Ulangan 11 - Eipomek

Musa birye, “Allah elda, mikip weiknye,” nyabuk yupu

¹ Musa birye, sik Israel nang nirya ati, nyabuk. “Anggun ni koproba Allah Yahweh atibuk, anggunce kanye pia delinamlume. Tonda, Allah elce, ‘Aning wininamlume. Aning ara, pia kum wininamlume,’ nyamuk yupu ap, ‘Teleb winina ara, ani. Aninguk wininamlume,’ nyamuk yupu ap, ayupu nirya nyapdeiamsuka nirya ara, ayupu uk, tuba-tuba moubuka talipmunce, wininamlume. Pia kum batakanamlume.

² Ura, anggun wini talak ululum Israel nang ara, anggunce deiplum mapu ati, ayupu kum nyapsine. Anggun mapu ara, aning nirya kum elilamikce, kum bikamike. Bukni, akunum wisi danmalum nang anggun nirya ara, akunum elilamlumce, bikamluma anya arye, anggunti nyapsine. Ara, wini talak ara, yata winin ning do, anggun ni koproba Allah arye, anggun dam winilamukba bikamlum ning ara, moubuka teninamlume. Ara, elce peterelamsuk ning ap, el mikip weik deice arye, pil dolamsuk ning ap, el mikip weik taruk deice arye meliamsuk ning nirya ap ara, tuba-tuba tenenamlume. Anggun mapu ara, aning ton kum bikamik bukni, anggun wisi akunum dalum nang nirya ara, anggunce akunum eibuka bikamlume.

³ Tonda, ninye sirika arye winipmanto kum ning buk, Allah arye ayala-yala nirya pia mikip weik deice arye, mambul pil dobuka winipnin yangalamuk ning ara, tuba teninamlume. Aning ara, anggun asing arye, akunum elilamlume. Ara, Mesir mutuku taleamuk ninye deiyoknye, Firaun ap, elce taleamuk nang ap ati, Allah arye mikip weik ning kutukukce, sik nong deice, ikin weik ning delilamuk. Ara, ninye kum winipmanto ning mikip winin ning ap, tonda, ‘Se, dipkoprob Allah aulule, elda mikip pia weiknye ulule, tenepnamakʼ tenen, mikip weik pil domuk ning ap ara, anggun ton akunum eibuka bikamlume.

⁴ Tonda atonun, anggun dinmalumak, Allah arye, Mesir mutuku yin talin nang ap, anggunce yuk mutuku nang olan bana ati, kuda deice bukuka balamik kuda ap, tonda ninye mal olal bana ati, kuda kirikuka tuku deice balamuk ning, el si kereta kuda ap, sik ninye olbalamik yin talin nang ap nirya ara, omuk. Tonda, sik ayin talin nang nirya ara, weik laut mekwen, el si ara Laut Teberau, nyalamik laut mekwen dam yangayikba, amekwen noutam arye sekdobukce, eitam kilon outam, kilon kipdobukba, abisik noutam ara, Allah arye nyabukba, amek cepdobuk bisik yanganmeka ani, omuk ning ton, eiamlume. Ara, sik Mesir nang arye, ‘Anggun Israel nang nirya opnamapʼ tenen, dobolyanganmasik nang ara, Allah Yahweh arye, anang nirya ara, omuke. Aning nirya babye, anggun ton akunum eibuka bikamlume.

⁵ Tonda, aning atonun, anggun babye aunmalum mutuku, Kanaan mutuku kum yanamlum talak ara, mek kum ati, ninye kum unyak mutuku, kata weik mutuku tuba yangalamlum talak ara, Allah arye, anggun dam pil domuk ning ap, wenebuka peterelamsuk ning ap nirya ara, anggunce akunum bikamlume.

⁶ Tonda, Ruben yala nang arye deibiknye, el si Eliab, elce deiamuk mapu, sik si ara Datan ap, Abiram ap ati, Allah arye sik dam winyamuk ning ara, anggunce tuba bikinamlume. Ara, sik anang arye, malye winipdikba, Allah arye sikti, wenebuk ning eiplume. Ara, anggun nirya dinmalumak arye, sik bitinye nang ap, sikce domdirik kilapu ap, sikce delilamdik mapu ap, sik tam kilamikce, sik dobolbalamik nang ap, sik aik neika ulamik nang ap, sik tenda bola asik domik ning ap, tonda sikce talibuka, weilamik kam ning nirya ap, anirya ara, tuku dilikuka dana-dana kiprobukba, apum bisik sakikba, tuku arye tamubuka teikdongobuk ning ara, anggun wini talak tuba kam ululum nang arye, aning nirya akunum eibuka bikamlume.

⁷ Aning nirya eiamluma anya arye, diba, anggun asing arye, akunum laka ubuka dinmalumba, ninye arye kum winipmanto ning nirya, Allah arye pil dobuka winyamuk ning ara, akunum eiamlumce, bikamlume.” Musa birye, sik Israel nang nirya ati nyabuk.

“Kanye deibuka, nimalye unyak nang dam ara, teleb ning yangalule. Nimalye arye kum unyak nang dam ara, malye ning yangalule,” nyabuk yupu

⁸ Musa birye sik Israel nang ati, ayupu ton dukdongobuka nyabuk. “Ati, Allah arye nyapdeipnukba, narye anggunti, ‘Aning ara, wininamlume. Aning ara, pia kum wininamlume,’ nyamsise yupu nirya ara, arup arye nyapmasin ning ara, diba tenepmunce, moubuka talipmunce wininamlume. Winipmunya deice arye, anggun mikip kipsiliba, Yordan mek koubuka, otam mutuku binuka wekmunce, malye kipnamlume. Allah arye, ‘Anggun ti amutuku arepsiniba, talibuka unamlume,’ nyapdeiamsuk mutuku uk, obinuka wekmunce, talibuka unamlume.

⁹ Tonda, arup arye nyapdeipmasin yupu moubuka talipmunce, pia kum batakmunyopura, Allah arye anggun kam una ati, lo weik tonun ton arepnamasile. Ara, anggun omutuku noutam wekelbimunce, unamlum mutuku ara, keting tamun tonap weik tonun mapmunce, unamlume. Amutuku ara, Allah arye anggun apu yapu ati, nyalin yupu nyapdeiamuka deice arye nyabuk. “Anggunce deipmunyeba, dadeipdanin banamak nang nirya ara, pia teleb mutuku arepnamsine. Tonda, winipmanto yupu ara, amutuku ara, sapi basam moum yung ap, mong mek ap, pia weik ulye mutuku dopropnamlume. Ara, amutuku noutam ara, yata teleb ning do, yala-yala nirya, pia teleb ning weik aulula ati nyapsine. Amutuku arepnamsine,” nyapdeiamuk. Ati ara, wini talak amutuku uk, binuka unamlume.

¹⁰ Anggunce binuka dopropmunce, talibuka unamlum mutuku ara, pia teleb ulule. Min talak ulamlum mutuku, Mesir mutuku atonun kum ulule. Aning ara, kume. Mesir mutuku bimunye talak ara, mikip aryuk pil dobuka, wa wipmunce, malye yala ning koulamlume. Winilamlumce, ‘Mok weik kum mutuku ati, mek ton yatuba, teleb ubuka papnamsilʼ tenen, anggun yan arye, mitik tonun mek bisik palibuka wakalilamlume.

¹¹ Bukni, anggun binuka dopropmunce, unamlum mutuku ara, aning atonun kum ulule. Amutuku ara, weik mutuku kon belebuka bukuk mutuku noutamuk unamlume. Tonda, mutuku lilunuk unamlume. Amutuku nirya ara, mok im deice aryuk, weik tonun cebuka sakalirye, tuku deice ara, kat kum bukni, pia teleb namin tuku unamsile.

¹² Anggun si erelamlum Allah, anggun ni koproba Allah Yahweh arye, ‘Amutuku nirya, pia unamakeʼ tenen, amutuku nirya ara, pia melibuka kalikinamsile. Tonda, anggun ni koproba Allah Yahweh, elcuk aketing tamun, aketing tamun nirya, minop tonok keting tamun deiyok koun sum arye dipdongobuka, dinmalya ani, keting tamun sirya, dakan talak nirya babye, batakna kumce, pia disilirye, kalikuka melinamsile.

¹³ Ati anggunda, arup arye, ‘Aning ara, wininamlume. Aning ara, pia kum wininamlume,’ nyapman yupu nirya, Allah arye nyapdeipmanuba, narye nyapmasin ning ara, kekepmunce, moubuka talipmunce, wininamlume. Tonda, anggun si erelamlum Allah, anggun ni koproba Allah Yahweh atibuk, kanye delina ap, el si erena ap umunce, anggun kanye pum tam nirya, el deiceuk delinamlume.

¹⁴ Narye anyapmasin touk, dipkoprob winipmunyopura, Allah arye anggun wa wibuka, yal ning koupnamlum talak ap, kouamunya lipnamlum talak ap, yuma talak deiyok koun ning ap, aminyan sirya dakan talak ap ati, mok arepliba, tuku teleb unamle. Winiplyopura, anggunce koupnamlum ning gandum do, anggur duk do, minyak zaitun duk do, aning-aning nirya kouamunye ani, akunum wisiplyopura, dakuka linmamunce, weik tonun delinamlume. Telebuk unamlume.

¹⁵ Aning atonun, anggun weilamlum ning domba basam do, sapi do, kambing do, anggunce weilulum ning dina ati, yo mutmuta pia weik tonun arenamsile. Tonda, din ning yala-yala nirya ara, anggunti kintinibuka delilamsilya ani, aminyan aning nirya libuka dipmunyopura, ton kum patanamsile.

¹⁶ Winibuka unamlum bukni, anggunda anggun kanye pum tam tenen ning ara, pia moubuka teninamlume. Ara, anggun ni Allah ap, el yupu ap batakmunce, tilila yupu uk, diba tenepmunyopura, adeice arye, yuk talye ning ati, si erebuka kipmunyopura, ikin weik upnamasile. Anggun wininamlum ning nirya ara, nong kum unamsile.

¹⁷ Aning ara, talye ati kum nyapsine. Winipmanto ara, Allah batakmunce, na nyapmasin yupu anggunce kum talipmunce, yanipmunyopura, Allah el yu upliba, anggunti wenepsilirye, ikin ning weik, anggun dam deipnamsile. Ara, anggun unamlum mutuku noutam ara, mok ton kum arenamsile. Winipsiliba, anggun koumunye ning nirya ara, duk teleb ubuka kum mounamsile. Anirya ara, koulupdopnamsile. Adeice arye, anggun nirya ara, lo mitik tonunuk kam unmamunya ani, adiparyuk dipnamlume. Ara, Allah Yahweh arye, pia teleb mutuku arepmasil bukni, malye winipmunyeba, wenepsilyopura, anggun teleb mutuku unmamunce, aning-aning nirya, dina kum aryuk, talye dipnamlume.

¹⁸ Ati ara, pia moubuka unamlume. Narye, ‘Aning wininamlume. Aning ara, pia kum wininamlume,’ nyapdeiamsuk yupu, anggun kanye pum tam ara, moubuka tenipmunce, aninguk kalikdamunce, talibuka pia wininamlume. Ayupu tuba tenena ati ara, ayupu sekuka kintinpmunyeba, anggun asok deice, tapu arye koubuka deipnamlume. Tonda, anggun taruk deice, tapu arye koubuka deipnamlume.

¹⁹ Winipmunyopura, Allah el yupu nirya dobuka, anggun mapu ati, tuba-tuba peterenauk wininamlume. Ara, anggun asik talye bukuka aunmamunye talak babye, bura tam bisik dabanmamunye talak babye, anggun dikdik sen talak babye, tonda bukmunce, anggun pil donmamunye talak babye, tuba peterelongonauk wininamlume.

²⁰ Tonda, anggun aik bublan dana-dana tam deiplum yo deice, Allah el yupu sekuka delinamlume. Tonda, anggun asik wekelban bisik, weik poka bublan tirikilongonak deice ton, Allah el yupu sekuka delinamlume. Aning nirya deice arye ton, ‘Allah el yupu, luba kina kumce, tuba teninamapʼ tenen, sekelinamlume.

²¹ Aning winipnamlum ning ara, talye ati kume. Deiyok ara, Allah el yupu tuba teneipmunyopura, Allah arye anggun ap, anggun mapu ap ati, keting tamun lo weik tonun arepsiliba, amutuku noutam arye, keting tamun weik kam unamlume. Ara, anggun ni koproba Allah Yahweh arye, anggun apu yapu ati, ‘Winiryuk teleb mutuku ton arepnamsine,’ nyalin yupu deice nyapdeiamsuk mutuku, anggun wini talak ululum nang, omutuku bimunce, pia ati telebuk unamlume. Ara, tukwak mutuku amu tam, im tuba deice tam pia aunamle atonun, anggun babye tuba, pia ati, amutuku noutamuk talibuka unamlume.

²² Ati asum ara, narye, ‘Aning ara, wininamlume. Aning ara, pia kum wininamlume,’ nyapman yupu nirya, anggun dam nyapmasin yupu nirya ara, moubuka talinamlume. Ara, Allah arye nyapdeipmanuba, narye nyapmasin ning ara, kekepmunce, moubuka talipmunce, wininamlume. Tonda, anggun si erelamlum Allah, anggun ni koproba Allah Yahweh atibuk, kanye delina ap, si kibuka el si erena ap, el tibuk talibuka umunce, anggun kanye pum tam nirya, el deiceuk delinamlume. Narye anyapmasin touk, dipkoprob winipmunyopura, Allah arye melibuka kalikinamsile.

²³ Winipmunyopura, Allah Yahweh arye otam binamlum mutuku unyak nang nirya ara, el mikip deice arye, anggun dam arye yakdonoknamle. Winipliba, ninye weik ukirye, mikip weik nang unyak mutuku nirya ara, yakdonoknamle. Sikda, mikip weik unyak bukni, anggun Israel nang, mikip pia weik nang, kum ululum bukni, Allah melinamsila deice arye, amutuku binuka obukapmunce, alubuka dopropmunce, amutuku nirya, talibuka unamlume.

²⁴ Otam mutuku wekelbimunce, anggun yan otam yanibuka binamlum mutuku nirya ara, anggunce malye kibukapmunce, amutuku nirya talipmunce, unamlum mutuku ati nyapne. Ara, anggun talipnamlum mutuku wililongonak ara, outam (ara selatan) ati ara, weik pala mutuku, kata tam arye dipdongobuka, binamunya ani, deice tam sirya sekena ara, (ara utara) pera mutuku eitam Libanon mutuku ubukak, asukum binuka sekdopnamlume. Tonda, keting panalyangan tam mutuku wilinak ara, weik tonun balamle mek, Efrat mek dam arye dipdongobuka, binamunya ani, outam (ara selatan) mutuku wililongonak ara, sirya keting kumulban tam, weik laut mekwen, el si ara Laut Tengah deibukak, asukum arye binuka, bokuka dopropmunce, amutuku-amutuku nirya talibuka unamlume.

²⁵ Tonda, amutuku unyak nang nirya ati ara, minop talak anggun ni koproba Allah Yahweh arye, anggunti, nyalin yupu deice arye nyapdeiamsuk touk upnamlarya. Ara, Allah arye, ‘Sik amutuku unyak nang ara, narye ilil ning arepniba, sikce tamubuka anggun Israel nang ati, ilil weik unamle. Ilil upliba, sik anang nirya arye, ‘Se, sik Israel nang arye yata wiripnamsiyak do, opsikirye, sirya daknamsiyak do?’ tenen, anggunti ilil weik upnamlarya.’ Allah arye ayupu nyapdeiamsuk atonun upliba, sik omutuku unyak nang arye, anggun Israel nang ati ilil unamle. Adeice arye, amutuku nang ara anggun wininamlum ning ati, ton kum yanuka sekelongonamsiyake. Sikce kum malye kipsitinge. Winipnamaka deiyok ara, Allah arye nunti, ‘Dipkoprop winibuka winipnamsine,’ nyalin yupu nyapdeiamsuka ati nyapsine.” Musa birye nyabuk.

²⁶ Musa birye nyabukopura, ayupu ton dukdongobuka nyabuk. “Arup ara, anggun Israel nang kekenmanulum nang nirya ati, mambul yupu laka kibuka nyapsine. Angguncuk, Aning malye ubibyopura, sik ning dopropnamabe. Bukni, aning ton talinauk ubiyopura, teleb un ning dopropnamabe,’ nyan ning ara, nyapnusina anya arye, angguncuk, ‘Aning winipnuyap do? Aning winipnuyap do?’ tenen, wipnamlume.

²⁷ Arup narye anggunti, ‘Teleb winin ninguk wipnamlume,’ nyapmasin ning ara, ani. Anggunce el si erelamlum Allah Yahweh arye, anggunti, ‘Aning wininamlume. Aning ara, pia kum wininamlume,’ nyapdeiamsuk yupu dobuka, anggunti arup arye akunum nyapmasin yupu uk, aninguk moubuka talipmunyopura, Allah arye anggunti, pia teleb kilinamsile.

²⁸ Aning atonun bukni, malye winipmanto ning ara, anggun si erelulum Allah, anggun ni koproba Allah Yahweh arye nyapdeipsuk yupu, moubuka kum talipmunce, aning batakuka, talye ning isa si, kum bikamlum ning, yuk mutuku nang arye si erenyak ning ati, ‘Aning ara, nun deiyoknye,’ nyabuka, atalye ning ati, si erepmunyopura, adeice Allah arye, anggun dam supsiliba, ikin ning anggun dam yaliba, kanye imun unamsile. Tonda, supsilya deice arye, malye ninguk dopropnamlume. Ayupu ara, akunum nyapmasine.” Musa birye, sik Israel nang ati, nyabuk. Nyabukopura, ayupu ton dukdongobuka nyabuk.

²⁹ “Anggun ni koproba, Allah Yahweh arye, anggunti, ‘Amutuku arepnamsine,’ nyapdeiamsuk mutuku, akunum bobisiliba, amutuku noutam umunye talak ara, anggunce amutuku nirya ara, alubuka dopropnamlum talak ara, winipnamlume. Ara, Gerisim mutuku deice welepmunce, ‘Nun ni Allah arye, teleb updeipnamsilʼ tenen, moropnamlume. Tonda, aning atonun, malye yupu nyabuka, suna ati ara, Ebal mutuku dupuk welebuka bimunce, ‘Nunda malye winibipyopura, nun ni Allah arye, wenebuka supnamsile,’ nyabuka, eitam mutuku binuka moropnamlume.

³⁰ Ura, amutuku bitinye ara, Yordan mek lilun bukni, Yordan mek koubuka, keting kumulban tam bukdike. Ara, sik Kanaan yala nang, sik unyak mutuku bukni, keting kumulban tam bukdik mutuku atia. Tonda, amutuku ara, weik asik dolamika si ara, Gilgal mutuku dam tam, abukni, mitik otam weik tarbantin yo kan-kan, aweik yo tikamuka, ayo bukni mitik otam ara, asik ton dolamika, el si More, anyasik tam amutuku bitinye bukdike.

³¹ Ura, teleb nyalin yupu ap, malye yupu nyabuka, sun yupu ap nyapnamluma deiyok ara, talye ati kume. Ara, ‘Anggun ni Allah arye nyapdeiamsuk yupu, tuba teninamlum,’ tenena ati nyapne. Ati, anggunda adiparyuk kintinipnamlume. Minopce, anggun adiparyuk, Yordan mek koubuka keting kumulban tam wekel binamlume. Amutuku bimunyopura, anggun ni Allah Yahweh arye, ‘Amutuku arepnamsine,’ nyapdeiamsuk mutuku akunum bimunce, alubuka dopropmunyopura, amutuku uk, talibuka pia unamlume.

³² Amutuku noutam binuka unamlum talak nirya ara, anggun ni koproba Allah arye nati, nyapdeipnukba, narye anggunti, arup arye lak nyapmasin ning ara, pia moubuka talinamlume. Ara, Allah arye, ‘Aning wininamlume. Aning ara, pia kum wininamlume,’ nyalin yupu ap, ‘Teleb winina ara, winibuka wininamlume,’ nyalin yupu ap nirya ara, moubuka talipmunce, pia unamlume.” Musa birye, sik Israel nang anirya ati, nyabuk.