Ulangan 12 - Eipomek

Allah el si erena ati, arenamlumak ap, el si erenamlumak ap ara, tonokak, nyabuk yupu

¹ Musa birye, Israel ninye ati nyabuk. Anggun apu yapu ati, bico tenebuka meliamuk Allah ara, el si Yahweh arye, amutuku arepnamsile. Ateleb mutuku wekmunce, talibuka unamlum talak nirya ara, Allah arye, ‘Aning ara, wininamlulume. Aning ara, pia kum wininamlulume,’ nyabuka nyalilamuk yupu, anyapnusin yupu ara, moubuka kekepmunce, aninguk pia talibuka wininamlume.

² Ati, Allah arye anggun winiryuk arepnamsil mutuku binuka, wekmunyopura, amutuku noutamak unyak ninye, malye kibuka yaknamlulume. Amutuku unyak ninye arye, yuk talye ning ati, ‘Nun ni koproba’ tenen, Isa Mutuku Dongonye si erenyake. Isa si eren ati, si erenyakak ap, Isa Mutuku Dongonye si eren aik domice ning ara, anyasik-anyasik nirya, ulubuka uku dongopnamlume. Ara, talye ning ati, si erenyak sukum ara, mutuku dup ap, mutuku taram ap, weik yo tiklamle amu tam ap nirya ara, ulubuka daklopnamlulume.

³ Amutuku binuka wekmunye talak ara, amutuku unyak ninye arye, ‘Isa si erepnamap’ tenen, pala keil lelebuka yangapdeibikirye, kam ning obuka, Isa Mutuku Dongonye ati arinyak sukum ap, ‘Isa asukum ulul’ tenen, cang keil tikilinyak sukum ap, Isa Mutuku Dongonye kil, el si Asera, el si erena ati, cang yo ikilamice sukum ap, ninye urasin atonun puturubuka deibikce, si erenyak patung ap, aning-aning nirya daklopmunce, uku dongopmunyopura, amalye ning nirya sirya daknamlume. Amutuku ninye arye, talye ning ati, si erenyak ning nirya binuka obuka, sirya dakuka, sik si kiliplopmunce, kum daneipnamlulume.

⁴ Kanaan mutuku tam noutamak unyak ninye arye, talye ning ati si erenyak touk, anggun Israel ninye arye, anggun babye atonun winipmunyopura, anggun ni Allah, el si Yahweh ati, si kum erenamlulume.

⁵ Amutuku ninye winilamak touk kum bukni, anggun Israel ninye ara, Allah arye el si erenak ati, ‘Asukum binuka wekenamlulume,’ nyabuka, laka nyapnamsilak anyuk, amutuku uk binuka, el si erenamlulume. Allah arye, ‘Aunamnak anye’ tenyamukce, wibuka nyapnamsilak ara, amutuku unamle. Asukumuk anggunce binuka wekmunce, elti, kibuka, el si diamuk erenamlulume. Yuk ning ati si erena pia meme.

⁶ Allah arye, ‘Asukumuk na si erenamnulume,’ nyapnamsilakuk bimunyopura, elti, kibuka arenamlum ning aning-aning nirya, tonokak asukumuk deipmunce, el si erenamlulume. ‘Allah arye, nun malye ning namin kipsilirye, lyepnamsil’ tenen, arenamlum ning ara, yala yuk-yuk bukni, kam ning sapi do, kambing do, domba do dobuka opmunce, uku dongopmunba, uku dipnamle. Yuk ning ara, arenamlum bukni, uku kum dipnamle, aupnamle. Tonda, anggun wa linamlum ning ara, nirya bokuka, 10 deipmunce, tonok ning dobuka, Allah ati arepnamlulume. Ara, anggun ning noutam bokuka sepuluh persen (10%) dobuka, Allah ati arepnamlulume. Tonda, anggun babye, tuba tonap tamubuka, ‘Aning ton, na ni Allah ati arepnamne’ tenepmunce, kintinipmunyopura, Allah ati arepnamlulume. Tonda, anggunce, ‘Dipkoprop wininamne,’ nyabuka, nyalin yupu nyan talak arepnamlum ning ap, Allah ati arenamlulume. Tonda, anggun sapi basam ap, domba basam ap, mi yuma ning ara, Allah el si erena ati, anyaik noutamakuk, arenamlulume.

⁷ Allah arye, ‘Nara, asukumuk unamne. Amutuku uk, na si erenamnulume,’ nyabuka nuknamsil mutuku ara, anggun ap, anggun mapsilip nirya ap, kwalya kwalipmunce, anggun ni Allah ati, kipmunce dinamlulume. Winipmunye talak ara, kanye deibuka, pin-pin asa arye unamlulume. Deiyok ara, ‘Nun ni Allah arye melilamsukce areamsukba, nun pil dolamupa deice arye, aning-aning nirya aupmasile’ tenen, kanye deibuka, kwalya kwalibuka dinamlulume.” Musa birye Israel ninye ati, nyabuk.

⁸ Nyabukce, ayupu ton nyabuk. “Wini talak ara, nun amutuku yaburye, ‘Na ton winipnamne, na kwit ton, el babye yuk winipnamle’ tenen, nun bidamang yuk-yuk tenelamap touk unyabe. Bukni, omutuku binuka unamap talak ara, aunyab talak ara, nun bidamang kanye tenebuka wininyap touk, omutuku binuka, kum wininamabe.”

⁹ Allah arye winiryuk arepnamsil mutuku, pia unamap mutuku, anggun mal olan nang ati, olana kum diparyuk, dikdik senamlum mutuku, min kum wekmaluma ati nyapsine. Allah el si Yahweh arye, ‘Israel ninye ati, amutuku arepneba, talibuka unamak,’ tenyamsuk mutuku, min kum wekmaluma ati nyapsine. Amutuku wekuka umunce, kanye lamapdongobuka unamlum talak ara, Allah arye nyasilye ninguk, wininamlulume.

¹⁰ Bukni, anggun Yordan mek koubuka otam mutuku bimunyopura, Yordan mek otam ulul mutuku nirya ara, Allah el si Yahweh arye, amutuku nirya arepnamsile. Ara, Allah arye melipsilyopura, amutuku talibuka, pia unamlume. Amutuku wekuka unamlum talak ara, sik dana-dana tam unyak ninye, anggun mal olan nang ati, tuba kum tenenamlulume. Talye kanye bobuka umunce, dikdik sebuka, telebuk unamlulume. Ara, Allah arye melibuka talipsiliba, dakeiyam asa unamlume.

¹¹ Aning atonun winipmunyopura, Allah arye, ‘Amutuku unamne. Winipnyopura, amutuku uk, na si erenamniyake,’ tenyamuk mutuku, lak nyapsilyopura, asukumuk binuka umunce, Allah el si erena ati, el arin ning bobuka, elti, arepnamlulume. Arup arye nyapnusin ning nirya ara, amutuku uk, boyanamlulume. Boyamunyopura, anggun ni koproba Allah ati, arenamlulume. Ara, ‘Nun malye wininyap ning, Allah arye namin kipnamsil’ tenen, Allah ati arenamlum ning ara, ani. Ara, kam ulul ning sapi do, domba do dobuka opmunce, uku dongopmunba, uku dipnamle. Ton ning ara, aupnamle. Tonda, anggun wa linamlum ning ara, nirya bokuka, sepuluh persen (10%) deipmunce, tonok ning ara dobuka, Allah ati arepnamlulume. Ara, sepuluh persen mitik tonun ati nyapne. Tonda, anggun kanye koproba arye, ‘Aning ton, na ni Allah ati arepnamne,’ tenepmunce, kintinipnamlum ning ap, tonda Allah ati, ‘Dipkoprop wininamne ati, amambul ning dobuka Allah ati arenamne,’ nyabuka, nyalin yupu nyamlum ning ap, Allah atibuk arenamlume. Ara, aning-aning nirya ara, Allah el si erena ati, elce nyapnamsil mutuku, asukumuk arenamlume.

¹² Winipmunyopura, ‘Nun ni Allah ap, neika unyabe. Elda amutuku ulula anya arye, nun dam ulule’ tenen, anggun kanye pia teniltona kum arye, kanye deibuka unamlulume. Ara anggun ap, anggun mapu ap, anggun kilmapu ap, anggun melina kilapu ap, anggun melin nang ap, anggun aik dam unyak Lewi yala nang ap, neika kanye deibuka, Allah ati, si erenamlulume. Ura, anggun kele. Sik Lewi yala nang ara, Allah arye, sik talibuka unamak mutuku ton, pia kum areamuk. Anggun umunya noutamak, talye diamuk unamake anya arye, anggun ap, anang ap, neika kanye deibuka unamlulume. Musa birye Israel ninye ati, nyabuk.

¹³ Musa birye nyabukce, ayupu ton dukdongobuka nyabuk. Arup akunum nyapmasin yupu ara, moubuka teninauk unamlume. Ara, ‘Nun malye wininyap ning, namin kipnamsil’ tenen, anggun kam ning obuka, uku dongona ati, bobanamlum ning ara, anggun bidamang kanye arye tenepmunye sukumuk, arena meme. Ara, talye lo upliba, eipmunyakuk dipre bana meme.

¹⁴ Deiyok ara, Allah arye anggun Israel nang unamlum mutuku noutam bukni, tonok yala nang arye talipnamakak, elcuk wipdeipnamsilak uk, el arin ning bobimunce, elti, arenamlulume. Ati asum arye, ‘Allah ati aning arenamlume,’ nyabuka, peterepmasin ning nirya ara, Allah arye tenebuka, wiamuk sukumuk, delilbanamlulume. Talyak meme. Musa birye Israel ninye ati nyabuk.

Israel ninye dinamik ning ap, kum dinamik ning ap ati, nyabuk yupu

¹⁵ Musa birye, Israel ninye ati nyabuk. Ura, ‘Allah arye nun malye winina ning ati, namin kipsilirye, kum daneipnamsil’ tenen, el arena ati, arenamlumak ati, laka nyapmasin touk, wininamlulume. Bukni, Allah arye anggunti, aning-aning nirya, teleb kibuka arisiliba, anggun mutuku nirya doproplum ning ara, kam ning obuka, talye mangkau asa arye, dina telebe. Ara, anggun kanye arye, ‘Arup ara, aning obuka dipnune,’ tenepmunye touk, anggun kam ning opmunce, anggun aik deibuka dina telebe. Yata yala tup ning do nirya ara, rusa basam do, kijang basam do, yuk ning do, talye mangkau asa dina telebe. Ara, yata nang do nirya, ‘Malye ning talipmana ati, Allah dam yanirye, el si kum erepnamne,’ tenenyak nang babye, malye ning talina kum arye, Allah dam tuba yanganyak nang babye, atup ning talye mangkau asa arye dina telebe.

¹⁶ Bukni, kam ning opmunyopura, ining yala nirya ara, anggun ton kum dinamlulume. Tonda, talye mek tuku deice dikiltaklamlum touk, anggun kam ning opmunce, ining tuku deice diklopmunce, tup koproba uk dina telebe. Bukni ining ara, dina meme.

¹⁷ Anggun ninye aik noutam kum dinamlum ning ara, nyapnusine. Ara, Allah el si erena ati arelulum ning ara, anggun aik koproba, noutam kum dinamlulume. Ara, winipmanto, anggun ning bokuka, 10 deipmunce, Allah arena ati, tonok ning dopropmunye ning ara, sepuluh persen (10%) mitik ning ara, anggun aik pum dem, kum dinamlulume. Ara, anggun kouamunye ning winiryuk ning gandum duk do, beras duk do, kwaning nong do, tonda anggur tapu duk ap, zaitun yo duk minyak ap ati nyapne. Aning atonun, Allah el arena ati, sapi basam mi yuma ning ap, domba basam mi yuma ning ap, Allah el ning anya arye, anggun aik pum tam dem, dina meme. Tonda, anggun kanye arye, ‘Aning ara, na ning. Ton ning ara, na ni Allah ati, arepnamne,’ tenepmunce, kintinipmunye ning ap, tonda Allah ati, ‘Dipkoprop wininamne,’ nyabuka, nyalin yupu nyan talak arepnamlum ning ap, aning nirya ara, Allah ati arenamlulume. Akunum arepmunyopura, anggun aik pum dem dina meme.

¹⁸ Anyapmasin ning nirya ara, Allah el arena ati, kintinipnamlum ning ara, anirya el ninguk ulule. Ati aning ara, anggun aik pum diamuk, dina meme. Ara, anggun ap, anggun mapu ap, anggun kilmapu ap, anggun melin kilapu ap, anggun melin nang ap, ura, anggun aik dam unyak Lewi yala nang ap, anggun nirya anyapmasin ninguk, anggun aik pum tam ara, dina meme. Allah el arena ati, kintinipnamlum ning ara, Allah el si Yahweh tenyamukce, wipdeibuk mutuku, aminyan nuknamsilakuk, dipnamlulume. Ara, el si erenakuk dinamlulume, nyapne. Allah arye, nuknamsilakuk, el arin ning ara, dipnamlulume. Yukak meme. Tonda, yata pil do nirya, anggunce pil donamlum talak nirya noutamak ara, anggun ni koproba Allah, ati, pin-pin asa arye, Yahweh el si erenamulume.

¹⁹ Allah arye arepnamsil mutuku binuka unamlum talak nirya ara, Lewi yala nang ati, batakna kum arye, moubuka tenepmunce, Lewi yala nang, sik patan ning ati, melibuka arenamlulume. Sik ning koproba ton, kum dopropnamaka atia. Musa birye, Israel ninye ati nyabuk.

Allah arye nyapdeibukba, Musa birye Israel ninye ati, “Ining ara, dina meme,” nyapdeibuk yupu

²⁰ Musa birye Israel ninye ati nyabuk. Anggun ni koproba Allah Yahweh arye, ‘Wininamsine,’ nyapdeipsuk touk, anggun unamlum mutuku weik nuknamsile. Nuksilyopura, mutuku yuk-yuk ton, weike talibuka unamlume. Amutuku noutam ulamunye talak nirya ara, tup yala nirya patapsiliba, anggunce anggun talima pum tam tenebuka, ‘E, na tenepman touk, atup ning obuka dipnamne,’ tenepmunyopura, anggun patapsilye touk, dina teleb uka.

²¹ Allah arye, ‘Na si erenamniak mutuku ara ani,’ tenyamukce, nuknamsil mutuku, anggun unamlumak arye amutuku bisik bana pera weik uplirye, tup ning patapsilya ati, mambul kanye bona meme. Anggun unamlum mutuku noutamak aryuk dina telebe. Ara, anggun weilulum ning, sapi do, domba do, kambing do, maka do, Allah arye areamsuk ning nirya obuka dina telebe. Ara, narye, ‘Winibuka wininamlulume,’ nyabuka nukamsise touk, obuka dina telebe. Aning opmunyopura, anggun tup ning nirya ara, anggun kanye arye tenepdemunce, anggun asik doplumak ap, anggun aik koproba pum tam ap, dina teleb uka.

²² Yata yala tup ning do nirya ara, talye mangkau asa arye, dina telebe. Ara, anggunce bai tam kam ning, rusa basam do, kijang basam do, yuk yala ning do, opna arye, talye dilamlum touk dina teleb uka. Tup dipnamting nang ara, yata nang do nirya, malye ning winibica ati, Allah dam yanmanto kum nang babye, el si eren nang babye, tonda malye ning talina kumce, Allah dam tuba yangan nang babye, atup ning sik aik koproba pum tam, talye mangkau asa arye dina telebe.

²³ Tup ning toubuka dina teleb bukni, ining kipman dina pia meme. Deiyok ara, ining ara kam una deiyok ning ulula atia. Yata yala ning do nirya, ining tuba kum uptopura, kam tuba kum uptu ati, ining dina ara pia meme. Ati, kam ning ayala-yala nirya opmunce, el tup ap, ining ap tabakuka dina pia meme. Ining dipmunyopura, pia malye upmunyake.

²⁴ Dipkoprop nyapsine. Ining ning ara, anggun pia kum dinamlulume. Bukni, talye mek tukwak diklopmunba balamle touk, kam ning opmunyopura, ining ara tukwak diknamlulume.

²⁵ Tonda, ‘Ining dina meme,’ nyapsin yupu kekebuka kanye lamapdongobuka umunyopura, Allah anggun dam usilirye melisiliba, anggunce mapu deipnamlum ning ap, amapu arye deibikiba, dadeipdanin banamak nang nirya ati ara, Allah arye melilamsilba, sik nirya telebuk unamake. Tonda, anyapmasin touk winipmunyopura, Allah el si Yahweh arye, ‘Aning telebe, diksukum unyak atia,’ tenenamsile, ati ara, aninguk wininamlulume.

²⁶ Anggunce, ‘Nun malye winin ning ara, Allah arye namin kipnamsil’ tenen, Allah ati arenamlum ning, aning-aning nirya ap, tonda, anggun bidamnye aryuk, ‘Allah el si erena ati arepnamap’ tenen, elti, arenamlum ning nirya ap, bobukapmunce, Allah el si Yahweh arye wibuka nuknamsilak uk, bobinamlume. Yahweh arye nuknamsilak uk bobinuka, elti, arenamlulume. Musa birye Israel ninye ati nyabuk.

²⁷ Nyabukce, ayupu dukdongobuka nyabuk. “Ura, anggun malye ululum ning namin kina ati, kam ning obukapmunce, nong nirya uku dapnamlum ning ara, Allah el si Yahweh dam delilbanamlulume. Ara, Allah el arena ati, pala keil lelebuka yangapdeiamunya deice deipmunyeba, uku arye dipnamle. Ara, aning nong ap, ining ap tabakuka deipmunyeba, uku dipnamle. Winipnamlum bukni, anggunce, ‘Allah ap, yuk nang ap teleb ubuka neika unamap’ tenen, tup ning obuka, Allah ati arenamlum ning ara, yuke. Aning ara, opmunce tup ning kalibuka deipmunce, ining ara, Allah el arena ati keil lelebuka yangabuka deipmunyakuk, aning binuka, diklopmunba, tukwak banamle. Winipmunyopura, tup ning nong tonok ara, anggun babye dina telebe. Anyapmasin ning nirya ara, pia moubuka talipmunce wininamlulume.

²⁸ Anyapmasin yupu nirya ara, moubuka kekepmunce, talibuka wininamlulume. Winipmunyopura, Allah anggun dam usilirye melisilyeba, anggunce mapu deipnamlum ning ap, amapu arye deibikcopura, dadeipdanin banamak ninye nirya ati ara, Allah arye melipliba, sik nirya telebuk unamake. Tonda, anyapmasin touk winipmunyopura, Allah arye, ‘Teleb diksukum una ani,’ tenyamsuk ning ara, aninguk wininamlulume. Allah el si ara Yahweh, anggun ni koproba ulule.” Musa birye Israel ninye ati nyabuk.

Talye ning ati, ‘Nun ni koproba,’ nyabuka, si erenyak ning ati, Allah arye, ‘Pia na like,’ nyabuk yupu

²⁹ Musa birye, Israel ninye ati nyabuk. Anggun bimunce, unamlum mutuku noutam nirya ara, anggun ni Allah Yahweh arye, amutuku unyak ninye ati, malye kibuka opyaknamle. Aninye nirya akunum yaklopura, anggunce amutuku unamlum talak nirya ara, moubuka tenepmunce, wininamlulume. Ara, amutuku ninye arye, talye ning ati, ‘Nun ni koproba ani’ tenen, si erenyak ning ati, pia kum talinamlulume. Allah arye, amalye ninye nirya obuka, sirya dakliba, anggun amutuku binuka dopropmunce, darapdomgobuka unamlume.

³⁰ Amutuku unyak ninye ara, talye ning si erenyaka deice arye, wena tapu youlamle touk unyaka anya arye, anggun babye, atonun kum wininamlulume. Ati ara, Allah arye amalye winin ninye, akunum oplirye, sirya dakliba, anggun Israel ninye arye, moubuka kalikdamunce, unamlulume. Ara, ‘E, amutuku ninye arye talinyak ning, sik Isa Mutuku Dongonye ning ati, si erenyaka ara, yata wiribuka wininyak do? Na babye ton, kel biknirye, winiptinye do’ tenebuka, tabakuka, pia kum wininamlulume. Awininyak ning ati, kum asipdenamlulume. ‘Aning kirikuka winipmunyopura, anggun babye wena tapu youlamle touk, winipmunyak’ tenen nyapsine.

³¹ Talye isa ning ati, talibuka si erenyak ninye arye wininyak touk, anggun ton pia kum wininamlulume. Anggun Isa Mutuku Dongonye ati, ‘Nun ni koproba Allah,’ nyabuka, aning si erena ati ara, sik malye nang wininyak touk, kum wininamlulume. Winipmunyopura, ara anggun ni koproba Allah, el si Yahweh ati, batakuka yaniptapnamlume. Aning ara, talye ati kum nyapsine. Deiyok ara, amutuku unyak ninye arye, sik Isa Mutuku Dongonye si erena ati, malye-malye wininyak ning nirya ati ara, Allah arye, ‘Aning-aning nirya ara, na like,’ tenelule. Tonok ning ara, nyapnusine. Amutuku malye wininyak ninye arye, sik talibuka si erenyak ning ati, sik bidamang sal mapu babye, kilmapu babye, dobuka obikirye, atalye ning si erena ati, kintinideipnak arye, uku dongonyake. Atonun pia malye winina ara, Allah arye, pia lik tenelule.

³² Aning nirya narye anggunti, ‘Wininamlulume,’ nyabuka nyasinye touk moubuka wininamlulume. Anggunce ton tabaka longona ap, kulukulina ap, batakna ap pia meme. Musa birye Israel ninye ati nyabuk.