Ulangan 20 - Eipomek

“Mal olan talak uplyopura, ‘Nun ni koproba Allah arye melipnamsile,’ tenebuka ulamunce, olanamlulume,” nyabuk yupu

¹ Anggun mal olan talak upliba, anggun mal olan nang ap, mal olalbanamlum talak ara, anggun mal olan nang ara, yin talin nang pia weika arye, kuda basam balye deice bukuka, yanganamak ning ap, ninye arye kuda basam tapu kirikikiba, libuka tuku deice balamak ning, el si ara kereta kuda perang, aning deice bukikirye, anggun dam olyangasikiba eipmunce, anggun ilil una meme. Aning kum bukni, minop talak anggun ni koproba Allah Yahweh, Mesir mutuku ninye noutamak arye melibuka boyanamsuk Allah arye, anggunti melinamsile. Ati asum-asum nirya, el tibuk pia diba tenebuka unamlume.

² Tonda anggunce, ‘Mal olalbinuyap’ tenen, kintinibuka deiyok koubuka, binumunye talak ara, Allah el si eren aik pum tam, pil talibuka dona deiyok nang noutamak, imam tonoknye ton, memebuka tiklirye, Israel ninye yin talin nang nirya ati, ayupu nyapnamsile.

³ Elce nyanamsile. “Amapo, anggun nirya kekeplulume! Anggun Israel yala ninye ara, arup arye nyapmasin yupu ara, moubuka kekeplulume. Wini talak anggun mal olana ati, anggun mal olan nang dam bimunyopura, ilil una ap, kanye talimauk dina ap, ‘Se, yata wiriptibye do?’ tenen, walwal kanye bobuka, sirim talina ap, pia kum wininamlulume.

⁴ Anyapmasin yupu ara, talye ati kum nyapsine. Deiyok ara, anggun ni koproba Allah Yahweh, elce melipra binamsile. Elce melipra banamsil deice arye, el mikip anggun deice deipsiliba, anggun mal olan nang nirya ati, obuka sirya dakanamlume. Ati ilil una meme.”

⁵ Tonda, ‘Mal olalbinuyap’ tenen, kintinipnamlum talak ara, yin talin nang, sik deiyok nang nirya arye, sik amu tam yin talin nang nirya ati, nyanamake. “Anggun arye, ‘Mal olalbinuyap’ tenen, kintinipmamunya nang noutamak ara, ninye ton aik, ‘Winiryuk dopnaman’ tenen, kintinipmalinye bira, ‘El ap, nun ap, olalbinuyap’ tenen, kintinibuka banamunyak ara, pia kum binamlulume. Anye el winiryuk donmalye aik, min kum mapmalye diparyuk, mal olana deice arye obikiba, diplyopura, el winiryuk dopmalye aik pum tam, kanye deibuka kum mapnamle. Ati, nun mal olan nang arye, ‘Anye bira obicak’ tenen, batakuka, el mutuku koproba tamubuka binamle. Ara, mal olana deice arye, anye obikiba, el winiryuk dopmalye aik batakliba, ‘Yuk nang doprobicak’ tenen, atonye bira, el asik koproba tamubuka banamle,” nyabuka, sik yin talina deiyok nang arye nyanamake.

⁶ Aning atonun, sik yin talin nang noutamak arye, ninye ton winiryuk anggur tapu duk wa wibuka koupmaliba, duk mounmalye ning, min kum dakuka dipmalinye bira, nun ap mal kum olalbinamabe. ‘Awinipmantonye ton auplyopura, tamubuka banauk unamle’ tenen, nyapsine. Ara, talye ati kume. Mal olana deice arye anye obikiba, el anggur tapu duk wa batakliba, ‘Yuk nang arye doprobicak’ tenen, ‘Anye bira, mal olanak bana meme,’ nyanamake.

⁷ Aning atonun, ayupu ton nyanamake. “Yatanye do, abulubuka wekmalum nang noutamak arye, ‘Akil dopnamne’ tenen, mun akunum dolul bukni, akil min kum dopmalye diparyuk, ‘Sal ton kil dopnamne,’ tenelamlinye awaplyopura, anye el aik koproba tamubuka bana telebe. Ara, mal olana deice arye, anye obikiba, el mun dilamlye kil batakliba, ‘Yuk nang dobicak’ tenen, atonye bira el asik koproba tamubuka binulule,” nyabuka, sik yin talina deiyok nang arye nyanamake.

⁸ Tonda, yin talin nang, sik deiyok nang arye, sik amu tam yin talin nang nirya ati nyanamake. “Anggun aunmalum nang noutamak arye, yatanye ton ilil una ap, talima mitang upmasilce, sirim talina ap unmasil do? Atonye bira, el aik koproba tamubuka bana telebe. Anye birye, el kwit capu, yuk yin talin nang, el ilil unmalye ning eibikirye, ilil una kum kanye bopmace nang ara, ‘Mitang kipdeiplyak’ tenen, ilil upmalinye bira, el aik koproba tamubuka banamlule.” Sik yin talin deiyok nang arye, sik amu tam yin talin nang nirya ati nyanamake.

⁹ Yin talina deiyok nang arye, sik amu tam yin talibuka unyak nang melina ati, yin talina deiyok nang ton wibuka deipnamake. Ara, sik amu tam, yin talibuka unyak nang ati, ‘Nun mal olan nang obuka, malye kina ati, winibuka wininamabe,’ nyabuka melipnamake. Yin talina deiyok nang arye, sik amu tam yin talina deiyok nang ton, yuk-yuk wibuka deibice nang arye, sik amu tam talye yin talin nang nirya ati “Winibuka unamabe,” nyabuka, yupu lak nyanamsiak nang ton wipnamaka ati, nyapsine.

Anggun mal olan nang ati, ‘Winipnamlulume,’ nyabuka, laka nyabuk yupu

¹⁰ Yata mutuku do nirya, anggun olan ninye unyak mutuku dam bimunyopura, ‘Amutuku noutamak unyak ninye opnamap’ tenen, warikil binamlum talak ara, anggun minopce, amutuku ninye ati, nyapnamlulume. “Kume, nun kanye ara, ‘Anggunda, nun amu tam ulamun buk, nunce pil dipsibiba, nun pil talye dopmunyopura, nun ap, anggun ap, talye kanye deibuka, neika teleb kibuka unamtibye,’ tenenyap bukni, “Anggunda, yata tenepmalum do?” nyabuka, asipdenamlulume. Nyapmunba, amutuku ninye arye, ‘Se, nun ap neika una ara, pia kum unamabe,’ tenebuka, malye kanye bobikirye, anggunti bublan kum kukeipsicopura, parapkabuka onauk winipnamlulume.

¹¹ Bukni, anggunce asipdemun buk, amutuku noutam ulamikce ninye arye, sik asik domikirye, antanap dongobuka domikce, keil poka botcamikca bisik bublan kukeipsikirye, “Telebe, anggunce nyapmasulum touk, neika nun ap wininamabe. Nunda anggun amutuku tam ubirye, anggun pil urdem ati donamabe,” nyabicopura, akunuma. Amutuku ninye ona kum bukni, anggun amu tam yasicopura, anggun Israel ninye, amu tamuk ubikirye, “Anggun pil melin nang ubirye, anggun piluk nunce palibuka donamsiyabe,” nyanamake.

¹² Bukni, sik amutuku ulamice ninye arye, “Kume, anggun Israel yala ninye ap, nun ap, neika teleb buka kum unamabe. Anggun amu tam pia kum unamabe,” nyapsikcopura, ona uka winipnamlume. Ati aninye ara, “Nun ap neika kum unamabe,” nyapsicopura, amutuku ulamikce, ninye nirya ati, onauk winipnamlulume. Anggunce amutuku noutamak bimunyopura, binuka warikuka, onauk wininamlulume.

¹³ Atalak ara, anggun ni koproba, Allah Yahweh arye tenebuka, el mikip anggun taruk deice deipnamsile. Winipsilyopura, amutuku unyak ninye nirya obuka, sirya daknamlulume. Aning akunum winipmunyopura, anggun Israel ninye nirya, amutuku deice binuka wekmunce, amutuku unyak ninye nirya ara, yu weik parang ya arye, aninye nirya obuka, sirya daknamlulume.

¹⁴ Winipnamlum bukni, amutuku kilapu ap, mapu ap, tonda sikce talibuka weilamak ning nirya ap, yata yala ning do, amutuku noutamak ulamle ning nirya ara, dolonamlulume. Anggun mal olan nang arye, taleamice ning nirya ara, dalubuka dopropmunce, anggun diamuk talibuka unamlulume. Ara, anggun ni koproba Allah Yahweh, el mikip arepsilya deice arye, yuk mutuku ninye nirya, obuka sirya dakmunce, sik taleamice ning nirya dopropnamlulume. Dopropmunyopura, angguncuk aning nirya, talibuka unamlulume.

¹⁵ Aning nirya, “Wininamlulume,” nyabuka, lak nyapmasin bukni, moubuka kekepnululume. Anggun mal olan nang, yuk mutuku ulamikce ninye ati, “Ninye nirya obuka, sirya dakmunce, sik kilapu, mapu ap, sik talilamice ning nirya ap, dalubuka dolonamlulume,” nyapmasin yupu nirya ara, anggun adiparyuk, yuk pera mutuku dabinuka unamlum talak nirya babye, anyapmasin touk winibuka, binuka wininamlulume. Bukni, anggun Israel ninye unamlumak, anggun dam unyak ninye ara, aninye ati ara, atonun ning sik dam pia kum unamlulume. Anggun Israel ninye ap, neika unamak ninye ati, kum obuka, sirya dakanamlume.

¹⁶ Bukni, yuk-yuk pera mutuku, anggun ni koproba Allah Yahweh arye, ‘Naʼ tenen Israel yala ninye arye, amutuku talibuka unamak’ tenen, kintinyamsukce, arenamsil mutuku nirya ara, amutuku ninye ara, onauk wininamlulume. Yuk pera mutuku ara, anggun ni koproba Allah arye, anggunti, “Arepnamsine,” nyalilamsuk mutuku anya arye, amutuku ulamikce ninye nirya ap, yata ning do nirya, kam ulul ning aning-aning nirya ap, obukapmunce, sirya daknamlulume. Winipmunyopura, anggun mutuku koproba atonun kibuka, talipmunce, unamlulume.

¹⁷ Anggun ni koproba Allah Yahweh arye, anggunti, “Aninye nirya, oplopnamlulume,” nyalisulul touk, anggunce amutuku si nyapnusin mutuku, talibuka ulamikce nang nirya ara, onamlulume. Ara, Het mutuku unyak ninye ap, Amori mutuku unyak nang ap, Kanaan mutuku unyak nang ap, Feris mutuku unyak nang ap, Hewi mutuku unyak nang ap, Yebusi mutuku unyak nang ap nirya ara, obuka, sirya dakanamlulume.

¹⁸ Aning ara, talye ati kum nyapsine. Deiyok ara, ani. Anyapmasin mutuku unyak ninye nirya, kum obuka sirya dakmunce, kam tuba ucopura, anggun ap, amalye unyak mutuku ninye ap, ansinibuka ulamunya ani, aminyan talak, sik amutuku ninye nirya arye, talibuka malye unyakce, Isa Mutuku Dongonye si erenyak ning ara, anggun ton peterepsikiba, anggun Israel ninye babye, amalye winin ninguk dopropmunce, malye weik wininamlume. Ara, talye Isa Mutuku Dongonye si erepmunce, Allah arye, ‘Na like,’ tenelye ning talibuka winimunyopura, adeice arye, ‘Anggun ni koproba Allah Yahweh yaniptapmunce, el dam ton, malye kipdeipdamunyak’ tenen, nyapsine. Musa birye, Israel ninye ati nyabuk.

¹⁹ Nyabukce, ayupu ton dukdongobuka nyabuk. Wini talak ara, yuk yupu ton nyapnusine. Anggunda, ‘Amutuku nang opnuyap’ tenen, tonok mutuku noutamak ton bimunce, amutuku ulamikce ninye, binuka warikamunya ani, wala yupa weik kiplyopura, amutuku ninye ati, binuka warikuka wininamlum talak noutamak nirya ara, amutuku noutamak ulamle yo, ayala-ayala nirya ara, kwinibuka kum batakanamlulume. Tonda, amutuku noutamak palamle duk dilamice yo duk, aning-aning nirya ara, pia kum weltakanamlulume. Ara, aminyan talak, amutuku noutamak binuka umunye talak, talibuka ulamunce, anggunce ayo duk nirya dakuka dinamluma atia. Tonda, ayo ayala-ayala nirya ara, talye yo uka. Ninye arye koulamtingopura, kwinibuka sirya daktum bukni, talye yo uk palula ati, amutuku yo weltakna ara, meme. Amutuku yo arye, anggun ton tamubuka, kum onamsila ati, nyapsine.

²⁰ Bukni, anggun babye, akunum kele. Amutuku noutamak palye yo nirya ara, moubuka dipdemunce, duk mouplyopura, ninye arye kum dipmanto yo yala nirya ara, anggun patapsilyopura, wena telebe. Ara, talye ati kum bukni, anggunce, ‘Weplobibirye, amutuku ninye, sik asik domika, dana-dana tam domik keil poka dam, ikdeibibirye, ayo deice arye welebuka, akeil poka bisibuka, anyaik pum tam wekibirye, aninye optibye,’ tenepmunyopura, amutuku deice palirye duk kum moulye yo uk, weltakna ara, teleb uka.