Ulangan 24 - Eipomek

“Dopdanamna ani, batakna ati,” nyabuk yupu

¹ Musa birye, Israel ninye ati nyabuk. “Ura, sal arye kil domli bukni, aminyan talak, akil arye malye winiplyopura, anye birye akil ati, ‘Lik,’ teneplirye, anye birye, ‘Akil na like, akil ati, bico tuba kum tenenamne,’ teneplyopura, batakna ati ara, winipnamle. Kil batakna surat sekuka, akil areplirye, ‘Batakine,’ nyaplyopura, akil adiparyuk, anyaik pum tam arye, batakuka banamle.

² Akil arye, anye el aik akunum batakuka bilyopura, yuknye birye akil ati, ‘Se na doptinye,’ teneplirye, donamle.

³ Ura, akil anyuk bukni, tuba tamubuka bilirye, doplinye babye, akil ati lik upliba, ‘Akil ara, na like,’ nyaplyopura, akil batakna ati, surat sekuka areplirye, el aik pum tam arye yaklopura, min yuma domlinye birye, tuba tamubuka, akil kum donamle. Aning atonun, akil bitinye sum dopmalinye diplyopura, akil min yuma talak domlinye birye, tuba tamubuka, akil kum doptue.

⁴ Ura, min yuma domlinye birye, akil batakliba, yuknye ton ila tuba doplirye, neika ulamdica ati, min yuma domlinye birye ara, akil pia kum doptue. Deiyok ara, Allah el kanye ara, ‘Akil ara malye ati, akunum kum dopmanto kil ulule. Ara, pia malye,’ tenelula atia. Ati, min yumanye birye, akil anyuk tuba tamubuka doplyopura, Allah ati malye kililule. Ati ara, Allah arye arepsuk mutuku ara, ‘Atonun malye ning winibibiba, amutuku nirya malye upsilyak’ tenen, ato ning pia kum wininamlulume.” Musa birye nyabuk.

Musa birye, ‘Winibuka unamlulume,’ nyabuk yupu ton ani

⁵ Musa birye, ayupu nyabukce, ayupu ton dukdongobuka nyabuk. Sal ton winiryuk kil doplinye bira, yin nang mal olana ati banmace talak ara, anye ap melibuka bana meme. Tonda yuk ikin pil ton, el deice delina meme. Teleb ning ara, keting tamun tonok ton batakmunba, el kil ap, sik kanye deipdarikirye, teleb kibuka, neika unamdake. Ara, elce el kil kanye teleb ulinamlye atia.

⁶ Tonda, anyapnusin ning ton, kum wininamlulume. Anggun kwit capu nang arye, anggun yo bok tuba tamubuka doprobikcopura, gandum do, jagung duk do, sik teikin keil dolona meme. Ara, ‘Sik mambul ning talipniba, sik tuba tamubuka, dobikce yo bok, dipkoprob tamubuka arepnamniak’ tenen, sik teikin keil, deice tam delinyak keil babye, amu tam delinyak keil babye, kum dopropnamlulume. Ato ning dopropmunyopura, ninye arye, yuk mutuku nang ubula dobuka, tapu koubuka talinyaka atonun anya arye, winina meme. Anggun kwit capu nang, sik teikin keil dopropmunyopura, ‘Mambul upliba, pil kum dobikirye, din kum dibicopura, dibicak’ tenen atia. Ati, yuk nang, sik weik mambul ning ara, dolona meme.

⁷ Anggun babye, Israel ninye noutamak, tonoknye birye yuknye biti, ubula doproplirye, tapu koubuka taleamlirye, ‘Anye bira, talye ning atonun ulule,’ teneplyopura, aminyan talak taliplinye dobuka, yuk nang ati dekeipmali bukni, sikce anye dobuka bobikcopura, pia malye weike. Tonda, aning atonun, tonoknye birye, yuknye ubula dobuka, tapu koupdongoplirye, ‘Na mambul pil talye urdemuk pil danamnilame,’ nyaplyopura, aning babye pia malye. Yatanye do nirya, aning atonun winibicopura, yuk nang ubula doplinye bira, adiparyuk oplopnamlulume. Aning ara, batakna meme. Atonye opmunyopura, winipmunye deice, anggun Israel ninye noutamak, malye ning kum danaipmunce, sirya daknamlulume. Musa birye nyabuk.

Musa birye, ‘Neika teleb una ati, wininamlulume,’ nyabuk yupu

⁸ Musa birye, Israel ninye ati nyabuk. ‘Barye suse atonunuk ap, bol kona uk ap ara, nun mutuku noutam nirya weik usulule,’ tenena ati ara, ato ning imun kanye anggun nong deice upsilyopura, Allah el pil don nang, anggun Lewi yala nang arye, ‘Winipnamlume,’ nyabuka, nyanamak ninguk, kel bikmunce, anyabikce touk, wininamlulume. Narye, anggun Lewi yala nang ati, ‘Wininamlulume,’ nyabuka, peterepsisi touk, aninguk kekebuka moubuka wininamlulume. Tonok ning babye, batakna kume.

⁹ Mesir mutuku batakuka, bisik noutamak yangalalum talak, anggun ni koproba Allah arye, Miryam biti arebuk ning ara, luba kina meme. Miryam arye malye kanye dongobukce, malye winibuka ati, Allah arye, el nong deice barye suse arebukba dilamuk. Aning ara, tenebuka unamlulume,” Musa birye nyabuk.

¹⁰ Musa birye ayupu ton nyabuk. Anggunce, anggun ning dobuka, anggun kwit capu ati, tia talak ati arepnamunyopura, anggun kwit capu arye, anggun ning tuba doprobicopura, anggun kayapu aik wekuka, anggunce anang, sik ning kum dopropnamlulume. Ara, anggun ka birye, “Tia talak ati adopropnukin ning ara, dipkoprob aminyan tam tamubuka arepnamkina ati ara, ance, ‘Dib tenepnamnilam’ tenen, tia talak ati, ‘Naʼ tenen, ning arepnukine,” nyaplirye, arepnamsil ning ara, anggunce anye el aik wekuka, kum dopropnamlulume.

¹¹ Aning kum bukni, el aik bai tamuk binuka, darapdongobuka tikmamunye buk, el bidamnye arye, el teneplye ning yanuka arepnamsile.

¹² Tonda, el ‘Naʼ tenen, ning arepkilinye birye, bona utotoa kum uplyopura, el baju ap, el selimut ap, ato ning ara, dolona meme. El tenen ning, weik arye, ‘Seʼ tenepnamla ati ara, tia talak ati, tonok lukunyan babye, ato ning dobuka pililongona meme. Ara, ‘El ning dopropmanya ani, ambusumuk tamubuka arepnamane,’ tenena meme. El ‘Naʼ tenen ning, dolona pia meme.

¹³ Bona utotoa kum ninye arye, sik ning tia doprobikirye, ‘Dipkoprop tamubuka arepnamne’ tenen, sik ‘Na’ tenen ning, anggunti arebice ning ara, lukunyan noutam deibuka, mandipna dona meme. Inipnulye talak ara, ‘Naʼ tenen ning, tia ati arepmasice ara, adiparyuk tamubuka, arenamlulume. Winipmanto ning ara, el baju do, el selimut do, tia ati dopropmamunya ani, inipnulye talak akunum uplyopura, el ‘Naʼ tenen ning, tamubuka arepnamlulume. Arepmunba, ongoplirye, alukunyan noutamak, kanye namin asa arye maplirye, kanye deipnamle. Kanye deipkilirye, anti, ‘Telebe,’ nyaplirye, Allah ati, “Na ni Allah, se, na kwit ati melinamlyame,” nyabuka moropnamkile. Tonda, anggun ni koproba Allah arye, anggun winipmamunye ning eipsilirye, ‘Sik winipmaka ara, diksukum wininmake,’ tenebuka, kanye deipnamsile. Musa birye nyabuk.

¹⁴ Nyabukabukce, ayupu ton nyabuk. “Talye pil dona ati, bona utotoa kum nang ara, aning-aning babye, nirya kum nang ati, pia dobuka delina meme. Tonda, sik pil dopmace buk, sik pil dona ati, yo bok adiparyuk kum arepmunya deice arye, sik nong deice, ikin ning kum delinamlulume. Anyapmasina ara, anggun mutuku koproba nang, Israel ninye do, yuk mutuku arye tikilyangan nang do? Tonok mutuku arye aik, neika ululum nang nirya ati nyapsine. Bona utotoa kum ninye arye, ‘Pil dopneba, yo bok arepnamniake,’ tenebikirye, pil dopsicopura, anang ati, ‘Dauplye’ tenen, ikin ning, sik nong deice delina meme. Sik dekna ning, adiparyuk arepnamlulume.

¹⁵ Ato nang ati ara, pil apia donmaca ani, keting kum upmalye talak aniryuk, sik pil dona ati arin yo bok do, yuk arin ning do, adiparyuk arepnamlulume. ‘Yuk sum aryuk arepnamne,’ tenena meme. Anang ara, pia bona utotoa kum ninye ati, kum arepmunyopura, sik patan ning doproptingce, kum diptinge. Abona utotoa kum nang arye, ‘Anye birye arepniliba, dekuka diptinye’ tenen, pil donmalya ati, anggunce anye biti, kum arepmunyopura, anang arye Allah el si Yahweh ati, ‘Se, sik akunum arepmasitinge. Yata ati do?’ nyabuka, Allah morobikce deice arye, Allah arye anggun Israel ninye ati, ‘Malye wininmake,’ tenepnamsile.” Musa birye nyabuk.

¹⁶ Nyabukce, ayupu ton nyabuk. “Anggun ni yapu, malye winibice ning ati, anggun mapu arye ona meme. Tonda, anggun mapu malye winibice ning ati, sik ni yapu ona meme. Bukni, weik malye ning winibikiba, ‘Mikip asa wenebuka opnuyabe,’ tenenyap ning ara, wenebuka olamap ning ara, amalye winipmalinye binyuk wenepmunce, opnamlulume. Sik malye winibice ning ati, yuk nang kirikuka, kum onamlulume. Amalye winipmalinye uka,” Musa birye nyabuk.

¹⁷ Nyabukce, ayupu ton nyabuk. “Anggun mutuku noutamak unyak bukni, tikilyangan nang ap, kwaknamne nang ap ati, diksukumuk wininamlulume. Tonda, youwak kilapu arye, sik patan ning kum upliba, yuk nang ning, tia dopropnamake ati, anggun ning tia arepmunce, ‘Dipkoprop tamubuka, na ning arepnamnil’ tenen, youwak kilapu, sik nong deice ongolamak baju dolona meme. Ato ninye nirya ati ara, ‘Meme, sik talye nang ati, dauplye, sik ning ubula doproptibya babye, yata nang arye nyapsiting do?’ tenen, sik ning ubula dolona meme. Anang nirya ati ara, diksukum ubuka yupu lipsisikuka peterenamlulume.

¹⁸ Tonda, tuba tenepnamlulume. Mesir mutuku ulalum talak ara, ikin pil weik dilamsikce, anggun nong deice delilamsikba, talye pil don nang ulalum talak ara, anggun ni koproba Allah arye lyepdomsuke. Ati ara, arup nyapmasin yupu nirya, moubuka kekebuka, diksukumuk wininamlulume.” Musa birye nyabuk. Nyabukce, ayupu ton nyabuk.

¹⁹ Ton ning ara, anggun gandum wa do, yakong wa do, wa linmamunyak, aning sekmunce, koubuka deiyok batakmunce, luba kipmunye ning ara, tamubuka dolbana meme. Anggun wa dam batakmunye ning ara, talye tikilyangan nang ap, sik ni yapu akunum diamice, kwaknamne mapu ap, kilmapu ap, youwak kilapu ap, anang nirya ara, sik ning kum ati ara, bona utotoa kum ninye unyaka ati ara, sikce lilyanamnyake. Winipmunya deice, anggun ni koproba Allah arye, pil nirya dopropamunya ati, melipsiliba, nirya telebuk upnamsile.

²⁰ Aning atonun, anggunce, ‘Zaitun yo duk daknamap’ tenen, kama dobuka, ayo taruk lontoknamlum bukni, zaitun yo duk ton tukwak kum saklyopura, tuba tamubuka tonap, ayo taruk kum lontokonamlulume. Min yuma talak, zaitun yo lontokmunyeba, yo duk ton kum saklyopura, aning nirya batakmunce, sik bona utotoa kum ninye ati, arenamlulume. Aminyan talak anang arye, aning bulubuka dolyanamnyake. Ara, anggun mutuku unyak bukni, talye tikilyangan nang ap, kwaknamne ninye ap, tonda youwak kilapu ap, sik ning kum ati, sikce dolyanamnyake.

²¹ Atonun, anggur tapu yo duk dakdopmunce, tuba batak dongopmunye ning ara, tuba tamubuka, tonap kum daknamlulume. Aupmalebuk, batakmunba, sik bona utotoa talina kum ninye arye, dolyanamnyake. Ara, sik talye tikilyangan nang ap, kwaknamne mapu ap, kilmapu ap, youwak kilapu ap arye, sik ning kum ati ara, sikcuk dolyanamnyake.

²² Anggun adiparyuk, tuba tenipnamlulume. Mesir mutuku ulalum talak ara, ikin pil aruklamsikce, anggun nong deice deiamsikba, talye pil don nang ulalumce, anggun imun kanye bobuka, ikin pil dolalum talak ara, anggun ni koproba, Allah arye lyepdomsuke. Ati ara, anyapmasin yupu nirya, moubuka kekebuka wininamlulume. Musa birye Israel ninye ati, nyabuk.