Ulangan 22 - Eipomek

Melilana ati, nyabuk yupu

¹ Winipmanto ara, yata wein ning do nirya, yuk nang sikce weilamak sapi basam do, tonda domba basam do, anggun ap neika ulamunye nang arye, weilamak ning ton, wangapmakiba, eipmunyopura, ‘Yo daupmalye, ‘tenena kume. Aning winina kum bukni, sik weilamak ning wangapmakca eipmunyopura, adiparyuk dobukapmunce, el bidamnyeuk, tamubuka arenamlume.

² Tonda, aning talilamlinye, el aik ulamlyak ap, aning talilamlinye el nong ap, anggun wal-walura, aning bobukamunce, anggun aik koproba delilbimunce, weipnamlume. Winipmanunye ani, aning talilamlinye birye enmaliba, kekepmunce, bikmunyopura, el bidamnye binyak, tamubuka arenamlume. Deiyok ara, teleb ubuka melilanauk wininamlume.

³ Tonda, yuk nang babye, aning winipmunye touk, wininamlume. Ara, yuk nang sik weilamak keledai basam do, kain kwilikdoba do, atonun yata yala ning do nirya ara, wangapmakiba, aupmalyak anggun asing eipmunyopura, anggun mutuku nang, sik ning anya arye, bobinukapmunce, el damnye binyuk arenamlume. Aning yala-yala nirya ara, ‘Daupmalye, dawangapmanyake,’ tenena kume. Melilanauk wininamlume.

⁴ Atonun ton, anggun mutuku nang bukni, yuk nang, sik keledai basam do, sapi basam do, anggun ap neika ulamunye nang weilamak ning, bisikak poupmalyopura, kum elilamak nang arye, talye mangkau kanye bolamaka atonun, una kume. Bukni adiparyuk, anggun kwit ap, neika abasam el nong bukeipmunyeba, tuba tonap teleb unamlule. ‘Daupmalye, asakuka poulbinmala babye, kum melipnuneʼ tenena meme.

⁵ Ton yupu ara ani. Kilapu ara, ‘Sal atonun unamneʼ tenen, sal ongolamak celana do, baju do, kum ongonamnyake. Aning atonun sal arye, ‘Kilapu atonun unamneʼ tenen, kilapu ongolamak celana do, baju do kum ongonamnyake. Aning winibice ninye ara, anggunce si erelulum Allah, Yahweh arye, ‘Aning ara, na pia like, aning ara, pia malye weikʼ tenen, yu ulule.

“Yuk ayala-ayala ning nirya winina ati ara, wininamlume,” nyabuk yupu

⁶ Winipmanto ning ton, ani. Anggunce talye dabanmamunyeba, maka ton, el aik donak ara, tuku deice do, yo taruk deice do, dobukaplirye, duk deibuka iryamlul do, ura mi bukmaliba kalikmalul do, winilamliba eipmunyopura, amaka sik nin bira, kum dopropnamlume. Ara, aupmalye maka, mi abukamlye ning ara, ‘Dipnamanʼ tenen, dopropnamlum bukni, aning ap, amaka sik nin ap, el duk ap, neika kum dopropnamlume.

⁷ Tonda, amaka el mapu ara, anggunce dopropmunyopura, sik nin bira, batakmunyeba, binamlule. Winipmunyopura, anggun unamlum talak ara, nara anggun ni koproba Allah arye, keting tamun tonap weik tonun arepsiniba, mapmunce, pia telebuk unamlume.

⁸ Winipmanto, anggunce winiryuk aik ton dopmunyopura, anyaik ara, el nong ara, lu kibuka dopmunce, alip aik deice tam amnyok kup-kup dana-dana nirya ara, poka dopnamlulume. Deiyok ara, ‘Yuk nang anyaik deice tam welebikirye, sakuka opdacakʼ tenena atia. Anyasik deice tam, mitik tonun poka dana-dana tam nirya donmamunye ani, ninye yuk nang ton anyaik deice arye banmakiba, sakuka oplyopura, anang sik ining, sik anyaik deiyok nang deice upnamle. Anya arye, mitik tonun poka akunum dopmunyopura, anggun babye ikin ning, deken ning kum dopropnamlume.

⁹ Tonda, anggur wa wipmunyak ara, anggur yalauk kounamlume. Awa noutam ara, yuk yala ning ton pia kume. Winipmanto, awa tuku noutam, yuk yala ning ap, anggur ap kouamunyopura, wisiplya babye, nong kum linamlume. Aning nirya bataknamlume. Ara, anggur duk wisipnamle ning babye, yuk yala ning nong upnamle ning babye, bataknamlume. Deiyok ara, anggur wa noutam ara, yuk yala ning kum koupnamluma ati nyapne.

¹⁰ Tonda, wa win talak ara, sapi basam ap, keledai basam ap ara, wa tuku palin ning, el si bajak, aning ara tonok ninguk, kum tapu koupdongopnamlume. Teleb ning ara, keledai basam yuk, sapi basam yuk, sik yuk-yuk pil donamdake.

¹¹ Atonun tonda, domba bola ap, kain lenan ap arye, tabakuka winyak baju ara, pia kum ongonamlume.

¹² Tonda adiparyuk, anggun nong deice ongolulum baju, el si jeket ara, kup-kup koulongana ati tapu ton, el si umbai, yuk-yuk kintinipnamlume. Dana-dana tam dumbarye kup-kup ak ara, umbai tonok-tonok wibuka kitipnamlume. Ara, anggun nong lelilongona atia.

“Sal ap, kil ap dolan talak ara, aning-aning wininamlume,” nyabuk yupu

¹³ Winipmanto sal tonoknye birye, wel kil winiryuk dopmaliba, neika mapmarece bukni, sal arye tamubukaplirye, ‘Se, akil ara, na likeʼ tenen, anye birye el kanye yuk teneplirye, ‘Deiyok kum upmalibuk, akil ara, na lik anya arye, talye bataknamneʼ tenen, dungnubuka teninamle.

¹⁴ Ara, winipmanto ning ati nyapne. Ato nang arye, el kanye aryuk, ‘Kume, akil bataktinyeʼ tenen, tilila yupu deice arye, akil el si yaniplirye, ayupu atonun ara, nyapnamle. “Kume, akil ara, el ap neika mapmanumu talak ara, wel ulamle kil arye, sal ap neika mapman kil kamo atonun, kum eipmane. Elda, sal ap akunum neika ulamne kil atonun, upmoa eipmanue. Ati, ‘Akil ara, na lik,’ teneplirye, nyapnamle.

¹⁵ Anye birye, atilila yupu nyaplyopura, awel kil, el li ap, el lin ap sikce, adiparyuk anye ap neika mapmarikiba, ining banmalye kain dobuka, amutuku yupu bokolina ati, deiyok-deiyok nang dam bobanamdurake. Abobinamdak ning ara, sik deiyok-deiyok nang arye eibikirye, ‘Sik kilmu ara, dipkoprob weluk ninye kum dobikʼ tenen, ‘Bikilinamak,’ tenenamake.

¹⁶ Atalak ara, adiparyuk, akil el li birye, sik yupu bokolina deiyok nang dam arye, nyapnamle. “Na kilmu ara, anye dopnamleʼ tenen, dipkoprob akunum dobukapsirye, anye biti arepsiba, akunum maprik bukni, atalak ara, nun kilmu dopmoknye birye, ‘Akil ara, na lik,’ tenenmalce, nun kilmu ati, nyapmale,” nyanamlule.

¹⁷ “Tonda, anye birye, talye yupu deice arye, ‘Akil ap mapmanumu talak ara, weluk ulamle kil arye, sal ap neika mapman kil kamo atonun, kum eipmane. Elda, sal ap akunum neika ulamne kil atonun upmoa, eipmanue. Ati akil bataknune,’ nyabuka tenipnamle. Anye birye utenepmalirye, atilila yupu nyapmasil bukni, dipkoprob anye ap, nun kilmu ap, neika mapmarik talak ara, el ining banmoba, acang kain deice dupmo ning ara, ‘Asukumuk dipdelulume,’ nyabuka, laka nyanamlule.

¹⁸ Akilmu el li birye, aning akunum lak nyaplyopura, adiparyuk, sik amutuku yupu bokolina deiyok nang arye, akain eibikirye, akunum bikikcopura, akilmu dopmalinye biti, yukubikiba, sik dam yalyopura, elti, wenebuka, ikin ning dobuka, el deice delinamnyake.

¹⁹ Winibuka sikce anye biti, ikin delinamnyake. Ara, dekna weik keil uang, el si ara perak, seratus (100) morobikiba, arenamlule. Winiplyopura, amutuku deiyok-deiyok nang arye, akil el li koproba ati, arepnamake. Arepnamaka deiyok ara, amutuku noutam ulye Israel kil ati, el si malye kipdeipmalya atia. Tonda, akil ara, anye el kil koprop, pia dobuka wininamlule. Sik kam unamdak talak nirya ara, anye birye akil kum bataknamle. Pia neikauk unamdurake.

²⁰ Bukni, winipmanto ton ani. Anye birye, el dobuk wel kil ati, ‘Na lik,’ teneplirye, “Akil ara, el ap neika mapmanumu talak ara, wel ulamle kil arye, sal ap neika mapmaprik kil kamo atonun, kum eipmane. Elda, sal ap akunum neika dolamakce, neika mapmaprik kil atonun upmoa, eipmanue,” nyaplyopura, el li ap, el lin ap arye, ining dupmok kain eipdedikirye, kum upmalyopura, ‘Se, akil ara, akunum wel talak arye, dipkoprob yuk nang ap ton mamiprike,’ tenepmarikirye, bikuka lak nyapdikcopura, aning ara, yuke.

²¹ Aning upliba, bikikcopura, awel kil, el li ap, el lin ap, akil adiparyuk bobinuka, el li yapu asik bublan dam binuka deipnunyake. Winiplyopura, amutuku weik asik dolamikca ani, noutam arye ninye bulubuka yakirye, akil ati, keil arye dobuka, obikiba dipnamlule. Awinipnamaka deiyok ara, ani. Akil el li yapu, asik tuba ulamlye talak ara, ninye kum domlirye uk, yuk nang ap neika mapmarikikce, talye-talye winilamlya deice arye, amutuku noutam ati, alye dakana winilamlya atia. Tonda, atonun ubuka wenepmunce, opmunya deice arye, amutuku noutam ara, atonun malye winin ning, tonap kum wininamaka ati, aning winipmunce, kum kilinamlume.

²² Tonda, sal tonoknye ton, yuk nang domice kil ap, neika mapmarikba, eipmunyopura, anggun anye ap, akil ap, sik bitinye adiparyuk opmunyeba, dipnamdurake. Winipmunya deice arye, amutuku noutam ara, atonun malye winin ning ara, kum wininamake. Adeice arye, malye winin ning ara, Israel nang dam arye, kum kilinamlume.

²³ Ura, winipmanto ning ton ani. Anggun asik dobuka unamlum mutuku noutam arye, wel kil tonok ulamlya ani, yuk nang moun dilamlya akunum dopnamalibuk, el kwit yuknye birye, akil dobuka, neika mapmarikiba, eipmunyopura, wininamlume.

²⁴ Adiparyuk, sik awinipdarikce nang bitinye bobukamunce, anggun weik asik dolamunye, bisik bublan dam binuka deipmunyopura, keil arye dobuka, opmunyeba, dipnamdake. Tonda, akil opmunyeba, dipnamla deiyok ara, weik asik dolamunye noutam arye, wininmamunye bukni, el akil arye weik yupu deice arye, ‘Na melipnululume,’ nyabuka, kum moropmalya ati, akil opnamlume. Aning atonun ton, sal babye opnamluma deiyok ara, yuk nang moun dilamlye kil, ubula dobuka mapmalya atia. Sik atonun nang bitinye nirya ara, winibuka onamlume. Adeice arye, amutuku noutam ara, atonun malye winin ning, tonap kum wininamake. Ati adiparyuk, kum kilinamlume.

²⁵ Bukni tonda, dipkoprob malye winin ning bukni, winipmanto wel kil tonok, yuknye birye, moun dilamlya ani, akunum dopnamle kil bukni, wa win dam arye, ubula doproplirye, neika manmarikca, eipmunyopura, amalye winipmalye sal ara, deiyok ara, elcuka. Anya arye, adiparyuk, anye wenebuka obikiba, dipnamlule.

²⁶ Anye opnamlum bukni, ‘Akil ara, el dam arye ton weneptibyeʼ tenen, pirina kume. Aning ara, akil elti, wenebuka obikiba, dipna ton kum atia. Deiyok ara, akil arye ninye opmanto malye winin ning kum winipmalye bukni, anye birye, el mikip deice arye, akil doplirye, neika mapmarikca tia. Tonda, amalye winipmalye ning ara, winipmanto ninye tonoknye ton, deiyok kum upmalibuk, el dam unmalinye, talye mangkau asa oplopliba diplyopura, anye atonun ton ulule. Ara, ninye opmalinye birye, elcuk teneibuka, yuknye birye, mangkau unmalinye opliba, diplamla atonun upnamle. Ati ara, akil ati, kum wenebuka opnamlume.

²⁷ Aning ara, akil ap, anye ap ara, ninye yuk nang una kum sukum, wa windam aryuk dopdanmarica atia. Tonda, sik neika dopdanmarikce talak ara, akil arye, ‘Ninye yuk nang ati, melipnitingʼ tenen, weik yupu deice arye ngalukuka moropmatu bukni, ninye kum sukum ati, kekebuka kum melipmaca atia. Ati, malye winin ning deiyok ara, akil arye kume. Ara sal aryuk, malye winipmalule.

²⁸ Ura, winipmanto ton nyapnune. Ninye tonoknye, el mikip aryuk, wel kil tonok, ninye moun dina kum kil dobuka, el mikip deice aryuk, sik neika mapmarikiba eipmunyopura, wininamlume.

²⁹ Awinipmalinye bira, adiparyuk, akil el li koproba ati, el tabuka arelamaka atonun, uang perak ara, lima puluh (50) arye arenamlule. Winiplyopura, akil ara, dipkoprob anye el kil pia dobuka unamlule. Deiyok ara, anye biryuk, pi dobuka dopmalye atia. Akil arye, ‘Telebe,’ kum tenepmalya babye, anye el mikip arye, akil dobuka mapmalule. Tonda, anye birye, akil doplirye, unamdak talak nirya ara, anye birye akil ati, lik uplya babye tonap, pia kum bataknamlule.

³⁰ Tonok ton nyapnusine. Ara, yatanye birye do, ninye tonoknye birye, el li koproba domlye kil ara, pia kum donamlule. Winiplyopura, el li koproba, el si pia malye kipdeipliba, el li bira, pia alye dakdanuka unamle. Ati, aning ara, pia meme nyapne. Musa birye, sik Israel nang ati nyabuk.