Ulangan 25 - Eipomek

Malye winibice nang wenena ati, nyabuk yupu

¹ Yata nang do, ton malye winibikirye derepdacopura, sik nirya yupu lipsisikuka bokolina aik bikirye, ‘Yatanye malye upmal do?’ tenen, winamake. Sik yupu lipsisikuka bokolina deiyok nang aryuk, yupu nirya kekebikirye, “Dipkoprop anang ara, malye upmaka anya arye, wenebuka opnamabe. Bukni, anang ara, malye winina kum, telebuk upmaka anya arye, batakdongopnamabe,” nyabuka yupu bokeipnamake.

² Wenena deiyok nang arye, yupu kekebuka kel kibikcopura, ‘Malye winipmalinye bira, el malye winipmalye ning weik ikin anya arye, elti, opnamabe,’ tenebicopura, yupu lipsisikuka bokolina deiyoknye birye nyapliba, el dinmalyak arye, malye winipmalinye tuku deice laka poupliba, el malye winipmalya atonun, el wenena ati, el nong deice kama arye molokuka opnamake. Ara, mitik malye ning winibice nang ara, mitik aryuk opnamak bukni, weik malye ning winibice nang ati ara, weika arye molokuka opnamake.

³ Winipnamlum bukni, amalye winipmalinye biti, yupa tonok keba obarye nukuka 40 aryuk, onamlulume. Tonap abisibuka weika arye eitam ona meme. Aning ara, anggun kayapu pia weika arye opmunyopura, ‘Elda pia malinye, ninye atonun kume, talye ning uka, tenepmunyak’ tenen ati, winina meme. Musa birye nyabuk.

⁴ Nyabukopura, ayupu ton nyabuk. “Sapi basam ton, yakong duk kurukna ati, yaninmalye talak ara, ‘Jagung diplyak’ tenen, el si bam bol tapu koulongona meme.” Musa birye nyabuk.

Diplinye bataklye kil dona ati, nyabuk yupu

⁵ Musa birye nyabuk. “Sik du weit neika ulamikce bukni, sik kwit ton, el mi delina kum diparyuk diplirye, el domlye kil bataklyopura, akil ara yuk yala nang ton, kum dopnamle. El bidamang domlye yala nanguk, akil dobuka, mapu deibuka, kwangnanamake. Adipmalinye, el du weit noutamak tonoknye birye, el batakmalye kil ati, adiparyuk doproplirye, sik mapu delinamdake.

⁶ Winipdikirye mapu deipra balamdica ani, akil arye kele sirya mi deiplyopura, diamlinye el yala pununa ati delinamle. Deiyok ara, akil arye min yuma deiplye mi, el diamlinye yok punupnamle atia. Winiplyopura, Israel ninye deipkirik danin bana ara, adiamlinye el si kum upnamle atia,” Musa birye nyabuk.

⁷ Nyabukabukce, ayupu dukdongobuka nyabuk. “Bukni, akunum diamlinye, el weit do, el du do, anye birye, ‘Akil ati kum dopnamne,’ nyabuka bataklyopura, akil arye anyaik domikcak wisi-wisi nang, sik aik poka bublan dam bukuka yupu talinyak sukum binuka nyapnamle. ‘Na domnuknye dibukba, el tam nang arye batakniaka ati, mi kum dipnirye, na akanye el si ton, Israel ninye noutamak kum upnamle. El tam nang arye kum dopnamniaka atia.’ Akil arye yanuka nyapnamle.

⁸ Nyablibuk, sik deiyok talibuka unyak wisi nang arye, ayala nang ati yukubikiba, yacopura, sik neika akil dolana yupu talinamnyake. Yupu akunum talibikirye, adiamlinye, el tam nang arye tuba, ‘Akil kum dopnamabe,’ nyabikcopura, akil arye winipnamle.”

⁹ “Sik kwit diamlinye, batakamlye kil yalirye, Israel nang, sik wisi-wisi nang, yupu lipsisikuka bokolina deiyok nang dam yalyopura, ‘Akil kum dopnamne,’ nyaplinye, el ongolamlye yan bol sandal kwiribukaplirye, anye el urasin deice maka tulupdeipnamle. Winiplyopura, akil arye nyapnamle. ‘Kume, winipmana ara, talye ati kume. Ara, yatanye do nirya, sik yala nang dibikce buk, sik kwit capu pununa ati, sik batakice kilapu kum dibikirye, mapu ton kum deibikcopura, winipnamabe. Ara, sik kwit capu kum punupnamake ati, winipmake,’ tenenamlulume.

¹⁰ Yatanye do nirya, sik kwit capu dibikirye, batakice kil kum doplirye, mapu ton kum deiplyopura, atalak arye deiyok koubuka, dotam nirya ara, anye el yala nang deipdanin banamak ninye nirya ati ara, Israel ninye arye, ‘Anggunda yan bol kwiribuka loltakna yala ninye atia,’ pia nyanamnyake,” Musa birye nyabuk.

Yuk malye winin ning babye, “Aning-aning winamlume,” nyabuka yupu

¹¹ Ninye bitinye olanmarikceba, tonye birye, tonye biti, mikip arye talipmalya arye tonye lyepdanmanto kum uplyeura, anye el kil yalirye, ‘Lyepnunʼ teneplirye, el kanye mikip deice arye talipneba, uk diplirye, anye birye, ‘Na kanye bataknuleʼ tenen, el akanye talepmalinye biti, el den duruk ap, den ap, nurup taliplyopura, winipnamlulume.

¹² Aning ara, pia malye una ati, winiplye kil ara, el taruk sekuka bataknamlyame. Akil ati, pia bico tenepmunce, ‘Dawaplye, el taruk kum seknuyabe,’ tenena kume.

¹³ Tonda, ikin ning nukulena ati ara, ‘Aning, ikin do, aning kanam do, el kilo ara, yata barye do?’ tenen, aning-aning yala-yala nirya, ikin ning bikina ati, dirilkwetelamik ning ara, ‘Tilila yupu nyapyeura, weik tonun doproptinyeʼ tenen, lubuka lilamak ning ara, ikin dilin ning ati, ton ning ara, ikin ning ara, kanam ning kintinibuka delina meme. Winin deice arye, tilila nyalana meme.

¹⁴ Aning atouk ton, anggun asik doplum noutam arye, gandum do, cakung do, tepung do, el ikin kiklilen ning ati ara, weik tonun lin ning ap, mitik tonun aryuk lin ning ap, kum delinamlume. Adeken ning yala-yala nirya ara, el ikin dipkoprob aupmalye touk, kiklip dekuka arenamlyame.

¹⁵ ‘Ikin ara, yata barye do?’ tenen, kiklilenyak ning deice ap, tonda lubuka lilamak ning deice ap arye, dipkoprob ninguk winamlulume. Winipnamluma deice arye, anggun unak ati, lo arepsilyeura, Allah Yahweh elce arepsuk mutuku talibuka unamlume.

¹⁶ Wininamluma deiyok ara, ani. Anggun ni koproba Allah Yahweh arye, ‘Dekna ati ara, talye-talye lulun yupu nyanyak nang nirya ara, na like,’ tenelule.

“Amalek mutuku nang nirya, opnamlulume,” nyabuk yupu

¹⁷ Mesir mutuku arye batakuka, bisik yangalamlum talak ara, Amalek yala nang arye, anggunti, winyamsik ning ara, tuba pia teninauk unamlume.

¹⁸ Anggun ni koproba Allah ati, ilil kum tenebikce, sik Amalek mutuku nang arye, anggun Israel nang ati aminyan dobolyasiyikce, ‘Optibyeʼ tenen, pirilamsik. Ara, anggun babye, nong namin kibuka, mikip nirya kum kiyamsuk talak nemalya arye dobolyasikirye, anggun kayapu aminyan kanye imun deice arye yangalamik nang nirya, anggun dam yanuka omik.

¹⁹ Ati ara, anggun ni koproba, Allah Yahweh arye, anggunti arepnamsil mutuku noutam bimunyopura, anggun mal olan nang dana-dana tam nirya opmunyeura, aunmakce kan-kan unamlum bukni, tuba mal kum olalbinamlume. Tunim abuka unamlume. Ati, talye kanye bobuka, telebuk unamlum talak ara, anggunce Amalek mutuku nang nirya obuka, sirya daknamlume. Winipnamlum bukni, sik Amalek mutuku nang arye, anggun Israel ninye ati, anggun aning ara, ‘Nunce oplopnamabe,’ tenelamik ning ara, kum luba kipnamlulume. Sik amutuku ninye, malye weik winilamik ning ara, pia teninauk unamlume. Anyapmasin touk, anggun ap, sik talinyak ning ap nirya, kum kilinamlume. Mutuku sirya, im sirya nirya unamak nang arye, sik Amalek yala nang ati, tuba kum tenenamak. Luba kinauk unamake.