Ulangan 1 - Eipomek

Yordan mek koubuka, keting panalyangan tam min kum banmek talak arye, Musa birye Israel ninye ak, nyabuk yupu

¹ Abuku noutamak sekiamuk yupu ara, Musa birye Israel ninye ati, nyabuk. Elce nyabuk talak ara, sik nirya Yordan mekin bukni, keting yangalamle tam tuba unmek. Yordan mek koubuka otam, keting kum ulamle tam, min kum binamik. Sik ulamik mutuku ara, mek kumak anya arye, ninye weik kum ulamik. Sik diamuk tia ulamik. Apata mutuku ulamik talak noutamak ara, Musa birye ayupu nyabuk. Amutuku ara, Yordan mekin dam bukni, keting panalyangan tam, mutuku si Suf mutuku dam unmek. Suf mutuku ara, yuk yala nang mutuku si ton, Paran mutuku ap, Tofel mutuku ap, Laban mutuku ap, Haserot mutuku ap, Di-Sahap mutuku ap, anoutamak sik tonok ulamik mutuku.

² Ura, Horeb mutuku arye, Kades-Barnea mutuku bisik bana ati ara, like kolombarye, sebelas (11) sum deice arye, mapna arye balamik. Ara, Seir mutuku noutamak balamik bisik ati nyapne.

³ Tonda, Israel ninye arye, Mesir mutuku batakuka, Mesir mutuku noutamak arye balamik talak arye nukuka, keting tamun yupa tonok keba obarye, ara empat puluh (40) tahun akunum kibukopura, Musa birye Israel ninye ati, ayupu nyabuk. Tonda, aketing tamun bukni, wala ara kolombarye, sebelas (11) wala deice bukni, asum ara, tonok sum arye tanggal satu, ayupu nyabuk. Ara, Musa birye Israel ninye ati, nyabuk yupu ara, Allah el si Yahweh arye, “Israel ninye ati, nyapnalame,” nyapdeibukba, Musa birye kekamuk yupu aubuk touk, sik Israel ninye ati, nyabuk.

⁴ Musa birye, ayupu nyabuk talak ara, ani. Ara, Amorit mutuku ninye, sik ninye deiyoknye Raja Sihon bira, el weik aik ulamukak ara, mutuku si Hesbon mutuku ulamuk. Bukni, Musa birye anye biti, akunum malye kibuka obuk talak ara, ayupu nyabuka ati nyapne. Aning atonun, Musa birye, Basan mutuku nang, sik weik deiyoknye, Raja Og biti, akunum malye kibuka obuk talak, ayupu nyabuk. Raja Og ara, el taleamukce, asik weik domuk mutuku si ara, Astarot mutuku nyalamik. Amutuku ara, Ederei mutuku dam ubuk. Amutuku ulamik nang nirya ara, Musa birye obuka, sirya dakukopura, ayupu nyabuk.

⁵ Ati ara, Yordan mek otam keting panalyangan tam noutamak bukni, mutuku si Moab mutuku noutamak, Musa birye ayupu nyabuk. Musa birye nyabuk ara, Allah arye Musa biti, ‘Aning winipnamlulume. Aning ara, pia kum wininamlulume,’ nyapdeiamuk yupu ap, peterelamuk yupu ap nirya, laka nyabuk.

Allah arye, “Horeb mutuku batakuka, otam mutuku binamlume,” nyapdeibuk yupu

⁶ Musa birye Israel ninye ati, ayupu nyabuk. Nun ni koproba Allah, el si Yahweh arye, Horeb mutuku, tonda mutuku si Sinai mutuku arye nyapsuke. “Ura akunuma, anggunda Sinai mutuku dam ulamlum talak ara, keting tamun yupa weik anya arye, akunuma.

⁷ Winira amutuku batakuka, yuk mutuku si, Amori mutuku binamlume. Ati, anggun cang kain tenda aik dakmunce, bobuka bimunce, Amori yala nang talilamik mutuku tam noutamak nirya ap, sik talilamik tam dam mutuku nirya ap, angguncuk talilbinamlume. Amutuku nirya arepsinyeura, anggun mutuku koproba uk kipnamsile. Aning ara, mek kum mutuku ap, weik mutuku uamuk tam nirya ap, Yordan mek duman bukuk mutuku taram ap, anyapce otam lyu mutuku tam ap, outam mek kum mutuku, Negeb mutuku ap, dabu tam weik laut mekwen kup-kup tam ap, Kanaan yala nang tam ap, itam mutuku si, Libanon mutuku ap, Efrat mutuku ap anyapce, otam weik arye balamle mek si ara, Efrat mek duman ap, amutuku otam, atam noutam ulul mutuku nirya, bimunce, amutuku nirya talibuka unamlulume. Narye amutuku akunum arepsina atia.”

⁸ “Teneipdelulume. Amutuku-amutuku nirya ara, narye akunum arepmasina ati nyapsine. Allah, na si Yahweh arye anggun apu yapu Abraham ap, Isak ap, Yakub ap ati, ‘Aminyan talak, amutuku nirya arepnamsine,’ nyapdeipsa ati nyapne. Tonda, nyapse. ‘Anggunce deipmunba, anggun mapu arye, dadeipdanin balamica ani, aminyan deipnamak mapu ati, amutuku nirya arepnamsine,’ nyapdeipse. Ati, narye, ‘Anggunda amutuku binuka unamlulume,’ nyapdeipse mutuku uk, wini talak anggun bimunce, talibuka unamlulume,” nyapsine. Allah arye, Musa biti nyabukba, Musa birye Israel ninye ati, laka nyabuk.

Musa birye, ninye yupu lipsisikuka bokolina deiyok nang wipdeibuk yupu

⁹ Musa birye, sik Israel ninye ati, nyabuk. “Nun Sinai mutuku dam unmapu talak ara, narye anggun kekenak, ayupu nyapdeiamsise. Ayupu ara ani. Na tonoknye biryuk, anggun nirya ati, yupu lipsisikuka bokolin pil dona deiyoknye una ara, kum uptinye. Ikin weik pil anya arye, na kanye imun unulule. Ati ara, naryuk anggun nirya ati, deiyok kibuka talipsitinirye, pil dopmanto kum unmane,” nyapsise.

¹⁰ “Ati ara, anggun ni koproba, Allah Yahweh arye anggunti, akunum melisilirye, weik tonun arye tabakuka arepnin basiliba, anggunda ninye yupa pia weik, akunum upnin balamlume. Wini talak ara, anggunda ninye yupa pia weik ululume. Dipkoprop, pia tabaknin basiliba, kurya im deice weik tiklamle touk, akunum ululume.

¹¹ Tonda, ‘Allah arye winibuka melinamsilʼ tenen, Allah morosunune. Ara, anggun apu yapu arye, si erelamiknye, Allah Yahweh arye, anggunti tuba pia melisilirye, tabakasiliba, anggunda ninye yupa pia weik, tonap tabaknin banamsile. Ara, ninye yupa pia weik aunmaluma atonun, tonap tabakuka, seribu kali lipat ton, ninye pia weik tonun, tonap tabakdeipnamsile. Winibuka tabakeipsilyopura, Allah arye anggunti, minop talak arye nyalin yupu deice arye, ‘Winipdeipsiniba, anggun nirya ara, telebuk unamlume,’ nyapdeiamsuk touk, ubuka unamlume. ‘Allah arye winipnamsilʼ tenen, morosunune.

¹² Bukni, na tonoknye biryuk, anggunce yu upliba uapdamunce, ikin upmasutu ning nirya ara, yata wiribuka melipsitinirye, naryuk yupu lipsisikin pil dobuka, sirya daktinye do? Aning ara, ikin weik unulula ati, kum winiptinye nyapsine.

¹³ Ati ara, sik Israel ninye yala yuk-yuk aulamik touk, ‘Anang arye, deiyok kibuka talipsikirye, nun melibuka yupu bokolina deiyok nang unamsiyakʼ tenen, anggun deiyok kina ati, ninye deiyok nang ton wipdeipnamlume. Akintinip deipnamlum nang ara, kel bikin ning ara, weik tonun kel bikamikce nang ton wipnamlume. Tonda, min arye pil teleb ubuka dolamak nang, sikda moubuka tenebikirye, teleb ubuka pil dolamak nang ton wipnamlume. Tonda, ‘Deiyok ning ara, dan sukum ulul do?’ tenen, moubuka tenebikirye, pil teleb ubuka dolamak nang ton wipdeipnamlume. Anggun umunye noutam arye, atonun unyak nang, yuk-yuk kintinip deipmunba, narye sik ananguk wipdeipniba, sik anang aryuk, anggun Israel ninye nirya talipsikirye, unamake. Sik amu tamuk umunce, sik nyakce yupu kekenamlume. Minop talak arye, ayupu nyapdeiamsisiba, kekelamlume.

¹⁴ Nyapdeipsopura, anggun nirya diba tenebuka kekelulumce, “Deiyok, ance, ‘Winibuka ninye deiyok nang wipdeipnulyame,’ nyabuka, lak nyapmasulum touk, teleb tenemabe. Ati, wininamabe,” nyamnulume.

¹⁵ Ati ara, anggun ap ululum nang noutam arye, ninye deiyok ning talibuka upmanto nang, teleb nang akunum wipdeipmamunye nang ara, narye anggun awipdeipmamunye nanguk dopropnirye wipdeipniba, sikce anggun talipsikiba unamlume. Anggunce akunum wipdeiplum nang ara, kel bikin ning ara, weik tonun kel bikamik nang, tonda min arye pil dolamik nang, tonda moubuka tenebikirye, pia teleb ubuka, pil dolamikce nang kintinipmalum nanguk dopdeipsise. Anang aryuk, sik ninye deiyok talibikirye, anggun Israel ninye deice tam ubikirye, talinamsiyake. Sik anang arye, yupa yuk-yuk bukni, anggun Israel ninye yupa weik aunmalum touk noutam arye, seribu nang ton bokuka, yuk-yuk kibikirye talinamake. Tonda, anggun noutam arye ton deiyok nang arye, anggun kan-kan arye, seratus nang ton bokuka, yuk-yuk bokdeibikirye talinamake. Aning atonun, tonda lima puluh nang ton, bokuka, yuk-yuk bodeibikirye talinamake. Tonda, yuk deiyok nang arye, sepuluh nang ton bokuka, yuk-yuk bokdeibikirye talinamake. Tonda, yuk deiyok nang ton wipdeipniba, anggun yala yuk-yuk aumunya atonun, anggun deiyok talibuka un nang ton wipdeipniba, sikce talipsikiba unamlume.

¹⁶ Anggun yupu bokolina deiyok nang ap, yupu lipsisikilina deiyok nang ap dopdeipsise talak ara, narye sik anang ati pil arepsirye, nyapse. “Anggunda apil domunce unamlume. Ara, anggun unamlum nang noutam ara, moubuka kalikinamlume. Adeice arye, anggun mutuku ninye nyalanmakirye, oplanmakiba eipmunyopura, sik aninye nirya ati, sik anang arye, lak nyapnamak yupu moubuka kekepmunce, pia teleb ubuka, diksukum yupu lipsisiknamlume. Moubuka dinamlume, tonda teleb ubuka, yupu bokolinamlume. Ton tam nang ati, ‘Na kwitʼ tenepmunce, ton tam nang ati, ‘Na lik,’ kum tenenamlume. Anang nirya ati, kanye bokona kume. Ara, anggun Israel nang koproba do, yuk mutuku arye tikilyangan nang bukni, anggun Israel nang kan-kan ulamikce nang do, anggun nirya ati ara, diksukum yupu bokolinamlume.

¹⁷ Anggunce ton tam nanguk, teleb ubuka, ton tam nang ati, malye kina kume. Angguncuk pia teleb ninguk wininamlume. Aning nirya ara, weik nang babye, mitik nang babye, atonunuk, amalye winipmakce touk, yupu lipsisikuka bokolinamlume. Mitik nang yuk, weik nang yuk, tenebuka, sik yupu yuk-yuk kum bokolinamlume. Tonda, yata nang do nirya ara, anggunce sikti, ilil kum tenenalume. Ara, ayupu lipsisikuka bokolinamluma nirya ara, yupu nyanamlum bukni, dipkoprob weik deiyoknye bira, Allah elce arenamsil ninguk nyabuka yupu bokolinamlume. Bukni, amalye upmakce ning ati, yupu lipsisikuka peterepmunce, ‘Se, yata nyaptibye do?’ tenepmunce, pia kum winipmanto ning winipmunyopura, angguncuk na dam asilyanamnulume. Aning na dam boyamunyopura, narye aning lipsisikuka, teleb kiplinamne, nyapsise.

¹⁸ Ati ara, atalak aryuk, anggunce yuk yala nang nirya una ati, aning ara, narye anggunti, “Winibuka-winibuka wininamlume,” nyapdeipsisiba, kekemunce, anggunce aninguk talibuka winipnin balamunce, wini talak babye, tuba winilulume. Musa birye, sik Israel nang, yala yuk-yuk ulamik touk, anang ati nyabuk.

Amori yala nang ulamik mutuku, maka meilban nang ara, dua belas nang ton wipdeibuk yupu

¹⁹ Musa birye sik Israel nang ati, nyabuk. “Nun ni koproba Allah Yahweh elce, “Wininamlulume,” nyapdeiamsuk touk, nunda Sinai mutuku arye batakuka, mek pia kumak ati, ninye ton kum ulamik mutuku, kata mutuku noutamuk bisik binamupu. Anggun ton amutuku nirya eililamlume. Amutuku noutam arye balamuba deiyok ara, sik Amori yala nang arye talibuka ulamik mutuku tam binamupu. Atalak nunda Kades-Barnea mutuku biburye, dabinuka ulamupu.

²⁰ Atalak ara, narye anggunti, nyapsise. “Wini talak anggunda, Amori yala nang unyak mutuku tam akunum yanamalume. Tonda, amutuku nirya ara, nun apu yapu taleamukba, sikce el si erelamiknye, Allah Yahweh arye nunti, ‘Ateleb mutuku arepnamsine,’ nyamsuk mutuku ara, oupmal atia.

²¹ Anggun asing arye eiplume. Ati ara, angguncuk amutuku bimunce, binuka unamlume. Ara, nun ni Allah Yahweh arye nunti, ‘Amutuku binuka, malye kibukapmunce, amutuku talipmunce, asukumuk unamlume,’ nyabuka, akunum nyapdeiamsuka ati, ‘Yata wiripnuyap do?’ tenen, teniltona ap, ilil una ap, kum upnamlulume. Anggun adiparyuk amutuku binamlume,” nyapdeiamsise.

²² Winibuka nyapdeiamsisopura, anggun nirya arye, tamubuka na dam yalumce, nyabuka moropnulume. ‘Teleb ning ara, ninye yata wiribuka nang do, ton minop wipdeipminba, sik anang bikirye, Allah arye, “Amutuku arepnamsine,” nyapdeiamsuk mutuku nirya ara, urasin ap, omutuku awamlye ning ap, binuka dipdemunce, amutuku asik adobuka unyakak bana ati ara, ‘Dan bisik bitibye do?’ tenen, ‘Abisik bitibye, tonda amutuku bana ati ara, winiptibirye, binuka wektibyeʼ tenen, bikicopura, sik anang tamubuka, nun dam yakirye, ‘Abisik binamabe,’ nyapsitingba, amutuku ara bitibye,’ nyamnulume.

²³ Nyabuka, anggunce yanuka moropnulum ning ara, narye tamubuka, ‘Deiyok, anyapmanulum yupu ara, telebe. Anyapmalum touk, winipnuyabe,’ nyapdeiamsise. Adeice arye, ninye yala dua belas aulamlum touk, narye 12 nang ton wipdeiamse. Ara, anggun yala yuk-yuk aulamlum touk, anggun kan-kan noutam arye, dua belas nang tonok-tonok wipdeiamse.

²⁴ Winibuburye, sik awipdeiamupu nang ara, sik adiparyuk, Amori yala nang ulamikak bukni, ei mutuku tam bisik dilbinamikce, Eskol mek duman biyik. Asukum biyikopura, amutuku-amutuku nirya, maka meipre balamike.

²⁵ Akunum dipdeyikopura, sik anang tamubuka, nun dam yanuyik talak ara, Amori yala nang ulamik mutuku noutam ulamuk yo duk ton boyanamike. Sik anang yayikopura, amutuku noutam ulamuk ning nirya ara, nun kekenak arye, yanuka lak nyamsike. Ara, nun ni koproba Allah arye nunti, ‘Amutuku teleb mutuku arepnamsine,’ nyapdeiamsuk mutuku ara, akunum eipmabe. Dipkoprop amutuku ara, pia teleb mutuku ulule,” yanuka, lak nyapsikba kekebupe.

²⁶ Bukni, Allah elce areamsuk mutuku ara, adiparyuk, min kum binuka wekamlume. Anggunce, “Kume, nunce amutuku nang ara, mikip weik nang anya arye, nunce sikti, malye kum kiptibye. Ati, omutuku kum binamabe,” nyabuka batakamlume. Anggun ni koproba Allah Yahweh arye, nyapdeiamsuk ning ara, anggunce kum kekeplumce, batakuka malye kimunya deice arye, elti, yanilulume.

²⁷ Anggunce nyamlume, “Kume, nun ni Allah arye nunti, ‘Anang ara, na like,’ tenesulula ati, adeice arye, nunda Mesir mutuku ulamupu ani, boyanamsuke. Winipsuka deiyok ara, elce nun bobuka, omutuku unyak nang, sik Amori yala nang deice deipsukba, wini talak ara, nun nirya opnamsiake. Opsikcopura, sirya daknamsiake,” nyamnulume.

²⁸ Ati ara, wini talak ara, dan mutuku binuka teleb unamap do? Nunda yata ati, ‘Sik Amori yala nang unyak mutuku noutam omutuku bitibye do? Ura, amutuku binuka unamapʼ tenen, amutuku maka meilbana ati, wipdeipmalumba, dilbinmek nang tamubuka yayikce, nyapsika ara, ani. Sikce, ‘Kume, sik amutuku unyak nang, sik Amori nang ara, nong pia weik nang unyak bukni, nunda nong mitik nanguk unyabe. Sik amutuku nang ara, pia mikip weik nang unyak bukni, nunda mikip mitik nanguk unyabe. Nunda, sik mikip weik tonun unyaka atonun nang kum unyabe. Tonda, sik asik adobuka unyak mutuku ara, weik asik ulule. Tonda anyasik-anyasik dana-dana tam nirya ara, weik pala kil dolamikce, taplakuka deibikce, weik cang poka dobuka antanap dongomikce, im noutam dobikopura, apoka noutamuk, sik asik adobuka, anoutamuk unyaka anya arye, anyasik-anyasik wekman kumto ulule. Tonda, anang sik nong babye, nena weik nang nong cang pia weik nang unyake. Aning nirya ati ara, omutuku min kum wekeltibye,’ nyabuka, lak nyapsika deice arye, nun ilil weik usulule,” nyamnulume. Musa birye nyabuk.

²⁹ Nyabukopura, ayupu ton dukdongobuka nyabuk. Bukni, narye anggunti, nyamsise. “Sik amutuku unyak nang nirya ati, tenina ap, pia ilil una ap, kum unamlume. Anang ati tenina meme,” nyapdeiamsise.

³⁰ “Anggun ni Allah Yahweh arye, anggunti melibuka bobanamsile. Elce menekuka baliba, nunda el aminyan tamuk melibuka banamabe. El mikip weik deice arye, Amori nang, omutuku unyak nang ati, oplirye, sirya daknamle. Tonda, anggunti, el mikip weik deice arye, moubuka kaliksilirye, bobanamsile. Ara, anggun Mesir mutuku noutam ikin weik daulamlumba, Allah Yahweh el mikip weik arye, pil dopsukce, boyanamsukba, anggun asing arye eiamlum touk, wini talak babye atonun, winipnamasile.

³¹ Aning atonun, mek kumak anya arye, ninye ton pia kum unyakak, kata weik mutuku uamukak babye, anoutam arye ton, talye balamlum talak babye, anggunce Allah ulamukce, pil dolamuk ning ton, akunum eibuka bikamlume. Anggunce elilamlumba, Allah Yahweh elce winyamuk ning ara, yata wiryamsukba, eiamlum do? Akata mutuku bisik yangalamlum talak ara, anggun si erelamlum Allah Yahweh, elcuk boyangalamsukba, pia teleb aryuk yangalamluma ani, aunmalum mutuku yanamlume. Ati tenipdelulume. Elce anggunti, winyamsuk ning ara, ani. Winipmanto ara, tonoknye birye, elce deiamlye mi mitang uplyopura, el li birye, el mi ati iripdakuka bobalamle touk, Allah arye anggunti, winibuka boyangalamsukba, anggun nirya arye eiamlume.

³² Bukni narye, ‘Batakasina kume, Allah arye anggun dam winyamsuke, winyamsuke,’ nyabuka, akunum nyamsise bukni, anggunce pia kum kekelulumce, anggun ni koproba Allah Yahweh el si erelamlum bukni, elti, pia moubuka diba kum tenelamlume.

³³ Allah Yahweh, elcuk, anggun bisik yangalamlum talak ara, Allah elcuk menekuka yangalamukce, elce dipre binamukce, ‘Telebak ara, asukumuk anggun tenda doltakan aik dopnamlume,’ nyapdeiamsuk sukum dolamlume. Tonda, inipne talak lukunyan noutam talak ara, Allah elce anggun melina ati, uku buk atonun ubuka tiknarye, dirina upneba, adirina arye yangalamlume. Tonda, keting noutam talak ara, kata mutuku bisik bana ati ara, weik cang dua atonun ubuka tiknarye lilipdongopnaba, adua amu tam balamlume. Winilamsuka deice arye, anggunda, ‘E, nun binamap bisik ara ani,’ tenebuka balamlume.

Minop talak Israel nang arye malye winilamika ati, Allah Yahweh arye wenelamuka ati, nyabuk yupu

³⁴ Musa birye sik Israel nang ati nyabuk. “Allah arye anggun tenebuka nyanmalum ning kekepsukce, elti, diba kum teneplumce, el yupu yanipmalum ning bikopura, yu weik ubukba, ‘Anggun anang wenena ati ara, winipnamsine,’ nyabuka, ikin yupu ton nun deice deipsuke. Ayupu ara dipkoprob sik anang ati nyapne,’ nyamsuke.

³⁵ Allah arye nyapdeibuk yupu ara ani. ‘Ura, wini talak unamlum Israel nang ara, anggun malye un ninguk talibuka ululum nang anya arye, anggun kan-kan noutam arye, tonoknye babye, narye anggun apu yapu nang ati nyalilamse ning dopropnamlume. Narye anggun apu yapu nang ati, ‘Ateleb mutuku Kanaan tam arepsiniba, omutuku noutam arye teleb ubuka unamlume,’ nyabuka, nyalin yupu deice arye nyapdeiamsise mutuku ara, wini talak kam ululum deiyok nang ara, amutuku kum binuka weknamlume,’ nyamsuke.

³⁶ Anggun Israel nang wisi nang nirya ati, nyapsine. Bukni, tonoknye el li koproba Yefune, elce deiamuk mi, el si Kalep, el tonok uk, ateleb mutuku binuka weknamle. Ati ara, Kalep ap, elce deipliba deipdanin banamak nang ap ara, narye amutuku arepniba, binuka unamake. Ara, el Kalep birye omutuku urasin dilbinamuk talak noutam, elce yanibukce, dilbinamuk mutuku-mutuku nirya ara, el ap, el mapu silip ap ati arepnamanarya. Winipnamna deiyok ara ani. Ara, narye nyapdeipse yupu ara, el Kalep birye, ‘Kume, Allah arye dipkoprob yupu nyapdeipsukʼ tenen, ayupu uk moubuka talibukce, anyapdeiamse touk winibuk. Winibukce, ‘Diba Amori mutuku bibirye, otam unyak nang ati malye kiptibye,’ tenebukce, diba tenepnuka atia. Ati ara, narye anggunti, ‘Amutuku bimunce, amutuku urasin ap, ulye ning ap, binuka dipdenamlume,’ nyapdeiamsisiba, dilbinmek mutuku ara, anye Kalep el tonok arepniba, el ap, elce deipliba dadeipdanin banamak nang ap, amutuku binuka wekikirye, daunamake. Allah arye nyapdeiamuk.

³⁷ Tonda, anggunce aning malye weik winilamlumba, Allah Yahweh elce anggunti yu ulamuk bukni, na ak yu kanye deiamyamnuke. Utenyamnukce, ‘Musa an babye, na yupu deice arye, ‘Amutuku arepnamsine,’ nyapdeiamse mutuku ara, min binuka kum weknamlame,’ nyapdeiamnuke.

³⁸ Bukni an melinanye binyuk, elce amutuku binuka weknamlarya. Ati, moubuka kanye deibuka, yupu nyapnulyame. Ara, ninye si Nun, elce deiamuk mi Yosua, elce deiyok kiplirye, ‘Israel nang ati, amutuku arepnamsine,’ nyapdeiamsuk mutuku ara, elcuk Israel nang bobilirye, amutuku binuka wekikirye, amutuku nang malye kibuka dopropnamake,’ nyamsuke.

³⁹ Tonda, ayupu nyapdeipnukopura, Allah Yahweh arye, nun nirya ati, nyapdeiamsuke. Ara, ‘Anggunce delimunye mapu ara, sik kanye kum deiamnyaka anya arye, sik ‘Malye winin ning ara ani. Teleb winin ning ara aniʼ tenen, kum biknamake. Amitik mapu nirya ara, sik ton malye kum winilamika ati, ateleb mutuku ara, amapu ati arepniba, binuka weknamake. Amitik mapu ara, minop talak anggun Israel nang arye, ‘Se, nun mal olan nang arye, nunti opsikcopura, nun mitik mapu alubuka dopropnamsiake,’ tenelamlume. Bukni, amitik mapu ara, sikce ateleb mutuku arepniba, binuka wekikirye, amutuku talibuka, teleb kibuka unamake. Allah arye nyapdeiamsuke.

⁴⁰ Bukni, anggun Israel yala nang, anggun wisi nang nirya ara, tuba tamubuka, otam yanamlum bisikuk binamlume. Ara, mek pia kumak ati, ninye kum unyak mutuku, kata mutuku tam bisik arye ubuka, weik laut mekwen el si Terberau alaut mekwen deibuka dakdongobuk mutuku, atam bana ati, bisik tamubuka binamlume. Ayupu nirya ara, Allah arye nyapdeiamukba, Musa birye, sik Israel yala nang nirya ati, lak nyabuk.

⁴¹ Musa birye ayupu nyabukopura, ayupu tonap dukdongobuka nyabuk. Ura, narye ayupu nyapdeiamsisiba, anggun Israel nang nirya arye, na dam tamubuka nyamnulume. “Se, na ni Musao. Dipkoprop nunda, Allah Yahweh el yupu yanipmap deice arye, el dam malye upmabe. Bukni, wini talak ara, nun kanye yuk tenemabe. Ara, nun ni Allah, elce nyapdeiamsuk touk ulamibirye, omutuku Kanaan noutam, sik Amori mutuku unyak nang ati, sikda nun mal olan nang anya arye, anang ati olbinuyabe. Ati nun yuk-yuk kintinip deibibirye, ‘Anang nirya ara, adiparyuk binuka, obuka sirya daknuyabe,’ tenemabe. Tonda, ilil kum upnamasile,” nyanamlume. Ara, anggunce, ‘Kume, mutuku deice tam arye ubuka bibirye, sik Amori yala nang warekuka opnamaba ara, ikin kum upmasile. Kanamuk upsiliba, anang opnamabeʼ tenen, “Nunda akunum kintinipmabe,” nyapdeiamnulumce, anggun ninye olan ning, alat perang yala-yala nirya ara, kintinip deiplume.

⁴² Anggunce nyabuka, yana moropnulumce, ninye olan ning kintiniplum bukni, nun ni Allah Yahweh arye, na dam yanuka nyapdeiamnuka ara ani. “Ance sik anang ati, ‘Daolbilulume,’ nyapminba, kum binunyake. Deiyok ara, narye sik anang kum melipnamne atia. Narye sik anang kum melipnyopura, ‘Sik mal olan nang arye, anang nirya ara, obuka sirya daknamakʼ tenen, nyapne,’ nyabuka, Allah arye nyapdeiamnuke.

⁴³ Allah arye nyapdeiamnuka anya arye, na Musa birye, anggun Israel nang nirya ati, nyamsise bukni, anggun kanye erebuka kwalina deice arye, na yupu kum kekelamnulume. Anggunda, Allah Yahweh elce dipkoprob nyalilamsuk yupu ara, pia moubuka kum kekelamlumce, aning babye yanilamlume. Ara, Allah arye, ‘Anggunda omutuku nang dam binuka opmunyopura, anang arye anggunti, opsikirye, sirya daknamsiyake. Ati omutuku mal olan bana kume,’ nyapdeiamsuk yupu ati, narye ton nyalamsise bukni, anggunce malye kibukaplumce, ‘Mutuku tam ara, adiparyuk mal olal binuyabe,’ tenelamlume.

⁴⁴ Anggunce winilamluma deice arye, sik Amori yala nang ara, amutuku dam noutam ulamika anya arye, anang kutuk sakuka yayikce, anggun nirya obuka, sirya dakamsike. Amori nang sik yupa ara, pia weik ulamike. Winipmanto ara, mong weklamlak weik tonun arye ulamaka atonun ulamike. Tonda, sik anang arye, eibuka dobolbisikba, Sin mutuku arye batakuka, yukak Horma mutuku dam ton dobolbinamsike. Dobolbalamsika ani, otam mutuku, Edom mutuku damuk binuka, anggun nirya ati, obuka sirya daksike.

⁴⁵ Winibuka obuka sirya daksikba, anggun adiparyuk tamubuka yanamlumce, Allah Yahweh ati, ‘Se, nun ni Allah Yahweh, ance nunti, bico tenesimince, melipsilyame,’ nyabuka, moryamlumce, engelamlum bukni, Allah Yahweh, elce anggun yupu kekebuka mangkau kiamsuke. Anggunce morolamlum yupu ara, pia kum kekamsuke.

Keting tamun, keting tamun nirya, kata mutuku noutamuk ulamik ning ati, nyabuk yupu

⁴⁶ Sik Amori yala nang arye, anggun Israel nang ati, obuka sirya daksikopura, nun nirya Kades mutuku binuka ulamupu. Amutuku noutamuk, keting tamun yupa weik tonun asukumuk ulamupu. Musa birye nyabuk.