Ulangan 14 - Eipomek

“Dibice nang ati, ‘Seʼ tenepmunce, aning kum wininamlume,” nyabuk yupu

¹ Musa birye, sik Israel nang ati, nyabuk. “Anggunce el si erelulum Allah Yahweh ara, elce wipdeiamsukce, el ‘Naʼ tenen, nang, el mapu koproba kipdeiamsuke. Allah mapu ululuma anya arye, ninye dipmalinye biti, ‘Se nun kwit dipmala anya arye, mambul kirikuka bouku peipnuyapʼ tenen, engepmunce, anggun nong bol deice dila dolana kume. Tonda, anggun asok dam potong kobuka, dilo kukuna kume. Ara, Allah el si kum biklamak nang arye, winilamaka atonun, kum wininamlume.

² Anggunda, Allah Yahweh arye, anggun wipdeiamsukce, el ‘Naʼ tenen, nang kipdeiamsukba, ululuma anya arye, Allah el mapu koproba ululume. Tukwak nang mutuku-mutuku nirya, aunyak kan-kan arye, ‘Anggunda, na mapu koproba unamakʼ tenen, akunum wibuka kintinip deipsuk nang ululume. Ati elce anggunti, ‘Anggunda mambul weik nang. Yuk nang nirya ara, mitik teleb unyak bukni, Israel nang ara, pia telebuk akunum wipdeipsine,’ tenesulule.” Musa birye, sik Israel nang ati nyabuk.

Allah arye ninye arye weinyak ning ati, “Aning ara, kum dinamlume, aning ara, dinamlume,” nyapdeiamuk yupu

³ Musa birye, sik Israel nang ati, nyabuk. Allah arye, ‘Ayala kam ulamle ning ara, na lik anya arye, aning nirya ara, malye ning ululule,’ tenenuna anya arye, ‘Anggun Israel nang arye, ayala ning ton dobuka dina meme,’ nyabuk ning ara, pia kum dinamlume.

⁴ Bukni, anggunce obuka dinamlum domba basam ato ning ara, ani. Ara, yan dumbarye ulamle ning ara, ani. Sapi basam ap, domba basam ap, kambing basam ap, aning nirya obuka dinamlume.

⁵ Tonda, rusa basam yala nirya ap, bura domba basam ap, bura kambing ap, kijang ap weik mutuku dup dam unyak domba basam ap ara, aning nirya obuka dinamlume. Ayala ning ara, teleb ning ati, ur obuka dinamlume.

⁶ Kam ulul yala ning nirya, ara, yan dumbarye ulirye, yan kala kwa lekelul ning ap, tonda anggun dina ara, akunum si deice arye dibikcopura, daunmakca ani, aminyan talak tuba tonap adin ning, sik mun pum arye dukikiba, tuba tonap dinyake. Akam un ning yala ara, anggunce obuka, dina teleb uka. Ayala kam ulul ning ara, anggunce obuka dinamlume.

⁷ Tonda, anggunce kum dinamlum kam ning yala ara, ani. Ara, yan kala kum kwa lekelul ning bukni, sik si arye, dina lakuka kum dinyak yala ning ara, kum dinamlume. Sik ayala ning ara, sik dina ara, akunum si deice arye dibikcopura, daunmakca ani, aminyan talak tuba tonap adin ning, sik mun pum arye duklopmakce ning, tonoap tuba dinyake. Ati, unta basam ap, kelinci ap, tonda mutuku dup dam keil kan-kan ulamle ning, el si marmot ap ara, Allah el kanye ara, ‘Aning ara, malye ning ululule,’ tenelula anya arye, aning ara obuka kum dinamlume. Ara, sik dina ara, si arye dobuka dinyak bukni, sik yan kala kum kwa lekelule. Adeice arye, aning ara, malye ning ulule.

⁸ Tonda basam koproba ara, kum dinamlume. Ara, Allah arye, ‘Aning ara, malye ning ululule,’ tenelula atia. Deiyok ara, aning ara, yan kala kwa lekelul bukni, sik dina ara, akunum si deice arye dibikcopura, daunmakca ani, aminyan talak tuba tonap adipmace ning, sik mun pum arye dukikiba, tonap tuba dinyake. Ati ara, basam koproba tup ara, kum dinamlume. Aning atonun tonda, basam koproba dipmalye ning, el bol kum talinamlume, ton kum bolpinamlume.

⁹ Mek pum ulamak yala ning nirya ara, anggunce dobuka dinamlum ning ara ani. Pul atonun ning beleplirye, tace ulul ikan yala-yala nirya ara, tomobuka dina telebe. Tonda, el bol deice nirya ara, karasa ulula atia. Anya arye, anggunce aning ara, tomopmunce, dobuka dinamlume.

¹⁰ Bukni, mek pum unyak ning yala nirya ara, pol atonun ning kum beleplirye, tace kum ulul ning ap, tonda bol deice ara, karasa kum ulye yala ning ap nirya ara, anggun tomopmunce, kum obuka dinamlume. Ara, Allah arye, ‘Aning ara, malye ning ululule,’ tenelula ati, aning ara, kum dinamlume.

¹¹ Maka yala-yala nirya aulul ning ara, weik tonun obuka diptum bukni, Allah arye, ‘Amaka yala ara, malye ululule,’ tenelul maka yala ara, kum obuka dinamlume. Malye una kum maka ara, anggunce obuka dinamlume.

^12-18 Bukni, anggunce kum obuka dinamlum maka yala nirya ara, nyapkusine. Ara ani. Ton ning ara, el si Rajawali ap, tonda burung Elang ap nyanyak maka ara, tonda amaka atonun yala-yala maka nirya ara, kum obuka dinamlume. Tonda, burung Nazar ap, Kout maka ap, Mul Damnye maka yala nirya ap, tonda Unta maka, el nong tuku bol pibuka balul maka ap, Sololong maka ap, tonda Gagak maka ap, Camar maka ap, Belekok maka ap, atonun maka yala ara, kum obuka dinamlume,” nyabuk.

¹⁹ Tonda, mitik tonun Serangka yala ning nirya, sik pol deice arye banyak bukni, tuku deice banyak ning nirya ara, anggunce kum dobuka dinamlume. Ara, malye un ning ulula atia.

²⁰ Bukni, mitik yala ning nirya, pol deice arye banyak ning bukni, tuku deice kum banyak ning yala nirya ara, malye kum unyaka ati, anggunce dobuka dinamlume. Aning ara, Allah arye, ‘Apol deice banyak ning ara, malye kum ululeʼ nyapdeiamsuk ning ara, anggunce dina teleb uka.

²¹ Tonda, yata yala ning do nirya, talye el yuk dipmalye ning ara, kum dobuka dinamlume. Bukni, talye el yuk dipmalye ning aupmalyopura, anggunce aning dobuka, anggun kan-kan yanuka unamak ninye asik nang ara, atonun upmalye ning ara, arepmunyeba, sik ninye asik nang ara, aning dobuka dina telebe. Akumopura, adipmalye ning ara, anggunce dobuka, anggun ap ulamlum ninye asik nang dam dekena ara, teleb uka. Anggunda Allah Yahweh arye, ‘Anang ara ‘Naʼ tenen, nang unamakeʼ tenen, akunum wepsukce, el mapu koproba kipdeipsuk nang anya arye, ato malye ning ara, kum dobuka dinamlume. Tonda, kil domba basam do, kil kambing basam do, sik moum yung dobuka, mek makau pum dikdongopmunyopura, abasam arye deipmakce mapu dobuka, kum yupnamlulume. Tonda kum dinamlume. Musa birye, sik Israel nang ati, nyabuk.

“Allah el si erena ati, anggun lipmamunye ning arye, bokukapmunce, winibuka-winibuka arelyanganamlum,” nyabuk yupu

²² Musa birye, sik Israel nang ati nyabuk. Ura, aketing tamun, aketing tamun nirya, anggunce wa wibuka koupnamlum ning, akunum wisiplyopura, yala ning ton deiplyopura, aning yala nirya arye, bokuka dopropmunce, adiparyuk bobuka, Allah el si erena ati, arelyanganamlume. Ara, wa wibuka kouamunyeba, tuku deice arye paplirye, nong unamle ning nirya ati nyapne.

²³ Anggun ni koproba Allah Yahweh arye, ‘Asukum ara, na si deipnamneʼ tenen, el si erena asik wipdeipnamlak ara, anyasik dam ara, el urasin damuk, elce kintinililyakuk, anggun nirya arye, Allah el aren ning noutam, bokuka boyanamlum ning nirya, asukumuk yanuka delinamlume. Ara gandum do, anggur mek do, minyak zaitun mek do, aning nirya noutam bokukapmunce, Allah ati arelyanganamlume. Tonda, sapi basam do, kambing basam do, domba basam do, ayala basam nirya ara, sik mi winiryuk min yuma deipnamle ning ara, anirya boyamunce, Allah ati arelyanganamlume. Aning nirya dina ati, Allah el arena ati, kintinip deipnamlumak ara, asukumuk yanuka dinamlume. Winipmunya deice arye, anggunce tuba-tuba teninamlume. Ara, ‘Se, nun ni koproba Allah Yahweh, elda weik mambulnyeʼ tenen, ilil upsiliba, el si erena ati, biknamlume.

²⁴ Winipmanto ara, anggun ni koproba Allah arye anggunti pia teleb kipdeipsiliba, anggun talelulum ning weik tonun arepsilyopura, arepnamlume. Allah arye, “Na si erena ati, na si asukumuk deipnamneʼ tenen, kintinp deipnamlak ara, asukumuk arelbanamlume. Bukni, anggun unamlum dam kum bukni, pia yukak kintinip deiplyopura, anggunce wa wibuka koulamlum ning ara, noutam bokuka dopropmunce, bobuka, ‘Allah ati arelbinamane,’ tenepmamunye bukni, pera mutuku bana ati ara, binmanto kum upsilyopura, teleb uka.

²⁵ Winipsilyopura, anggunce awa wibuka koulamlum ning nirya, tamubuka dopropmunce, yuk nang dolona ati, uanguk dekenamlume. Winibuka adekmunye ning ara, anggun adiparyuk auang dobuka koupdongopmunce, anggun taruk noutam arye talinamlume. Aminyan talak, anggun ni koproba Allah arye, ‘Asukum ton arepnutume,’ nyaplirye, kintinip deiamlyakuk, auang bobinuka, Allah el arena ati, amutuku uk, bobinamlume.

²⁶ Adekmunye uang ara, tuba tamubuka, anggun patapsilye ninguk dekenamlume. Ara, sapi basam do, domba basam do, kambing basam do, tonda anggur mek do, anggur mek yu ulamle ning do, anirya ara, auang arye dobuka dekmunce, anggun adiparyuk bobinuka, anggun ni Allah Yahweh, el dam bobimunyopura, anggun ap, anggun kilapu ap, mapu ap, anggun nirya dipmunce, kanye teleb arye unamlume.

²⁷ Tonda, anggun unamlum mutuku ap, asik dolamice noutam ara, sik Lewi yala nang kum lubakinamlume. Lewi yala nang ap, unamlume. Sik ayala nang ara, anggun yuk Israel yala nang unamlum atonun, sik Lewi yala nang babye, wa tuku talibuka, kum unamake. Ati ara, anggunce ayala nang ara, batakmunyeba, bona talin kumce, talye bona utotoa kum nanguk unamnyake. Anggunce anang ati tenepmunce, anggun ning noutam bokuka, sik Lewi yala nang ati arenamlume.

²⁸ Ati ara, aketing tamun, aketing tamun nirya, winilinye kiplya deice ara, anggunce Lewi yala nang arena ati, anggun wa wibuka koulamlum ning ara, noutam bokuka, anggun umunye mutuku bukni, anggun asik dolamlum noutam kintinilinamlume.

²⁹ Akintinip deipnamlum din nirya ara, Lewi yala nang arena ati, deipnamlume. Ara, Allah arye, sik Lewi yala nang ara, sik talibuka wa win tuku ton kum kintinibuka arepnamle. Ati, akintinip deipnamlum din, yala-yala nirya ara, anggun mutuku noutam unamak Lewi yala nang ap, yuk mutuku arye tikilyangan ninye asik nang ap, tonda yuwak kilapu ap, sik nin ap, el li ap akunum dibikba, kwaknan mapu ap, kilapu weiamikce nang ap ati, anggunce, ‘Naʼ tenen, delinamlum din ning, noutam bokuka anyapmasin nang ati arenamlume. Akintinip deipmamunyopura, sik anang yakirye, sik pataplye touk, yanuka doprobikirye, sik weik tonun dinamnyake. Anggun Israel nang arye, aning nirya winipmunyopura, anggun ni koproba Allah Yahweh arye, anggun pil donamlum ning nirya ara, telebuk kilinamsile.