Ulangan 21 - Eipomek

Ton nang arye, yuk nang opmakce bukni, ninye ona deiyok nang, kum kel bikikcopura, lipsisikina ati, nyabuk yupu

¹ Winipmanto, Allah Yahweh arye, ‘Sikda amutuku unamakʼ tenen, arepsuk mutuku noutam unamlum talak ara, ninye ton obikiba, sik wa win dam dipmaliba, mangkau arye banmamunya ani, eipnamlume. Eipnamlum bukni, ‘Se, aopmakinye bira, yatanye birye oplopmal do?’ tenen, kum bikmunyopura, winipnamlume.

² Dipmalinye, el nong eipmunyopura, adiparyuk amutuku deiyok kibuka ulamikce nang ap, tonda malye winipmakce nang, yupu lipsisikina deiyok nang ap, sik dam binuka nyapmunyeura, anang arye aoplopmakiba, dipmalinye dam bikirye, anye deipmalyak arye, amutuku noutam asik dobuka unyak nang ara, ‘Dan asik damak ululnye do?’ tenen, kiklilen ning bobinuka deibikirye, dipdenamnyake. Winibikca deice arye, adipmalinye, el nong damak ulye asik, “Asukum akunumaʼ tenen, bikinamake.

³ Mining dam asik kunum kiklimunce, pia dam asikak akunum bikikcopura, sik anyasik dobuka ulamikce nang ati, sik talibuka ulamice nang binuka nyabikiba, sik amutuku nang arye, anye sik min bikamikce nang arye, el opmek ning ati, teleb aren ning dobuka, Allah ati arepnamnyake. Winipnamnyaka anya arye, sik anyasik talibuka ulamikce nang binuka, nyapmunyeura, sapi basam kil winiryuk nepnin banmalye ning tonok, kintinip deipnamanyake. Tonda, asapi basam kil ara, pil don ning, el ngang dam deibikiba, ikin ning kirikuka bobalamle ning ara, aning kum winyamica ati, pil kum dolamlye sapi basamuk, kintinip deipnamanyake.

⁴ Amutuku deiyok nang arye, akintinip deipmace sapi basam ara, sik anang aryuk bobinuka, mek cena kum, mek tuba-tuba balamlyak ara, wa wibuka koupmanto kumak bobikirye, adiparyuk sapi kil basam ngang talibuka, kotoklobikirye, opnamnyake. Ara, aning ona ati, kintinip deipmakce sukumuk, binuka opnamnyake. Aning ara, aopmalinye bira, el dekena ning ati, arepnamnyake.

⁵ Aning winipnuce talak ara, Lewi yala nang, imam pil dolamice nang arye, melibikiba, sik neika asukumuk binamnyake. Ara, sik anang arye, malye winipmace ning ara, bikikirye, “Aning ara, winipnamlume,” nyabuka, lipsisikin nang unyake. Sik Lewi yala nang ara, anggun ni koproba Allah Yahweh arye, ‘Na si eren aik pum pil donamakʼ tenen, wipdeiamuk nang unyake. Tonda, Allah arye, ‘Sik anang ara, na talinun ninye, sik teleb ulina ati, sik aLewi yala nang arye, na si deice arye teleb yupu nyanamnyake. Tonda, ninye arye yu yupu deice arye walana ap, ura olana ap, ura yu upliba, derelana arye malye yupu nyalana ap ati, ‘Apil donamakʼ tenen, Allah arye, teleb kibuka kintinip deibuk nang, unyaka anya arye, anang aryuk alilsisikin pil donamnyake.

⁶ Oplopmakiba, dipmalinye dam asik dobuka ulamikce nang, deiyok kibuka ulamikce nang, anyasik deiyok nang ara, sapi basam kil obuka, mek dam deipmacak, el dam bikirye, sik adiparyuk, sik taruk asapi basam deice deibuka, mek likinamnyake.

⁷ Tonda, sik anang arye, sik taruk tatang mek likice talak ara, adipmalinye biti, “Kume, anye opmalanye bira, nunce kum opmabe. Aning atonun, adipmalye bira, opmangu nang ton, nunce aning pia kum eipmaba ati, nun walwale,” nyanamnyake.

⁸ Ati ara, nun ni Allah Yahweh arye, an ap, an mapu nun Israel nang Mesir mutuku ulamububa, lyepdomsulum touk, atalak babye, nunti, namin kibuka lyepsilyame. Nun Israel nang ara, an mapu unyaba anya arye, adipmalye bira opmangu nang ara, dipkoprob nun walwale. Ati adipmalye bira, el ining ara, nun deice kum deipnamsilyame. Anye bira, el malye winina kum buk, opmakba, dipmala anya arye, anye biti deken ning ikin ara, ‘Nun talye nang doprobipyakʼ tenen, moropkiyape. Ati namin kipsimince, aning ara, kum kipdeipsemince, tamubuka teleb kipdeipnusilyame, na nie,” nyabuka moronamake. Winibuka, akunum morobikcopura, Allah arye adipmalnye bira, el ining ara, sik nong deice kum deipnamle. Amutuku nang ara, namin kipnamle.

⁹ Ura, Allah arye, ‘Sikda, aninguk winiptinge,’ tenesulul ninguk, anggunce aninguk wininamlume. Allah arye anggunti, nyapdeipmasilba, anyapdeipsin touk, amutuku dipmalinye biti ara, wininamlume. Aning wipmunyopura, Allah arye adipmalinye, el ining ati ara, anggun dam ikin ning kum delinamsile. Atalak-atalak nirya ara, Allah arye ‘Aning ara, telebe, dipkoprob winina ara, ani,’ nyasilye ninguk, talibuka wininamlume. Musa birye nyabuk.

Mal olanak binuka, yuk mutuku kilapu alubuka boyanganamak kilapu ati ara, “Wininamlume,” nyabuk yupu

¹⁰ Anggun ni koproba Allah Yahweh arye, mal olalbinumunye talak, mikip arepsiliba, anggun olan mutuku nang nirya binuka, obuka sirya dakmunce, ton nang ara, ‘Nun pil donamsiyakʼ tenen, tomobuka boyanganamlume.

¹¹ Amutuku nang tomopmunce, boyanuka deipmamunya ani, winipmanto ara, urasin pia teleb wel kil ton eipmunce, ‘Se, akil ara, na dopnamne,’ tenepmunyopura, ubuka wininamlume.

¹² Akil boyanuka, anggun asik tamubuka boyanamlume. Anggun asik bobimunyopura, adiparyuk, el akil potong nirya, adiparyuk koplopnamlule. Tonda, el taruk kala sekenamle.

¹³ Winiplyopura, akil tongopmunye talak ongolamlye baju do, celana do, kwiriploplirye, winiryuk baju ongopnamlule. Akil aik unamle talak ara, wala tonok mapnamle. Aunamle talak nirya ara, talye ulamlirye, anggunce el li koproba ap, el lin koproba ap, el li yapu nirya omlum ning ati, aning teniplirye, engenamle. Ati ara, atalak nirya ara, akil ap neika kum manamlume. Winilamunya ani, awala akunum sirya daklyopura, akil dopmunce, akil ap neika manamlume.

¹⁴ Bukni, atonun kil, anggunce dobuka domunyeba, neika ulamunce, el ap neika mapmamunya ani, aminyan talak ara, ‘Kume, akil ara, pia kum dopnamne,’ tenepmunyopura, anggunce akil ati, ‘Yuk nang uang dekdopnuyabe,’ kum tenenamlume. Bukni, anggun adiparyuk, akil batakmunyeba bilirye, el babye teneplye touk, wininamlule. Akil ati ara, anggunce, ‘Kume akil ara, talye kil anya arye, uang dekdopnune,’ tenena do, ‘Talye pil dipniba donamnile,’ tenena do, aning nirya ara, kum tenenamlume. Deiyok ara, talye ati kume. Anggun kanye aryuk, akil ara dopmunce, neika mapmamunya ati, yuk nang arye, ‘Akil ara, dauaplye, malye kil atonun ululule,’ tenenamake.

“Min yuma deiamunye mapu ati, sik talibuka unamak ning ara, bokuka arepmunyeba, talibuka unamnyake,” nyabuk yupu

¹⁵ Winipmanto yupu ton nyapnusine. Ara, ninye tonoknye birye, kil bitinye dobuka ulamlya ani, ton kil ara, weik tonun kanye delilule. Ton kil ara, kanye kum delilule. Ura, akilapu atalak aryuk mapu bitinye deipnamdake. Bukni, pia min yuma mi deipnamle kil ara, sik akanye birye, kum kanye deiamlye kil arye deipnamle.

¹⁶ Winiplyopura, sik akanye birye, elce taleamtu ning nirya bokuka, el mapu ati arepnutopura, yata wiripnamtu do? Ara, anye el kanye deiamlye kil arye, deiamlye mi tamuk kum kilule. Dipkoprop min yuma mi deiamlye kil, el kanye kum deiamlye kil bukni, el deiamlye mi ara, dipkoprob min yuma mi ulula anya arye, amiuk el li birye, el talilamle ning noutam, weik tonun ton bokuka, ami atibuk arenamlule. Ara, el kanye deiamlye kil arye deiamlye mi, el bataklya deice arye, kanye kum deiamlye kil arye, min yuma deiamlye mi, el talilamlye ning, mitik tonun kililule. Winina ara malye ati, aning ara, kum wininamlume.

¹⁷ Ati ara, akilapu bitinye domuknye bira, el talilamle ning nirya bokukaplirye, bitinye-bitinye kintinip deiplirye, el dipkoprob min yuma deiamlye mi ati ara, arenamlule. Yata ning do nirya, el li birye talilamlye ning ara, bitinye-bitinye kibuka, dopropnamlule. Amapu bitinye ati ara, atonunuk ubuka, kum bokolinamlule. Ara, kanye deiamlye kil ap, kanye kum deiamlye kil ap, sikce min deipdik mapu ara, atonun bokuka, kum arenamlule. Dipkoprop min yuma miuk, el li koproba talilamlye ning ara, bitinye kibuka dopropnamlule. Aminyan deiamlye mi ara, tonok-tonok kibuka dopropnamlule. Ati, anyapmana atonun, ubuka arenamlule. Tonda, sik ni koproba talilamlye ning ara, ‘Na mapu, dipkoprob min yuma mi deipsinye bira, weik tonun ning, adiparyuk arepnamneʼ tenen, kintinilinamlule. Tonda, boklirye, amiuk arenamlule. Deiyok ara, anye el wel ulamuk talak ara, mikip ulamukce, ami min deibuka anya arye, ami ara dipkoprop, el min yuma deiamuk mi ulula anya arye, el li birye talilamle ning nirya, bitinye-bitinye kibuka dolona ara, elcuk doproptue.

Malye winipmace mapu ara, “Wininamlume,” nyapbuk yupu

¹⁸ Winipmanto yupu ton nyapnusine. Ura, anggun deiamlum mapu arye, anggun ni yapu ap, anggun nin yapu ap, anggun yupu kum kekepsikcopura, el li, el lin birye, ‘Teleb winipnamleʼ tenen, obuka weneprikibuk, amapu pia mandipna dobikirye, sik yupu kum kekepmanto ubikcopura, ubuka wininamlume.

¹⁹ Sik mapu mandipna dobikirye, yupu kum kekepmanto upmakcopura, sik ni ap, sik nin ap, wisi nang arye, ami bobinuka, amutuku nang talibuka ukirye, pia moubuka unyak ninye deiyok nang nirya, sik dam bobanamnyake. Ara, sik asik dana-dana antanap dongobuka domik keil poka noutam bukni, weik bublan kintinip deiamikak, asukumuk ami bobikirye, sik mutuku deiyok nang ati, “Nun ni yapu, anggunce nun mi ninye yupu kum kekelul ati, anggunce wenebuka, teleb kipdeipsululume,” nyabikirye, binuka moronamnyake.

²⁰ Ami bobinuka, anyasik weik bublan dam bobinamak talak ara, amutuku asik dobuka, unyak nang nirya ati, deiyok kibuka talinyak nang ara, ayupu lak sukum aryuk nyanamnyake. “Kume, nun mi ara, mandipna kanye bobuka, nun yupu kum kekepmanto ulule. Pia yanisululce, nun nyanyap yupu yaniplirye, pia kum kekesulule. Malye-malyeuk winilirye, din ning yala-yala nirya adiparyuk, weik tonun dilirye, sirya dakalongolule. Tonda, yu mek dekuka dilirye, malye-malyeuk winilule,” nyabuka, binuka lak nyapnamake.

²¹ Winipmunyopura, amutuku unyak ninye nirya arye, ami ati, keil dobuka, obikiba dipnamlule. Winipmunya deice arye, malye un ning ton amutuku noutam kum unamle. Anggun adiparyuk kum kipdeipnamlume. Winipnamlum deice arye, anggun umunye mutuku nirya ara, telebuk unamle. Tonda, anggunce winipmunyeba, yuk mutuku unyak Israel nang nirya, ayupu kekebikirye, ilil upliba, moubuka unamake.

Wenebuka obikce nang, tapu biribuka, weina ati, nyapdeibuk yupu

²² Tonda, winipmanto yupu ton nyapnusine. Aning ara, dipkoprob nyapmanye touk wininamlume. Winipmanto ara, malye winin ning weik winipmalye nang wenebuka, obikiba dipnamle. Adipnamlanye bira, el nong ara, talye daupmalye yo deice do, sikce ikamikce cang yo deice do, yo deice tapu arye kirikil kwetenamnyake. Ara, ‘Yuk nang eibikirye, ‘Seʼ tenen, bikikirye, sik babye ton malye kum wininamnyak,’ tenena ati, aning wininamake.

²³ Winipnamak bukni, wenebuka obikirye, el nong dobuka, yo deice deipmakinye bira, el nong ara, alukunyan noutam nirya ara, asukumuk batakmamunyeba, kum unamlule. Bukni, asum keting kum kumulbinaple talak aryuk, el nong bobuka, tuku pum weilbinamnyake. Ayo ikuka tapu arye, birip kwetepmamunye bira, tuba asukumuk upmalyopura, Allah arye amutuku ulamlum nang, anggun wenena nirya ati, ikin ning arenamsile. Ati ara, ‘Winipsilyakʼ tenen, adipmalinye bira, el nong adiparyuk dobuka, asum sintam talak aryuk, weilbanamlume. Deiyok ara, adeice anggunti, Allah Yahweh arye arepsukba, umunye mutuku noutam ara, malye kibuka kum kilinamsile.