nuklyopura, malye winin ning ara, el anye deice unamle. Ara, malye bisik nuklinye biti ara, “Allah arye arepliba, anye el dam ikin ning yalyeba, dolonamlule. Adeice arye dipnamle,” nyabuka, yupu deice arye, sun yupu nyanamake. Ayupu ara, anggun Israel nang nirya kekepmunyopura, anggunce tamubuka nyanamlume. “Yo, dipkoprob nyapmasuluma ati, nunce, ‘Aninguk winipnamleʼ tenen, ‘Akunuma,’ nyapmabe,” nyapnamlume.

¹⁹ Tonda, yatanye do nirya, ninye asik nang ap, tonda mitik winiryuk nenmakce nang ap, yuwak kilapu ap, sik ning ubula doproplinye ap, yupu lipsisikuka bokolin talak ara, deiyok kum upmalibuk, malye yupu nyaplyopura, aning ara, “Teleb kum unamle,” nyabuka, sun yupu nyapnamlume. Ara, anye biti ara, “Allah arye ikin ning arepliba, anye el dam ikin ning yalyeba, dolonamlule. Adeice arye dipnamle,” nyabuka, yupu deice arye, sun yupu nyanamlume. Ayupu ara, anggun Israel nang nirya kekepmunyopura, anggunce tamubuka nyanamlume. “Yo, dipkoprob nyapmasuluma ati, nunce, ‘Aninguk winipnamleʼ tenen, ‘Akunuma,’ nyababe,” nyanamlume.

²⁰ Tonda, yatanye birye do nirya, tonoknye, el mi koproba arye, el li koproba domlye kil ap, neika maprikcopura, elce el li koproba ati, yu uplirye, pia malye ulilunye binya ati, “Elda teleb kum wininamle,” nyabuka, yupu deice arye, sun yupu nyapnamlume. Ara, anye biti ara, “Allah arye arepliba, anye el dam ikin ning yalyeba, dolonamlule. Adeice arye dipnamle,” nyabuka, yupu deice arye, sun yupu nyanamlume. Ayupu ara, anggun Israel nang nirya kekepmunyopura, anggunce tamubuka nyanamlume. “Yo, dipkoprob nyapmasuluma ati, nunce, ‘Aninguk winipnamleʼ tenen, ‘Akunuma,’ nyababe,” nyapnamlume.

²¹ Tonda, yatanye birye do nirya, tonoknye, talye kam unyak ning ap, neika maprikcopura, teleb kum unamle. Ara, anye biti ara, “Allah arye ikin ning arepliba, anye el dam ikin ning yalyeba, dolonamlule. Adeice arye dipnamle,” nyabuka, yupu deice arye, sun yupu nyanamlume. Ayupu ara, anggun Israel nang nirya kekepmunyopura, anggunce tamubuka nyanamlume. “Yo, dipkoprob nyapmasuluma ati, nunce, ‘Aninguk winipnamleʼ tenen, ‘Akunuma,’ nyababe,” nyanamlume.

²² Tonda, yatanye birye do nirya, tonoknye, el makal kil koproba do? Tonda, el li koproba el makal kil do? Ura, el lin, el weit kil do? El dukul do, akil ap neika maprikcopura, “Teleb kum winipnamle,” nyabuka, yupu deice arye, sun yupu nyapnamlume. Ara, anye biti ara, “Allah arye ikin ning arepliba, anye el dam ikin ning yalyeba, dolonamlule. Adeice arye dipnamle,” nyabuka, yupu deice arye, sun yupu nyanamlume. Ayupu ara, anggun Israel nang nirya kekepmunyopura, anggunce tamubuka nyanamlume. “Yo, dipkoprob nyapmasuluma ati, nunce, ‘Aninguk winipnamleʼ tenen, ‘Akunuma,’ nyababe,” nyapnamlume.

²³ Tonda, el yamal kil ap, neika maprikcopura, “Teleb kum unamle,” nyabuka, yupu deice arye, sun yupu nyapnamlume. Ara, anye biti ara, “Allah arye ikin ning arepliba, anye el dam ikin ning yalyeba, dolonamlule. Adeice arye dipnamle,” nyabuka, yupu deice arye, sun yupu nyanamlume. Ayupu ara, anggun Israel nang nirya kekepmunyopura, anggunce tamubuka nyanamlume. “Yo, dipkoprob nyapmasuluma ati, nunce, ‘Aninguk winipnamleʼ tenen, ‘Akunuma,’ nyababe,” nyanamlume.

²⁴ Tonda, yatanye birye do nirya, tonoknye birye, el dam unyak nang ati, ninye ton dungnubuka oplyopura, ‘Elda teleb kum unamle,’ nyabuka, yupu deice arye, sun yupu nyapdeibikcopura, el dipnamle. Anye bira, “Allah arye ikin ning arepliba, anye el dam ikin ning yalyeba, dolonamle. Adeice arye dipnamle,” nyabuka, yupu deice arye, sun yupu nyanamlume. Ayupu ara, anggun Israel nang nirya kekepmunyopura, anggunce tamubuka nyanamlume. “Yo, dipkoprob nyapmasuluma ati, nunce, ‘Aninguk winipnamleʼ tenen, ‘Akunuma,’ nyababe,” nyanamlume.

²⁵ Tonda, yatanye birye do nirya, tonoknye birye, malye kum winipmalinye biti, deiyok kum upmalibuk, el kwit yuknye birye, yu upliba, bul kin ning dobuka areplirye, ‘Opdeipnilyame,’ nyapliba, ayupu kekeplirye oplyopura, ayupu nyapmalirye, arukun ning arepnamlanye bira, ‘Elda teleb kum unamle,’ nyabuka, yupu deice arye, sun yupu nyapnamlume. Ara, anye biti ara, “Allah arye, ikin ning arepliba, anye el dam ikin ning yalyeba, dolonamlule. Adeice arye dipnamle,” nyabuka, yupu deice arye, sun yupu nyanamlume. Ayupu ara, anggun Israel nang nirya kekepmunyopura, anggunce tamubuka nyanamlume. “Yo, dipkoprob nyapmasuluma ati, nunce, ‘Aninguk winipnamleʼ tenen, ‘Akunuma,’ nyababe,” nyanamlume.

²⁶ Tonda, yata nang do nirya, Allah arye, “Aning ara, wininamlume. Aning ara, pia kum wininamlume,” nyapdeibuk yupu yaniplinye ap, tonda Allah elce nyapdeibuk touk, kum winiplinye ap ara, sik Lewi yala nang arye, ‘Sikda moubuka, teleb kum wininamake,” nyabuka, yupu deice arye, sun yupu nyapnamlume. Ara, anye biti ara, “Allah arye ikin ning arepliba, anye el dam ikin ning yalyeba, dolonamlule. Adeice arye dipnamle,” nyabuka, yupu deice arye, sun yupu nyanamlume. Ayupu ara, anggun Israel nang nirya kekepmunyopura, anggunce tamubuka nyanamlume. “Yo, dipkoprob nyapmasuluma ati, nunce, ‘Aninguk winipnamleʼ tenen, ‘Akunuma, amin,’ nyababe,” nyanamlume.