Ulangan 16 - Eipomek

Weik kaplina yuna ati, nyabuk yupu

¹ Musa birye Israel nang ati, nyabuk. Abib wala dam akunum uplyopura, awala noutam arye, anggun ni koproba Allah Yahweh, el si erebuka kina ati, weik kaplina yuna kwalinamlume. Aning wininamluma deiyok ara, ani. Ara, minop talak awala deice ara, lukunyan kibuk talak noutam ara, Allah elce anggun Israel nang ti, Mesir mutuku ulamlumba, anggun min yuma mapu kum obuk bukni, Mesir mutuku noutam arye lyebukabsukce, anggun Kanaan mutuku yangana ati boyanamsuke. Ati ara, awala noutam ara, weik kaplina kwalinamlume.

² Allah arye, ‘Na si erena ati ara, asukumuk na si deipnamna anya arye, anggunda asukumuk, na si erenamnulume,’ teneplirye, kintinip deipnamsil mutuku ara, asukumuk binuka, kwalinamlume. Amutuku uk, bimunyopura, anggun adiparyuk Allah si erena ati, anggunce kambing basam do, domba basam do, sapi basam do, tonok-tonok bobimunce, obuka Kaplina Kwalina kwalinamlume. Ara, ‘Nunda Allah elce Mesir mutuku noutam lukunyan noutam, nunti lyebuka boyanamsuke,’ tenepmunce, Kaplin Kwalina ati, kwalipmunce, Allah el tibuk si erebuka kinamlume.

³ Kaplina Kwalina ati, kwalin ning din sum ara, domba basam winiryuk obuka, el tup dinamlum talak ara, anggunce nena kum roti kwaninguk dinamlume. Ara, like tekbarye sum noutam nirya ara, anena kum roti kwaning ap, adomba mi tup ap, aninguk dinamlume. Aning dinamluma ara, anggun min talak, Mesir mutuku ulamluma ani, “Se, nunda, ikin weik ulamupu buk, Allah lyepsukce, bicoto ubuka yanamupu,’ tenepmunce, anena kum roti kwaning dobuka dinamlume. Wini talak arye dipdongobuka, doyanamle talak noutam, anggun kam unamlum keting tamun nirya ara, Kaplina Kwalin ning dinamluma deice arye, anggun Mesir mutuku ikin weik ulamlum ning ara, luba kina kumce, tuba-tuba pia ati teninauk unamlume. Ara, ‘Kanye imun ulamsukba, ikin kanye bobuka ulamupu,’ tenena ati, adin dinamlume.

⁴ Kaplina Kwalina dinamlum talak noutam ara, tonok sum arye dipdongobuka, like tekbarye kipnamle sum nirya ara, dan mutuku do nirya, anggun unamlum mutuku noutam arye tonoknye babye, roti nen ning, el si ragi ton, anggun aik pia kum deilinamnyake. Tonda, Kaplina Kwalina minop deiyok koupmunye, lukunyan aryuk anggun opmanumye ining ara, atup asum lukunyan aryuk dipmunce, sirya dakanamlume. ‘Mitik tonun ton bokuka, ‘Naʼ tenen, deipmabirye, mapmapya bereklyopura, ambusum beren tam dipnamabe,’ tenena pia kume. Alukunyan noutamuk, atup nirya dipmunce, sirya dakanamlume.

^5-6 Tonda, anggun weilamlum ning Kaplina Kwalina ati kwalibuka dina ati, boyanmamunye ning ara, anggun ni koproba Allah Yahweh, elce, ‘Asukum aryuk, aning obuka dinamnyake,’ nyapdeiamlyakuk, yanuka opmunce, dinamlume. Bukni, kum nyapdeiamlyak arye, atup boyanuka, kum dinamlume. Ara, anggun unamluma ati, arepsuk mutuku noutam bukni, anggun asik doamlumak nirya arye, aning kum dinamlume. Aning winina ara, Allah Yahweh arye, “Asukumuk na si deipnamna anya arye, asukumuk Kaplina Kwalina ning boyanganamake,” nyapdeiamlyakuk, akam ning onamlulume. Tonda, keting kumuplye talak aryuk, akam ning onamlulume. Ara, anggun Mesir mutuku ulamlum ani, batakuka yanamlum talak, aketing uplyeura, Kaplina Kwalina ati dinamlum kam ning babye, onamlulume.

⁷ Atup ning nirya, makau yupmunyopura, anggun ni koproba Allah Yahweh, elce wipdeibukce, kintinip deibukak, bobimunce yanuka dinamlume. Winibuka dinmamunya ani, inipmalya ani, bereklyeura, asum kiplyopura, anggun adiparyuk, anggun aik yuk-yuk tamubuka binamlume.

⁸ Naku barye sum tuba aupmalye talak nirya ara, nena kum roti kwaning dinamlume. Ara, tekbarye sum, minop deiyok kina sum winipmamunya atonun, wininamlume. Ara, nena kum roti kwaninguk dinamlume. Winipnin balamunya ani, sirya tekbarye sum akunum uplyopura, anggun nirya bulubuka wekmunce, Allah el si erenamlume. Atekbarye sum ara, anggunce yuk talye pil ton, kum donamlume. Allah el si erena ati, dikdik senauk wininamlume.

Wa wiamne ning, lipne talak kwalina ati, nyabuk yupu

⁹ Ura, anggun gandum wa wibuka kuamunya ani, akunum wisiplyopura, binuka minop yupmamunce, sekuka lipnamunye sum, asum arye deiyok koupmunce, tekbarye minggu nuknin balamunya ani, tekbarye kiplye minggu, akunum uplyopura, akunuma.

¹⁰ Tek barye minggu akunum nukdemunyeba, tekbarye akunum uplyopura, gandum winiryuk dakna ati, kwalin ning kwalipmunce, anggun ni koproba Allah Yahweh ati, ‘Telebe,’ nyabuka, elti, kibuka si erenamlulume. Allah si erepmunye sumuk, Allah arena ati, anggun kanye aryuk, ‘Aning ara arepnamabe,’ tenyamunce, kintinip deipmunye ning ara, boyamunce, arenamlume. Ara, Allah Yahweh, elce anggunti, teleb ubuka areamsilya atonun winibuka, weik tonun arenamlume.

¹¹ Ati, anggun ni koproba Allah Yahweh arye, elce kintinip deiamlyakuk, pia teleb kanye deibuka umunce, aning dinamlume. Ara, anggun ap, anggun mapu ap, anggun kilmapu ap, anggun pil don nang ap, kilapu ap, tonda anggun asik noutam unamak Lewi yala nang ap, yuk mutuku arye tikilyangan ninye asik nang ap, tonda yuwak kilapu ap, sik nin ap, sik ni ap akunum dibikba, batakik mapu ap, kwangnamne nang ap, anggun nirya ara, teleb kanye uk bobuka ulamunce, kil-kil asa arye neika unamlume.

¹² Apil donamlum talak nirya ara, luba kum kinamlulume. Tonok ning ara, anggun Mesir mutuku noutam ulamlum talak ara, ikin pil dilamsikba, dolamlumce, ikin weik ulamlum ning ara, luba kina meme. Tupa tenenamlulume. Tonda, narye anggun nirya ati, ‘Aning ara, wininamlume. Aning ara, pia kum wininamlume,’ nyapdeipsise yupu nirya ara, moubuka talipmunce, wininamlume. Musa birye, sik Israel ninye ati, nyabuk.

Yambul yo arye Bai Tam Aik Kwalina sum ati, kwalina din sum ati, nyabuk yupu

¹³ Musa birye, sik Israel ninye ati, nyabuk. Gandum duk wina ati, tekin ning arye teikuka, duk wina ap, tonda anggur duk teikmunce, anggur mek purubuka delina ap ati, apil akunum winimunyopura, anggun adiparyuk yo bata arye, tia ati bai tam asik, bai tam domunce, aning ati Bai Aik Kwalina, kwalinamlume. Ara, like tekbarye (7) sum noutam nirya ara, ayo bata arye donamlum bar asik pum tam mapmunce, akwalya ton kwalinamlume.

¹⁴ Akwalya kwalibuka dinamlum talak nirya ara, anggun ap, anggun mapu ap, anggun kilmapu ap, anggun pil don nang ap, pil don kilapu ap, tonda anggun asik noutam unamak Lewi yala nang ap, yuk mutuku arye tikilyangan ninye ap, tonda yuwak kilapu ap, sik nin ap, sik ni ap akunum dibikba, kwaknamne mapu ap, kwangnamne nang ap, anggun nirya arye, teleb kanye uk bobuka ulamunce, kil-kil asa arye, neika unamlume. Anggun nirya arye, neika akwalina kwalibuka dinamlume.

¹⁵ Tonda, like tekbarye sum nirya ara, akwalina kwalibuka dipmunce, anggun ni koproba Allah Yahweh atibuk kibuka, si erenamlulume. Ara, talye sukum arye kum wininamlum bukni, Allah elce kintinip deipnamlakuk, asukumuk yambul Bai Aik Kwalina, akwalina kwalibuka dinamlume. Winipmunyopura, anggun ni koproba Allah Yahweh, elcuk, anggun wa wibuka koupnamlum ning babye, anggunce pil donamlum ning ayala-ayala nirya babye, pia teleb kipdeipsiliba, nong weik tonun arenamsile. Winipsilyopura, anggun nirya arye kanye deipmunce, el tibuk arenamlumce, el siuk erenamlulume.

¹⁶ Tonda, sik Israel nang nirya ara, Allah Yahweh ati, si erebuka kinamnyake. Ara, Allah elce, ‘Aning ara, wininamakeʼ tenen, kintinip deiamlyakuk, tonok keting tamun noutam bukni, like winilye deice arye, sik Israel nang nirya ara, keting tamun 20 tahun deice, akunum nemik nang, bulubuka yakirye, el si erepnamnyake. Allah el si erena ati, bulupnamak talak ara, ani. Ara, Kaplin Kwalina Kwalin talak ap, wa wibuka kouamikce ning nirya ati, kwalya kwalipnamak talak ap, tonda yo arye bai tam aik dobikirye, Bai Aik Kwalya kwalinamak talak ap, aning like winilye deice arye bulubikirye, Allah el si erenamnyake. Atalak ara, amutuku unyak nang nirya ara, talye ati kum yangnamak bukni, Allah ati aren ning ara, yuk-yuk boyanuka arelyanganamake.

¹⁷ Abobuka arelyanganamak ning ara, Allah elce, sik yuk-yuk ati, teleb kipdeibukce, aning-aning weik tonun tabakuka areamuk touk ubuka, teleb arin ning boyanganamnyake. Musa birye, sik Israel nang ati, nyabuk.

Pia teleb koprop una ati ara, ninye yupu bokolina deiyok nang wipnamika ati, nyabuk yupu

¹⁸ Sik Israel yala ninye nirya ati, ‘Sik amutuku noutam unamakʼ tenen, Allah arye arepsukba, asik dobuka ululum mutuku nirya ara, aululuma atonun, anyasik noutam arye, anggun yupu lipsisikuka bokolina deiyok nang ton, yuk-yuk wipdeipnamlume. Tonda, Israel nang, anggun unamlum noutam arye, malye upmunyeba, adeiyok nang arye, ayupu kekebikirye, lipsisikuka bokolina pia teleb dipkoprob yupu nyapsikirye, tamubuka tonap teleb kipdeipnamsiyake. Ati, ‘Ninye yupu lipsisikuka bokolina deiyok nang melibuka yupu bokolinamakʼ tenen, adeiyok nang ton wipdeipnamlume.

¹⁹ Anggun awipdeipnamlum nang arye, ‘Aning ara dipkoprob malye ninge. Aning ara, dipkoprob teleb ning,’ tenebikirye, yupu bokeipnamsiyake. Anggunce, ‘Anye na kwit ulula anya arye, dauaplye,’ kum tenenamake. Sik kanye aryuk, ‘Aning ara, winipnamabe,’ tenebikce touk, ubuka yupu lipsisikuka kum bokeipnamsiyake. Tonda, ‘Tonye bitibuk, ikin ning kum deipnuyabeʼ tenen, elce uang areplyopura, elce malye winibuk ning, lubuka, namin kum kipnamake. Tonda, malye ning arebice ning ara, kum dolonamnyake. Deiyok ara, amalye ning arepmacopura, kel weik bikilirye, dipkoprob teleb winin ninguk wililamlanye babye, tamubuka malye ninguk wininamle. Malye ning ati, kum winilule. Teleb winin ning ati, wenelula anya arye, asing kum nang atonun unyake. Adeice arye, malye pil donyake. Dipkoprop ning ton, kum pil donyake. Ati ara, malye ning dopropmanto nang ara, kum wipdeipnamlume.

²⁰ Anggunce atalak-atalak nirya ara, adiparyuk pia dipkoprob telebuk unamlume. Ninye yupu bokolin talak ara, yata ning do nirya, sikce winilamak touk, kekepmunce, yupu lipsisikuka bokolinamlume. Ton tam nang ati, ‘Na kwitʼ tenen, ‘Teleb kipdeipnuyabe,’ tenena bukni, ton tam nang ati ara, ‘Nun lik anya arye, ikin ninguk arepnamabe,’ tenena kume. Anggun yupu kekepmunce, dipkoprob ubuka yupu bokolinamlume. Wipmunyopura, Allah arye anggunti, arepsuk mutuku noutam binuka unamlum talak ara, keting tamun weik tonun ton, lo arepsiliba, keting tamun weikto kam unamlume. Tonda, atalak noutam ara, Allah arye, ‘Arepnamsine,’ nyamsuk mutuku ara, dipkoprob dopropmunce, asukumuk talipmunce, teleb ubuka unamlume.

²¹ Tonda, anggunce anggun ni koproba Allah Yahweh, el si erenak ati, mesba dobuka kintinip deiplumak ara, yuk talye ning si erena ati, cang yo el si Asyera yo dobukapmunce memebuka, moupdeipmunce, amesba dam kum tikilinamlume. Aning ara, pia mem ning ati nyapne.

²² Tonda, talye yuk-yuk ning do, yuk mutuku nang arye, ‘Aning ara, nun ni koproba allah,’ tenelamak ning ara, aning si erena ati, ayukumna yo ton kum ikinamlume. Deiyok ara, anggun ni koproba Allah Yahweh, elda atonun ning si erena ati ara, ‘Na like. Aning ara, na pia like,’ tenelule. Musa birye, sik Israel nang ati, nyabuk.