Rut 3 - Eipomek

Rut ap, Boas ap, epradikce, yupu taliprik yupu

¹ Rut ap, el yamal kil Naomi ap, neika daulamdika ani, tonok sum ara, Naomi birye nyabuk. “ ‘Narye anti, ninye dopminba, pia melimkiliba, telebakuk, neika unamlame’ tenen, pia piribuka enamne. Ninye dopminyeba, an patapkilye ning nirya ati, melimkiliba, telebakuk pia unalame. Aning ara, mambul weik anya arye, enamkine. Ati, moubuka tenenamlyame.

² Tonda, gandum wa pil donmangu kilapu ara, Boas el gandum wa ap, el jelai wa ap, pil don kilapu ati ara, an ap neika pil donamlume. Ura, Boas bira na domsinye, el yalanye ulula ati ara, elcuk dopkilirye, melinamkil do, kum do? Alukunyan noutam ara, el wa win dam unmalce, roti deiyok ning gandum dobuka winmaliba, kala saklyopura, duk dobuka moubuka delinalame.

³ Ati, mek kekminyopura, nintong teleb mek an nong deice likmince, baju teleb ning ongopnulyame. Winipminyopura, Boas pil donamlak binulyame. Binulam bukni, ‘Na yanmane,’ kum nyapnulyame. Bukni, gandum kala pil akunum sirya dakminyopura, lak nyana telebe. Din ap, mek ap, akunum diplyopura, ‘Na yanmane,’ nyapnulyame.

⁴ Moubuka tenipmince, winipnulyame. ‘El malbinulyak ara, dan do?’ tenen, dinmaminya ani, akunum malbilyak ara, eipmince asukumuk mapnulyame. Selimut pakupdanuka mapmalya dam, el yan deipmalye dam, binuka mapnulyame. Winipminyopura, selimut pakupmalye yan dam arye, dangabuka mapnulyame. Winipminyopura, nun amutuku winilamap touk, ‘Elce eipnilirye, dobuka melinamnil’ tenen, winilamap touk, el yan dam mapnulyame. Winipminyopura, aminyan elce, ‘Winipnalame,’ nyabuka, laka nyapnamakile.” Naomi birye, Rut biti nyabuk.

⁵ Nyabukopura, Rut birye tamubuka, nyabuk. “Nongo an nyapmanilam yupu nirya, bikmana ati, aninguk winipnamane,” nyabuk.

⁶ Ayupu akunum sirya nyabukopura, Rut adiparyuk, gandum wa wiamikak sekuka, gandum kwekenmekce, kala kokon pil donmekak biyuk. Biyukopura, el yamal kil nyapdeipmok touk, aning nirya winibuk.

⁷ Aminyan ara, Boas din ap, mek ap dibukura, el mikip ubukce, kanye teleb ubukura, gandum duk teleb ning wibuka, deilinmek dam malbiyuk. Mabuk talak ara, Rut bira yupu nyana kum, tunim abuka, Boas el selimut pakupdanuka mapmokak, el yan dam binuka, Boas el yan pakupmok ning dangabuka, el yan damuk, binuka mabuk.

⁸ Winibuka mapmok bukni, alukunyan noutam ara, lelim ton talye karin arye nyabukura, Boas kekebukce, Boas ara, ‘Na nong da angupnaman’ tenen, uldeyukce, el yan deipmokak, donoklamukak bol pebukba, kil tonok, el yan dam mapmokba, Boas eibukce, lukdayuk.

⁹ Lukdayukopura, elce asipdeyuk. “Akilo anda yata kil do?” nyabuk. Nyabukba, Rut birye tamubuka, “Nara, an pil don kil Rut yanmane. Na nie, anda na yamal kil domuknye, el yala nang ulyama ati, nun ikin usilye ning ara, mangkau kibuka, kum bataknamsilame. Lyepsimince, nunti pia talibuka melinamsilame. An adiparyuk talibuka melinamsilame. Ati ara, amutuku ninye ara, anggun winilulum atonun, ‘An selimut mouse dam, na nong singnipnamanilam’ tenen, moropkine.” Rut birye, Boas biti nyabuk.

¹⁰ Nyabukopura, Boas birye, Rut biti nyabuk. “Akilo, ‘Nun ni koprop Allah Yahweh arye melipnamkile’ tenen, moronamkine. Ara, minop talak, an yamal kil biti, pil melibuka dolalum ning ara, teleb ulamlum bukni, wini talak ayupu nyapnilam ning ara, pia weik teleb ning nyapnilame. Tonda, dipkoprob, anda wel nang dopmanto kil ulyam bukni, bona talina kum nang babye, bona talin nang babye, ‘Kam nang dopnitinge’ tenen, sik dam kum binmalame. Aning kum winipmalam bukni, na wisi dasinye bukni, telebe nyapmanilama ati, nyapkine.

¹¹ Ati ara, ance nyapmanilam yupu nirya ara, narye kekebuka, winipnamkina ati, Rut ance kanye teniltona ap, ilil una ap, kume. Tonda, amutuku unyak nang nirya arye anti, ‘Dipkoprop, elda pia teleb kil. Diksukumuk ulule,’ tenekinyake.

¹² Ance, ‘Na yamal kil domuknye, el tam nang ulyame,’ nyapmanilam ara, dib nyapmalam bukni, Naomi domuknye, el tamnye pia dipkoprob, el weit koproba tonok ton aulule. Ati, elcuk an minop dopkutue. An unamlam ning nirya, narye melipkitinye bukni, anye bira Naomi domuknye el yalanye, el weit koproba ulula ati ara, elcuk minop dopkuturye, an ikin ukilye ning, melipnamkutunye ulule.

¹³ Anye birye minop dopkute. Anya arye, ‘Elcuk melinamkil do, kum do?’ tenen, elti, asipdenamne. Ati ara, alukunyan noutam ara, aunmamin bukni, bereklyeura, anyapmakinanye birye, ‘Akil dobuka melinamkine,’ nyaplyopura, eluk dopnamkile. Bukni, anye birye, ‘Na kume,’ nyaplyopura, naryuk dopkinirye, an patan ning ara, naryuk melinamkine. Aning ara, talye kum nyapkine. Pia kam ulinye Allah, el si Yahweh si deice arye nyapkine. Dipkoprop anyapmakin tonun, melinamkine. Ati wini talak ara, mapmaminya bereklyopura, anyapmakin ning nirya ara, sirya winipdeipnamakine,” Boas birye Rut biti, nyabuk.

¹⁴ Nyabuka ati ara, Rut bira, Boas yan damakuk mapmokbuk, berekuk. Bukni, Boas birye nyabuk, “Min kum berekaplye talak aryuk, bukdakuka binulyame. Ara, ninye yuk nang arye, ‘E, gandum duk kwekenmongak sakanmo ara, akil yanmo arye, malye winimok do?’ tenen, kel bikicak ati, min kum eipmakice talak aryuk binulyame,” nyabuk. Boas birye, nyabuka deiyok ara, Rut lukunyan yanuka mapmok ning ara, yuk nang arye, ‘Rut bira Boas yan dam mapmoe, nyapnicak’ tenen, nyabuk.

¹⁵ Berekuk talak ara, Boas birye Rut biti, nyabuk. “An kisok kaluldongon baju, kwiribuka deipminba, narye gandum duk, aning deice yamupdeipnamkine,” nyabuk. Nyabukopura, Rut birye, anyapmok touk winibukba, Boas birye gandum duk yamukdongobuk. Yamupdongobuk ning ikin ara, 13 kilo ap, ton tabakuka mitik anun ton arebuk. Winibukopura, Boas aning doprobukce, Rut takunya deice deibukba, takupdakuka biyuk. Winibuk talak, Boas bira tamubuka, gandum pil donmekak batakuka, el aik tamubuka biyuk.

¹⁶ Aning akunum winibukopura, akil Rut tamubuka, el yamal kil, Naomi damak biyuk. Biyukopura, Naomi birye, Rut biti asipdeyuk. “Akilmuo, Boas birye anti, yata wiripmakil do?” nyabuka asipdeyukura, Rut birye, Boas winipmok ning ap, nyapmok yupu ap nirya, lak binuka nyabuk.

¹⁷ Tonda, Rut birye, ayupu dukdongobuk nyabuk. “Boas birye, aning nirya akunum winipnuopura, gandum duk 13 kilo ton, mitik anun tabakdongobuka arepmanue. Arepnurye, elce nyapmanue. ‘Akilo anda talye taruk bananguk, an yamal kil dam, kum binulyame,’ nyapmanile,” nyabuk.

¹⁸ Nyabuka sengabukopura, Naomi birye nyabuk. “Winipmakil ati ara, ‘Na dopse tamnye Boas birye, elda yata wiripnamnil do?’ tenen, wini talak ara, kanye aryuk dinauk unamlyame. Anye birye, asum aning nirya, kum sirya dakmalye talak aryuk, dikdik sena kumce, anyapmakil ning nirya, winibuka sirya daknamale. Ati pia dinauk unamlyame,” Naomi birye, Rut biti nyabuk.