Ulangan 18 - Eipomek

Sik imam-imam nang ap, Lewi yala nang ap, sikce pil talibuka donamika ati, nyabuk yupu

¹ Allah Yahweh arye, Harun biti nyabuk. Na si eren aik pum tam, pil donamak nang, imam-imam nang nirya ara, Lewi yala nang unyake. Tonda, sik imam-imam nang ap, sik talye daunyak nang, Lewi yala nang nirya ara, sik wa win tuku ap, yuk ning nirya ara, kum arenamne. ‘Sikce aning-aning talibuka unamak’ tenen, narye aning dobuka, Lewi yala nang ati, kum arepnamne. Aning kum bukni, Israel ninye nirya arye, ‘Nun malye wininyap ning ara, nun ni koproba Allah arye, aning nirya ati, namin kipnamsil’ tenen, kam ning boyakirye, imam nang arye, aining ning obikirye, uku dongolbanamak noutamak arye bokuka, sik Lewi yala nang ton, dopropnamake. Aning dolanamaka deice arye kam unamake.

² Narye yuk yala Israel ninye nirya ati, sik wa win tuku ap, yuk ayala-ayala ning nirya ap, bokuka arepnamne. Bukni, sik Lewi yala nang ati ara, aning-aning nirya bokuka, kum arenamne. Na Allah Yahweh aniryuk, sik Lewi yala nang ati, kalikuka melinamne. Sik patan ning nirya ara, na deice aryuk dolonamake. Ara, na Allah arye, sik Lewi yala nang ati, ‘Naryuk anggun patan ning kintinibuka arenamsine,’ nyabuka, nyalilamse atonun wininamake.

³ Yata ninye do nirya, Israel ninye ara, yuk-yuk bukni, sik nirya arye, ‘Nun malye wininyap ning nirya, Allah arye namin kinamsil’ tenen, sik weinyak ning noutamak ara, domba basam ap, sapi basam ap, kambing ap, maka ap, ura, yuk yala ning nirya ap ara, sik imam-imam nang dam anyuk bobuka, arelyanganamake. Abobuka yanganamak kam ning nirya noutamak ara, imam-imam nang ati arebicopura, sik imam-imam nang ap, Lewi yala nang ap arye, keil dam tup ap, si bam bol dam tup ap, mun teleb ulamle ning ap, nong noutamak, teleb ulamle tup ap nirya ara, bol teleb kibuka, bolamak ning nirya ap bobuka yakirye, sik imam-imam nang ati, arelyanganamake.

⁴ Tonda, sik Israel yala ninye nirya arye, sik imam-imam nang ap, Lewi yala nang yuk nang nirya ap ati, gandum wa ap, anggur tapu duk wa ap, zaitun yo duk mek ap, min yuma wenye linamak ning ara, bobuka arelyanganamake. Tonda, anggun domba basam, potong winiryuk kopmunye ning ap nirya ara, sik imam-imam nang ap, yuk Lewi yala nang ap, sik dam anyuk arelyanganamlulume. Aning dobuka dinamaka deice arye, kam unamake. Ati, anyapmasin ning bobuka, sik Lewi yala imam-imam nang nirya ati, bokuka arenamlulume.

⁵ Adobuka arelyanganamlum ning ara, urdem ati kume. Deiyok ara, na anggun ni koproba Allah Yahweh arye, anggun Israel yala ninye nirya umunya noutamak noutam arye, Lewi yala nang akunum wipdeiamse. Ara, na Allah Yahweh arye, ‘Lewi yala nang arye, na si eren aik pum tam talibuka, pil donamak talak nirya ara, na si deice arye, pil dobuka unamak’ tenen, ayala nanguk wipdeiamse. Aning ara, sik Lewi yala nanguk, na Allah si eren aik noutamak talibuka ubikirye, pil pia dopra banamake. Ati, anggun yuk yala Israel ninye nirya arye, anyapmasin ning dobuka, sik Lewi yala nang ati, arelyanganamlulume.

⁶ Sik Lewi yala nang nirya ara, dan mutuku do nirya, sik mutuku koproba batakikirye, Israel ninye dabinuka ulamice mutuku noutamak ara, sik Lewi yala nang babye, abinuka ubikirye, ninye asik nang atonun, kibuka kum unamake. Aunamak mutuku noutamak nirya babye, na si eren piluk donamake. Tonda, ‘Na mapu koproba Israel yala ninye unamak’ tenen, na Allah Yahweh arye wipdeiamse mutuku uk, ubikirye, apil nirya talibuka donamake.

⁷ Sik mutuku koproba batakikirye, yuk mutuku binuka unamak talak nirya ara, na Allah Yahweh, na si erebuka winibikirye, pil donamake. Aning ara, teleb uka. Ara, anggun kwit capu nang, yuk Lewi yala nang babye, na si erebuka, na piluk donamake. Ara, teleb uka. Ara, sik Lewi yala imam-imam nang nirya ara, na Allah dam anyuk ubikirye, na aik pum tam noutamak talibuka, na piluk donamake.

⁸ Ati ara, sik Lewi yala imam-imam nang arye, sik mutuku koproba batakikirye, yuk mutuku binuka unamak talak nirya ara, sik din ning weika arye dolonamake. Ara, minop talak arye amutuku noutamak ulamikce, Lewi yala nang arye, teleb ning aning-aning nirya dololamak touk, sik winiryuk yanamak Lewi yala nang babye, ateleb ning dopdobikirye, unamake. Aning ara, telebe. Sik imam-imam nang nirya arye, sik dolona ara, yuk-yuk kume. Sik ning dolona ara, neiktoto uke. Israel ninye arye, anyapmasin ning arelyanganamak talak ara, sik imam-imam nang arye dolonamak ning ara, neiktoto uke. Winiryuk yanamak imam nang ara, sik mutuku koproba bataknuce talak, sik apu yapu talilamikce ning, nirya dekikirye, yo bok ton dopropnamaka babye, teleb uka. Bukni, sikce yuk mutuku akunum bicopura, amutuku unyak imam-imam nang arye, Israel yala ninye arelyanganamak ning noutamak arye dololamak touk, sik winiryuk yanamak Lewi yala nang babye, aning ato touk dolonamake. Aning ara, telebe. Allah Yahweh arye nyabuk.

Israel ninye arye, yuk mutuku binuka unamak talak ara, amutuku noutamak unyak ninye arye, ‘Isa Mutuku Dongonye si erebuka mem pil ap, yuk malye winin ning ap winilamak touk, talibuka pia kum wininamlulume,’ nyapdeibuk yupu

⁹ Ura, anggun ni koproba Allah Yahweh arye, anggunti, kintinip deiamsuk mutuku, Kanaan mutuku arepsiliba, dopropmunce, amutuku noutamak binuka unamlum talak nirya ara, sik amutuku noutamak unyak ninye arye, malye winin ninguk talibuka, wininyak touk, anggunce pia kum wininamlulume. Ara, sik amutuku ninye, min arye talibuka malye-malye winilamikce ning, eipmunce, aning ati, ‘Se, sik amutuku unyak ninye arye, malye winilamice ning, nun babye aning ton kel kiptibye’ tenena ara, pia meme. Na Allah ati dib kum tenenyak ninye arye, talye ning puturubuka deibikirye, amalye mem ninguk, talibuka winilamice ning ara, tonda yuk malye mem ning winilamice ning ara, anggun Israel ninye arye, ton binuka talibuka, pia kum wininamlulume. Aning ara, pia meme nyapsine.

¹⁰ Sik amutuku noutamak unyak ninye arye, malye ubuka wininyak ning ara, nyapnusine. Sik amutuku unyak ninye arye, Isa Mutuku Dongonye si erena ati unyakce, sik mapu nirya ara, sal mapu ap, kilmapu ap nirya obuka, uku dongolbanyake. Sik amutuku noutamak unyak ninye arye, malye winilamak touk, anggun Israel ninye, pia kum wininamlulume. Tonda, sikce ninye derelamice ninye, sik kanya ap, neika yupu talibuka ulamak ninye ap, neika dukdongobuka pia kum unamlulume. Tonda, sik amutuku ninye arye, ninye kir don merye talibikce, ninye ati, ‘Nun like’ tenebuka, unyak ninye ap, neika yupu talibuka kum unamlulume. Tonda sik amutuku nang arye, mem ninguk talibikirye, ‘Aminyan talak winipnamle ning ara, eibibirye, kel kibuka laka nyanamap’ tenen, mem pil dolamak ning ara, anggun Israel ninye arye, pia kum wininamlulume. Aminyan talak unamlumak nirya ara, amutuku noutamak unyak ninye arye, pia malye winilamak ning, anggunce talibuka, pia kum wininamlulume.

¹¹ Amutuku noutamak unyak ninye, sik noutamak arye, ninye ton kir dona ati, weik arye kel kinyak ninye ap, neika dukdongobuka winina pia meme. Aning atonun, ninye dibinyak ninye, dib kanye ap, yupu talina ati deiyok ning talibuka pil dolamak ning ara, anggun ton talibuka, kum wininamlulume. Tonda, amem ning pil donyak nang ati, ‘Se, nun ton peterepsitinge’ tenen, asiltona pia meme. Amem ning nirya ara, anggunce neika dukdongobuka, winina pia meme.

¹² Anyapmasin ning talibuka, pil donyak ninye nirya ara, na Allah Yahweh arye, ‘Na like’ tenen, batakanune. Amem ning aning-aning nirya ara, pia malye ning ati nyapsine. Ati ara, yata ninye do nirya, sikce anyapmasin malye winin ning, winipre banyak ninye nirya ara, na sik ni koproba Allah Yahweh arye, aninye yakuka, amutuku noutamak arye dopkwetepnamne. Anggunda, na mapu koproba Israel ninye ap, amalye ning talibuka wininyak ninye ap, neika dukdongobuka, pia kum wininamlulume. Deiyok ara, na Allah arye, amalye ning talibuka wininyak ninye nirya ati ara, ‘Aninye ara, na pia like,’ tenenuna ati, nyapsine.

¹³ Ati, na anggun ni koproba Allah Yahweh unun ati ara, anggunce na dam unamlum talak nirya ara, malye winin ning, tonok ning babye, talibuka pia kum wininamlulume. Na anggun ni koproba Allah ap kanye talima dukdongobuka upmunce, pia diksukum winin ninye uk unamlulume. Allah arye Israel ninye nirya ati, nyabuk.

Allah arye, el yupu laka nyanamlanye tonok wipdeipnamle, nyabuk yupu

¹⁴ Musa birye, Israel kili sal ati nyabuk. Anggun wekuka yupu talipmunce, unamlum mutuku unyak ninye ara, pia malye weik wininyake. Anggunce asing keten nang ap, diamice nang kanya ati, yupu neika talinyak nang ap, ‘Aminyan talak winiplye ning, kel biktibye’ tenen, mem ning talibuka, don nang ap, ninye kir don nang ap, pia weik unyake. Aminyan talak binuka unamlum mutuku noutamak, unyak ninye arye wininyak bukni, anggun Israel yala ninye arye, aning atonun pia kum wininamlulume. Narye amutuku nirya arepsinyopura, anggunce amalye unyak ninye nirya, yakwetepnamlume. Anggun ni koproba Allah el si Yahweh, elce anggunti, wiamsuknye birye, ‘Na tenen ninye arye, amem ning ayala-yala nirya talibuka, pia kum wininamlulume. Aning nirya ara, pia meme,’ tenelamsukce, akunum nyamsuke. ‘Aning nirya ara, pia ton kum talibuka wininamake,’ tenesulule.

¹⁵ Ati, aning kum bukni, nun ni koproba Allah Yahweh arye, minop talak na Musa wipdeiamnuk atonun, nun ni koproba Allah, el si Yahweh arye, nun Israel ninye noutamak arye, na unya atonye, tonok ton wipdeipnamsile. Ara, Allah el nyalye yupu kekeplirye, sikti, laka nyanamla deiyoknye wipdeipnamsile. Wini talak, na Musa unye atonun, aminyan talak anye bira, Allah el yupu laka lena deiyoknye unamsile. Anye akunum wipdeiplyopura, anye nyaplye yupu kekebuka, unamlulume.

¹⁶ Allah arye anye wipdeipnamsila deiyok ara, talye ati kume. Deiyok ara, ani. Sinai mutuku bulubuka wekmalum talak arye, Allah ati moropmunce, ‘Se, nun ni Allah Yahweh, elce nyalul yupu ara, nun ilil weik usulul anya arye, nun dam ton, elcuk kum nyanamsulule. Tonda mutuku dup deice, Allah arye kinitipdeibuk uku elinyaba atonun ning ara, nun ilil ati, ‘Tonap pia kum elinamapʼ tenen, moropkiyabe. Nun ilil weik atia. El yupu tuba kekebibirye, auku buk ton tuba eibipyopura, nun dibipyak’ tenen, nyalamlume. Ayupu nyapmaluma ati, Allah arye, el yupu laka nyana deiyoknye ton wibuka arepnamsile. Musa birye, sik Israel yala ninye ati, nyabuk.

¹⁷ Musa nyabukce, ayupu ton dukdongobuka nyabuk. Allah si Yahweh arye, Sinai mutuku dup epdanumume talak ara, ayupu ton nyapnuk. Ara, anggunce ayupu nyalum talak ara, Allah el si Yahweh arye nyapnuk. “Sik Israel ninye arye moropmaniak yupu ara, telebe.

¹⁸ Musa an wipdeipkise touk, anggun Israel ninye noutamak arye, na yupu laka nyana deiyoknye, tonoknye ton wipdeipnirye, na yupu el dam nyapdeipniba, ayupu nirya dobuka, Israel ninye ati, laka nyalbanamle,” Allah arye nyabuk.

¹⁹ Nyabukabukce, ayupu ton nyabuk. “Na yupu lak nyana deiyoknye wipdeipniba, na si deice ap, na mikip deice ap arye nyapsiliba, elce nyanamle yupu, kum kekelamikce nang nirya ara, narye sikti, wenepnamne.

²⁰ Bukni, na yupu laka nyana deiyoknye kum bukni, narye, ‘Wininamlulume,’ nyabuka, kum nyalamse yupu bukni, yuk talye nang, narye kum wipdeiamse nang arye, sik bidamnye kanye aniryuk, ‘Allah arye nyapnuke,’ nyabuka, na si deice arye tilila nyabice nang ara, adiparyuk oplopnamlulume. Aning atonun, yata nang do nirya, Isa Mutuku Dongonye el si do, yuk-yuk talye ning si do, sik si erenyak ning deice arye, ‘Wininamlulume, wininamlulume,’ nyabice nang ara, adiparyuk oplopnamlulume. Sikda, narye kum wipdeipse nang arye, tilila yupu nyanyaka atia. Allah arye nyapnuke. Musa birye nyabuk.

²¹ Nyabukopura, ayupu ton nyabuk. Yuk talak ara, anggun talima pum tam ara, ‘Allah el si Yahweh arye, dipkoprob wibuknye birye nyasulul do, kum do?’ tenen, kanye teniltona upsilyopura, anggun wininamlum ning, laka nyapnusine. Adeice arye, kel kipnamlulume.

²² Yata nang do nirya, ‘Allah arye nyapnuka ati, mambul ning winipnamle ning ara ani, ani,’ nyabuka, laka nyanyak bukni, sik nyanyak ning, nong kum kiplyopura, akunuma. Adeice arye kel kipnamlulume. Anang ara, sik nyanyak ning nong kum upmala ati, Allah arye el pil dona ati, anang kum wipdeibuk. Sik nyanyak yupu ara, nong kum kipnamle. Sikda, talye nang unyake. Sida, tilila nang uka. Sik bidamang kanye aniryuk nyanyake. Allah el si deice, ‘Winipnamle,’ nyace nang bukni, sik nyanyak yupu nong kum uplyopura, aning ara, Yahweh arye dipkoprob kum dopdeipsuk ati, ato nang ati ara, ‘Mambule,’ kum tenenamlulume. ‘Allah arye nyalye yupu kum nyanyake. Sik dem aryuk nyanyake,’ tenenamlulume. Ato nang ara, oplopnamlulume. Allah arye nyapnuke. Musa birye Israel ninye ati, nyabuk.