Rut 1 - Eipomek

Elimelek ap, el mapsilip nirya ap, Moab mutuku biyik yupu

¹ Minop talak ara, ninye deiyok nang, Raja nang arye, Israel tam nirya min kum taleamik talak ara, ‘Malye ning ani, teleb ning ani,’ nyabuka, yupu bokolina deiyok nang arye, amutuku nirya talibuka, yupu bokolilamik. Atalak noutam ara, dina patana weik deiyok koubuk. Ara, Israel ninye ulamikak nirya, din kum danin balamukba, aninye nirya, din patalamuk. Winibuk talak ara, Yehuda tam noutam bukni, ninye asik dobuka ulamik mutuku si, Betlehem mutukunye, el si Elimelek, ulamuk. Tonda, el kil Naomi ap, el mapu bitinye ap, sik mutuku ara, Betlehem ulamik. Amutuku ulamik bukni, din patalamukba, Elimelek ap, el kil ap, el mapu bitinye ap nirya, Betlehem mutuku arye batakuka, Moab mutuku binamikce, ulamik.

² Anye Elimelek, el kil si ara, Naomi. Sik mapu si ara, Kilyon ap, Mahlon ap, ulamrik. Sik yala ara, Yehuda yala nang ulamik bukni, ayala si ara, Efrata yala ninye ton nyalamik. Sikda Yehuda yala ninye arye taleamik tam noutam, Betlehem mutuku ulamik bukni, din patabuka ati, sik mutuku arye batakuka, Moab mutuku tam tikilbinamikce, binuka ulamik.

³ Ulamika ani, Naomi el akanye, Elimelek dibuk. Dibukura, Naomi ap, el mapu bitinye ap, asukumuk ulamik.

⁴ Ulamik talak ara, Naomi el mapu bitinye nang arye, Moab mutuku kilapu doprik. Tonoknye dobuk kil si ara, Orpa. Tonye dobuk kil si ara, Rut. Sik nirya amutuku noutamuk daulamika ani, keting tamun tagu barye (10) mamik.

Naomi ap, el yamal kil Rut ap, Betlehem mutuku tamubuka birik yupu

⁵ Ulamika ani, Naomi el mapu bitinye Kilyon ap, Mahlon ap, akunum diprik. Naomi el mapu ap, el akanye ap, akunum dibikce, el dem batakikba, elda youwak kil kibuka ulamuk. Winipdikce, sik nin binyuk, el uk ulamuk.

⁶ Dipdik talak ara, Naomi ap, el mapu arye domrik kilapu ap ara, Moab mutuku uk unmekce, kekenmekba, yuk nang arye, ‘Allah el si Yahweh arye, el mapu Israel ninye ati, bicoe tenyamukce, melilamuk deice arye, mok weik areamukba, sik wa wibuka koulamik ning ayala-yala nirya teleb ubukba, dina weik bobikirye, din ning weik dilamake,’ nyanmekba kekebikce, Moab mutuku ara, batakuka yanuyika ati, sik nirya kintinibuka deibik.

⁷ Naomi Moab mutuku arye batakuka yanuyik talak ara, el mapu domdirik kilapu ap, sik neika, ‘Yehuda mutuku tamubuka binamap’ tenen, bisik banmek.

⁸ Atalak ara, bisik banmek bukni, Naomi birye sik akilapu bitinye ati nyabuk. “Teleb ning ara, anggun adiparyuk tamubuka, anggun nin yapu damuk bidurume. Na mapu bitinye akunum diprik nang ara, anggunce domrumce, kanye deibuka, teleb ubuka pil dolamdumce, nati weik arye kanye deibuka meilyamnurume. Aning nirya ati ara, Allah el si Yahweh aryuk dekna weik deknamsile. Anggun meilyamnurum touk, ‘Allah arye teleb kibuka melinamsile’ tenen, anggunti Allah moronamsine,” Naomi birye nyabuk.

⁹ Nyabukce, ayupu ton nyabuk. “Allah el si Yahweh arye, anggun sal tamubuka dona ati ara, elce tenepsuk ninguk birumunce, teleb ubuka unamdurume. ‘Anggunce nati teleb updeipnin, yanganururum touk, Yahweh arye anggunti, teleb kipdeipnamsile’ tenen, Allah moronamsine,” nyabuka, Naomi birye akilapu ati nyapdeibuk. Yupu akunum nyapdeibukopura, “Teleb aryuk daunamdurume,” nyabuka, mutubukopura, Orpa ap, Rut ap, sikda, weik arye engeprik.

¹⁰ Engeprikce tamubuka elti, nyalbirik. “Nongo ance nun batakana kume. Nun neika neiktoto bibirye, an yala ninye ulamak mutuku uk binamabe,” nyabuka moroprik.

¹¹ Nyaprik bukni, Naomi birye tamubuka nyabuk. “Kume, akilapu dipkoprob nyapmasine, anggun mutuku tamubuka binamarume. Yata deiyok ati anggun ap, na ap, neika unamap do? Anggun ap, neika kum bitibye. Anggunce nati ara, ‘Mapu tonap deiptuba, neptiringba, doptinimnye,’ tenepmanurumce do? Kume, na mapu tonap kum deipnamsine.

¹² Kume, anggunda, anggun minop talak ulamdum mutuku, anggun mutuku tamubuka dabidurume. Nara, akunum wisi dasa anya arye, sal ton tamubuka kum doptinye. Ati teleb ning ara, akilapu dabinamadurume. ‘Sal ton dopnamne,’ pia kum tenenune. Tonda, sal doptinya babye, alukunyan babye, sal taruk mourupnitingba doptinirye, sal mapu tonap deiptinye babye, anggun daulamturuma ani, kum dopturume.

¹³ Tonda, mapu ton deipliba, ‘Sik amapu neprikiba dopnanam’ tenen, unamdum talak babye, pia uku weik mapnamdume. Tonda, winipdumunya deice arye, ‘Yuk nang ara, kum dopnanam’ tenen, nyapdum do? Na kilmapu aning ara winina kume. Na kanye koproba dibuka ara, ikin weik upnile. Anggun babye atonun, anggun akanye yapu bitinye diprika ati, anggun babye, ikin usulul. Na kanye ara, Allah el si Yahweh arye, na wenepnuka ati, na ilil kanye bopne. Anggun ap na neika ulamibyopura, anggun ton ikin unamsile. Ati, ‘Winipnanam’ tenena kume,” Naomi birye nyabuk.

¹⁴ Nyabukba, Orpa ap, Rut ap, aning kekeprikce, tonap weik arye engeprik. Engeprikopura, Orpa birye, el yamal kil Naomi biti, iribuka mutubukce, “Telebe dabilyame,” nyabukce, el mutuku uk, tamubuka biyuk. Bukni, Rut elda, ‘Na yamal kil bataknirye, na mutuku tamubuka kum bitinye. Asukumuk unamne,’ tenebukce, el yamal kil bitibuk iribukce, asukumuk unmok.

¹⁵ Neika unmarik talak ara, Naomi birye Rut biti nyabuk. “Aning dipdelyame, an ka kil bira, tamubuka el mutuku ap, el yala nang dam bilirye, sik si erenyak ninguk binuka talipnamle. Ati an babye tamubuka bimince, anggun bitinye neikto touk, unamdume,” nyabuk.

¹⁶ Nyabuk bukni, Rut birye tamubuka, Naomi biti nyabuk. “Nongo, ance nati, ‘Tamubuka bilyame,’ nyana kume. Narye anti, batakuka kum bikitinye. Dan tam binalamak do, tonda dan binuka unalamak do, nirya ara, na pia tuba melinamkine. Tonda, an mutuku ara, na mutuku atouka. Tonda, an yala nang ara, narye, ‘Aninye ara, na yala nang atonun,’ tenenamne. Tonda, an si ereminye Allah ara, na babye el siuk erenamne. Nun neika unanama atia.” Rut birye nyabuk.

¹⁷ Nyabukce, ayupu ton nyabuk. “Tonda, nongo an dan tam dipminyopura, weipnamkiyakak ara, na babye asukumuk dipniba weipnamniyake. Na patapnil ning ara, ani. Narye anti, melina kumce, batakuka bikinyopura, na wenena ati, Allah arye ikin weik ning na deice deipnutue, nyapne. Ati ara, pia melipkineba, unaname. Unanam bukni, na dipnyopura, bataknamkin bukni, kumopura, kume. Atonun an dipminyopura, neika kum upnanam bukni, kam unanam talak ara, pia kum bataknamkine,” Rut birye nyabuk.

¹⁸ Nyabukba, Naomi birye Rut nyabuk ning moubuka kekebukce, ‘Dipkoprop Rut bira, na melipnamnile,’ tenebukce, tonap, ‘Na batakuka bilyame,’ nyan yupu ton kum nyabuk.

¹⁹ Ati ara, Naomi ap, Rut ap, sik neika bisik dukdongobuka banmarika ani, Betlehem mutuku birik. Sik akunum birik talak ara, amutuku ulamik ninye nirya bikikce, ‘Se’ tenebikce, ilil kanye bobik. Winibikce, amutuku ulamik kilapu nirya arye, “Se, ayanmal kil ara, dipkoprob Naomi yanmal do?” nyabik.

²⁰ Nyanmekba, Naomi birye sikti, nyabuk. “Anggunce na si ati, ‘Naomi’ nyalamnulum bukni, asi tuba sinina kume. Asi sina deiyok ara, ‘Kanye teleb bolul kil,’ ulula anya arye, asi tonap tuba kum sipnamnulume. Anggunce nati, minop si batakuka, na winiryuk si, ‘Mara’ nyapnamnulume. Asi sinina deiyok ara, nara ikin kanye weik bobuka, unun kil ati ara, akil si, ‘Mara’ nyapnamnulume. Mara nyana si ara, ‘Ikin kanye bolul kil,’ ulula anya arye, asi uk sisinamnulume. Deiyok ara, Allah aning-aning deice tam ulirye, el mikip weiknye El-Sadai birye, walwal kipdeipmanukba, na dam kanye ikin weik ninguk unulul ati, nyapsine,” Naomi birye nyabuk.

²¹ Nyabukce ayupu ton nyabuk. “Yuk si Mara nyapnamnulume, nyapmasina ara, urdem ati kume. Ara, amutuku batakuka binuse talak ara, aning-aning nirya, teleb aryuk talibuka ulamsirye, teleb kanye deipse bukni, na binuka ulamse mutuku arye batakuka, amutuku yanuka unaman talak ara, na akanye ap, na mapu bitinye ap, deibik. Tonda, aning-aning nirya kum kipnukba, ikinuk unululba, mambul kanye bonune. Aning nirya babye, ton bobuka kum yane. Tonda, na akanye koprop ap, na mapu bitinye ap, akunum dibik atia. Winipnuk ati ara, Allah el si Yahweh arye, na nong diamuk boyanmanile. Wini talak ara, ikin kanyeuk bobuka, unmana ati ara, anggunce na si ara, Naomi kum nyanamnulume. Ara, Allah mikip weiknye, aning-aning deice tam ululnye, El-Sadai birye, na wenena ati, weik mambul ning na dam areamnukba, pia ikin unulula ati nyapsine,” nyabuk.

²² Arup nyapmap touk, Naomi ap, Moab mutuku kil, el yamal kil, el si Rut ap, Moab mutuku noutam arye batakdikce, tamubuka Betlehem mutuku yarik. Yarik talak ara, gandum wa wiamika yupmekce, dinmek talakuk yarik.