Titus 3 - Eipomek

Allah el mapu teleb wininamak ning ati, nyabuk yupu

¹ Na mi Tituso, sik dib tenenyak ninye, Kerit mutuku nang noutamak ara, ‘Akunum diba tenebikce, Allah yupu kunum kekebik bukni, luba kibcak’ tenen, tonap ayupu peterebuka nyanamlyame. “Sik amutuku deiyok nang, pemerintah nang ap, yuk ninye deiyok nang ap nirya ati, sik adiparyuk, sik amutamuk ubuka, sik nyanyak yupu kekebuka, telebuk wininamlulume. Tonda, atalak-atalak nirya, yata teleb winin ning do, yata teleb pil do, ‘Kanye deibuka, talye kanye bobuka, mikip arye pil dopnuyap’ tenen, kintinilinalulume,” nyabuka peterenalyame.

² Tonda, “Yuk ninye ati, yuk nang arye, ‘Aninye ara, malye nang tenepnamak’ tenen, yupu malye nyabuka, deililana meme. Yupu deice waldana ap, ninye nong oldana ap, pia kum wininamlulume. Aning kum wininamlum bukni, yuk nang, sik patalye ning tenebuka, nimalye arye, melibuka unamlulume. Yata ninye do nirya, tenepce arye winina ap, kanye talima eremna ap kum bukni, dipkoprop sik amutamuk umunce, nimalye arye telebuk wininamlume,” nyabuka, peterenalyame.

³ Aning peterelamlyam deiyok ara ani. Ara, minop talak nun babye kanye bona kum arye, walwal ulamubu. Ara, malye kibuka, ninye deiyok nang yupu ap, Allah yupu ap, kum kekelamubu. Yata malye winin ning do, malye patan do, malye kanye tenena do nirya, amalye ninguk patalamsuka deice arye, yukulamsukce, nun malye ning winina deice arye, tapu kouamsukba, pia malye ulamubu. Atilila ning diba tenelamuburye, yuk nang ati, yu weik ubuka, waldana ap, oldana ap, ulamubu. Tonda, yuk nang ning ati, ‘Se sik ning ara, naryuk doproptinye’ tenen, kanye talima engena ap, ulamuburye, nun nirya arye, yuk nang nirya ati, lik upsinabuk, ‘Pia lik,’ tenelalamubu.

⁴ Apia winilamubua ani, aminyan talak noutamak ara, nun ni Allah, elda nun Lyena Deiyoknye birye, nun patan ning tenepsukce, bico tenebuka, nimalye arye, melyamsuknye, laka ubuka yayukce, elce nunti lyepsuke.

⁵ Nun Lyena Deiyoknye, elce lyepsuka deiyok ara, nun teleb ubuka, diksukum pil weik dolamubu deice arye, pia kume. Aning deice arye, pia kum lyepsuk bukni, nun malye winin ning ati, talya merekuka obuka bataksutu bukni, nunti kanye arepsukce, bicoe tenepsuk deice arye, el minang kanye aryuk, wibuka lyepsuke. Ninye arye, deliltakne ning dobuka, mek liklamak atonun, Allah arye, nun malye winin ning kilipsukce, winiryuk delilamak mapu atonun ubuka deipsuka deice arye, kunum lyepsukce, teleb kibuka deipsuke. Tonda, Allah El Dib Kanye arye, nun kanye noutamak wekuka pil dopsukba, kanye winiryuk ning atonun punubuka deipsuka deice arye, lyepsukce, teleb kibuka deipsuke.

⁶ Nun Lyena Deiyoknye Yesus Kristus pil dopsuk deice arye, Allah El Dib Kanye weik arye arepsuke.

⁷ Allah El Dib Kanye weik arye arepsuka deiyok ara, nun malye winilamubu bukni, Allah el kanye aryuk, bico tenepsuk akarye, nun malye ning nirya, kum kipdeipsuk akarye, pia teleb winin nang atonun, akunum kipdeipsuke. Winipsuka deice arye, bol koplobuka pia kam una deiyok ning arisulula ati ara, im deice tam pia kamuk unamake. El mapu atonun kipdeipsuka ati, kanye bokoltona kum arye, ‘Dipkoprop, pia kam un ning arenamsile,’ tenen, akunum kel bikmuburye, ‘El tamubuka tukwak mutuku yanamle talak ara, yata talak do?’ tenebuka, dinauk unamapya ani, el bisikuk dobolbinamtibye.

⁸ Anyapmakin yupu ara, pia dipkoprop ulula ati ara, ayupu diba tenebuka talinamlyame. Tonda, ance peterenaminye ninye ati, ayupu dem dobuka, mikip asa arye peterenamlyame. Ara, ‘Allah ati akunum dib tenelamik kili sal arye, yuk talye ning nirya batakikirye, teleb un ninguk pia patapliba, moubuka talibikirye, pia pi dobuka, diksukumuk wininamak’ tenen, nyapkine. Anyapmakin yupu nirya ara, pia teleb yupu ulul ati, yata ninye do nirya, aninguk kekebibirye, talibuka wininamyaba deice arye, ayupu arye, telebuk kilisulule. Ninye nirya ati, nyapkine.

⁹ Ayupu kekebuka dobolbanyaba deice arye, teleb kilisul bukni, na mi Tituso, sik yuk nang pia walwal nang arye, nong kum upnamle ning ati, talye yupu deice arye nyalalamik ning ap, sik apu yapu arye, dadeipdanin yangalamikce, nyapdanin yangalamik yupu ap, Allah arye, “Aning wininamlulume. Aning ara, pia kum wininamlulume,” nyapdeibukba, Musa birye sekeiyamsuk mem yupu nirya ati, yu kanye bobuka derelalamak yupu ap, ance nyalana meme. Amalye winin ning donga anibuka, batakalongonamlyame. Ayupu atonun yupu nirya ara, kum melipsutu atia. Tonda ayupu nirya ara, nong dib kum upnamle ati ara, ayupu kekena ap, yuk nang ap nyalana ap ara, pia kum wininalyame.

¹⁰ Ura, anggun dib tenebuka, du weit atonun ululum ninye kan-kan arye, yatanye malye nyalya deice arye, yu ubuka, kanye wililamsilanye biti, yupu sekuka, mikip arye wenepnalyame. “Ninye yu kanye bobuka mal pilana meme,” nyabuka, yupu sekmince, mikip asa arye wenepnalyame. Tonok talak akunum wenepminyebuk, aning atonun ila tonap, winiplyopura, tamubuka tonap elti, yupu sekuka wenepnalyam bukni, aning ara, yuk talak tonap, anye biti wenena kume. Anye bira, apia malye winilamlyeura, anye bira pia bataknamlulume. El ap, neika una kume. Yu kanye bobuka, mal pililamsiak ninye ap, neika una meme.

¹¹ Kanye teniltona kume. Atonye bira, el kanye talima pia malye ubuka ulule. El malye ulya deice arye, el bidamnye babye ati, pia malye ubuka winidalule. Anye bira, el pia malye wininanye, urasin lak kilildalule.

Asurat sirya dakna ati, nyabuk yupu

¹² Ura, ‘Na Nikopolis mutuku arukna li talak unamne’ tenen, akunum tenepsa anya arye, narye nun kwit yapu, Artemas ap, Tikikus ap, dopreibnibuk, an dam yarikcopura, anda minopce na dam Nikopolis mutuku yandenamlyame.

¹³ Tonda nun kwit Zenas, ara ninye yupu bokolina ati, yupu melina deiyoknye ap, tonda nun kwit Apolos ap, ‘Sik patan ning dobuka, teleb ubuka, neikauk banamdak’ tenen, sik patan ning nirya ati, melipnamlyame.

¹⁴ Nun diba tenenyap ninye nirya ara, yata teleb winin ning do nirya, aninguk pataliba, moubuka pil dona ati, adiparyuk bikinamabe. Ara, 'Allah akunum diba tenenyap ninye arye, yuk talye ning nirya batakibirye, teleb un ninguk pia pataliba, moubuka talibibirye, pia piribuka diksukumuk unamap' tenen, nyapkine. Wininamaba deiyok ara, 'Asum-asum nirya, nun patapsilye ning kintinibuka delina ap, yuk nang ati, melibuka arena ap, unamabe. Tonda 'Nunce teleb teleb ubuka kum wininyap' tenen, nyapsine. Tonda, talye-talye winina kumce, pil pia teleb ubuka dolamipya ani, 'Teleb winin ning weik winibipya deice arye, duk weik mounamsil' tenen, na Paulus arye, nyabuka sekeipkine.

¹⁵ Telebe, na mi Tituso, na ap unyap ninye nirya arye, anti, “Telebe,” nyapkiake. Aning atouk, an dam unyak nang diba tenenyakce, nunti teleb tenebuka kanye delisinyak nang ati, “Paulus arye nyapsile,” nyabuka sikti nyapnulyame. 'Allah arye bico tenesilirye, el kanye aryuk, anggun pil dona ati, melibuka arinamsil ning, anggunti weika arye arisiliba, dolonamlum' tenen, na Paulus arye, anggun nirya ati, Allah morosunune. Telebe, na Paulus arye nyapkine. Asukumuk deipkine.