Ulangan 23 - Eipomek

“Atonun wamlye nang ara, Allah Yahweh el dam pia kum yanganamnyake,” nyabuk yupu

¹ Nun ni koproba Allah, el si erena ati, el dam kum yanmanto nang ara, nyapnusine. Sik anang ara, ani. Den duruk tonok wamlinye ap, tonda den seklobikinye ap, sik awinyamlye nang ara, Israel nang arye, Allah Yahweh el si erena ati, el dam yanganamak talak ara, sik anang ap ansinibuka, kum yanganamnyake.

² Tonda, ninye dona kumce, talye-talye ulamikirye, deamikce mapu ap, tonda ami arye deipliba, dadeipdanin balamikca ani, ninye dika takubarye (10) deiamikce nang ap, tonda, ami arye deipliba, dadeipdanin balamikca ani, ninye dika takubarye deipnamak nang, asepuluh (10) generasi nang nirya ara, Israel nang arye, Allah Yahweh el si erena ati, el dam yanganamak talak ara, sik anang ap, ansinibuka, kum yanganamnyake.

³ Tonda, Amon yala nang ap, tonda Moab yala nang ap, tonda sikce deibikiba, dadeipdanin balamikca ani, ninye dika takubarye deipnamak nang, asepuluh (10) generasi nang nirya ara, Israel nang arye, Allah Yahweh el si erena ati, el dam yanganamak talak ara, sik anang ap, ansinibuka kum yanganamnyake. Aning ara, pia tuba wininamlume.

⁴ Ura, sik Amon mutuku nang ap, Moab mutuku nang ap, Allah dam kum yanganamaka deiyok ara, anggun Israel nang, Mesir mutuku ulamluma ani, batakuka bisik yangalamlum talak ara, sik abitinye mutuku nang arye, din ap, mek ap, kum arelamsik bukni, anggunti, ‘Sik anang ara, suptibyeba, malye winiptinge,’ tenyamsike. Utenyamsikce, sik anang arye, malye arena ning ara, Peor mutuku bukni, Mesopotamia mutuku ulamuknye, Beor el mi Bileam bira, ‘Elce Israel nang dam arepnamleʼ tenen, deken ning uang areamuka deice arye, pia malye ubika atia.

⁵ Sik anang arye, utenebuka arebikba, Bileam birye anggunti, ‘Malye uptingʼ tenen, suamsuk bukni, anggun ni koproba Allah Yahweh arye, Bileam el nyabuk yupu ara, kum kekamuke. Anye birye, ‘Malye kipdongopnirye, sik anang ara, suknamne,ʼ tenebuk ning ara, Allah arye tamubuka, teleb kipdeipsuke. Aning deiyok ara, Allah arye anggun Israel ninye ati, bico tenepsukce, kanye deiamsuke.

⁶ Anggunce, sik Amon mutuku nang ap, Moab mutuku nang ap ati, anggun wininamlum ning ara, ani. Atalak arye dipdongobuka, doyanamle talak nirya ara, pia ati, sik amutuku nang ara, sikti, pia kum melinamlume. Tonda, ‘Sik amutuku nang teleb-teleb kibuka winibikirye, kanye deibuka unamakʼ tenen, sik anang ati, teleb kipdeipmunyeba, kum wininamake.

⁷ Bukni, anggunce Edom mutuku unyak nang ati ara, ‘Sikda talye nang anya arye, malye wininyake, nun like,’ pia kum tenenamlume. Deiyok ara, sik amutuku nang ara, sik kayapu nang, Israel yala nang arye deibikba, dadeipdanin balamika ani, Israel yala nang noutam unyak nang unyaka atia. Tonda, Mesir mutuku unyak nang ati, ‘Sikda talye nang unyaka anya arye, nun like,’ kum tenenamlume. Deiyok ara, min talak anggunda, Mesir mutuku noutam ninye asik nang, tikilyangan nang atonun kibuka winilamluma atia.

⁸ Ati ara, sik amutuku nang arye deibikiba, deipnamak nang, anang arye deipnamak nang ton, doyanamle keting tamun, ninye dika winilye ning kiplirye, anyubuka dotalak deipnamak nang ara, sikda Israel nang arye, Allah Yahweh el si erena ati, el dam yanganamak talak ara, sik anang babye, ansinibuka yanganamnyake. Aning ara, pia tuba wininamlume.

“Yin talin nang doltakan aik, dobukabikirye, unamak sukum ara, ‘Malye ubikcakʼ tenen, kalikilanamlume,” nyapbuk yupu

⁹ Winipmanto ning ton, nyapnusine. Ara, anggun Israel nang arye, yuk mutuku nang ap, ‘Mal olanuyapʼ tenen, olalbinmamunye talak ara, ‘Mangkau arye, malye winin ning, ayala-ayala nirya ara, winibibiba, Allah arye derepsilirye, wenepsilyakʼ tenen, leibuka wininamlume.

¹⁰ Winipmanto ara, tonoknye ton, malye winin ning winipnamle ning ara, el anye mapmalye talak arye, mangkau arye, el lin bisik arye, den yung yalyopura, el anye adiparyuk, yin talin nang sik doltakan asik arye kisidakuka, el yuk bura tam binamlule.

¹¹ El anye bira, tia talak ati, tamubuka yin talen nang dam yangana kumce, asukumuk bura tam dabinuka, talye daunmalya ani, sintam kiplyeura, mek kekdoplirye, yin talen nang, sik doltakan asik damuk, tamubuka yanamlule.

¹² Malye winipdeipdamunyopura, anggun adiparyuk tia ati, anggun doltakan asik, dobuka unamluma dam kum bukni, bura tam ton binuka, kintinip deipnamlume.

¹³ Tonda winipmanto, akintinip deiamunye asik dam binuka, unmalinye bira, el adiparyuk boban ning ara, kama atonun ning ton bobanamlule. Deiyok ara, lin do, dei do, yukak binuka dongoplyopura, ‘Yuk nang arye do? Allah arye do? ‘Amalye ning eibikcakʼ tenen, tuku paliplirye, dongoplya deice tam, tuku arye dobuka, sinipdongopnamla atia.

¹⁴ Aning wininamluma deiyok ara, anggun doltakan asik dobuka unamlumak ara, anggun yuk kum wininamlume. Anggun ni koproba Allah arye, melipsiliba, anggunda el amu tam unmamunya deice arye, anggun mal olan nang arye, kum yanuka obuka, sirya daknamsiyake. Winipnamlula anya arye, anggun doltakan asik dobukapmunce, unamlumak ara, malye winin ning winina kumce, leibuka telebuk wininamlume. Ara, anggun dam arye malye un ning ton winipmunyopura, anggun ni koproba Allah arye, aning eiplyopura, ‘Anggun dam arye bataksiliba opsikcak,’ tenena atia.

Aning-aning nirya winina ati ara, “Wininamlume,” nyapdeibuk yupu

¹⁵ Ninye tonoknye ton, el aik melibuka, pil dona ati uang arye, yuknye dekukaplirye, yanuka deiamliba, el aik pil dolamlya ani, lik upliba, ‘Na likʼ tenen, batakuka bilyopura, anye birye, sik yuk nang dam yaliba, sikce, “Na melipnutum do?” nyaplirye, yanuka moropsilyopura, anggunce anye biti, ‘Na dam yangana kume. An deiyoknye damuk, tamubuka binamlyame,’ kum nyapnamlume. Anggun adiparyuk, anye biti melinamlume.

¹⁶ Anye el kanye aryuk, anggun unamlum mutuku bukni, anoutam arye, ‘Nara amutuku unamne, omutuku unamne,’ teneplye mutuku uk unamlule. Tonda, anggunce el anye biti, “Nun tenepmap touk unamlama,” nyabuka, mikip arye, ikin weik ning deibuka, lululongona kume.

¹⁷ Anggun Israel nang noutam, nirya ara, sal babye, kilapu babye, isa mer si eren aik talibuka, pil dokirye, talye yolan ninye winilamak touk, pia kum unamlume.

¹⁸ Tonda, aning atonun ara, sik isa si eren aik noutam pil donmakca ani, sik nong deice aryuk dekdopmakce yo bok ara, anye dobuka, ‘Allah Yahweh arepnuyapʼ tenen, dobuka, Allah si eren aik kum boyanganamnyake. Ara, isa-isa si eren ning ap, malye winin pil dona deice arye, dolonamak uang ap, bobinuka, anggun ni koproba Allah ati, arelbana kume. Atonun ara, malye winin ning anya arye, elda pia yu ulule.

¹⁹ Winipmanto, yuk Israel yala nang, sik uang patanmali bukni, kum upmalyopura, moropsikiba, anang sik Israel nang ati, sik yo bok tia areamunye ning ara, anang tia ati, areamlum yo bok ara, ‘Tonap tabakuka arepsululume,’ nyabuka, kum moropnamlume. Aning atonun, yo bok uang do, dekna weik ning do, din ning do, yuk talelulum ning ayala-ayala nirya babye atonun, tia ati, yuk Israel yala nang ati, arepmunyopura, aminyan talak, anang arye aning tamubuka, arepnamsiyak talak ara, ‘Nun ning ara, tia talak noutam arye, dobuka taleamluma anya arye, atalak pununa ati, yo bok tonap tabakuka arepsululume,’ nyabuka, pia kum moropnamlume. Winina ara, pia malye atia.

²⁰ Bukni, yuk mutuku nang, sik ninye asik nang arye, moropsikiba, anang ati, tia talak arepmunyopura, aning aminyan tamubuka, arepnamsiyak talak ara, yo bok ton tabakuka arena telebe uka. Anggun Israel nang ati ara, tapakana pia meme. Sik anang arye, adomikca atonun ubuka, tamubuka arenamsiyake. Anyapdeipsin yupu ara, anggun nirya kekemunce, aninguk wininamlume. Winipmunyopura, anggun ni koproba, Allah Yahweh elce, anggun aunamlum mutuku noutam wininamlum ning nirya ara, pia teleb kilinamsile.

²¹ Winipmanto, anggunce anggun ni koproba Allah Yahweh ati, “Aning dipkoprob winipnamabe,” nyapdeiamuk yupu deice nyapdeiamlum ning ara, batakna kume. Anyapdeiamlum touk winibuka, adiparyuk aning wininamlume. Deiyok ara anggunce, anggun ni koproba Allah Yahweh ati, “Winibuka-winibuka unamabe,” nyapdeiamlum ning ara, anggun ni koproba Allah Yahweh arye, “Anyapdeiamnuk touk, ubuka winipnamakca. Tonda, sikce yupu nyapdeipnik touk, arenamniakcaʼ tenen, disulule. Ati, anggunce anyapdeiplum touk ubuka, kum arepmunyopura, anggun damuk malye winililalulume. Allah arye, ‘Winina ara, malye ning,’ tenelula ati, winipmunyopura, elce wenepnamsilarya.

²² Anggunce, anggun ni koproba Allah ati, “Aning winipnamne, an si erebuka kina ati, aning ton arepnamkine,” nyapdeiamuk yupu deice arye, kum nyapdeiamlumopura, aning babye, telebe uka. Nyalin yupu kum nyamlumce, aning ton kum winimunyopura, anggunce malye kum winilulume.

²³ Bukni, anggun kanye aryuk tenipmunce, ‘Aning ara, Allah Yahweh ati arepnamabe. El si erebuka kina ati, winipnamabe,’ nyabuka, anggun yupu arye, nyalin yupu deice arye, Allah Yahweh ati nyamlum ning ara, anggun adiparyuk anyapdeiamlum touk, wininamlume. Arena ati ara, dipkoprob aninguk arenamlume. Kumopura, pia malye wininamlume.

²⁴ Winipmanto ara, anggun din patapsiliba, yuk nang, sik anggur wa wibuka kouamikcak bisik bamunce, eipmunyopura, apatapmasilye touk, ubuka dopropmunce dinamlume. Aning ara, malye kum bukni, ‘Aminyan talak ton dipnamneʼ tenen, anggur duk tonap weik tonun daknirye, na aling libuka dilbinamne,’ kum tenenamlume. Winina ara, malye winina atia.

²⁵ Aning atonun, tonda anggun din patapsiliba, yuk nang, sik gandum wa wibuka kouamikcak, bisik bamunye buk, agandum eipmunyopura, apatapmasilye touk, taruk arye duk dakmunyopura, dinamlume. Bukni, gandum yo ara, parang atonun ning, el si ara sabit, aya arye sekuka, weik tonun dolona kume. Aning ara, malye winina atia. Musa birye, sik Israel nang ati, Allah arye nyapdeiamuk yupu ton, lak nyabuk.