Titus 1 - Eipomek

Paulus arye, “Telebe” nyana ati, nyabuk yupu

¹ Telebe, na mi Tituso, an ap, neika Yesus Kristus dib tenebupubuk, kanye talima dukdongopsuk ati, na mi koprop atonun ulyamnye anti, na Paulus arye asurat sekeibkine. Na Paulus ara, Allah el amu tam unirye, el yupu uk kekebuka, el piluk donune. Yesus Kristus arye, ‘Na yupu dobuka peterelbanamle. Elda na Rasulnye unamle’ tenen, wipdeipnukura, Allah arye, ‘Lyepnamne’ tenen, wipdeiamuk ninye ara, ‘Sik arye, elti, weik arye dib tenepnamak’ tenen, pil donune. Tonda aninye arye, ‘Allah el dipkoprop yupu weik arye kel biknamak’ tenen, pil donune. Allah el yupu ara, moubuka kekebibye deice arye, Allah el funguk ulye touk, diksukumuk uptibye.

² Allah arye tilila yupu pia kum nyalule. Aning-aning kabul kum kwepdeiamuk talak ara, “Bol kobuka pia kam una deiyok ning arepnamsine,” nyabuka nyalilamsuke. Nun nirya arye, kanye teniltona kum aryuk, ‘Dipkoprop pia kam un ning arenamsil’ tenen, dib tenebuka dinauk unyabe. Wininyaba deice ara, nun dib tenen ning ap, kel bikinyap ning ap, ulule. Yuk deiyok ton kume.

³ Nun Lyena Deiyoknye Allah arye, “Na yupu dobuka peterelbanamlyame,” nyapdeipnuk deice arye, Allah el yupu dobuka peterelbalamse. Allah arye, ‘Pia teleb talak, atalak ani,’ tenebuka wibuk talakuk, melilamnukba, narye el yupu dobuka peterelamsa deice arye, el yupu lak kipdeipsuke. Na Paulus arye nyapkine.

⁴ Ura, Tituso anda dib tenelyamnye ati, na mi kopropa atonun ulyame. Ura, na mi Tituso, nun ni Allah ap, nun Lyena Deiyoknye Yesus Kristus ap, sik bitinye arye an Titus ati, bico tenekururakce, sik kanye aryuk talye melikururak ning ap, nun malye una ati, wenebuka talye olopsitiring bukni, aning namin kisururakce, nun patasilye ning urdem aryuk arisururak ning ap, tonda, ‘Yuk nang ap, yu ulana kumce kanye deibuka telebuk unamak’ tenen, arikururak deiyok ning ap, tuba arikururake. ‘Aning nirya ara, tuba-tuba weik arye tabakuka arenamkirak’ tenen, an Titus ati, Allah morokunune.

Paulus arye, ‘Titus ara, Kerit mutuku pil donamle’ tenen, nyabuk yupu

⁵ Tituso, Kerit mutuku dopdeipkisa deiyok ara, ‘Pil akunum deiyok koubuka, pil dopnin basiryuk batakse ning ara, tuba tonap, sirya daknamle’ tenen, dopdeipkiseura, batakuka bikise. Ara, “Winipnulyam,” nyabuka lak nyalamse touk, anyasik nang, mutuku-mutuku nirya, dib tenebik nang, ‘Sik Yesus ati dib tenebik nang, sik Allah yupu asik deiyok nang wibuka deipnin banamlyam,’ tenen ati nyapkine.

⁶ Ara, Allah yupu aik deiyok nang, dib tenen nang, sik deiyok nang ara, anyapnukin ning wininyak nanguk wipnamlyame. Sik adiparyuk wininamake. Sik malye winina pia kum arye, telebuk unyakbuk, yuk ninye arye, “Anye bira malye winilule,” nyapmanto kum nanguk, wipnalyame. Tonda, sik kil weik arye dona kum, tonok kiluk dobuka, telebuk unamake. Sik mapu ara, dipkoprop Allah dib tenebikirye, telebuk wininyakbuk, yuk ninye arye, “Kume, sik mapu ara, sik kanye pia malye ninguk pataplibuk, malye-malye wininyake. Kanye pi dobuka, sik ni yapu nyanyak yupu ara, pia kum kekenyake,” nyapmanto kum nanguk, wipnalyame. Teleb ning ara, sik nyapu teleb ubuka winin nanguk, wipnalyame.

⁷ Aning ara, talye ati kum nyapkine. Allah yupu peteren nang, sik melina deiyok nang ara, dib tenen nang, sik kanye melipdakirye dinamak anya arye, talye pil kum donyake. Sikda, Allah el pil talibuka donamaka ati, sik adiparyuk maknya kintinibuka dina ap, yuk nang yanina ap, kum winiptinge. Tonda, yuk ninye ati minop derelana ap, wenena ap, kanye wangalamak mek pia pataplibuk, weik arye dina ap, kum winiptinge. Tonda, yu weik ubuka, yuk nang oldana ap, bona talin ning yo bok ap, weik arye dolona ati, tenepce arye, minin yupu nyana ap, anirya ara, sik adiparyuk pia kum wininamake. Amalye-malye winin nang ara, ‘Allah ati diba tenen nang, sik melina deiyok nang unamak’ tenen, wibuka pia kum delinamlyame. Aning kum bukni, ‘Allah yupu peteren nang, sik melina deiyok nang unamak’ tenen, diksukum unyak nanguk, wibuka delinamlyame.

⁸ Anirya kum bukni, lak nyapnukin ning teleb un ninguk unyak nanguk, ‘Allah yupu peteren nang, sik melina deiyok nang unamak’ tenen, wibuka delinamlyame. Ateleb winin ning ara, ani. Ara, yata ning do nirya, teleb winin ning atibuk patapnamle nanguk wibuka delinamlyame. Tonda, yuk ninye do, ninye asik nang do, sik aik yangana ati, “Telebe,” nyabuka, buplan kukulikirye, melinauk wininyake. Tonda, sik pataplye ning, talye kanye bobuka, winina kum arye, ‘Malye winipnyak’ tenen, dipsukumuk tenepce, telebuk wininyak nanguk, wipnamlyame. Sik bidamang ati, pia bita dilakirye, diksukumuk winikirye, Allah ati pia mambul tenebuka, elce nyasilye touk, wininyak nanguk wipnalyame. Tonda malye kum winibikibuk, yuk nang arye, “Sikda malye wininyake,” nyabuka, kum nyapmanto nanguk, pia diksukum unyak nanguk, wina telebe. Anirya ati ara, ‘Anang ara, diba tenenyak nang, sik melina deiyok nang unamak’ tenen, wibuka delinamlyame. Na Paulus arye nyapmakine.

⁹ ‘Allah yupu aik deiyok nang winipnamak’ tenen, wipmanto nang, sik wininyak ning ton nyapnune. Ara, Allah el dipkoprop teleb yupu, Yesus ap, nun ap, peterelamubu touk, moubuka kekebikirye, ayupu talibuka wininyak nanguk, wina telebe. Winibikce nang ara, Allah el yupu dipkoprop ulye touk, moubuka peterenyak deice arye, yuk nang kanye arye melina ap, Allah yupu yanin nang ati, “Amalye winin ning bataklulume,” nyabuka, sik yupu sekikirye, teleb ninguk lipsisikuka peterena ap, aning wininyak nanguk, wibuka delina telebe. Yuk ton kume. “Amalye winin ning bataklulume,” nyabuka, sik yupu sekikirye, diksukumuk lipsisikuka, peterena ap, aning wininyak nanguk wibuka delina telebe. Yuk malye ning, talibuka wininyak nang ton, wibuka pia kum delinamlyame. Aning winina meme.

¹⁰ Ara, talye ati kume. Wini talak ara, Allah yupu ap, ninye deiyok nang nyanyak yupu ap, ati, kekena kum arye, lik tenebuka, yanin nang weik unyake. Ninye arye, dipkoprop teleb pil dona kum arye, talye yupu uk, weik arye talye nyaplobuka nyakirye, yuk ninye ati, tilila yupu talye nyakibuk, atalye yupu mangkau asa aryuk, diba tenenyake. Ton nang ara, mitik arye wininyak bukni, sik Yahudi yala ninye arye, “Den bam bol mouse ning adiparyuk sekenamlulume,” nyanyak nang, sik aunyaka ara, weik arye, talye yupu nyabuka, tilila yupu peterenyake.

¹¹ Atilila yupu nyanyak nang ara, sik malye yupu peterenyaka deice arye, anyasik-anyasik ninye akunum diba tenelamik bukni, tonok-tonok ton kum, sik nirya arye, dib tenebik ning, Allah yupu batakuka, weik kanye mambul kilinyake. Ara, atalye yupu nyanyak nang arye, yuk nang ati, peterenyaka deice arye, tonok-tonok kum bukni, anang weika arye minop talak kunum diba tenelamik ning, bataknamyak ati, atilila yupu nyanyak nang arye, yuk nang ati, weik kanye mambul kilinyake. Aning ati ara, atilila yupu, tenepce arye nyanyak ninye ati, “Amalye winin ning ap, tilila yupu nyanmalum ning ap, adiparyuk bataklulume,” nyabuka, yupu sekenamlyame. Amalye nang talye yupu peterenyaka deiyok ara, ‘Yo bok weik arye dolonamap’ tenen, tilila yupu tenepce arye, nyanyake.

¹² Naryuk, “Sik anang ara, tilila yupu uk nyanyake,” kum nyanune. Anggun tam nang babye, Kerit mutukunye, elda sik yupu lak nyalamuknye birye, ayupu nyabuk. “Kume. Kerit mutuku unyap ninye ara, atalak-atalak nirya tilila yupu uk nyabikce, pia malye ninguk patapliba, yu weik ninye unyabe. Tonda, yuk ninye nirya, din pataplibuk, mitika arye dilamak atonun kume. Nun Kerit mutuku nang ara, din pia weik arye talye dibuka, din tula nang unyabe,” nyabuk.

¹³ Sik mining tamnye birye, nyabuk touk, dipkoprop sik Kerit mutuku nang arye, amalye ning wininyake. Aning ati ara, ‘Dipkoprop sikce Allah el yupu uk, talibuka unamak’ tenen, sik yupu sekmince, mikip asa arye wenepminyopura, diksukum yupu uk, lipsisikuka peterenamlame. Ateleb yupu akunum peterepminyopura, awise nang arye, akunum kekebicopura, aminyan talak Allah el dipkoprop yupu kekebuka, dib tenebicopura, diksukumuk ubikirye, Allah el yupu batakna kumce, pia darabuka, telebuk unamake.

¹⁴ Sik Kerit mutuku unyak ninye ati, mikip asa arye wenepminyopura, aKerit mutuku unyak kili sal ara, Yahudi yala ninye arye, talye-talye nuklamak yupu, nong kum upnamle yupu, minop talak nuklamik yupu ara, tuba kum kekenamake. Tonda, Allah yupu batakuka, yaninyak ninye arye, ‘Winipnamlume,’ nyabuka, tilila nyanyak yupu ton, tuba kum kekenamake.

¹⁵ Yata ninye do nirya, sik kanye talima etekdop unyak ninye ati ara, pia telebuk ulule. Bukni, yata ninye do nirya, sik kanye talima pia malye ninguk tenebuka, patalye ninye ati ara, aning-aning nirya, pia malyeuk ulule. Aninguk kume. Sik kanye tenen ning ap, sik talima noutam ning ap ara, pia malyeuk akunum uplibuk, ‘Aning telebe, aning malye’ tenen, moubuka kum teneptinge. Sik kanye talima akunum kwalinmala ati, teleb ubuka pia kum tenebtinge. Pia walwal nanguk akunum unyake, nyapkine.

¹⁶ Ato wininyak ninye ara, nyanyake. “Kume, Allah diba tenebuka, kanye dukdongobuka unyabe,” nyabuka, talye nyaltakanyak bukni, sik malye-malye ninguk winiyak deice arye, Allah batakuka yaninyake. Anang ara, Allah el yupu nirya, kekena kum arye yaniplobikibuk, Allah arye sikti, pia lik tenelirye, lik ulule. Yata teleb winin ning do, sik pia kum winiptinge. Malye winin ninguk, tenebuka wininyake. Na Paulus arye sekeibkine.