Ulangan 15 - Eipomek

Keting tamun tekbarye ning, kiplye talak winina ati, nyabuk yupu

¹ Atalak-atalak nirya ara, keting tamun tekbarye (7) akunum uplyopura, anggun kayapu arye, anggun teleb ning tia ati, morobikiba, areamunye ning nirya ara, ‘Aning ara, tamubuka arepnamsulume,’ nyamunye ning ara, adiparyuk batakanamlume. Ara, anggun kayapu nang ati, ‘Kume, na teleb ning, tia ati dopromlum ning ara, dauaplye. Aning ara, ance nati, tamubuka kum arepnamnilyame. Ancuk urdem dopropnamlyame,’ nyapnamlume. Adeice arye, anggun kayapu nang, sik teleb ning dopromlum ning ara, moubuka teleb kilinamlume.

² Aning winina ati ara, winibuka wininamlume. Anggun Israel nang nirya arye, anggun kayapu yuk Israel nang arye do, anggun dam unyak nang arye do, anang arye anggun teleb ning do, anggun uang do, tia ati morobikba, akunum tia ati areamlum ning ara, moubuka teleb kilinamlume. Ara, sikce anggun ning, tia dopromik nang ati, nyapnamlume. “Kume, anggunce dopromlum ning ara, ‘Tamubuka arepnamne,’ tenena kume. Aning nirya ara, dauaplye. Tia ati dopromlum ning ara, angguncuk dopropmunce, pia ati talinamlume. Nun ti tamubuka arena kume.” Winibuka nyapmunyopura, aning nirya moupdopmunce, teleb kibuka delinamlume. Deiyok ara, Allah Yahweh arye, “Na tenen nang ara, anggun kayapu nang arye, tia ati morolamik ning ara, moubikirye, telebuk kipdeipnamake. Tuba tamubuka kum dolonamake,” nyabuka, akunum nyapdeiamsuke. Ati, anggun ning, tia ati dopromik nang ati, ‘Tonap tamubukapmunce, arepnilyame,’ nyabuka, kum moropnamlume.

³ Ati ara, anggun Israel nang, sik yuk Israel nang ati ara, sik tia ati moryamikirye, domice ning ara, tamubuka dolona kume. Bukni, yuk mutuku nang, ninye asik nang arye, anggun Israel nang uang do, yuk teleb ning do, ton tia ati areamlum ning ara, anang ati, ‘Tamubuka arepnamsulume,’ nyabuka, moropnamlume. Bukni, anggun Israel nang aryuk, tia dopropmekce ning ara, ‘Adibaryuk tamubuka arepnilyame,’ nyabuka, kum moropnamlume. ‘Aning nirya, malye, dauaplye,’ tenepmunce, batakanamlume.

⁴ Tonda, Allah el kanye ara, ‘Sik Israel nang unamak sukum ara, pia bona talina kum nang ara, kum unamnyake,’ tenelule. Deiyok ara, anggun ni koproba Allah Yahweh arye, anggunti, pia teleb kipdeipnamsile. Ara, anggun patan ning ayala-ayala nirya, weik tonun arenamsile. Elcuk anggun Israel nang ati, teleb kilinamsile. Winipsiliba, amutuku noutam ara, pia teleb kibuka unamluma anya arye, sik bona kum talinamak nang ara, angguncuk talelulum ning arye bokuka, bona utotoa kum nang melina ati, talye arenamlume. Awininamlum deice arye, anggun Israel yala nang unamlum mutuku noutam ara, pia bona utotoa kum nang ton, pia kum unamnyake.

⁵ Ati ara, arup na Musa birye, anggun dam, ‘Aning-aning wininamlume,’ nyapdeipsin yupu ara, moubuka bikmunce, aninguk talibuka winimunyopura, tonda anggun ni koproba Allah Yahweh, el tibuk, talipmunyopura, elce anggunti, pia teleb kipdeipsiliba, pia teleb kibuka unamlume.

⁶ Aning nyapmasin touk, akunum winimunyopura, anggun ni koproba Allah Yahweh arye, anggunti, nyalin yupu deice arye, ‘Winibuka arenamsine. Pia teleb kipdeipnamsine,’ nyapdeiamsuk touk ubuka arenamsile. Winipsiliba, anggunce, yuk pera mutuku unamak nang nirya ati ara, teleb ning ap, dekna weik ning ap, uang ap, tia ati areamunya ani, aminyan talak ara, sik anang arye tamubuka arepnamsiyake. Bukni, anggun Israel nang arye, yuk mutuku nang, anggun uang do, anggun yuk teleb ning do, aning ati, ‘Se, tia arepmasumunya ani, aminyan talak tamubuka arepnamsiyabe,’ nyabuka, kum moropnamlume. Tonda kum dopropnamlume. Tonda, anggunce yuk mutuku nang unyak mutuku ap, amutuku noutam unamak nang ap ati, ninye deiyok nang kibuka, talinamlume. Bukni, yuk mutuku nang arye tamubuka, anggun Israel nang ati, ninye deiyok nang kibuka, kum talinamsiyake.

⁷ Tonda, anggun ni koproba Allah Yahweh arye, anggunti arepmasil mutuku, binuka unamlum talak ara, anggun amutuku ulamlum nang, anggun kwit tonok ton, bona utotoa talina kum diparyuk ulamlyopura, anggun adiparyuk, el anye biti, anggun talilamunye ning noutam bokuka, elti, arenamlume. Anggunce, ‘Nun talinyap ning ara, bokuka kum arepnamabe,’ tenepmunce, kanye pum tam ‘Na lik,’ tenena kume. Anggun adiparyuk bokuka, bona utotoa kum nang ati, melibuka arenamlume.

⁸ Bukni, anggun kanye pum tam lamapdongobukamunce, anggun kwit el patanmalye touk ubuka, anggunce tia arepnamamunye ning ara, yata wiribuka do, el anye pataplye touk, el melina ati, anggun ning bokukapmunce, dobuka arenamlume.

⁹ Tonda, anggunce, ‘Aning ara, kum arepnamabe,’ tenebuka batakmunce, tamubuka el anye biti, tilila yupu deice arye, ‘Kume, tia dopropmince ning, dekelina ati, keting tamun tekbarye ara, nunce tia ati arepmapye ning, dekelina bataknamap keting tamun, akunum dam kipmala ati, anggun patapmasil ning ara, kum arepnamkiyabe,’ kum nyapnamlume. Atonun, malye kanye teninmalum ning ara, batakmunyeba, adiparyuk anggun kanye pum tam kum wekenamsile. Anggunce, anggun kayapu bona utotoa kum nang ati, dobuka kum arepmamunyeba, el ikin upliba, anye birye anggun ni Allah ati, ‘Se, na patanmanuba, na kwit biti moropmanu ning ara, kum arepmanile,’ nyabuka, Allah moroplyopura, anggun dam malye kilinamsile.

¹⁰ Aning kum wininamlum bukni, el anye pataplye touk, elti, weik tonun arenamlume. Anggun kanye teniltona kumce, kanye teleb deice aryuk, weik tonun arepnamlume. Deiyok ara, anggunce yuk talye bona utotoa kum nang ati, arepmunyopura, anggun ni Allah Yahweh arye, anggunti, anggun donamlum pil ayala-ayala nirya ap, tonda anggunce, ‘Winitibyeʼ tenen, piripnamlum ning nirya ap ara, tabakuka, weik tonun arenamsile.

¹¹ Ayupu nirya ara, talye ati kum nyapsine. Deiyok ara, ani. Anggun Israel nang unamlum mutuku noutam nirya ara, bona utotoa kum nang ton unamake. Aning-aning nirya kum talinyak nang ton, anggun mutuku noutam aunamake. Ati ara, bona utotoa kum nang, anggun unamlum mutuku noutam pia aunamaka anya arye, narye anggunti, anyapdeipsin yupu ara, anggun adiparyuk talipmunce, anggun kayapu nang ati, kanye darapdongobuka, anggun ning arye bokuka, bona utotoa kum nang ap, aning-aning patan nang ap ati, arenamlume,’ nyapdeiamsise. Musa birye, sik Israel nang ati, nyabuk.

Pil dona ati, uang deice arye dekuka, delin nang ati, nyabuk yupu

¹² Musa birye, sik Israel nang ati, nyabuk. Winipmanto ara, anggun mamun Israel nang bukni, sal do, kilapu do, anggun pil dona ati, uang deice arye dekamunye bira, anggun asik pil dona ara, keting tamun nakub baryeuk (6) pil donamsil bukni, keting tamun tekbarye (7) ning akunum uplyopura, talye dem batakmunyeba, apil donanye bira, talye unamlule. Anye bira, pia kum talinamlume.

¹³ Tonda, apil melin ati dekuka boyanamunyeba, pil dolamlya ani, keting tamun tekbarye batakmunyeba, bindopnulyopura, talye dem batakmunyeba, taruk bananguk kum binamlule.

¹⁴ Aning kum bukni, anggun kanye teleb deice aryuk, anggun talimunye ning ton bokuka, bona talina kumnye biti arenamlume. Ara, anggun domba basam ap, kambing basam ap, gandum duk do, tonda anggur duk teikmunce, anggur mek kwenamlum ning do, anggun dam aupmasilye ning ara, el tibuk boyanuka arenamlume. Ara, Allah Yahweh arye, anggunti weik tonun yamubuka aresilye ning, anggun dam awapsilye touk dobuka, anggun pil donanye biti arenamlume.

¹⁵ Tonda, aning ton tuba teninamlume. Min talak ara, anggun Mesir mutuku noutam ulamlum talak, ikin weik ulamsuk ning ton, moubuka tenenamlume. Ara, anggun Mesir mutuku noutam ulamlum talak ara, ikin weik pil dilamsikba, imun kanye bolamlume. Winilamluma ani, anggun ni koproba Allah Yahweh arye, lyebuka boyanamsuke. Ati, Mesir nang arye, anggunti winilamsika atonun, anggun babye, anggun pil melin nang ati, kum wininamlume. Anggun talye pil don nang ara, tekbarye keting tamun uplyopura, anang batakmunyeba, talye binamake. ‘Winibuka unamlume,’ nyabuka, arup arye ayupu kunum nyapsine.

¹⁶ Bukni, el apil melinanye birye, ‘Kume, na kum binamane,’ nyaplirye, anggunti kanye deipsilirye, ‘Anggun ap neika unamabe,’ nyaplyeura, teleb uka.

¹⁷ Angguncuk el anye bobinuka, anggun ulamlum asik bublan dam bobimunce, bisik botolamak ning arye, el amul potoknamlume. Winipmunyeba, el anye bira pia ati, anggun aik pil melibuka donanye unamlule. Aning atonun, anggun aik pil melin kil arye, aninguk nyaplye babye, el amul potokmunyaba, anggun aik pia pil melibuka don kil unamlule.

¹⁸ Winipmanto ara, anggunce uang deice dekamlumba, pil melin nang, apil melibuka dolamsilya ani, keting tamun nakub barye (6) noutam batakmunyeba, bilyopura, anggunce, ‘Se, yata ning deiyok ati batakab ati binul do? Dekna weik ning deice arye, anye dekamupu bukni, winira talye binamale,’ kum tenenamlume. Ara, keting tamun nakub barye nirya ara, anggun piluk, talye melibuka dolamsilya atia. Tonda, winipmanto anggun asik, tia ati melibuka pil donmasiliba, dekna arenamlum ning ara, weik tonun arelamlum atonun, pil kum donamsulule. El anye bira, el dekmunye talak arye dipdongobuka, pil talye dem dolamlya ani, keting tamun nakub barye deice arye, uang ton elti, kum arenamlume. Ati, el anye bira, talye batakmunyeba binamlule. Na Musa birye, anggunti nyapmasin yupu ara, moubuka talipmunce, winimunyopura, anggun ni koproba Allah Yahweh, elce anggun dam ulirye, anggun winipnin banamlum ning nirya, teleb kipdeipsiliba, weik tonun dolonamlume. Musa birye, Israel nang ati, nyabuk.

Anggun weilamlum ning arye, min yuma deipmalye ning winin ati, nyabuk yupu

¹⁹ Musa birye, sik Israel nang ati nyabuk. Sapi basam mi ap, kambing basam mi ap, tonda domba basam mi ap nirya ara, yim winiryuk min deipmalye ning ara, anggunce bobukamunce, Allah Yahweh el si erena ati, arelyanganamlume. Abobuka arelyanumunye, sapi basam ara, anggun wa tuku palina ati pil dolamunye ning ara, kum arelyanganamlume. Sapi mi pil dona kum ning, winiryuk nepmalye ninguk, boyanganamlume. Tonda, domba basam babye, potong kum kopmamunye ninguk, Allah el arepnamamunye ati boyanuka arelyanganamlume.

²⁰ Aketing tamun, aketing tamun nirya ara, anggun min yuma ning ayala-ayala nirya, adiparyuk Allah Yahweh el damuk arelyamunce, sapi basam tup bokuka tuba aupmalye ning ara, anggun ap, anggun mapu silip ap arye, aning neika dinamlume. Ara, anggun ni koproba Allah Yahweh arye, ‘Na si erebuka kina ap, na si erena ap arena ati ara, asukumuk atup ning arelyanganamnulume. Tonda atup ning dina ati ara, asukumuk dinamlume,’ nyabuka kintinip deiamnyak uk, yamunce dinamlume.

²¹ Bukni, anggun ni Allah Yahweh ati arenamlum sapi ato ning, min yuma deipmalye ning babye, nong malye wamlye ning ara arelbana pia kume. Ara, bol malye wamlye ning ap, yan kwanyamlye ning ap, asing kuamlye ning ap, tonda nong deice malye ning mitika nun wamlye ning nirya ara, Allah ati kum boyanuka arelyanganamlume.

²² Sik ninye ara, malye ning pia kum talilamikirye, dipkoprob telebuk ulamak nang babye, tonda malye ning bol pipmakiba, Allah arye, ‘Anang ara na dam kum yatinge,’ nyalamle nang babye, anggun domunye asik noutam tuba aunmamunye talak ara, rusa basam do, kijang basam do, obikirye aning tup talye dinamnyake. Aning atonun, abasam bitinye talye mangkau asa dilamluma atonun, anggun weilulum domba ato ning winiryuk deiplye ning ara, bol malye ulamle ning ap, asing malye ulamle ning ap ara, opmunce, talye mangkau asa dinamlume. Bukni, adomba ato ning tup ara, Allah ati kum arenamlume.

²³ Bukni, sapi basam ato ning opmamunye ning el ining ara talye kum dinamlume. Aning kum bukni, aning opmunye talak ara, el ining ara dobukapmunce, tuku deice diklopmunyeba, talye mek dikiltakalamlum atonun ubuka, batakanamlume. Aning ara el ining kum dinamlume. Musa birye Israel nang ati nyabuk.