Rut 2 - Eipomek

Rut ap, Boas ap epdarik yupu

¹ Naomi domuknye Elimelek, el tam nang arye deiamiknye tonok ton, elda weiknye, ton bona utotoa, weik talinanye ulamuk. Amutuku nang arye, el winilamuk ning nirya eibuka, kel biklamikce, elti, ‘Weik mambulnye,’ tenelamik. Anye el si ara, Boas.

² Naomi ap, Rut ap, Betlehem mutuku neika ulamrik talak ara, tonok sum ton, Moab mutuku kil, Rut birye Naomi biti, nyabuk. “Nongo, ance telebe nyapniminba, nara gandum lilbinune,” nyabuka morobuk. “Ara, yuk nang gandum wa dam binibuk, nati bico tenepnilinye birye, ‘Asukum liptume,’ nyapnutuba, ‘Liptinye’ tenen, nyapne. Telebe nyapniliba, sik gandum wa wiamice likiba, ‘Tukak talye saklye ning bunaman’ tenen, nyapne,” nyabuk. Nyabukura, Naomi birye, “Yo, akilmuo, dadilbilyame,” nyabukura, biyuk.

³ Gandum lilban nang, panabuka bayikura, Rut adiparyuk, aminyan melibuka biyuk. Melibukba, sik neika gandum wa win dam biyikce, sekenmekce, sakenmekba, sakanmok ning ara, aminyan tam arye bubuka, lipnin banmok. Rut birye bubuka, linmok wa win dam ara, ‘Awa deiyoknye bira, Boas wa aulule,’ kum tenepmok bukni, dipkoprob ara, Elimelek yalanye Boas, el wa noutam bubuka linmok.

⁴ Atalak ara, sik aninye wa win dam, binuka linmek bukni, Boas Betlehem mutuku arye tamubuka, el wa win dam yayuk. Yayukce, el gandum linmek ninye ati, “Na kwit capu, anggun nirya telebe. ‘Allah el si Yahweh arye, anggun ap neika ulirye, pia teleb kipdeipnamsile’ tenen, Allah moronamsine,” nyabuk. Nyabukba, aninye sik nirya arye tamubuka, “Nun ni an babye, ‘Yahweh arye, bico tenepkilirye, pia teleb kipdeipnamkil’ tenen, moronamkiyabe,” nyabik.

⁵ Aning akunum nyapdayikopura, Boas birye Rut eibukce, el gandum lina deiyoknye biti, “Akil ara, yata kil do,” nyabuka asipdeyuk.

⁶ Asibukba, el anye birye, “Akil ara, Moab mutuku kile. Naomi melibukba, sik neika Moab mutuku arye, yanmarak kile.

⁷ Tonda, na dam yanmalce, ‘Nara, gandum wa win dam daknin banmakiba, aminyan melipnirye, sakanmalye ning, bulubuka deipnin banamane,’ nyabuka, yanuka moropmal ati, narye, ‘Telebe awininmalyame,’ nyapmanba, beren tam dikdik sena kumce, apil donmale. Wini talak ara, dikdik sen talak kipmal ati, doltakne aik dam binuka bukmace, dikdik sepmake,” nyabuk. Boas el gandum wa wina deiyoknye birye, Boas biti lak nyabuk.

⁸ Nyabukopura, Boas birye, Rut biti nyabuk. “Akilmu, na kanye deipkine. Anyapnukin ning ara, moubuka kekepnulyame. Anda yuk-yuk nang gandum linmak dam bulbana kume. Tonda, asukum arye batakuka, yukak bana kume. Asukumuk unamlyame. Tonda, na pil melin kilapu ap, neika unamlume. An ka kilapu pil donmak sukumuk, binuka pil donalyame. Sik dam arye batakuka, yukak bana kume.

⁹ Tonda, ance dinmaminba, na pil don nang gandum wa win dam lilbakceura, an ka kilapu sik lilbinamacakuk, an ap lilbanamlulume. Sik wa win dam binuka bukicopura, an babye sik bukice touk, aminyan binuka melinalyame. Tonda, na gandum wa talibuka pil donyak nang ati, ‘Akil anggun melipsilyopura, el dam ton kum nyanamlulume. El nong talina kume. Sik leibuka yukak unalyame,’ akunum nyapdeipmane. Tonda, an mek patapkilyopura, na wa win nang arye, kwebuka deipmace mek makau uk, kwebuka dinamlyame. Asum-asum nirya ara, na pil don kilapu ap, melibuka unamlyame,” Boas birye, Rut biti nyabuk.

¹⁰ Nyabukba, Rut akunum kekebukce, nong kanupdongobukce, tukwak dinmokce, Boas biti kibuk. Rut birye, tamubuka Boas biti nyabuk. “Naio, nara talye kil anya arye, ance kanye teleb arye, winibuka kum nyapnutum kile. Nara, yuk mutuku, ninye asik kil anya arye, ance anyapnilama atonun, kum nyapnutum bukni, teleb yupu nyapmanilame,” nyabuk.

¹¹ Rut birye nyabuk buk, Boas birye, tonap tamubuka nyabuk. “Yuk nang arye anti nyapnikba akunum bikise. Ara, an domlumba dibuknye akunum dibukba, an yamal kil ati, pia teleb kanye lon pil dolamluma ani, wini dopre yangalyam ning ara, bikise. Tonda, ani ap, an nin ap, an mutuku ap nirya, batakuka nun mutuku yalume. Winiplumce, an bikina kum ninye ap neika ansinibuka pil domunya ati, aning nirya yuk nang arye lak nyapkikba bikise.

¹² Ati ara, an kanye lon pil dopnin yangalyam ning nirya ati ara, Allah el si Yahweh aryuk dekna weik ning arepnamkile. Ayam mapu ara ilil upliba, ‘Nun nin irinamsil’ tenen, el dam yakiba, kil ayam arye el mapu el pol amu tam irilamle touk, anda, ‘Allah arye kalikuka melinamnil’ tenen, amutuku yanmalame. Ara, ‘Israel ninye sik ni koprop Allah, el si Yahweh arye, melibuka kalikinamnile’ tenen, amutuku yanmalama anya arye, ‘Allah arye, dekna weik arye arenamkil’ tenen, nyapkine,” Boas birye nyabuk.

¹³ Nyabukba, Rut birye tamubuka nyabuk. “Se na nio, anda na deiyoknye ulyame. Ance pia dipkoprob nati, teleb tenepmanilame. Na patapnil ning ara, ance nati, ‘Elda teleb kil,’ tenepnamnilame. Nara, an talye pil dokikce kilapu atonun kil kume. Nara, anggun amu tam, pia malye kil koprop unun bukni, ance teleb yupu nyapnilama deice arye, na kanye deipkine. Ikin upnuka ati, na talima melipmanilam deice arye, ance nati melipmanilamba, na kanye teleb unman ati, teleb nyapkine,” nyabuk.

¹⁴ Aminyan talak, anang nirya, sik din keting akunum ubukopura, Boas birye Rut biti, nyabuk. “Na ka kilo, asukumuk yalyame. Din ning kintinip deipmakina, yanuka diplyame. Aroti din ning dobuka, anggur mek makau pum tam burubuka dipnulyame,” nyabuk. Nyabukba, Rut yayukce, Boas gandum pil don nang bukmekak uk yanuka bukukba, Boas birye, uku arye dapmok gandum dobuka Rut biti arebuk. Arebukba, Rut kwaning patapmok touk dinmoka ani, akunum boubuk. Boubukopura, agandum din ning ton tuba batakuk. Din ton tuba aubuk.

¹⁵ Atalak Rut akunum din dibukce, gandum dakalbiyuk talak ara, Boas birye el gandum pil don nang ati nyabuk. “Anggunce gandum koubuka deipmalum ning dam upmal ning doproplya babye, ‘Aning dolona kume,’ nyabuka, yupu kum sekenamlulume. Ara, ‘Akil alye dakdalirye, ilil uplyak’ tenen, nyapsine.

¹⁶ Aning kum bukni, gandum dakanamunye talak ara, nirya koubuka, delina kume. Ton ning ara, elti, bokdeipmunba, el ton dolona telebe. Winiplirye, gandum teleb ning ton, bubuka linamle. Tonda, elti, wenena pia meme. Elti malye kilina kume,” nyabuka, Boas birye yupu nyapdeibuk.

¹⁷ Boas birye nyabuka ati ara, asum ara, Rut beren tam arye, gandum duk bunmoka ani, sintam kibuk. Wininmok ani, gandum duk bubukce, teikinmok bukni, duk sakuk ninguk bulubuka delinmok ning nirya ara, ikin ara mikbarye (13) kilo ubuk. Ikin ara, 13 kilo atonun, tonda 22 liter atonun, ubuk.

¹⁸ Rut birye winipmok ning ara, bobuka, el aik tamubuka, bobiyuk talak ara, el yamal kil dam biyukce, el dopropmok ning binuka, lak nyabukura, Naomi eibuk. Tonda atalak ara, el keting duk-duk arye dinmoka ani, boubukba, ton bopmuk ning babye, el yamal kil binuka, arebuk.

¹⁹ Winibukba, el yamal kil Naomi birye, asipdeyuk. “Aning nirya ara, dan tam arye bobuka yanmalam do? Tonda, arup ara, yatanye gandum wa win dam unmalum do? Aunmalam wa deiyoknye birye eipmakilce, melipmakila ati, anye bira, ‘Allah arye, pia elti, tuba melinamle’ tenen, moropnune,” nyabuk. Nyabukopura, Rut birye, el yamal kil ati, asum pil donmokak ap, awa taleamuka, weik deiyoknye ap, aning nirya ati, yanuka laka nyabuk. Tonda, Rut birye nyabuk. “Na gandum duk bulbinmanu wa deiyoknye bira, el si Boas,” nyabuk.

²⁰ Aning akunum kekebukopura, Naomi birye el yamal kil ati, “Anye bira, ‘Yahweh arye weik arye melinamle’ tenen moropne. Nun ni koproba Allah arye, bico tuba tenesilirye, melisulule. Nun kam unyap ninye babye, akunum dibik ninye babye, tuba tenesilirye, teleb ulisulule. Tonda, an nyapmomnye bira, ara na domsinye Elimelek, el tamnye ulule. Boas bira, Elimelek tamnye ulula ati ara, elce kanye deipsuturye, nun ikin usulul ning ara, melipsutue anya arye, nunti, ‘Telebe,’ tenepsutopura, batakana kumce, pia talibuka melipsutue. Na kanye ara, elce lyepnamsil ca. Bukni, nunda dinauk unaname,” Naomi birye nyabuk.

²¹ Nyabukba, Moab mutuku kil Rut birye, el yamal kil ati, nyabuk. “Nongo, tonda el anye biryuk, ‘Anda na gandum dakne nang, asukumuk umunce, sik dakanmaceba, saklye ning tuba bunalyame. Na gandum wa nirya linamaka ati, winilaminya ani, sirya daknamlame,’ nyapnuke,” nyabuk.

²² Nyabukba, Naomi birye tamubuka, Rut biti nyabuk. “Aning ara, pia telebe. Boas el gandum wa pil don kilapu ap, sik pil donmacakuk, melibuka linamlyame. Anyapmakin ning ara, ance yuk nang gandum wa win dam binuka, pil dopminyopura, ‘Yuk nang arye, an dam yanamkiyake. Yuk talye nang arye, malye kipdeipkicak’ tenen, nyapkine,” nyabuk.

²³ Ati ara, Naomi nyapmok touk, Rut bira, el ka kilapu ap, neika Boas el gandum wa ap, el jelai wa ap, asukumuk pil dolamuk ani, akunum nirya sirya dakuka, liprobik. Ara, minop talak arye, gandum duk ap, jelai duk ap, lipnin yangalamika ani, sirya dakdongobuka liprobik. Atalak nirya Rut bira, el yamal kil ap, uk ulamdik.