Roma 2 - Eipomek

“Allah arye ninye mutuku-mutuku nirya, sik yuk-yuk wininmikce ning ati, lipsisikuka yupu bokeipnamsile,” nyabuk yupu

¹ Ura yata nang do nirya, sikce yuk nang ati, “Anggun malye winilulum ning ara, ani-ani,” nyabuka, lyep-lyep abuka wenelulum ninye nirya ara, Allah arye anggun babye teleb ninye anya arye, ‘Dawaplye’ tenen, kum namin kipnamsile. Sikce yuk nang ati, “Anggunda malye ululum ninye,” nyabuka yupu bongoliluluma deice arye, anggun bidamang arye anggun bidamang ati, yupu lepsisikuka bokeipdanmalume. Deiyok ara, anggunce yuk nang ati, “Malye winipmalum ning ara atia,” nyamunye bukni, amalye winin ning ara, anggun babye atonun kibuka winiluluma anya arye, anggun bidamang ati wenebuka yupu lepsisikuka bongolilalulume.

² Ura, nun nirya kele. Malye winin ning yala-yala nirya talibuka wininyak ninye ati, Allah arye yupu lepsisikuka bokolilirye, amalye wininyak ninye wenenamlanye, Allah elda, pia diksukumuk ulule. Ati, yupu lepsisikuka bokolinamsil ning nirya ara, diksukumuk unamle. Elce nun tukwak mutuku wininyap ninye nirya ati, nyapdeiamsuk touk, ‘Na nyamse yupu nyalul touk, teleb unyak do, malye wininyak do?’ tenen, dipdesilirye, el dipkoprop yupu deice arye wenesulule.

³ Aning ati ara, anggunda talye tukwak ninye bukni, yuk nang ati, “Anggunda malye ululume,” nyabuka yupu bokolilulumce wenelulum bukni, anggun babye amalye winin ninguk talibuka umunya deice arye yata tenelulum do? Allah arye nun wininyap ning ati, ‘Dawaplye’ tenen, ‘Namin kipsilirye, kum wenepnamsile,’ tenebuka ululum do? Kume. Allah arye ninye im sirya, mutuku sirya nirya ati, weneplirye, yupu lepsisikuka bokeipnamsil talak ara, anggunda lobuka kum binamlume. Allah arye anggun malye winilulum ning nirya ati wenepnamsile.

⁴ Ura, Allah arye anggun nirya ati, ‘Se, sik malye winin ning bataknamak do?’ tenen, bico tenesilirye, adiparyuk minopce wenebuka kum osulule. Aning kum bukni, tia talak atibuk namin kisilya deiyok ara nyapnusine. Ara, Allah arye nun tukwak unyap ninye nirya ati, ‘Se, na namin asa arye teleb ubuka melipsiniba, lo tuba awaplyopura, adeice arye sik malye wininyak ning moubuka tenebikirye batakikcopura, tamubuka na tam kipropnamak do?’ tenen, kalikuka disulule. Winisulul bukni, anggun dan do? Aning, moubuka kum tenelulumce, ‘Talya luparabuka malye winin ninguk talibuka wininamap’ tenen, ululum do? Anggunce, aning tenelulum do? ‘Allah bico tenesilirye, adiparyuk wenebuka kum osulul ning ara, elce, ‘Lo arepniba, sik malye winin ning bataknamak’ tenen, patalyeba namin kisilya ara, mambul kum ati, dauplye,’ tenemunce malye tuba winilulum do?

⁵ Bukni, na kayapo. Anggunce, anggun malye umunye ning nirya ati, batakmunyopura, Allah arye namin kipsilirye, kum wenepnamsile. Bukni, anggun ilil pia kum kanye dobuka, anggun kanye talima kat upliba, anggun malye ning kum batakmunyopura, malye ninguk tuba winimunya deice arye, Allah weika arye tonap tabakuka wenepnamsile. Tuba-tuba malye winimunya deice arye, anggun bidamang arye anggun bidamang ati, malye ulilalulume. Ninye arye sik mambul ning ati, ‘Tonap weik unamsil’ tenen, dokola delilamak touk, anggun malye-malye winiluluma deice arye, anggun bidamang arye, anggun bidamang nong deice ikin ning weik delilanmalume. Allah tenyamuk talak akunum uplyopura, lakak aniryuk ninye nirya ati, lipsisikuka yupu bokeipsilirye, wenepnamsile. Wini talak ara, anggun tuba malye winilulum ninye ati, weik arye wenepnamsile. Anggun malye winin ning batakna kumce, talima kat kibuka, ‘Malye wininupyap tenena kum deice arye, malye umunya ati ara, Allah weik arye wenepnamsile.

⁶ Allah yupu noutamak sekamik touk. ‘Allah arye tukwak unyak ninye nirya ati, yupu lipsisikuka, wenepnamle talak ara Allah arye ninye im sirya, mutuku sirya nirya, sik yuk-yuk wininyak ning ati, moubuka dipdelirye, sik wininyak ning awamlye touk, yupu lepsisikuka bokeipnamsile.’ (Mazmur 62:12)

⁷ Aning tonap laka nyapnusine. Yata ninye do nirya sikce, ‘Kume, Allah arye nunti, pia teleb una deiyok ning ap, kam pia una deiyok ning ap arepsutuba, elti, pia si erenamep’ tenen, patalyeba batakna kumce, pia pi dobuka, teleb winin ninguk talibuka wininyak ninye ati ara, Allah arye bol koplobuka, pia kam una deiyok ning arepnamle. Anyaripnamle ninye ara kam pia unamake.

⁸ Bukni, yata ninye do nirya, Allah el dipkoprop yupu batakikirye, sik bidamang patan ning atibuk tenebuka unyakce, malye wininyak ninye ati, Allah el yu weik upliba aninye ati, weika arye wenepnamle. Sik aninye ara kam pia kum unamake. Allah arye yu weik upliba, aninye ati weik arye wenepnamle. Aninye ara, kam pia kum unamake.

⁹ Malye winin ninguk talibuka wininyak ninye nirya ati ara, Allah arye ikin ning ap, kanye imun ning ap weika arye, sik nong deice deipliba, sikda ikin weik unamake. Minyuma ara, Yahudi yala ninye bukni, sik malye wininyak ninye ati wenebuka, yupu lepsisikuka bokeipnamle. Aminyan ara, Yahudi yala kum ninye babye, malye wininyak ninye ati, weneplirye, yupu lepsisikuka bokeipnamle.

¹⁰ Bukni, teleb winin ninguk talibuka diksukumuk wininyak ninye nirya ati ara, kanye imun ning nirya kum kibuka deiplirye, pia teleb una deiyok ning ap, elti, si eren ning ap, Allah ap dukdongobuka neika teleb una ati, deiyok ning ap arepnamsile. Diksukumuk unyak ninye nirya ara, ereiplirye, teleb ulinamsile. Ateleb ning ara minopce Yahudi yala ninye ati ateleb ning arenamle. Aminyan talak ara, Yahudi yala kum ninye ati, ateleb ning arenamle.

¹¹ Deiyok ara, Allah arye ninye im sirya, mutuku sirya nirya ati, ‘Anye bira na kwit kopropa anya arye kum wenepnune. Bukni, anye bira, na like,’ tenenuna ati, anye binyuk wenepnamne’ tenen, kanye talima kum wilisulule. Ninye tukwak ninye yala-yala nirya ara, ‘Na kwit kopropa atia bukni, anye bira na like,’ tenena kum aryuk tenesilirye, nun winilamap touk dipdesilirye, yupu lipsisikuka bokeipnamsile.

¹² Yahudi yala kum ninye ara, Musa sekamuk yupu, kekebuka kum kel kiyamika ati, amem yupu amu tam bukuka kum unyaka anya arye, Allah arye anggunti, “Anggunda Musa sekamuk yupu kel kiyamlum diparyuk, ayupu yaniptabuka malye winilamlume. Winilamluma deice arye, malye ulamlume,” nyabuka kum wenepnamle. Bukni, sik bidamang kanye aryuk malye winilamice ning ati, wenebuka onamle. Bukni, sik Yahudi yala ninye ara, Musa sekamuk mem yupu kekebuka kel kiyamikce, amu tam unyak diparyuk ayupu yanibuka malye wininyaka anya arye, Musa sekamuk yupu deice arye, sik wininyak ning nirya moubuka dipdelirye, wenebuka onamle.

¹³ Allah arye, ‘Aning ara wininamlulume, aning ara kum wininamlulume,’ nyapdeibukba, Musa birye sekeiyamsuk yupu deice arye, Yahudi yala ninye ati wenepnamla deiyok ara ani. Ara, Allah el kanye ara, ‘E, aninye ara, Musa sekamuk mem yupu ara, amul deiceuk kekenyaka anya arye, sikda diksukum ninye unyaka ati, teleb kipdeipnamsine,’ kum tenelule. Aning kum bukni, Allah el kanye ara, ‘Narye nyapsiba, Musa sekamuk yupu nirya ayupu kekebuka, dipkoprop talibuka dobolbanyak ninye ara, “Sikda telebe,” nyabuka, diksukum ninye kipdeipnamsine,’ tenesulule.

¹⁴ Ura, ayupu tonap tabakuka laka nyapnusine. Sik Yahudi yala kum ninye ara, Musa sekamuk mem yupu dobuka kum kekelamik bukni, sik bidamang kanye aniryuk ayupu deice deiyok ning nyasilye touk, diksukum ubuka ucopura, wininyaka deice arye lakak usulule. Ara, sik bidamang kanye talima pum tam ara, ‘Diksukum winin ning ani,’ tenekirye, aninguk talibuka dobolbanyaka deice arye, Musa sekeiyamsuk mem yupu deice arye nyapdeiyamuk touk ulule.

¹⁵ Ara nun kele, wininyaka deice arye, Musa birye sekuka deiyamuk yupu nong kum dololamik bukni, ayupu nyalul touk deiyok ning ara, Allah arye sik kanye talima pum tam, “Aning telebe, aning malye,” nyabuka deiamuka anya arye, sik talye mangkau kanye bobuka kum wininyake. Sik unyak talak noutamak ara, teleb ning ap, malye ning ap tabakuka winibikcopura, sik talima pum tam arye, ‘E, aning ara teleb winipmap bukni, aning ara malye winipmabe’ tenen, bokuka winyake. Tukwak ninye nirya arye, sik kanye talima pum tam ara, ‘Teleb winin ning ara ani, malye winin ning ara, ani’ tenen, moubuka tenenyake. Talye mankau kanye bobuka, kum wininyake.

¹⁶ Ura, Allah arye tenyamuk sum akunum uplyopura, tukwak ninye im sirya, mutuku sirya nirya ati, yupu lepsisikuka bokeipsilirye, wenepnamsile. Ara, Allah arye nyapliba, Yesus Kristus arye ninye nirya ati, sik kanye talima pum tam arye duknubuka tenelamice ning babye, nirya lakak kipdeipsilyopura, aning nirya Allah arye dipdelirye, yupu lepsisikuka bokeipsilirye, wenepnamsile. Ton nang ati ara, “Anggunda diksukum kibuka deipsine,” nyapnamsile. Ton nang ara, “Anggunda malye ulamlume,” nyabuka bataknamsile. Awinipnamsil ning nirya ara, narye Yesus el laka teleb yupu, ninye lyena yupu laka nyasununa deice arye peteresunune.

Yahudi yala nang ap, Musa sekamuk mem yupu ap ati, nyabuk yupu

¹⁷ Wini talak ara, yuk yupu ton nyapnusine. Anggunce yuk nang ati peterelulum nang ara, anggun bidamang arye anggun bidamang ati, kum peterelalulum do? Ton nang ara, nyalalulume. “Kume, nunda Yahudi yala nang unyabe,” nyabuka ululume. “Nunda Musa sekeiyamsuk yupu talibuka unyaba anya arye, ayupu teleb kibuka talinyaba deice, Allah arye lyepnamsile. Nunda, Allah ap teleb ubuka neika unyaba anya arye, Allah el kanye delisulule,” nyabuka, anggun bidamang kanye erepdamunce kwalilalulume.

¹⁸ Anggunce, ‘Kume, Musa sekamuk mem yupu peteresikceba, weik arye kel kinyaba anya arye, Allah elce tenesilye ning nirya ara, akunum kel bikamuburye, pia teleb un ning ara ani, ani, tenen, moubuka kel kinyabe,’ tenelamunce, anggun bidamang kanye aniryuk erebuka ululume.

¹⁹ Tonda anggunce utenelulume. ‘Nunda Yahudi yala kum ninye nirya ati, “Allah el dipkoprop bisik ara ani,” nyabuka petereptibye,’ tenelamunce anggun bidamang kanye arye erelilalulume. ‘Bisik peterena deiyok nang arye asing kun ninye talibuka bobalamak touk, nunda yuk ninye ati, ‘Teleb bisik ani,’ nyabuka peterena deiyok nang unyabe,’ tenelalulume. ‘Nunda, kunukna noutamak unyak ninye ati, dirin kilina deiyok nang unyabe,’ tenelamunce, anggun bidamang kanye aniryuk erebuka kwalimunce ululume.

²⁰ Tonda, anggun Yahudi yala nang arye utenelulume. ‘Sik nirya ara pia walwal ninyeuk unyake. Bukni, nunda weik peterena deiyok nang unyabe,’ tenekalulume. Mitik mapu arye deiyok ning nirya moubuka kum tenelamak touk, sikda walwal ninye unyaka anya arye, ‘Sik anang ara, nunce Allah el yupu dobuka petereptibye,’ tenelamunce, anggun bidamang kanye aryuk erebuka ululume. Aning-aning nirya ati utenemumnya deiyok ara nyapnusine. Ara, anggunce, ‘Kume, Musa sekeiyamsuk mem yupu arepsuka deice ara, dipkoprop yupu ap, weik kel kina deiyok ap nirya ara, akunum awamsuke,’ tenelamunce, anggun bidamang kanye erebuka umunya ati nyapsine.

²¹ Ura, anggunce yuk nang ati peterelulum bukni, anggun bidamang arye anggun bidamang ati kum peterelalulum do? Anggun bidamang, kum kel kilulume do? Anggunce yuk ninye ati, “Ubula dona meme,” nyabuka peterelulum bukni, anggun babye ubula dolulum do? Pia kum dolulum do?

²² Anggunda yuk nang ati nyalulume. “Yuk nang domikce kilapu ap, talye ulamikce kilapu ap, talye-talye yolana meme,” nyabuka peterelulum nang, anggun babye yuk kilapu ubula dobuka yolulum do, kum do? Aning atonun anggunce nyalulume. “Yuk nang arye, Allah batakuka talye ning atibuk, ‘Nun ni kopropa’ tenen, si erenyak ning ara, nun like,” nyabuka peterelulum bukni, sik diba tenena kum nang arye, sik mem ning si eren aik pum delilamak bona ning ara, ‘Weika arye ubula doproptibye,’ tenebuka dololulum do?

²³ Anggunda, “Allah arye, ‘Aning ara wininamlulume, aning ara kum wininamlulume,’ nyapdeibukba, Musa sekeiyamsuk mem yupu ara, nun Yahudi yala nang arye talinyabe,” nyaltakalulumce, anggun bidamang kanye talima erebuka kwalilalulum bukni, anggun babye Allah el yupu yaniltalulum do, kum do? Ayupu yanimumnya deice arye, ‘Allah elda mambul kumnye anya arye, elti, si erebuka kum kinamabe’ tenen, el yupu yanilulum do?

²⁴ Winibuka umunya ati ara, sik minop talak sekamik yupu nyasilye touk winilulume. Ayupu ara ani. ‘Anggun malye umunya ati ara, Yahudi yala kum ninye sik eibikirye, nun ni Allah, el si ati malye yupu nyalisinyake,’ Yesaya birye nyabuk. (Yesaya 52:5; Yehezkiel 36:22)

²⁵ Ura, Musa sekamuk mem yupu talibuka, dipkoprop dobolbalamtumtoura, Allah el mapu una ati, laka kilin ning, den bam bol deice ning sekelulum ara, mitik teleb upsutu bukni, Allah el mem yupu yaniltanauk winipmunyopura, anggun den bam bol mouse ning sektinga babye, ‘Deiyok pia kum upsuka atia,’ tenebuka anggunda talye nang atonun kibuka ululume.

²⁶ Sik den bam bol mouse ning sekna kum ninye bukni, Musa sekamuk mem yupu nyasilye touk diksukumuk winibikcopura, Allah el kanye ara, ‘Sikda teleb winin ninguk talibuka wininyaka anya arye, na tenen ninye, den bam bol mouse ning sekna ninye atonun wininyake,’ tenenamle. Weik mambul ning ara, Allah el dipkoprop yupu nyasilye touk moubuka talibibirye dobolbanamabe. Weik mambul ning ara, aninguka. Den bam bol mouse ning sekna ara, nong bol deice ninguk ulula ati, aning ara, pia mambul weik kume.

²⁷ Yata ninye do nirya, sik den bam bol mouse ning kum sekenyak bukni, Allah arye, ‘Aning ara wininamlulume, aning ara kum wininamlulume,’ nyapdeiamuk mem yupu kekebuka dobolbanyakce, diksukum winin ninguk talibuka wininyak ninye ara, Allah arye aninye ati, el kanye deiplirye, dopropnamle. Bukni, anggun Yahudi yala ninye ara, Musa sekamuk mem yupu dobolbalulumce, den bam bol mouse ning sekelalulum bukni, Allah el yupu ara yaniltamunyopura, aning-aning nirya awabsilya babye, aminyan talak Allah arye anggunti kanye kum deipnamsile. Anggunti wenebuka opnamsile.

²⁸ Dipkoprop ning ara, anyapnusine. Yahudi yala ninye arye deipsitinge babye, ara nong bol mouse ning atonun uka. Allah el kanye ara, ‘Adeice Yahudi yala nang ara, na tenen ninye kopropa unyake,’ kum tenelule. Tonda, laka kilin ning ati, den bam bol mouse ning seklopsitinga babye, aning ara, nong bol deiceuk usilye anya arye, adeice aryuk, Allah el mapu kopropa pia kum unamabe.

²⁹ Nong bol deiceuk kum bukni, Allah arye, ‘Na tenenye unamle,’ tenelye ning ara ani. ‘Dipkoprop Yahudi yalanye bira aululue,’ tenelulnye bira, el talima pum tam ara teleb ubuka un ning aulule. Diksukum winilulnye biti, Allah arye, ‘Anye bira na tenenye anya arye, na mi kopropa ulule,’ tenelule. Tonda, Allah arye, ‘Na mapu koprop’ tenen, laka kilin ning dipkoprop ning ara, Allah El Dib Kanye ara, nun talima pum tam usilirye, nun urasin yuk kilisululce, teleb kibuka delisulule. Talye mem yupu ap, nong bol deice pil dolamikce nang ap, wininyaka deice arye, Allah el mapu kopropa kum unyabe. Aning ara kume. Allah El Dib Kanye arye, nun talima pum tam pil dosilya arye, nun kanye talima teleb kibuka deipsilya deice arye, winiryuk ninye atonun kilisulule. Winisilya nang nirya ati, Allah arye kanye deiplirye, ereipnamle. Bukni, talye kanye bobuka daunyak ninye arye, diksukumuk wininyak ninye ati, si kum erenamake.