Ulangan 10 - Eipomek

Musa birye, Allah nyalin yupu, like bitinye talak doprobuk ning ati, nyabuk yupu

¹ Musa birye, Israel ninye ati, laka nyabuk. Atalak Allah el si Yahweh arye nati nyapnuke. “Wini talak ara, ance keil pala bitinye ning kintinipnalyame. Ara, minop talak arye, keil pala bitinye kintiniplumce, na dam boyanamlum touk, winipnulyame. Tonda, yo pum potokukapmince, marikna memepmince, Sinai mutuku tuba tonap, na unyak weleyanalyame.” Allah arye, na Musa biti nyapnuke.

² Allah arye nyapnukce, ayupu ton dukdongobuka nyapnuke. “Akeil deice sekeipnamkin yupu ara, min arye sekeipkisirye, arepsiba, ance do poukloplumba, telebuk ning, ayupu uk seknamne. Seknirye, anti arepkiniba, an dopropminyopura, narye nyalilamsirye, keil pala deice sekamse yupu, dobukapmince, ayo marikna, el si ara Peti Perjanjian pum bisikuk libuka deipnalame.” Allah arye nyapnuke. Musa birye nyabuk.

³ Nyabukce ayupu ton nyabuk. “Ati ara, narye yo si akasia yo, lakase dobuka, marikna memepsirye, keil pala bitinye puturubuka kintineipse. Akeil bitinye ara, min arye memebuka boyase bukni, ateleb lopse atonun, tonap tuba winiryuk ning ton memepse. Winipsirye, akeil pala bitinye dobuka, Sinai mutuku dup tamubuka welepse.

⁴ Mutuku dup deice welepsirye, keil pala arepsiba, minop talak Allah arye sekeiamuk yupu uk, elce, ‘Aning ara, wininamlulume. Aning ara, pia kum wininamlulume,’ nyalisilye yupu nirya, apala keil deice arye, yupu deiyok tagu barye (10) sekuka arepnuke. Tonda, anggun kele, ayupu ara, anggunce Sinai mutuku amu tam bulubuka dinmalumbuk, mutuku deice, weik uku buk dinmoka noutamak, Allah arye nyapdeipsuk yupu ati, nyapsine. Allah arye, ayupu uk sekuka arepnuke.

⁵ Akeil pala bitinye arepnukopura, Sinai mutuku dup deice arye, tamubuka koluksirye, Allah nyalin yupu bitinye, keil pala deice sekeiamuk ning ara, narye yo lakase marikna, el si Peti Perjanjian pum bisik dongobuka deipse. Deipseba, akeil bitinye ara, ayo lakase pum tam tuba aulule. Awinipse ning nirya ara, Allah arye ‘Winipnamlulume,’ nyabuka, nyapnuk touk, wininpse.” Musa birye nyabuk.

Israel ninye mutuku-mutuku balamik ning ati, nyabuk yupu

⁶ Atalak noutamak ara, Israel ninye mutuku yuk-yuk balamik. Min yuma ara, sikce Jakan nang taleamik mutuku batakuka banmika ani, mutuku si Mosera mutuku yayik. Sik batakuka biyik mutuku ara, minop talak ninye arye, ‘Mok cepliba, tuku pum tam mekwen deipnamsil’ tenen, tuku pum bisik ton palilamikba, sumur-sumur weik lukik. Amutuku nang, sik si Jakan ninye, aning talilamik. Amutuku batakuka amutuku arye, Mosera mutuku biyik. Amutuku ulamik talak ara, Harun dibukba, tuku palibikce, el pununa ati, el mi Eliazar dem, el pil dobuka dolamuk. El pil ara, Allah ap, ninye ap, ansinilina deiyoknye, tonda Allah si erena ati, kam ning obuka, arena pil dolamukce, el li dolamuk pil dolamuk.

⁷ Amutuku batakuka biyikopura, yuk mutuku si Gudgod mutuku biyik. Amutuku batakuka anirye, yuk mutuku si, Yotbata mutuku biyik. Amutuku ara talye balamuk mek weik aulamuk.

⁸ Amutuku noutamak biyik talak ara, Allah el si Yahweh arye, Lewi yala nang ati wipdeibuk. Ara, Allah nyalin yupu yo lakase marikna, el si Peti Perjanjian pum tam deiamuk ning ara, anang arye bobuka banamika ati, anang wipdeibuk. Tonda, Lewi yala nang arye, Allah el si eren aik binuka wekikirye, el pil dopnamik ning ap, tonda, ‘Allah arye Israel ninye ati, teleb kipdeipnamsile,’ nyanamik ning ap, tonda, Allah el si erepnamik ning ap ati, Allah arye Lewi yala nang wipdeibukba, wini talak tuba sikce deibikba, dadeipdanin yangalamik Lewi yala nang ara, tuba apil dobuka unyake.

⁹ Ati ara, Allah arye Lewi yala nang ati, sik talibuka unamik mutuku ton kum arebuk. Ati, sik ni yapu arye, tuku ton kum arelamik. Tonda wini talak babye, kum arelanyake. Israel ninye noutamak bukni, sik kwit capu yuk-yuk yala nang arye, tuku weik doprobik touk, Lewi yala nang kum doprobik. Deiyok ara, Allah el piluk donamaka deice arye, sik pataple ning dopropnamaka atia. Allah elcuk, sik ‘Se,’ tenebice ning, arenamle. Yuk nang dopropnamaka touk, sik kum dopropnamake. Ara, Allah el si Yahweh arye, sik apu koproba Lewi biti, nyapdeiamuk touk unamake.

¹⁰ Musa birye, Israel nang ati nyabuk. “Na Sinai mutuku dup tuba ualamse talak ara, min yuma talak atonun, like tonok keba koklom dikin, 40 sum ap, 40 lukunyan ap ulamsirye, anggun melina ati nyapse yupu, Allah el si Yahweh arye kekepnuke. Kekepnukce, anggun kum opsuke. El kanye yuk tenebuke.

¹¹ Winibukce, nati ayupu nyapnuke. “Na Allah arye, anggun apu yapu ati, ‘Ateleb mutuku arepsinyeura, talipnamlume,’ nyapdeamsi touk, wini talak ara, Musa ance Israel ninye bobuka bana ati, kintinipnalyame. Ance minopce biminyeba, sikda anyapmakin mutuku, teleb mutuku binuka talibikirye, amutuku noutamakuk unamake.” Allah el si Yahweh arye nyapnuke. Musa birye, Israel ninye ati nyabuk.

Allah arye Israel ninye ati, ‘Wininamlulume,’ nyapdeibuk yupu

¹² Musa birye, Israel ninye ati nyabuk. Ura, Israel ninye kanye lamapdongobuka ulamunce, ayupu uk moubuka tenepmunce, wininamlulume. Amapo, Allah el si Yahweh arye anggunti, ‘Wininamlulume,’ nyabuka, nyalisulul yupu ara, ani. Ara, anggunce, Allah el si Yahweh ati, ‘Elda pia mambule,’ tenebuka kipmunce, el si diamuk erenamlulume. Ubuka winipmunyopura, Allah arye, ‘Wininamlulume. Teleb bisik ani,’ nyasilye ninguk kekebuka, abisikuk banamlulume. Tonda, elti, anggun kanye talima ap, anggun nong ap, el deiceuk deilinamlulume. Winipmunce, Allah yupu aik wekuka, el yupu kekebuka, dobolbanamlume. Ara, anggun kanye taliama ap, anggun nong ap, anggun wininamlum ning nirya ap, unamlum ning nirya ap arye, Allah ati arepnamlume. El piluk dopmunce, el amu tamuk, bunamlulume.

¹³ Allah arye, ‘Aning ara wininamlulume. Aning ara, kum wininamlulume,’ nyalisilye yupu nirya, arup sum arye nyapmasin yupu ara nirya, moubuka kekepmunce, wininamlulume. Winipmunyopura, Allah arye aning-aning nirya teleb kipdeipsiliba, telebuk unamlume. Ati, arup sum arye dipdongobuka, dotalak nirya, telebuk upra banamlume.

¹⁴ Anggun ni koproba Allah, el si Yahweh arye, im deice tam babye, im deice noutam ulul ning nirya babye, el aryuk talilule. Aning atonun, tukwak tam babye, tuku deice ulul ning nirya babye, elce kwepdeibukce, talibuka ulule. Anggun ni koproba Allah, el si Yahweh arye, aning-aning nirya babye, el dem arye talibuka ulule.

¹⁵ Anggun ni koproba Allah, weik mambulnye ululce, anggunti wiamsuke. Tukwak mutuku noutamak ara, ninye yala-yala weik daunyak bukni, Allah arye, anggun apu yapu ati, bico tenebuka wiamukce, melilamukba, dadeipdanin yangalamika ani, anggun wini talak upre yangalulum ninye babye, ‘Na mapu pia unamak’ tenen, wipdeipsilirye, melisulule. Yuk nang ton kum wipdeiamuk, anggun uka. Arup babye, elce anggunti, aning tuba tenesulule.

¹⁶ Ati ara, anggun talima pum tam ara, ‘Allah eluk talinamabe’ tenen, unamlulume. Anggun kanye erebuka, malye winilalum ning ara, bataknamlulume. Winipmunyopura, anggun talima pum tam arye, diksukumuk winipmunce, kanye lamapdongobuka arye wininamlulume. Kanya bokoltona meme.

¹⁷ Ara, talye ati kume. Deiyok ara ani. Anggun ni koproba Allah, el si ara Yahweh bira, el tonok ulule. Yuk Allah ton kum ulule. Aning-aning nirya ap, ninye nirya ap, aning-aning nirya ap ara, pia el Allah atonun kum unyake. Allah ara, aning-aning nirya talibuka ululce, aning-aning babye, yuk ninye deiyok nang babye, el amu tamuk unyake. Allah ara, mikip weik deiyoknye ulirye, ninye nirya babye, aning-aning nirya babye, elcuk talilule. Ninye nirya arye elti, ‘Se elda pia mambule,’ tenenyake. Tonda, ninye urasin kum elilulce, kanye talima kum wililule. Tonda, ninye urasin elilulce, ‘Bon ninguk arepnicopura, doproptinye,’ kum tenelule. El kanye talima diksukumnye biti, kanye delilirye, yupu bokolilule. Allah ara, pia telebnye ulule. Allah elda, malye ning tonoknye babye pia kum winilule.

¹⁸ Allah elda, kwaknamne mapu ap, youwak kilapu ap ati, teleb ubuka diksukumuk melilule. Aning atonun, Israel mutuku noutam unyakce, yuk yala ninye asik nang ati, sik patapliba, din ning ap, ongon baju ap, bico tenebuka arelule.

¹⁹ Ura, ati ara, anggun ton atonun wininamlulume. Ara, Mesir mutuku noutamak ulalum talak ara, ninye asik nang atonun ulaluma ati, wini talak ara, sik mutuku koproba noutamak unyak ninye, yuk yala ninye unyakce, ninye asik nang unyak ninye ara, ‘Nun kwit capu’ tenen, bico tenebuka, anang ati melinamlulume.

²⁰ Winibuka anggun unalum talak nirya ara, anggun ni koproba Allah ati, ‘Elda pia mambule’ tenen, el siuk erenamlulume. Allah ati, el amu tam ulamunce, el pil donamlulume. El tibuk, ilil tenebuka, eluk talibuka ulamunce, anggun kanye talima, el deiceuk delinamlulume. Anggun nyalin yupu nyanamlum talak ara, Allah el siuk nyanamlume. Ati, anggun kanye lamapdongobuka arye, el amu tam unamlulume.

²¹ Anggun ni koproba Allah ati, ‘Telebe,’ nyabuka, el siuk erenamlulume. Allah arye anggunti, mikip weik deice arye, ninye kum winipmanto ning ap, mambul ning ap, melibuka pil dolamsuk ning nirya ara, minop talak arye elilamlume. Wini talak tuba ululba, anggun asing arye elilulume. Ati, ‘Telebe,’ nyabuka, Allah ati kanye deibuka, mot nyanamlume.

²² Anggun apu yapu yupa ara, bitinye keba nakub dikin nanguk, ninye 70 uk ulamikce, Mesir mutuku binuka wekamik bukni, anggun ni Allah weika arye meliamsuka deice arye, wini talak Israel ninye, anggun ninye yupa ara, kurya im deice kum nukmanto tiklamle touk ululume. Aning nirya ara, Allah elcuk aning nirya arepnamsile. Musa birye, Israel ninye ati nyabuk.