Ulangan 26 - Eipomek

Min yuma ning, Allah arelbana ati, nyabuk yupu

¹ Musa birye, Israel ninye ati nyabuk. Ura, aminyan talak, anggun ni koproba Allah, el si Yahweh arye, ‘Teleb mutuku arepnamsine,’ nyabuka, nyapdeiamsuk mutuku bimunyopura, anggunce amutuku talibuka, pia unamlulume. Amutuku ara, anggun mutuku koproba kipnamle. Asukumuk unamlume.

² Daulamunya ani, wa wiamunya min yuma mouplye ning ara, yuma ning nirya ara, libukapmunce, Allah ati arelbanamlulume. Allah arye arepnamsil mutuku noutam koupmunba, moupnamle yuma ning nirya ara, aling arye libuka arepnamlulume. Arepnamlum sukum ara, Allah el si Yahweh arye, ‘Asukum ara, na si seknamne. Na si eren aik ara ani,’ nyabuka wiamukce, nyapnamsilakuk, arelbanamlulume.

³ Allah el si eren aik talibuka, pil dona deiyoknye, el dam bimunce, nyapnamlume. “Allah el si ara, Yahweh ati, nyapne. Allah arye, na apu yapu nang ati, ‘Amutuku nuknamsine,’ nyabuka, sik deice nyalamuk mutuku ara, akunum arepsukba, na akunum wekmane,” nyapnamlulume.

⁴ Nyapmunyopura, Allah el si eren aik, pil dona deiyoknye birye, anggun lipmamunye ning, el dam yanuka arepmunye aling doproplyopura, Allah el si Yahweh, el si erena ap, arena ap ati, keil pala lelebuka, yangabuka deiamik damak, el si mesba dam deipnamle.

⁵ Winiplyopura, anggunce Allah dam ati, nyapnamlulume. Minop talak ara, na yok pununanye Yakub bira, Aram mutukunye ulamukce, el mutuku koproba ton, kum ubuka ati, tonok mutuku uk, kum ulamukce, obinuka, ayanuka talye balsusulamuke. Balsusulamuka ani, el ap, el kilapu ap, el mapu ap, el kilmapu ap, sik mapsilip nirya ap, mitik tonun dem ulamikce, sik Mesir mutuku biyikce ulamik. Mesir mutuku ulamik talak ara, ikin pil dolamikce, tonda talye tikilyangan nang atonun bukni, sik mapu weik deipdanin balamika ani, yupa weik kipnin balamukce, sik mikip ton weik upre balamukba, yuk mutuku ninye nirya arye, ‘Se, anang ara, mambule,’ tenelamikce, bikamik. Sik ninye weik upnin balamik ati, wini talak ara, nun weik unyabe.

⁶ Wini talak ara, sik Mesir mutuku ninye arye, nun apu yapu ati, pia ikin pil ap, ikin ning ap, weika arye, sik nong deice delilamikba, imun kanye bobuka ulamikce, ikin pil weik aruklamikba, dolamik.

⁷ Winilamika ani, kanye imun weik ulamika deice, nun apu yapu si erelamikba, sikti, melilamuk Allah ati, morolamik. Morolamikba, Allah arye, nun apu yapu, ikin weik pil dolamik ning ap, alye dakalilamik ning ap, sik imun kanye bobuka ulamik ning ap, nirya eibukce, kekepsuke.

⁸ Nun apu yapu arye morolamikba, Allah el mikip weik deice arye, Mesir mutuku noutamak arye, bobuka yangalamsuke. Allah el mikip ara, weik ulula ati, elce ninye winipmanto kum pil ap, ninye kum winipmanto ning ap, weik mambul ning areamuk ning ap, adeice arye, anang nirya arye, ‘Se aning ara, dipkoprob Yahweh aryuk pil donmasile,’ tenebikce, ilil weik ubukba, yok sirim talibuk. Yahweh arye, nun apu yapu lyebukce, dobuka boyasuke.

⁹ Ati nun ni Allah arye, winipsukba, nun ni yapu ap, nun ap dobuka boyasukce, amutuku yanuka arepmasil mutuku ara, aning-aning nirya, teleb ning weik ulul mutuku, akunum arepmasile. Winipmanto ning ara, sapi basam weik mutuku anya arye, moum yung weik arinyake. Tonda, mong mek weik ulul mutuku anya arye, weika arye dibuka, kanye delinyabe.

¹⁰ “Ati ara, na ni Allah, ance arepsulumba, min yuma moulamle ning, min yuma ning ara, libukapna arye, an si erena ati arepkine.” Aning nyanamlulume. Aning atonun akunum nyapmunyopura, boyamunye ning, Allah ati delinamlulume. Winibukapmunce, Allah si erena ati, tuku gutam dipdongopmunce, el si erenamlulume.

¹¹ Winipmunya deice arye, anggun ap, anggun mapsilip ap nirya, aning-aning nirya talye yamubuka arisilye ning nirya ara, anggunce Allah ati, ‘Telebe,’ nyabuka, el siuk erepmunce, kanye delinamlulume. Winipmunye talak ara, sik Lewi yala nang ap, anggun mutuku noutamak, talye tikilyangan nang nirya ap, Allah el areamsuk ning nirya ati, el si erebikirye, kanye delinamake. Musa birye, Israel ninye ati nyabuk.

Allah arye urdem arisilya ati, bokuka bona utotoa kum ninye arena ati, nyabuk yupu

¹² Musa birye, Israel ninye ati nyabuk. Amutuku unamlum talak nirya ara, keting tamun yupa winilye ning, akunum kiplyopura, Allah arye arisilye ning nirya bokuka, tagu barye kibuka deipmunce, tonok ning wilibuka, sepuluh persen (10%) ton bokuka, Allah aik pil don nang, sik Lewi yala nang ap, yuk nang bona utotoa kum ninye ap ati, arepnamlulume. Tonda, aninguk bukni, anggun mutuku noutamak unyak bukni, talye tikilyangan nang ap, mitik mapu sik ni yapu, wisi nang diamikce, kwaknamne mapu ap, kilmapu apura, youwak kilapu ap ati, bokuka arepnamlulume. Arepmunyopura, anggun ululum mutuku-mutuku nirya, bona utotoa kum ninye patalamlye touk, dinamake. Urtalya ati, kum unamake.

¹³ Bona utotoa kum ninye ati, akunum arepmunyopura, anggun ni koproba Allah, el si Yahweh dam ati, anggunce nyapnamlulume. “Naio, keting tamun winilye ning deice, an si erena ati arekinyap ning, an ‘Naʼ tenen ning ara, nun aik pum tam arye dobuka, talye bona utotoa kum ninye ati, akunum arepmabe. Tonda, an aik pil don nang Lewi yala nang ap, nun mutuku noutamak unyak bukni, talye tikilyangan nang ap, mitik mapu sik ni yapu diamikce, kwaknamne mapu ap, kilmapu ap, youwak kilapu ap ati, bokuka arepmabe. Ton luba kibuka kum batakmab ning ara, ani. Ance nyapsulum touk, akunum winipmabe. Ati, ance, ‘Aning wininamlulume,’ nyapsulum yupu nirya ara, akunum kekebuka winipmabe.”

¹⁴ “Tonda, nun ni Allah, anti arekinyap ning ara, tonok babye ton, nun kwit capu dibikiba, engebuka bulunyap talak ara, an tenen ning ton, kum dibupu. Tonda, nun malye winibupe talak ara, an dam kum wekmanto winibupe talak ara, nunce an ‘Naʼ tenen ning dobuka, kum dibupu. Tonda, ‘Akunum diamik ninye, sik sambala arye melipnamsil’ tenen, an ‘Naʼ tenen, ning ton bobuka, sikti, kum arebupe. Aning nirya kum bukni, an Yahweh arye, ‘Aning ara, winipnamlulume. Winibuka winipnamlulume,’ nyapdeiamlum yupu nirya, moubuka kekelamuburye, aninguk winilamupu.”

¹⁵ “Ati ara, Allah an mutuku im deice arye, pia teleb koprop ulyam mutuku arye dilamsilamak, nunti disilyame. Winipmince, ance wipdeiamsulum ninye, Israel ninye ati, ‘Teleb kipdeipsimince, nun patan ning arenamsilyame. Nun mutuku teleb kipdeipnamsilyame’ tenen, moropkiyabe. Ara, ance nun apu yapu ati. ‘Wininamsine, tonda pia teleb mutuku, aning-aning nirya weik ulul mutuku arepnamsine,’ nyabuka, nyapdeiamsulum touk, ‘Wini talak nunti arepnusilam’ tenen, moropkiyabe.” Anyapmasin touk nyapnamlulume. Musa birye, Israel ninye ati nyabuk.

Allah arye Israel ninye ati, “Wininamsine,” nyabuka, nyalin yupu nyapdeiamuk ning ati, nyabuk yupu

¹⁶ Musa birye, Israel ninye ati nyabuk. Arup ara, nun ni koproba Allah, el si Yahweh arye, ‘Winipnamlulume,’ nyapdeipsile. Ara, Allah arye nyapdeipmanilba, na Musa birye nyapmasin yupu nirya ara, moubuka kekepmunce, aninguk dobolbanamlulume. Ara, mitik tonun aryuk, winina meme. Allah arye nyapdeiamsuk yupu nirya, moubuka kekepmunce, anggun kanye talima dukdongobuka, diksukumuk wininamlulume.

¹⁷ Arup sum arye anggunce nyapmalumba, na akunum kekepmasine. Ara anggunce, ‘Kume, nun ni koproba Allah ara, elcuk Yahweh ulule. Yuk talye ning nirya ati, si kum erenamabe. Allah arye nyapdeipsuk yupu nirya ara, wenena yupu ap, ‘Aning ara, wininamlulume. Aning ara, kum wininamlulume,’ nyabuka, elce nyapsuk ning nirya ara, moubuka kekepnamabe. Allah arye, ‘Abisikuk binamlume, nati dobolbanamnululume,’ nyapdeiamsuk touk, wininamabe.” Anggunce ayupu nyapmalumba kekepmasine.

¹⁸ Nyaplumba, Allah akunum kekepmasilce, anggun Israel ninye ati, arup arye nyapmasile. “Ura ‘Naʼ tenen, ninye ara, Israel ninye uka. Na mapu atonun unamak,” nyapmasile. Aning ara, min arye, Allah el si Yahweh, akunum anggunak nyapdeiamsuk touk, tuba tonap nyapmasile. Tonda, elce, “Aning ara, wininamlulume. Aning ara, ton pia kum wininamlulume,” nyapdeiamsuk yupu nirya, ‘Kekebuka wininamlum’ tenen, nyapmasile.

¹⁹ Anggunce el nyapdeiamsuk yupu moubuka kekepmunce, pia winipmunyopura, anggun Israel ninye ati ereipsiliba, ninye nirya arye, ‘Se, anang ara, sik mambul weike. Allah elda pia telebe,’ nyabuka, Allah el si erenamake. Allah arye, ninye ayala-yala nirya, weika arye kwepdeibuk bukni, yuk yala ninye im sirya, mutuku sirya nirya ara, mitik mambul unyak bukni, anggun Israel ninye ara, Allah arye ereipsiliba, weik mambul ninye unamlume. Wininamla ara, talye ati kume. Ara, ‘Israel ninye, ‘Naʼ tenena ninye unamaka ati, sikti, wipdeipnamne. Sik ti konop nang nyanamake. ‘Sik ti, yuk mutuku nang arye si dopnamake’ tenen, Allah el si Yahweh arye wiamsuke. Aning nirya ara, Allah arye, anggun apu yapu ati kunum, “Wininamne,” nyabuka, nyapdeiamuk touk, winipnamsile. Musa birye Israel ninye ati laka nyabuk.