Ulangan 2 - Eipomek

¹ Musa birye sik Israel nang nirya bulubuka wekmekak arye nyabuk. Nun ni koproba Allah arye, ‘Tamubuka kata mutuku uk binuka unamlume,’ nyapsukopura, nun nirya ara, ila tamubuka mek kumak, pia kata tam bisikuk beipu. Winibuburye, weik laut mekwen, el si ara Teberau Nyanyak mekwen tam beipu. Aning ara, Allah Yahweh elce, ‘Winipnamlume,’ nyamnuk touk ubupe. Winibuburye, Edom mutuku Atamuk, pia ati antanap dongobuburye, asukum weik tonun arye, kepdanin balamupu ani, amutuku tam tuba banauk ulamupu.

² Asukumuk winibuka ulamupu ani, Allah Yahweh arye nati, yanuka nyapnuke.

³ “An ap, sik Israel nang nirya ap arye, amutuku tamuk pia banauk ulamluma anya arye, akunuma. Wini talak ara, amutuku batakuka, outam (ara utara) bimunce, adiparyuk binamlume,” nyapdeipsuke.

⁴ Tonda, ayupu ton nyapnuke. “Wini talak ara, ance sik Israel yala nang ati, ‘Winipnamab, winipnamap,’ nyan ning ton, binuka nyapnulyame. Aning ara ani. Anggunda, amutuku noutam binumunye talak ara, pia kanye moubuka tenipdumunce, nimalye aryuk amutuku noutam binamalume. Ara, anggun tam nang ton, amutuku noutam unyaka anya arye, aniryuk Edom tam binamalume. Atam ara, anggun kayapu nang ara, Esau birye deiamukba, dadeipdanin banyak nang, Edom yala nang unyak mutuku binamalume. Sik amutuku unyak nang arye, anggun Israel yala nang ati, ilil ulula anya arye, kanye moubuka nimalye arye, banamalume.

⁵ Tonda, anggunce amutuku nang ati ara, ‘Anang mal pipnamabe,’ tenena pia kume. Sik dam ton kum binuka opnamlume. Tonda, sik anang unyak mutuku, atam nirya ara, narye anggun Israel yala nang ati, mitik tonun babye, ton kum arepnamsine. Deiyok ara, Edom mutuku tam nirya ara, narye Esau yala nang ati, akunum areamsiba, min arye talibuka unyake.

⁶ Bukni, anggun din ning ap, mek ap patapsilyopura, sik anang dam bimunce, anggun uang deice aryuk dekukapmunce, dinamlume.

⁷ Ati anggunda moubuka tenipnamlulume. Anggun pil dolamlum talak noutam nirya ara, anggun ni koproba Allah Yahweh arye, teleb kibuka kintinyamsukce, anggun patan ning yala-yala nirya yamubuka arelamsuke. Tonda, Allah elce, amek kum mutuku, kata weik mutuku noutam, bisik balamlum talak ap, banamlum talak ap ara, elcuk kalikuka melilamsuk touk, tuba melinamsile. Tonda, keting tamun yupa empat puluh (40) tahun noutam ara, pia kata mutuku balamlum talak ara, anggunce el si erelamlum Allah Yahweh, elce erebuka ulamukce, anggun patalamsuk ning nirya ara, apatalamsuk touk, ubuka arelamsuke. Talye patalansukba, kum bataklamsuke. Allah arye Musa biti, nyapdeiamukba, Musa birye, sik Israel nang ati nyabuk.

⁸ Nyabukce, ayupu ton nyabuk. “Ura, Allah arye nyapsukopura, nun nirya Elat mutuku dolamik asik ap, tonda asik dolamika, el si Esion-Geber mutuku ton, abisik tam ban bisik ara, batakuburye, dabu mutuku utam (ara utara) binamupu. Nun kayapu nang, Esau birye deiamukba, dadeipdanin yangalamik nang ton, Ebon mutuku tam ulamikak arye, batakuka utam bisik binamupu. Winibuka dabinamupu ani, adiparyuk weik laut mekwen, el si ara Laut Mati amu tam mutuku dukdongobuka binamupu. Abisik beipu ura, tamubukabuburye, keting panalyangan tam, kata weik mutuku ton, Moab mutuku kata tam binamupu.

⁹ Amutuku Moab tam beipu talak ara, Allah Yahweh arye nati, nyapnuke. “Anggunda, Lot birye deiamuknye, Moab yala nang ara, amutuku noutam unyaka anya arye, anggunce Moab nang ati ton, ‘Mal pipnamap,’ kum tenenamlume. Tonda, anggun amutuku nang kum binuka opnamlume. Tonda, Ar mutuku ara, narye akunum arepsiba, sik talibuka unyake. Ara Lot birye deiamukba, dadeipdanin yangalamik nang ati, amutuku akunum minop talak areamse. Ati, sik talibuka unyak mutuku nirya ara, mitik tonun babye bokuka ton, anggun Israel yala nang ati, pia kum arepnamsine,” nyamsuke.

¹⁰ Ura, minop talak ara, Ar mutuku ara, Emim yala nang arye talibuka ulamik. Sik anang ara, ninye yupa pia weik nang ulamikce, sik nong ara, cang pia weik nang ulamik. Ara, sik urasin ara, Enak Ayala nang nyalamak nang, sik nong cang ulamik atonun, Emim nang babye, atonun nong cang weik nang ulamik.

¹¹ Enak yala nang ulamik atonun nang ulamik. Tonda, sik amutuku nang atibuk, yuk nang arye, ‘Sik si ara, Refaim yala nang,’ nyalamik. Tonda, sik anang atibuk, sik Moab mutuku ulamik nang ara, anang ati, ‘Sik si ton Emim nang unyake,’ nyalamik.

¹² Minop talak ara, Edom mutuku noutam ara, Hori yala nang ton amutuku noutam ulamik. Bukni, Esau birye deiamukba, dadeipdanin yangalamik nang arye, sik Hori yala nang ati, obuka yakdonokikce, sik anang aryuk amutuku talibuka aulamik. Winibikopura, sik ulamik mutuku nirya ara, binuka, alabuka talibikce ulamik. Winilamikopura, Allah Yahweh arye, Israel nang ati, teleb mutuku arebukba, amutuku ulamik nang ati, obuka sirya dakikce, sik amutuku talibuka ulamik nang arye, bataklamik ning ap, asik ap, doprobik touk, sik Esau yala nang babye, atonun ulamik.

¹³ Ura, Musa birye, ayupu ton dukdongobuka lak nyabuk. Allah Yahweh arye, na Musa biti nyapnuke. ‘Wini talak ara, anggun Israel nang ara, Zered mek duman koubuka, otam mutuku binuka unamlume,’ nyapdeipnuke. Ati, Allah Yahweh arye nati, nyamnuk touk, nun nirya arye ulamupu.

¹⁴ Ura, mutuku si, Kades-Barnea mutuku arye deiyok koubuka, upnin yangalamupu ani, Zered mek duman koubuka, atam yapu sum bukni, aketing tamun noutam nirya ara, yupa pia weik tonun, tiga puluh delapan (38) tahun deice arye, bisik banauk ulamupu. Amutuku yanuka, ulamupu talak ara, Allah arye nyapdeiamsuk touk, Kades-Barnea mutuku arye, deiyok koubupu talak ara, sik yin talin nang nirya, tuba kam ulamik nang atalak 38 keting tamun noutam, tuba upnin yangalamik nang, sik yin talin nang nirya ara, akunum diamike. Tonoknye babye, kam tuba kum ulamuk. Aning ara, Allah Yahweh arye, ‘Na yupu yanipmaluma anya arye, pata mutuku arye, talye dem balamlum buk, sirya talak ara, sik anang nirya dipnamakca,’ nyamuk touk winibuk.

¹⁵ Aning ara dipkoprob nyabape. Amutuku noutam yanuka ulamikce, bana uk ulamik talak ara, Allah Yahweh arye tuba-tuba sik anang nirya ati, ikin ning sik nong deice delilamuka deice arye, sik anang nirya olamuka ani, sirya dakuka kum kiryamuke. Ara, Israel yala nang unamak sukum ara, na yupu yanilamnik du nang ara, kam tuba kum unamake. Na yupu kekeninyak nanguk, kam unamake. Anang uk, Kanaan tam mutuku binuka wekikirye unamake. Allah arye nyapdeiamuk touk winibik.

^16-17 Anggunda, Kades-Barnea unmapu talak akunum du nang ulamik Yin talin nang nirya, akunum dibikura, Allah Yahweh arye na Musa dam yanuka nyapdeipnuk bukni, nun Israel yala nang nirya ati nyapdeiamsuke.

¹⁸ Anggunda arup aryuk deiyok koubukapmunce, Moab nang unyak tam uk wekelbinamaluma anya arye, Ar mutuku tam bisikuk bimunce, amutuku wilinak koubuka otam wekelbinamlume.

¹⁹ Anggunda, Moab mutuku wekelbinmamunya ani, Amon yala nang unyak mutuku uk binamlume. Bukni, sik Amori yala nang unyakak ara, Lot birye deiamukba, dadeipdanin, yangalamik yala nang ati, amutuku, na Allah arye, akunum areamse. Ati, anggun Israel nang arye, Amon yala nang ton benbena meme. Tonda, sik ona kume. Deiyok ara, amutuku nirya ara, na Allah arye, sik Lot elce deibukba, deipdanin yangalamik yala nang ati, akunum areamsa anya arye, tuku mitik tonun babye, anggun Israel yala nang ati, kum bokuka arepsitinye. Allah arye ayupu akunum nyamsuke. Musa birye nyabuk.

²⁰ Ura, amutuku el si ara ton, Refaim yala nang ulamik mutuku nyalamik. Tonda min talak ara, amutuku ulamik nang ati, sik Amon mutuku unyak nang arye nyalamika ara, ‘Amutuku noutam ara, sik Zamsumim yala nang unyake,’ nyalamik.

²¹ Amutuku ulamik nang ara, sik Zamsumim yala nang ara, ninye yupa pia weik tonun, nukman kumto ulamikce, mikip weik nang ulamik. Sikda Enak Ayala nang pia cang weik nang ulamika atonun, sik Zamsumim nang babye, atonun ulamik. Bukni, Allah arye amutuku minop talak ulamik nang, sik Enak nang nirya ara, obuka sirya dakukba, sik Amon yala nang arye, amutuku talibuka ulamik. Tonda, sik Enak nang taleamik ning ap, asik dolamika ap ara, sik Amon yala nang arye alubuka doprobik.

²² Aning unibuk touk, Allah arye, sik Esau yala nang ati, melilamuk. Ara, minop talak ara, Edom mutuku noutam ara, Hori yala nang ton amutuku noutam ulamik bukni, Esau birye deiamukba, dadeipdanin yangalamik nang, sik Hori yala nang ati, obuka yakdonokikce, sik anang aryuk amutuku talibuka aulamik. Winibikopura, sik ulamik mutuku nirya ara, binuka alabuka doprobikce, ulamik. Winilamikopura, Allah Yahweh arye, sik Esau yala nang ati, amutuku ulamik nang, sik Hori nang ati obukabukce, sirya dakuk. Ati, sik amutuku talibuka ulamik nang arye, bataklamik ning ap, asik dolamik ning ap, doprobik touk, sik Esau yala nang aryuk, aning nirya talibuka ulamik. Abuku sekik talak ara, sik Esau yala nang ara, amutuku noutam tuba ulamik.

²³ Aning mitik tonun, dabu tam bukni, weik laut mekwen el si ara, Laut Tengah, alaut lilun noutam nirya ara, sik Awi yala nang ulamik. Winilamik bukni, keting kumulban tam ara, mekwen deibuka, sekdongamuk mutuku tonok, el si Pulau Kereta, amutuku ulamik nang ara, sik Awi yala nang ulamik mutuku ara, yanuka obuka sirya dakikce, alubuka amutuku uk, talibuka ulamik. Winibikopura, sik aKereta nang adiparyuk, amutuku nirya, talibuka upnin balamika ani, selatan tam bukni, Gasa mutuku dam ara, sik mutuku wilinak ati, binuka dolamik.

²⁴ Musa birye, sik Israel nang ati nyabuk. Moab mutuku bisibuka yapu talak ara, Allah arye nunti, nyamsuke. ‘Wini talak ara, anggun adiparyuk, Arnon mek duman koubuka, otam binamlume. Bimunyopura, narye anggunti, Amori mutukunye, Raja Sihon, elda Esibon mutuku talibuknye ap, el taleamuk mutuku ap nirya ara, anggun Israel nang ati arepsiniba, binuka, obuka sirya dakmunce, el taleamuk mutuku nirya ara, dopropnamlume. Winipmunce, amutuku ara, anggun talibuka unamlume. Allah arye nyapdeiamsuke.

²⁵ Atalak aryuk, Allah Yahweh arye nyamsuke. Arup arye deiyok koubuka, narye anggunti arepsiniba, yuk-yuk mutuku nang, dana-dana mutuku nirya arye, biknamsiyake. Biksikirye, anggunti, ilil weik tonun unamle. Aning ara, dipkoprob winipnusine. Winipsiniba, aning eibikirye, yuk mutuku nang, dan tam mutuku unyak nang do nirya ara, anggun Israel nang ati, yupu lak nyabikce talak ara, sik tonok ilil pia weik unamle. Tonda, yuk mutuku nang arye, anggun ulamunya ati biksice nang arye, ‘Sikda Israel nang yanganmaka,’ nyabikiba, kekebikcopura, sirim taliplirye, ilil weik upnamale. Allah arye nyamsuke.

Israel nang arye, Raja Sihon obik yupu

²⁶ Atalak ara, Kedemut mutuku dam bukni, ninye kum ulamikak, pia kata sukum unmaburye, ‘Nunda kanye tonok bobuka, telebuk unamabeʼ tenen, nyalin yupu nyapsirye, ninye deiyoknye Raja Sihon, elda Hesyebon mutuku talibuka ulamuknye, el dam yupu nyalbana ati, ninye ton bokdeipsiba, sikce ayupu lak nyalbiyik.

²⁷ Ayupu ara ani. Na nio, ance nunti, “Telebe,” nyapsiminyeura, an talibuka ulyam mutuku noutam ara, bisik nong bisik dem, nun binamabe. Tonda, an talibuka ulyam mutuku, bisik binamapye talak ara, nunce yan ton kirikuka, kwanim bisik babye, sirik bisik babye, yuk tam babye yanibuka kum binamabe. Bisik nong bisik dem banmapya ani, yuk mutuku binuka unamabe,” nyabuka, moryamse.

²⁸ Nun din ap, mek ap, patapsilye ati, ‘Nun dipnuyabe,’ tenebipyopura, uang deice aryuk dekuka dinamap bukni, moropkipyeba, bikminyopura, adiparyuk, an talibuka ulyam mutuku batakuka, bisik binamabe. Aning dem moropkiyape.

²⁹ Winibibirye, nunda balamipya ani, Yordan mek koubuka, otam binamabe. Wininamaba ara, nun ni Allah Yahweh arye, nunti areamsuk mutuku binamaba ati, moropkiyape. Tonda, Esau birye deiamukba, dadeipdanin yanganyak nang, Edom mutuku noutam unyak nang ap, tonda Moab yala nang bukni, Ar mutuku unyakak ap ati ara, nunce ayala bitinye nang ati, ‘Anggun umunye mutuku noutam bisik ara, nun banmapya ani, otam mutuku binamabe,’ nyabuka morobububa, sik amutuku bitinye nang arye, ‘Yo, telebe, anggunda nun talibuka unyap mutuku bisik noutam binamlume,’ nyapsikba, yanganyabe,” nyabuka morobupue.

³⁰ Nyabuka morobupue bukni, Hesyebon mutuku talibuka ulamuk ninye deiyoknye, Raja Sihon birye nunti, ‘Yo, amutuku bisik ara, telebe dabilulume,’ kum nyamsuke. Deiyok ara, ani. Nun ni koproba Allah Yahweh arye, anye Raja Sihon, elti, mandipna don ning areamukba, anye malye weik ubuka deice arye, ‘Kume, nun mutuku noutam kum binamlume,’ nyabuka, yupu seksuke. Bukni, Allah arye tenyamuk ning ara, ani. ‘Mandipna upliba, na Allah arye, Israel nang ati, mikip weik arepniba, sikce el obuka sirya daknamake,’ tenyamsuke. Allah arye winipsukce, anye Raja Sihon, el taleamuk mutuku nirya ara, nunce deiyok kibuka, el taleamuk mutuku nirya, alubuka dopropbibirye, amutuku nirya babye, oyanamle talak arye, asukum dem unmabe.

³¹ Aning akunum winibukopura, Allah Yahweh arye, nati nyapnuke. ‘Raja Sihon ap, el talilul mutuku ap nirya ara, bobuka anggun Israel nang deiceuk, akunum deipsine. Ati ara, amutuku nirya ara, anggun adiparyuk amutuku nirya alubuka dopropmunce, talibuka unamlume,’ nyapdeiamnuke.

³² Nyapnukopura, atalak aryuk, Raja Sihon ap, el yin talen nang nirya ap arye, ‘Israel yala nang ati, olbinuyabe,’ tenepsikce, nun unmapu mutuku Yahas mutuku damuk yayik.

³³ Bukni, nun ni Allah Yahweh arye, ‘Kume, anang nirya ara, Israel nang arye obuka sirya daknamakʼ tenen, Raja Sihon el tam nang nirya bobuka, nun deice uk deipsukba, sik anang nirya, nunce obuka sirya dakupue. Ara el Raja Sihon ap, el mapu nirya ap, el yin talen nang ap nirya ara, nunce obuka sirya dakupue.

³⁴ Onmapu talak aryuk, anang ulamik mutuku nirya ara, alubuka doprobupe. Doprobuburye, amutuku noutam ulamik nang nirya babye, obuka sirya dakamupue. Ara, sal ap, kilapu nirya ap, tonda mapu nirya ap, obuka, sirya dakupe. Tonoknye babye, kum batakupu. Sik nirya obuka, sirya dakamuburye, tonoknye babye, kum batakububa, kam kum ulamik. Nirya ara, obuka sirya dakupuba, sik nirya dibike.

³⁵ Bukni, sik amutuku nang arye, talibuka weilamik domba ato ning, yala-yala nirya ara, kam kipman doprobupu. Tonda, sikce talibuka ulamik mutuku ap, sik domik asik noutam nirya ulamik talak, talilamik bona yala-yala nirya ap ara, aning nirya alubuka dopromuburye, nun ning dem kibupu.

³⁶ Nun ni Allah Yahweh, el mikip weik deice arye, nunti meliamsukba, Raja Sihon birye taleamukba, el tam nang ulamik mutuku asik dolamika nirya ara, alubuka dopromubu. Ara, Aroer asik dolamika ara, Arnon mek lilun tam uamuk mutuku ap, tonda amek duman noutam ulamikce, asik dolamik ning ap, anerye dipdongobuka, otam Gilead mutuku ap, anoutam mutuku nirya ara, alubuka dopromubu. Raja Sihon taleamuk mutuku noutam nirya ara, sik asik dana-dana tam weik cang keil poka domik ning, awamuk bukni, aning-aning nirya ati ara, uluplobuburye, anyasik dolamika nirya ara, “Se, aning ara, kanye imun upsila anya arye, bataknamabe,’ pia kum tenyamupu. Amutuku nirya, malye kibuburye, alubuka dopromubu.

³⁷ Winilamupu bukni, nun ni Allah Yahweh arye, ‘Atam unyak nang ara, anggunce kum opnamlume,’ nyabuka, yupu sekamsuk touk, ulamupu. Ati ara, nunda sik Amon yala nang ulamik mutuku dam ara, kum olbinamupu. Ara, balamle Yabok mek lilun dolamik asik ap, tonda amutuku noutam bukni, mutuku kon deice dolamik asik ulamik nang ap, kum olbinamupu. Anang ara, batakupu. Winipmapu deiyok ara, nun ni Allah Yahweh arye, ‘Wininamlume,’ nyapdeiamsuk touk winibupu.