Roma 4 - Eipomek

Abraham diba tenebuka deice, Allah arye, “Anda telebnye,” nyabuka diksukum kipdeibuk yupu

¹ Ura, diba tenena deice arye diksukum nang kilina ati ara, nun apu kopropa Abraham bira, yata wiribuka kel kiyamuk do? Aning laka nyapnusine.

² Abraham diba tenebukce, diksukumuk ulamuka deice, Allah arye, “Anda diksukumnye,” nyabuka, teleb kipdeiamtu toura, Abraham arye, “Nara, teleb ulamse deice arye lyepnuke,” nyabuka kwalilamtu bukni, aning atonun kum ulamuk. Ati, Allah dam ati kwalina yupu kum nyaptue.

³ Dipkoprop Allah yupu noutamak ara, Abraham biti yata nyasulul do? Ayupu ara ani. ‘Abraham birye Allah ati diba tenyamuka deice arye, Allah el kanye aniryuk, “Anda diksukum unanye,” nyabuka, teleb kipdeibuk.’ (Kejadian 15:6)

⁴ Ura, winipmanto yupu ton nyapnusine. Yatanye do nirya, ‘Dengna ning dopropnamne’ tenen, yuk nang ati pil teleb kibuka doplyopura, el pil dolamlya dekna ati, apil deiyok nang arye adiparyuk yo bok arinyake. Aning ara, kum bataktinge. Ayo bok arinyaka, ara talye ati kume. Ara el pil dolamlya dekna ati arinyake.

⁵ Bukni, Allah elda malye un ninye ati, lyepsilirye, diksukum kilisululnye ulula anya arye, elti, dib teneplinye biti, diba tenelya deice aryuk, Allah el kanye aniryuk, “Anda diksukumnye,” nyabuka, teleb kilisulule. Ara, anye teleb pil dolamlya deice arye kume. Anye el diba tenebuka deice, Allah el kanye aniryuk, anye lyelule.

⁶ Ayupu nyapmasin touk, minop talak ulamuknye Raja Daud sekamuk yupu noutamak arye, ayupu atonun ton nyapdeisuke. Daud birye, “Sik teleb pil donyaka deice arye kum bukni, Allah el kanye aniryuk, ‘Anggunda diksukum un ninye,’ nyabuka, teleb kilisulula ninye ara, kanye deibuka, pia telebuk unamabe,” nyabuk. Daud birye Mazmur yupu noutamak sekamuk yupu ara ani.

⁷ ‘Allah arye sik ninye nirya malye wininyak ning ati, namin kilirye, sik malye wininyak ning kum kibuka delisulul ninye ara, kanye deibuka pia telebuk unamake. Nunce Allah el yupu yanilamuburye, malye winilamupu bukni, Allah arye amalye winilamupu ning ati, akunum lyepsuk ninye ara, kanye deibuka, pia telebuk unamabe.

⁸ Yatanye do nirya, Allah arye anye, el malye winilamuk ning ati, “An malye winilamlum ning ara, ani-ani,” nyabuka, aning ati kum kibuka deiplirye, aminyan doryanamle talak nirya ara, pia kum wenepnamlanye bira, kanye deibuka telebuk unamle.’ (Mazmur 32:1-2)

⁹ Ura, ayupu deice arye, “Pia telebuk unamake,” nyalamuk ning ara, Yahudi yala ninye, den bam bol sekenyak ninye atibuk nyabuk do? Yahudi yala kum ninye, den bam bol kum sekenyak ninye ap ati, ayupu nyabuk do? Kume, ninye yala-yala nirya ati nyabuk. Ayupu deice ara, akunum nyapmasine. Nun apu kopropa Abraham diba tenebuka deice aryuk, Allah arye, “Anda diksukum teleb ubuka unanye,” nyabuka teleb kipdeibuk, nyapmasine.

¹⁰ Allah arye Abraham biti diksukum kipdeibuk talak ara, dan talak do? Anggun ton teneipdelulume. Allah arye Abraham biti ayupu nyabuk talak ara, Abraham el den bam bol akunum sekik talak do? Min kum sekik talak do? Kume, Allah arye ayupu nyabuk talak ara, Abraham el den bam bol deice ning min kum sekik talak arye nyabuk. Ati Abraham diba tenebuka deice aryuk, Allah arye Abraham biti teleb kipdeibukce, “Anda diksukumnye,” nyapdeibuk.

¹¹ Abraham diba tenebuka deice, Allah arye elti, akunum diksukum kibukba, daulamuka ani, aminyan talakuk, Abraham biti diksukum kipdeibuknye biti, yuk ninye ara, ‘Allah arye anye talilule, tenepnamak’ tenen, bikilin ning aribuk. Alaka kilin ning aribuk ning ara, Allah arye den bam bol mouse ning sekna pil aribukba, Abraham arye doprobuk. Aning ati ara, Abraham bira, nun deiyok kounanye, nun apu kopropa usulule. Ara, yata ninye do nirya, den bam bol mouse ning kum sekenyak bukni, ‘Allah arye diksukum ninye kipdeipnamsil’ tenen, diba tenenyak ninye nirya ara, sik apu kopropa Abraham ulule.

¹² Aning atonun, nun Yahudi yala ninye babye, nun apu kopropa Abraham arye den bam bol sekna pil min kum doprobuk talak bukni, Allah ati weik arye diba tenyamuk touk, nun babye diba tenebibyopura, dipkoprop, “Nun apu kopropa Abraham usulule,” nyaptibye. Den bam bol sekenyap ning awamsilya babye, aning ara nong bol deice ninguk ulula ati, aning ara weik mambul kume.

¹³ Allah arye Abraham biti, “An ap, ance deipminba, dadeipdanin, banamak mapu nirya ara, pia weik unamake. Sik adeipdanin banamak ninye ati, aning-aning nirya dobuka arenamsine,” nyabuka nyalilamuk ning ara, Musa sekamuk yupu talibuka dobolbalamik deice ati kum nyabuk. Aning kum bukni, Abraham arye Allah ati diba tenyamukba, Allah arye el Abraham ati diksukumnye kipdeibuk. Diksukum kipdeibuknye deiyok ara, diba tenelamuka deice aniryuk, ayupu nyapdeibuk.

¹⁴ Ura, Allah arye, ‘Aning ara wininamlulume, aning ara kum wininamlulume,’ nyapdeibukba, Musa birye sekeiyamsuk yupu talibuka, ‘Dobolbanamabe’ tenen, pirilenyak ninye babye, winilamaka deice arye Allah nyalilamuk yupu doproptingetoura, pil dona kum bukni, talye diba tenenyak ninye arye, diksukum un ning kum doproptinge. Doproptingtoura, ‘Diba tenena ning ara talyauk ulule,’ nyaptibye bukni, aning ara kum nyanyabe. Tonda, Allah arye, “Winibuka arenamsine,” nyabuka nyalilamuk yupu nirya ara, nong kum upnamle. Bukni, teleb pil donyaka deice arye, kum doproptinge. Deiyok ara, diksukum un ning nirya ara, diba tenena deice aryuk ulula ati nyapsine.

¹⁵ “Winina meme,” nyana yupu ulul mutuku nirya ara, wenena ap, on ning ap ton aupnamle. Amem yupu kum uptopura, ninye arye ayupu kum yaniptinge bukni, im sirya, mutuku sirya nirya ara, amem yupu aulyeba, kel kinyak deice aryuk, ninye arye yaninyake.

¹⁶ Aning nirya ati, ayupu nyapsine. Allah arye, “Wininamsine,” nyabuka deipsilye yupu nirya ara, diba tenena deice aryuk nong upnamle. Deiyok ara ani. Ara, Allah arye utenelule. ‘Narye diba tenenyak ninye nirya ati, “Wininamsine,” nyabuka nyalilamse ning nirya ati, diba tenepnecopura, narye bico tenepsinirye, na kanye aryuk talye arepnamne,’ tenelamuka ati, diba tenena deice aryuk nong upnamle. Utenebuka anya arye, akunuma. Yata ninye do nirya, Abraham arye diba tenelamuk touk, diba tenenyak ninye nirya ara, Allah arye, “Wininamsine,” nyabuka delilamsuk ning nirya dipkoprop dolonamake. Ara, dipkoprop Abraham arye deibukba, dadeipdanin yangalamik ninye nirya ara, Musa sekamuk yupu talibuka unyak ninye, Yahudi yala ninye babye, Yahudi yala kum bukni, diba tenenyak ninye yala-yala nirya babye, Abraham arye diba tenelamuk touk diba tenebikcopura, aning dolonamake. Abraham bira, nun diba tenenyap ninye, nun apu kopropa atonun usulule.

¹⁷ Ara, Allah yupu noutamak sekeiyamik touk ulule. Ayupu ara ani. ‘Allah arye nyabuk, “Abrahamo, Narye an Abraham ati, yuk-yuk ninye yala-yala weik, daunamak ninye nirya ati, sik apu kopropa akunum kipkine,” Allah arye nyabuk.’ (Kejadian 17:5) Abraham bira, Allah ati diba tenelamuka anya arye, Allah el kanye ara, ‘Sik aminyan talak diba tenepnamniyak ninye nirya ara, sik apu kopropa ara Abraham ulule,’ tenelule. Allah ara, talinye kume. Elce deiyamuk ninye akunum kam bukuka delilule. Min kum ulamle ning bukni, ‘Aupnamle’ tenen, yupu nyalilamle touk, dipkoprop nong ulule.

¹⁸ Abraham el ulamuk ning ara nyapnusine. Allah arye Abraham biti, “Im deice kurya weika arye tiklamle touk unamake. Ara, ance deipminba, dadeipdanin banamak ninye nirya ara, kum nukmanto unamake,” nyapdeiamuk ning ara, kum winipmanto ning bukni, nong min kum uamuk talak ara, kanye teniltona kumce, ‘Dipkoprop Allah arye winipnamnile’ tenen, weik arye diba tenelamuk. Ati ara, Allah arye Abraham biti nyapdeiamuk touk, wini talak ara, Abraham ninye yala-yala nirya sik apu kopropa el aulule.

¹⁹ Allah arye Abraham biti ayupu nyapdabalamuk talak ara, Abraham pia wisi akunum danamuka anya arye, el mi kum deipmanto, keting tamun yupa weik 100 tahun ulamuk. Tonda el domuk kil Sara babye, mi kum deipmanto kil ulamuk. Ulamrik ning ara, Abraham moubuka kel kiyamuk bukni, kanye bokoltona kum diparyuk Allah arye nyalilamuk yupu ati diba tenebuka ulamuk.

^20-21 Abraham bira, ‘Kume, Allah el mikip pia weik ululnye anya arye, elce, “Winipnamkine,” nyabuka nyalilamnuk yupu ara, dipkoprop winipnamnile’ tenen, diba tenenauk ulamuk. ‘Dip do, tilila do?’ tenen, teniltona deice kum ulamuka anya arye, Allah arye Abraham melilamukba, el diba tenyamuk ning weika arye tabakuka mikip upra balamukce, Allah ati kibuka el siuk erelamuk.

²² Winibuka weik arye diba tenelamuka ati ara, Allah el kanye aryuk Abraham biti, “Anda pia diksukumnye,” nyabuka teleb ubuka deibuk.

²³ Ayupu noutamak arye, “Allah el kanye aryuk diksukum kipdeibuk,” nyabuka sekeibik ning ara, Abraham eltibuk kume.

²⁴ Nunda, nun Deiyoknye Yesus dibuk bukni, tuba tamubuka kam bukeibuka deiyoknye Allah ati, diba tenenyap ninye, nun nirya ap ati, ayupu sekeipsik. Nun babye diba tenebibyopura, Allah el kanye aryuk, “Sikda diksukum ninye unyake,” nyabuka, teleb kipdeipnamsile.

²⁵ Yesus Kristus ara, nun malye tenenyap ning ap, malye unyap ning ap, pununa ati, obikba dibuk. Dibukba, Allah arye tuba tamubuka kam bukeibuka deiyok ara, ani. Ara nun malye ning nirya lyena ap, Allah arye nunti, “Sikda diksukum un ninye,” nyabuka, nunti teleb kilina ap ati, Yesus kam bukeipsuke.