Ulangan 19 - Eipomek

“Ninye arye yuk nang ati, yu kanye tenena kum diparyuk obicopura, ‘Sik tam yu nang kwang dakuka opnicak’ tenen, binuka asik dobuka teleb unamake,” nyabuk yupu

¹ Musa birye, sik Israel ninye ati, nyabuk yupu ani. Anggun ni koproba Allah Yahweh arye, anggunti arepnamsil mutuku noutamak, min arye ulamik ninye nirya ara, amutuku noutamak arye, yakwetepnamle. Ton nang ara, obuka sirya daknamle. Winiplyopura, Allah arye amutuku dobuka, anggun Israel ninye ati, nuknamsile. Ara, amutuku ulamik ninye arye, sik min arye dobuka ulamik aik ap, sikce talibuka ulamik mutuku wa tuku nirya ap ara, anggunti arepsiliba, angguncuk amutuku nirya dopropmunce, talibuka unamlulume.

² Anggun ni koproba Allah Yahweh arye, amutuku arepsiliba, amutuku noutamak pia aunamlum ati, sik amutuku noutamak ulamik ninye arye domik asik dipdemunce, asik winilye wipnamlulume.

³ Anyaik aruma winilye dobuka ulamik ning, wipnamlum ning ara, amutuku nirya bokuka, winilye kipmunce, yuk-yuk talibuka unamlume. Ara, anggun ni Allah Yahweh arye ‘Anggun Israel yala ninye ati arepnamne’ tenen, kintinibuka deiamsuk mutuku arepsiliba, talibuka telebuk unamlume. Tonda, anggunce amutuku nirya bokuka, winilye kibuka deipmunce, amutuku noutamak bana ati, teleb karayong bisik yabuka deipnamlulume. Ara, talye ati kume. Deiyok ara, yatanye birye do nirya, yu kanye bona kum diparyuk yuk nang obicopura, ‘Se, sik tam nang arye, na wenena ati, kwang dakuka opnicak’ tenen, bikbik abuka, awinilye asik dam binamake. Winipnumunyopura, ninye sik mangkau arye yuk nang obicopura, sik mal olan nang yakirye, adiparyuk, minopce yanuka kum opnamkiyake. Ninye arye mangkau kanye bobuka, yuk nang obicopura, sik mutuku koproba batakuka, minopce awinilye asik noutamak, akunum bicopura, telebuk unamake. Ara, sik mal olan nang yakirye, adiparyuk kum opnamaka ati, ilil kum diparyuk, telebuk unamake.

⁴ Aning ara, dipkoprob olana ati, laka nyapsine. Ara, ninye tonoknye birye, yuk nang ati oltakalulnye bira, tenepce kum oltakalule. Tonda anang ati, yu ulamuka deice arye, kum oltakalul bukni, el kwit capu nang ati, ‘Opnamne,’ tenena kum deice aryuk, talye oploplirye, elce, ‘Se, na opmanunye, el kwit capu nang arye nati, kwang dakuka opnicak,’ teneplyopura, bikbik abuka, ton tam mutuku binuka unamle. Ara, anggunce awinilye asik wibuka deipnamlum mutuku, asukumuk binuka uplyopura, teleb ubuka, namin kibuka kam unamle.

⁵ Winipmanto ara, ninye bitinye yo wena ati, ya dobuka bai mutuku barudake. Bai mutuku binuka, yo wenmarikibuk, ayalila kolkol lelebuka luksaklirye, yanduka el kwit opliba dipnamle. El kwit opliba diplyopura, el ilil ati, adiparyuk bikbik abuka yuk mutuku binamle. Ara, anggunce wibuka kintinipnamlum asik winilye (3 kampung) bukni, mining dam asikuk minopce binamle. Bilirye, amutuku noutamak binuka, teleb ubuka unamle.

⁶ Anyasik noutamak ara, yuk nang nirya arye, anye dam yanuka, kum opnamake. El kwit birye tenebuka, yuk pera mutuku binamla deiyok ara, ‘Na kwit el tam nang ap, el kilapu, mapu ap, sik nirya arye nati, yu upliba tamubuka, kwang dakuka opnicak’ tenen, yuk pera mutuku bikbik abuka binamle. Anye, ninye opmalinye bira, anggunce el wenena ati, dobolbinduka kum opnamlulume. El kwit opmalya deiyok ara, tenebuka yu kanye bobuka, kum opmalule. Tonda, anye birye, ‘Na kwit opnaman’ tenen, kum teneipmali bukni, mangkau arye opnamle.

⁷ Ati ara, tonye birye, el kwit biti, tenebuka yu kanye bona kumce, mangkau arye oplyopura, elce, ‘Opmaliba, dipmalinye birye, el tam nang yu upliba, kwang dakuka, anye obicak’ tenen, narye, “Asik winilye (3 kampung) wipmunce, kintinibuka deipnamlulume,” nyapdeipmasine.

⁸ Allah el si Yahweh arye, sik apu yapu ati, “Narye weik pala teleb mutuku arepnamsine,” nyabuka, nyalin yupu deice arye nyapdeiamuk. Allah arye, ayupu nyalilamuk touk, pala weik mutuku arepsiliba, dopropmunce, amutuku ulamik ninye arye dolamik asik, winilye ton wipmunce, kintinip deipnamlulume. Winipmunyopura, ninye tenebuka kumce, mangkau arye, yuk nang obicopura, anyasik winilye kintinipnamlum mutuku noutamak, minopce binuka unamnyake.

⁹ Na Musa birye, “Aning ara wininamlulume. Aning ara, pia kum wininamlulume,” nyapdeipsinye touk, dipkoprob winipmunyopura, Allah arye weik pala teleb mutuku arepnamsine. Tonda, anggun ni koproba Allah el si Yahweh arye, ‘Sikda ‘Naʼ tenen, ninye unamak’ tenen, “Aning ara wininamlulume. Aning ara, pia kum wininamlulume,” nyapdeiamsuk yupu, pia moubuka kekepmunce, ayupu talibuka dobolbamunyopura, dipkoprob Allah arye, amutuku arepnamsine. Tonda, anggun ni koproba Allah Yahweh, el deiceuk anggun kanye deipmunce, elce “Ateleb bisikuk dobolbanamlume. Teleb winina ara, ani,” nyabuka nyalisilye touk, kekebuka winipmunyopura, dipkoprob Allah arye, ateleb mutuku arepnamsile. Ati, apala weik mutuku, akunum arepsiliba dopropmunyopura, anggun adiparyuk winilye asik ton, tabakuka wipmunce, kintinibuka deipnamlulume.

¹⁰ Anyapmasin touk, nakub barye asik wipdeipmumnyopura, teleb arye unamlume. Ara, ninye ton malye kum upmalibuk, el kwit tenepce ap, yu kanye bona ap kum aryuk, mangkau arye oplyopura, anggunce, “Anye bira, el malye winipmalye ning wenena ati, minopce oplopnuyabe,” nyabuka, ‘Anye talye lukparabuka opmunyak’ tenen, nyapsine. Ninye arye tenebuka kumce, yuk nang mangkau arye obikiba, anggunce anang wenena ati, kwang dakuka kum oplopnamlulume. Adiparyuk anang opmunyopura, Allah arye anang, sik ining, anggun nong deice deipsilirye, anggunti wenepnamsile. Ati, ninye arye malye kum winipmalibuk, mangkau kanye arye obikiba, ‘Anggun Israel nang arye, anang kwang dakuka opmunyak’ tenen, amutuku noutamak ara, asik nakub barye wibuka, kintinip deipnamlulume.

¹¹ Bukni, yatanye do nirya, deiyok kum upmalibuk anye birye, ‘El kwit yu kanye bobuka, anye bira, na like ati ara, apnamane, teneplirye’ tenen, kunusa dobuka, el kwit mangkau arye mining dam balibuk, yu kanye bopmalinye birye, el kwit oplyopura, dipkoprob pia malye weik wininamle. Atonye birye, yuknye oploplirye, ‘El tam nang arye, na wenena ati, kwang dakuka opnicak’ tenen, minopce ninye kum opmanto asik bindoplya babye, teleb kum unamle. Anggunce anye bira, ‘Dauplye daulamlula,’ tenena meme. Atonye ninye arye opmanto kum asik minopce betua babye, anggunce anye biti, batakna pia kume. Dolbimunce, anye wenepnamlulume.

¹² Anye dipkoprob pia malye winipmalula ati, el mutuku koproba, talibuka unyak wisi nang nirya arye, ‘Anye bira dolbilulume,’ nyabuka ninye wipdeibikiba, ninye opmalinye dolbikirye, tapu koubuka, tamubuka el mutuku koproba boyacopura, ninye wenebuka, ona deiyoknye arepnamake. Aribicopura, ninye ona deiyoknye birye, amalye winipmalirye ninye omlinye, el kwang dakna ati, el anye tamubuka opliba, dipnamle.

¹³ Aopmunba dipnamlanye biti, anggunce bico kum tenepnamlulume. Ninye ton, malye kum winipmalibuk, talye oltakalulnye biti, kwang dakuka oplopnamlulume. Tenepce arye, yu tenebuka, ninye olamak nang nirya ara, yuk talye Israel ninye kan-kan kum unamake. Ato ninye nirya ara, obuka sirya daknamlulume. Winipmunyopura, anggun Israel ninye nirya teleb ubuka wininamlume.

“Tuku bokuka wililonak ara, ‘Tonap outam lulubuka doproptinye,’ kum tenenamlulume,” nyabuk yupu

¹⁴ Tonda, tuku bokuka wilinak ati, ‘Na talinye tuku wiliba ani’ tenen, keil dobuka delilamak ning ara, anggunce, ‘Tuku tonap tabakuka doproptinye’ tenen, akeil dobuka lulubuka, yukak kum delinamlulume. Anggun ni koproba Allah, el si Yahweh arye arepnamsil mutuku noutamak, tuku bokuka, yuk-yuk arepnamsil touk, atuku uk dopropmunce, talibuka unamlulume. Anggun min kum yanamlum talak, sik min arye atuku talibuka ulamik ninye arye, tuku bokuka wilinak ati, deiamik keil ara, lulubuka yukak delina meme. Musa birye Israel ninye ati, nyabuk.

Ninye malye wininyak ning, laka nyalbana ati, nyabuk yupu

¹⁵ Musa birye, Israel ninye ati nyabuk. Yata malye winina ati do nirya, ninye arye malye ning winibicopura, sik winibice ning laka nyana ati ning ara, tonoknye, ‘Na asing arye eipmane,’ nyaplyopura, adeice aryuk, malye winipmalinye wenena meme. Bukni, yuk nang ap tabakuka, bitinye nang do, winilye nang arye do, ‘Kume, nun babye amalye winipmal ning eipmabe,’ nyabicopura, adeice aryuk, ‘Anye bira dipkoprob malye winipmale’ tenen, weneptume. Anye winilye ning kum eibicopura, talye diamuk kum wenepnamlyame. Anye birye winipnamle ning, tonoknye birye, ‘Na asing arye eipmane,’ nyalye bukni, yuk nang bitinye nangto, winilye nangto arye, kum eibicopura, anye bira, talye kum wenepnamlulume. Ninye wenena ati yupu bokeipnamlum talak nirya ara, ninye bitinye do winilye do, ‘Nunce ton eipmabe,’ nyabuka, laka nyabicopura, malye upmalinye wenena telebe. Kumopura, kume.” Musa birye nyabuk.

¹⁶ Nyabukce, ayupu ton dukdongobuka nyabuk. Ara, “Ayupu tonap tabakuka nyapnusine,” nyabuk. Ara, talima malinye tonoknye birye, ninye olamlirye, malye-malye winina weik winilamlinye birye, yuknye biti, ‘Anya bira, malye winipmal ning ara ani,’ nyabuka, minina yupu deice arye, laka nyaplyopura, adiparyuk amalye winipmalinye birye, nyaplye yupu dib kum tenenamlulume. Tonda, ‘Anye bira, malye winipmale,’ nyaplinye biti, el yupu kekebuka, adiparyuk wenena kume.

¹⁷ Aning kum bukni, ninye olamlirye malye ulinye bira, ayupu atonun nyaplyopura, ayupu nyaplinye ap, el kwit ap, neika bobuka, yupu lipsisikuka bokolina aik boyanganamlulume. Sik bitinye anyaik pum tam, Allah el si Yahweh, el dam wekdikceba, sik deiyok nang arye ayupu nirya kekepnamake. Atalak kekepnamak nang ara, ani. Ara, Allah ap, ninye ap, ansinilina deiyok nang, imam nang ap, Israel ninye sik yupu lipsisikuka bokolina deiyok nang, hakim-hakim wisi nang ap, bulubuka wekikirye, kekenamake. Ayupu nirya kekepnamake.

¹⁸ Yupu lipsisikuka bokolina deiyok nang, ayupu nirya moubuka kekepbikirye, adiparyuk ‘Dib nyanmasil do, tilila nyanmasil do?’ tenen, aning-aning nirya ati, asibikirye, moubuka didikirye, dipdekcopura, moubuka teneipdekirye, anang aryuk yupu bokeipnamake. Yupu lipsisikuka bokolina deiyok nang, sik hakim-hakim nang arye, ayupu moubuka kekepbikirye, bita eibuka, kel kibikirye, ‘Kume ayunye birye, el kwit ati, “Malye winipmale,” nyabuka, minin yupu nyaplinye bira, tilil yupu nyanmale,’ tenebikirye, aning nirya ara, moubuka tenebikirye, sik adiparyuk, atilila yupu nyanmalinye biti, ‘Ara talye yupu nyanmala’ tenen, wenepnamake.

¹⁹ Ara, yata nang do nirya, sikce sik kwit capu nang ati, ‘Malye winipmale,’ nyabikirye, tilila yupu deice nyanyak nang ara, adiparyuk weik arye wenepnamlulume. Wenepnamluma ara, ani. Anang arye, ‘Nun kwit bira, winibuka-winibuka weik arye wenepnamlulume,’ nyabice ninguk, sik tilila yupu nyanyak nang, sikce nyapmace touk, weik arye wenepnamlulume. Sikce sik kwit capu nang ati, ‘Ikin ning deibuka, wenepnamake,’ tenebuka nyabice touk, atilila yupu nyabice nang ati, ikin ning deibuka, wenepnamlulume. Winipmunyopura, anggun noutamak arye, sik malye wininyak nang ap, ninye olamak nang ap, yu kanye bolamak nang ap, sik malye wininyak ning ap ara, kum kilinamlulume. Aning nirya ara, kum danamlarya.

²⁰ Anyapmasin touk, akunum winipmunyopura, sik yuk daunyak Israel ninye nirya kekebikirye, ilil weik uplyopura, ‘Se, nun kwit capu ati, tilila yupu ap, minina yupu ap, nyabipyopura, ikin ning deibuka wenepnamsiyake. Weik arye wenepsicak,’ tenen, kel kibikirye, tilila yupu nyana ara, bataknamake. Tilila yupu tonap, tabakuka kum nyanamake. Pia dipkoprob yupu uk nyanamake.

²¹ Ton nang arye, ton nang ati, tilila yupu nyabikirye, malye kibikce nang ati, amalye wininyak nang ati, bicoe tenena meme. Aning atonun, yuk nang arye malye winibicopura, anang ati, bico tenena meme. Winipmanto ning ara, ninye opnanye bira, el babye onuka. Tonda, taruk sekloplinye bira, el babye taruk seknamlulume. Yan sekloplinye bira, el babye yan seknamlulume. Tonoknye birye, yuknye asing tulupyopura, el babye asing tulupnamlulume. Sikce yuk nang ati, malye winibice touk, anang ati ara, atonun wenepnamlulume. Musa birye, Israel ninye ati nyabuk.