Ulangan 13 - Eipomek

Min kum winibuk bukni, aminyan winipnamle ning ati, laka nyanamak bukni, tilila nang ati, nyabuk yupu

¹ Musa birye, Israel ninye ati nyabuk. Mambul yupu ton nyapnusine. Min kum winibuk bukni, aminyan winipnamle ning ati, laka nyan nang ton, anggun dam yakirye, nyapnamsiake. Yanamak bukni, sikda Allah arye dopdeibuk nang kume. Aning ara, tilila yupu nyan nang uka. Ati ara, aminyan winipnamle ning ati, laka nyan nang, nabi do, lengdar deice arye kel kibikirye, laka nyan nang do, yata nabi nang do nirya, moubuka tenepmunce, kalikinamlulume. Ara anang arye, ‘Sik dib tenepnamniyak’ tenen, ‘Ninye kum winipmanto ning, mambul ning kipnamaba,’ nyabikirye, aning dipkoprob winibikiba, ereipmunyopura, aupmalye babye, anang ati dib tenena meme. Mambul ning winiptinga babye, anang ara, tilila yupu nyan nang anya arye, anggun dib tenena meme.

² Atilila nang arye anggunti, ‘Ura, anggun min arye, kum kel kiamlum allah, yuk allah-allah si erebibirye, neika dobolbanamabe,’ nyapnamsiake. Nyapsikirye, ‘Dib tenepnamsiak’ tenen, ninye kum winipmanto ning winipdekiba, nong uptua babye, anang ati, anggunce dib kum tenenamlulume. Atilila nang ati, pia kum kekenamlulume.

³ Ayanuka tilila yupu nyanamak nabi nang do, lengdar mabikirye, laka nyanyak nang do, sik tilila nyabice yupu ati, dib tenebuka, pia kum kekenamlulume. Deiyok ara, ani. Anggun ni koproba Allah arye, ‘Na’ tenen ninye arye, nati, ‘Sik kanye talima ap, sik wininyak ning nirya ap adeice arye, nati diba tenebikirye, na siuk pia erenamniyak do, kum do? Sik kanye talima, na deiceuk delinyak do, kum do?’ tenen, asilenamsile. Allah arye winilenamsila ati, sik nabi nang do, lengdar deice arye, kel kibuka aminyan wininamle ning laka nyanyak nang do, anggun dam yacopura, dib tenena meme. Anggun ti nyapnamsiak yupu, pia kum kekenamlulume. Allah arye, anggun winilenamsila anya arye, anggun kanye ap, nong nirya ap moubuka unamlulume.

⁴ Tonda, anggun ni koproba Allah, el si Yahweh arye, nyasilye yupu nirya ap, Allah el nong koproba ap ati, dib tenebuka unamlulume. Eluk melibuka dobolbanamlulume. Allah ati, ‘Elda weik mambule’ tenen, el siuk erenamlulume. Allah arye, ‘Aning wininamlulume,’ nyabuka, nyasilye yupu moubuka kekenamlulume. El amu tam upmunce, el pil ati, pia donamlulume. El tibuk talibuka dobolbanamlume. Musa birye, Israel ninye ati nyabuk.

⁵ Musa birye nyabukce, ayupu ton nyabuk. “Aminyan winipnamle ning, laka nyanyak nang, nabi nang do, lengdar deice kel bikuka, laka nyanyak nang do, yuk talye ning si ati, ‘Nun ni koproba,’ nyabuka, ‘Aning si erenamabe,’ nyabice nang ara, anang tomopmunce, adiparyuk oplopnamlulume. Deiyok ara, ani. Anang arye, Allah kum tenebuk yupu, yanuka nyanyake. Sikce, ‘Anggun ni Allah Yahweh batakuka, yuk talye ning si erenamlulume,’ nyabuka, peterenyaka ati, “Anang ara, oltakanamlulume!” nyapsine. Tonda, Allah el si Yahweh arye, ‘Aning ara, wininamlulume. Aning ara, kum wininamlulume,’ nyapdeiamsuk yupu ati, ‘Anggun kekena kumce, yaniplopnamlume,’ nyabuka, malye yupu nyanyaka ati, anang tomopmunce, onamlulume! Ura, anggun kele, Mesir mutuku tuba ninye asik nang atonun ulalum talak, ikin pil weik anggun nong deice delilamsikba, ikin weik ubuka engelalum bukni, anggun ni koproba Allah, el si Yahweh arye, lobuka lyepsuk. Lyepsukce, ateleb mutuku boyasuka anya arye, elti, pia kum bataknamlulume. Sik malye nang arye, tilila nyapnamsiak nang oplopnamluma deice arye, anggun Israel ninye noutamak pia malye ning kum kibuka deipmunce, sirya dakmunyopura, sik malye nang si kiliplopnamlume.” Musa birye, Israel ninye ati nyabuk.

“Anggun aik neika ulamunye ninye arye, sikce, ‘Allah batakuka, yuk ning si erenamabe,’ nyabice ninye ara, adiparyuk opnamlulume,” nyabuk yupu

⁶ Musa birye Israel ninye ati, nyabuk. Arup nyapmasin touk, yupu ton nyapnusine. Ara, anggun weit koproba do, anggun du yapu koproba do, anggun kilapu do, anggun kanye talima delilalum nang do, anggun kwit capu koproba, tonok ulamlinye birye ap, anang arye, ‘Nun ap, nun apu yapu ap, kum kel bikamupu ning, yuk allah-allah si erenamabe,’ nyabikirye, duknubuka, tilila yupu nyapsicopura, anggun kekena pia meme. Aning atonun, anggun mapu do, anggun kilmapu do, anggunce dolulum kilapu do, anggun akanye yapu do, anggun kwit koproba do, yata nang do nirya, anggun kanye lamapdongobuka, ulamunyak yakirye, ayupu uk, yanuka nyapsikcopura, pia kum kekenamlulume.

⁷ Aning atonun, yata nang do nirya, yuk allah-allah si, anggun unamlum dam do, pera mutuku ululnye do, dan sukum do, tukwak mutuku yuk-yuk mutuku sirya ululnye arye do, yanuka, ‘Aning si erenamabe,’ nyapsikcopura, anggun pia kum kekenamlulume.

⁸ Amikip yupu nyanyak nang nirya ara, kekena meme. Tonda ‘Se, na kwit’ tenen, ‘Dauaplye, el yupu kekenamne’ tenena meme. Tonda, ‘Se, anye bira opnamaka anya arye, na ka koproba ulule. Ton ning ara, na weit koproba ulule. Tonda, na du koproba ulule,’ tenebuka, kum duknunamlulume. Tonda anang melina ati, tilila kum nyanamlulume. Anang ati, bico tenebuka, ‘Dauaplye’ tenen, kum bataknamlulume. Anang talye parapkabuka, opnamlulume.

⁹ Amalye yupu nyanyak nang melina meme. ‘Yuk ning si erenamabe,’ nyabuka, malye yupu talamak nang ara, adiparyuk oplopnamlulume. Anggun taruk arye, anye biti, adiparyuk minopce keil dobuka opmunce, deiyok koupmunyopura, yuk Israel ninye ap tabakuka, keil dobuka onamlulume.

¹⁰ Anggunce aninye ati, keil dobuka opnamlulume. Deiyok ara, sikce, ‘Allah batakuka, yuk talye ning si erebibirye, yuk bisik dobolbanamabe,’ nyabuka, ‘Tilila nyapsicak’ tenen nyapsine. Tonda minop talak, anggun Mesir mutuku ninye asik nang atonun ulamlumbuk, ikin pil anggun nong deice dililamsikba, imun kanye bobuka ulamlumbuk, anggun ni koproba Allah, el si Yahweh arye, lyebuka lopdeibsukce, boyanamsuke. Ati, anggun ni Yahweh ati, pia kum bataknamlulume. Amalye nang tonok ara, batakna kumce, sik nirya oplopnamlulume.

¹¹ Na akunum nyapmasin touk, dipkoprob winipmunyopura, anggun Israel ninye ati, yuk nang nirya arye, aning kekebikirye, ilil weik asa unamake. Winibicopura, sik malye wininyak ning, ‘Tonap kum wininamabe’ tenen, kel kibuka unamake. Musa birye, Israel ninye ati nyabuk.

¹² Tonda, winipmanto Allah arye, anggun una ati arepkukba, asik dobuka unamlum mutuku noutam arye, atonun yupu ton nyapmasinba, kekenamlumce, winibuka winipnamlume.

¹³ Ara, anggun unamlum mutuku noutam arye, ninye yata barye nang do, ton kutukuka tikikirye, tilila yupu nyabikirye, yukuprobikiba, anyasik dobuka ulamikce nang nirya, sik anang yupu kekebikirye, malye winin bisikuk melibuka dobolbanamake. Sik anang arye nyapnamak yupu ara, ani. “Anggun nirya, yangalulume. Yamunyopura, anggun si bikina kum allah, ‘El siuk neika erepnuyabe,’ nyabuka, yukupnamsiake. Tonda, sik anang nirya ara, ayupu kekepmace nang, ‘Sik anang nirya ara, dobolbinamake,’ nyabikiba, kekenamlame.

¹⁴ Nyabikiba, kekebikcopura, ‘Dan sukum arye aning ara wininamak do?’ tenen, moubuka dilbinulyame. Tonda amutuku ulamikce nang ati, moubuka asipdenulyame. Winipmince, anyapman ning, moubuka bikmince, ‘Aning ara, dipkoprob na unun mutuku noutam arye amalye winin ning ara, winipmakeʼ tenen, biknululume.

¹⁵ Bikmunyopura, anyasik dobuka ulamice nang nirya ap, sikce talibuka weilamak domba ato ning, ayala-yala nirya ap ara, adiparyuk obuka kum kilinamlume. Tonda, anyasik dobuka, ulamice nang nirya babye, obuka kum kilinamlume.

¹⁶ Amutuku noutam asik dobuka, ulamice nang, sik taleamice ning nirya ara, adiparyuk bulubuka, ninye nirya dinmacebuk, yanuka lak kibuka, bululinamlume. Aning nirya yamunce, bulubuka, tonok sukum deipmunyopura, sik amutuku asik dobuka, ulamice nang ap, sik talibuka ulamice ning nirya ap, anggun adiparyuk dobuka, Allah el si eren ati, aning nirya ara, uku dongopmunyeba, uku arye dibuka sirya daknamlule. Tonda, anyasik dolamicak ara, asik tamubuka kum donamlume. Batakmunyeura, asik oldemuk upnamlule.

¹⁷ Amalye ning nirya ara, anggunce ton, ‘Naʼ tenen bobinuka deipnuyabe,’ kum tenenamlum, bukni, aning nirya ara, adiparyuk kum kilinamlume. Winipmunyopura, Allah arye anggunti, yu upnamsil ning nirya ara, elce namin kipnamsile. Namin kipsilirye, tamubuka anggunti, Allah arye bico tenepnamsile. Elce anggunti bico uplyopura, anggun yala nang nirya ara, tonap tabakdeipsiliba, weik tonun upnin banamsile. Ara, Allah elce anggun apu yapu ati, ‘Wininamsine,’ nyapdeiamuk yupu atouk, winipnamsile.

¹⁸ Ara Allah Yahweh arye, anggunti, “Aning ara, wininamlume. Aning ara, pia kum wininamlume,” nyapdeiamsuk yupu uk, arup babye, narye anggun dam lak nyapsine. Ati, anggunce aninguk moubuka talipmunce, Allah el tenelye touk winimunyopura, anggun yala nang tabakuka, weik tonun upnin banamsile.” Musa birye nyabuk.