Roma 15 - Eipomek

“Nunce yuk diba tenen ninye nirya ati, ‘Yata wiriptibya deice arye, sikti, teleb kibuka meliptibye do?’ tenen, wininamabe,” nyabuk yupu

¹ Nun dipkoprop weik arye diba tenebuburye, nun kanye talima wisipsukce, lamapdongobuka unyap ninye nirya arye, sikda mikip kum ati ara, mitik anun aryuk diba tenebice bukni, ‘Aning winiptibye do, kum do’ tenen, kanye teniltonauk unyak ninye ati melinamabe. Ara, nunce aninye ati minopce derelana kum bukni, namin asa aryuk melibuka unamabe. Tonda, nunce nun bidamang ati kanye deibuka patasulul ning uk, nun bidamang atibuk tenebuka kanye tenebuka kum wininamap bukni, sik mitik tonun arye diba tenenyak ninye ati, nunce, ‘Yata wiriptibya deice arye, aninye ati, teleb ubuka meliptibyeba, sik kanye delinamak do?’ tenen, moubuka unamabe.

² Nun nirya arye, yuk diba tenenyak ninye ati, ‘Sik kanye talima wisipliba, weik arye diba teneanamak’ tenen, sik teleb kanye delina ning, winibibya deice arye, kanye deibuka telebuk unamake. Ati, nunce, yuk diba tenenyak ninye nirya ati, ‘Yata wiriptibya deice arye, sikti, teleb ubuka meliptibye do?’ tenen, unamabe.

³ Wininamaba deiyok ara, nyapnusine. Ara, Kristus el babye, ‘Na bidamang kanye delinulul ninguk wininamne,’ tenebuka, kum winilamuka anya arye, nun babye Kristus el winilamuk touk wininamabe. Kristus, el winilamuk ning ara, el bidamang atibuk kum winilamuk bukni, Allah yupu deice sekamik touk winilamuk. Ayupu ara ani. ‘Malye nang arye Allah anti, malye yupu nyabuka, an nong deice delikinyak yupu uk, na nong deice babye malye yupu nyabuka ikin delininyake.’ (Mazmur 69:9) Ayupu sekeiyamik touk, Kristus winilamuk.

⁴ Sik minop talak seklamik yupu nirya ara, nun kel kina ap, peterena ap ati seklamik. Ara, Allah arye nunti, ‘Winibuka wininamak,’ tenyamsuke. ‘Allah yupu nirya kekebikca deice arye, sik kanye talima kwa dibleba, sikce, ‘Ikin upmasilya babye, Allah dipkoprop lyebuka melinamsile’ tenen, batakna kum, pia pi dobuka wininamake. Na Allah ati ara kum wininamake,’ tenyamsukce, el yupu nyalilamukba seklamik.

⁵ Ura, ikin ning upmasilya babye, batakna kumce, pia pi dobuka pil dona deiyok ning ap, kanye talima melinana deiyok ning ap, arisilya deiyoknye bira, Allah el uka. Anggunti tenepnirye, Allah ati morosunun ning ara nyapnusine. Ara, ‘Allah arye sik Roma mutuku unyakce diba tenenyak ninye nirya ati, Allah arye sik kanye talima pum tam, pil doplirye, sik kanye tenen ning dukdongopliba, sikce Kristus el yupu kekebuka, eltibuk dobolbanamak talak nirya ara, teleb ubuka neikauk unamak’ tenen, na Paulus arye anggunti Allah morosunune.

⁶ ‘Allah arye anggun kanye tenena tonok arenamsile,’ tenen patanulula deiyok ara ani. Ara, ‘Sik kanye talima dukdongobikirye, tonok kanye bobuka neika atonun ubuka unyakce, nun Deiyoknye Yesus Kristus, el Li Kopropa Allah ati, weik arye si dokirye, el siuk erenamake’ tenen, na Paulus arye, anggun Roma mutuku ululum ninye ati Allah morosunune. Na Paulus arye nyapsine.

⁷ Aning ati ara, ayupu ton nyapsine. Kristus arye, anggun Roma mutuku diba tenelulum ninye nirya ati, kanye talima arepsilirye, ‘Aninye ara na mapu kopropa unamak’ tenen, dopsuk. Winipsuka ati, sikce anggun neika umunye ninye nirya ati, ‘Nun kayapo’ tenen, kanye talima arepsiliba, kanye deipdamunce unamlulume. Wininamluma deiyok ara, ani. Ara, ‘Nun nirya kanye talima arepsiliba melilapyeba, yuk nang eipsikirye, nun ni Allah ati, kibuka el siuk erenamak’ tenen, unamabe nyapsine.

⁸ Anyapmasin ning ara, dukdongobuka laka nyapnusine. Ara, Kristus tukwak mutuku yanuka ulamukce, nun Yahudi yala ninye melyamsuka deice arye, lakak kipsuk ning ara nyapnusine. Ara, Allah arye Yahudi yala ninye, sik minop talak ulamik ninye, nun ayupu yapu ati, “Wininamsine,” nyalilamuk yupu nirya akunum winibuk. Winilamuk ning deiyok ara, ani. Allah arye, Yahudi yala ninye ati, “Wininamsine,” nyabuka nyalin yupu nyasilye ning nirya ara, ‘Dipkoprop winilule, tenenamake’ tenen, Yesus Kristus tukwak mutuku yayukce, nun Yahudi yala ninye ati weika arye melyamsuk.

⁹ Tonda, Kristus tukwak mutuku yanuka ulamuk ning deiyok ara, ani. Ara, sik Yahudi yala kum ninye arye, “Se, Allah talye luparabuka wenepsuturye oplopsutu bukni, bico tenyamsukce, lyen ning akunum kintinipdeiamsuke,” nyabuka, ‘Yahudi yala kum ninye nirya arye, Allah el siuk erenamak’ tenen, Kristus yayuke. Kristus arye, Yahudi yala kum ninye ati tenebuka, pil dolamuk ning ara, minop talak Allah el yupu deice seklamik yupu atonun winilule. Ayupu ara ani. “Na ni Allah, Yahudi yala kum ninye kan-kan unamne talak noutamak nirya ara, narye Allah an si ati, pia erenamne. An si erena ati, mot nyanamne,” nyabuk. (2 Samuel 22:50)

¹⁰ Tonda, Allah el yupu noutamak arye ayupu ton sekik. ‘Sik Yahudi yala kum ninye ap, Allah arye, ‘Na mapu kopropa unamak’ tenen, akunum wipdeiamuk ninye, Yahudi yala ninye ap, neikauk kanye deibuka unamlulume,’ nyabuk. (Ulangan 32:43)

¹¹ Tonda, yuk Allah yupu noutamak ayupu ton sekamik. ‘Sik Yahudi yala kum ninye arye, Allah Yahweh el si ati, erepmunce eltibuk kibuka el si erenamlulume. Anggun ninye im sirya, mutuku sirya nirya arye, Allah ati, el si erepmunce pia mot nyanamlulume.’ (Mazmur 117:1)

¹² Aning atonun, nabi Yesaya el sekiamuk buku noutamak arye, ayupu nyabuk. ‘Yesaya birye nyabuk, “Nun apu kopropa, Isai birye deibukba, dadeipdanin yangalamik ninye deice arye deibikiba, yo kwapu youlamle touk, upnamlanye birye, anggun kan-kan yanuka tiknamle. Nun dam yanuka tiklyopura, ninye im sirya, mutuku sirya nirya ati, weik Ninye Deiyoknye kiplirye, sik nirya talinamle. Winipliba, sik Yahudi yala kum ninye arye, ‘Elce nun lyenamsile’ tenen, kintinibuka dinauk unamake,” nyabuk.’ (Yesaya 11:10)

¹³ Ura, na Paulus arye anggun Roma mutuku noutamak diba tenebuka ululum ninye nirya ati nyapsine. Allah el melisilya deice arye, nunce elti, ‘Dipkoprop teleb kipdeipsilirye, lyepsilyopura, pia melinamsile’ tenen, kintinibuka dinauk unyabe. Anggun Roma mutuku ninye ati, Allah morosunun ning ara nyapnusine. Ara, anggunce anggun kanye talima el deiceuk deipmunce, diba tenelulumopura, atalak Allah arye anggunti, mambul kanye bona kumce, kanye deibuka teleb winina deiyok ning ap, pin-pin una deiyok ning ap, ‘Weika arye arisiliba, anggun talima pum tam langdinamsil’ tenen, na Paulus arye anggun Roma mutuku ululum ninye ati Allah morosunune. Tonda, anyapmasin ning ara, Allah arye el Dib Kanye arisiliba, el mikip deice arye melisilyeba, anggun Roma mutuku tam ninye nirya ara, ‘Dipkoprop Allah elcuk, teleb kipdeipsilirye, lyepsilyopura, pia ati melinamsile’ tenemunce, ‘Kintinibuka dinauk unamlum’ tenen, Allah morosunune. Na Paulus arye nyapsine.

Paulus arye, “Nara, Yahudi yala kum ninye ati, ninye lyena yupu dobuka peterelbanune,” nyabuk yupu

¹⁴ Ura amapo, yuk yupu ton nyapnusine. Na kele, anggun Roma mutuku ululum ninye ara, teleb ubuka ululume. Anggunda, weika arye akunum kel kilamlumce, anggun mutuku kopropa ninye ati, teleb kibuka peterelalulume. Yesus arye peterelamsuk ning nirya ara, anggunce moubuka kel kiluluma anya arye, anggun kel bikna ning ara, kum sukmasile.

¹⁵ Asurat noutamak bokuka sekeipsise yupu ara, ‘Laka nyapniba, sikce ila tuba tonap tenepnamak’ tenen, ilil tenena kumce, pi dobuka sekeipmasine. Winipmasina deiyok ara ani. Allah arye nati bico tenyamnukce, el bidamang kanye aryuk apil dona deiyok ning arepnuka anya arye, ayupu mikip arye nyapmasine.

¹⁶ Allah arye bico tenyamnukce nati, ‘Apil donamle’ tenen, wibuka deiamnukce, pil dona deiyok ning areamanuk ning ara, laka nyapnusine. Ara, ‘Paulus ara, Kristus el pil melinanye ulirye, Allah el si erena aik pum tam talibuka, pil dona deiyok nang, imam arye Allah el yupu peterenyak touk, Paulus babye ninye lyena ati, Allah el laka teleb ninye lyen yupu dobuka, Yahudi yala kum ninye unyak mutuku peterelbinamle’ tenen, Allah arye wibuka deipnuke. Yahudi yala kum ninye unyak mutuku noutamak dopreipnuka deiyok ara, ani. Ara, ‘Allah El Dib Kanye arye, Yahudi yala ninye kum bukni, diba tenenamak ninye nirya ati, teleb kiplirye, Allah el na tenen ninye unamak’ tenena ati, wipdeipnamle. ‘Aninye wibuka delinamla deice, Allah arye sikti, kanye delinamle’ tenen, Allah arye na Paulus ati, wibuka deipnuk. Ura, minop talak, Allah el si kina ati, kam ning obuka Allah ati arilbalamikba, Allah arye aninye ati, kanye delilamuk touk, Allah El Dib Kanye arye, Yahudi yala kum ninye ati, wiplirye, akunum teleb kiplyopura, Allah arye sik Yahudi yala kum ninye ati, el kanye delinamle.

¹⁷ Aning ati ara, nara Yesus Kristus arye talilulba, Allah el pil donanye unirye na kanye pia delinune. Narye na bidamang ati ara, ‘Nara, weik mambulnye,’ kum tenenun bukni, ‘Yesus Kristus elda weik mambul weiknye ulule’ tenen, elce arepnuk piluk donune.

¹⁸ Yuk yupu tonap kum nyanamne. Na nyanamne yupu ara, ani. Ara, na winilamse ning ap, peterelamse ning ap nirya ara, Kristus arye pil dolamukba, sik Yahudi yala kum ninye arye Allah ati, diba tenelamikce, el yupu uk tuba kekebuka dobolbanyake.

¹⁹ Aning ara, na mikip deice arye kume. Allah El Dib Kanye mikip deice arye melyamnukba, amambul pil nirya dolamse. Ara, aninye nirya arye, ‘Allah elcuk apil dosulule,’ tenebuka, ‘Diba tenenamak’ tenen, etekdop ubuka don pil ap, ninye kum winipmanto pil ap, dolamsirye peterelamsiba, sik Yahudi yala kum ninye arye, Allah ati diba tenelamikce, el yupu kekebuka dobolbanyake. Winibuka apil dolamse ning ara, keting wekelban tam, weik asik dolamikak, Yerusalem mutuku arye dipdongobuka anyapce, keting panalyangan tam, mutuku si Ilirikum mutuku tam noutamak nirya ara, Kristus el laka teleb yupu, ninye lyena yupu bobuka peterelbalamse. El yupu ara tonok ning babye kum bataklamse.

²⁰ Minop talak arye dipdongobuka, wini talak noutamak nirya babye, tonok ninguk tenebuka patalamnuke. Ara, ‘Kristus el si kum kekelamik ninye, sik unyak mutuku noutam akuk peterelbinamne’ tenen, patalamnuke. Winibuka ulamse deiyok ara, ani. Winipmanto ning tenelamse yupu deiyok ara ani. ‘Yuk nang arye, sik aik ayukumna yo min arye ikuka domicak ara, kum dopnamne,’ tenenune. Ayupu nong ara, ‘Yuk nang arye, Allah yupu min arye akunum peterelamik mutuku noutamak ara, narye kum peterelbinamne. Allah el si ap, el yupu ap, min kum kekelamik mutuku noutam akuk peterelbinamane,’ tenelamsirye, apiluk dobuka ulamse.

²¹ Yuk nang arye pil deiyok koubuka dolamikak binuka, pil dona kum bukni, Allah el yupu deice sekeiyamik touk, Allah yupu kum kekelamik ninye unyak mutuku uk binamse. Allah el yupu ara ani. ‘Allah el yupu ninye arye moubuka kum laka nyalamikba, kum kekelamik mutuku noutamak unyak ninye nirya ara, kekenamake. Minop talak arye ayupu kum kekelamik ninye ara, aminyan talak pia moubuka kekenamake, nyabuk.’ (Yesaya 52:15)

²² Allah yupu kum kekelamik ninye, sik ulamik mutuku minopce peterelbalamsa ati, wini talak ara, ‘Roma mutuku noutamak bitinye,’ tenelamsi bukni, lo ton pia kum wamnuke ati, anggun dam ara kum yanamse. Paulus arye, Roma mutuku ninye ati nyabuk.

Paulus arye, “Na Roma mutuku yanamne,” nyabuk yupu

²³ Amapo, minop talak anggun ululum mutuku kum yanamse bukni, wini talak ara, na peterelamse mutuku noutamak ara, winiryuk mutuku ton kum upmala anya arye, ton binuka kum petereptinye. Tonda keting tamun yupa pia weik deice arye, ‘Se, anggun Roma mutuku noutamak umunce diba tenelulum ninye ati dilbitinye’ tenen, pia patalamnuke.

²⁴ Nara, anggunti patanululba, tuba tenesununa ati ara, ‘Mutuku si Spanyol tam peterelbinamne’ tenen, bisik noutam binamne talak ara, anggun Roma mutuku noutamak ton dilyanamsine. Ara na bisik binamne talak, anggun mutuku tia ati ton yanyopura, uruna mapmapya ani, anggun ap, na ap, kanye pia deipdabirye, aminyan talak Spanyol mutuku binamne. Winibuka binamne talak ara, anggunce na melibuka dopdeipnamnulume.

²⁵ Aning winipnamne bukni, wini talak ara, Yerusalem mutuku diba tenenyak ninye, sik melin ning ati bobuka binamane. Ara, ‘Yuk mutuku ninye arye Yerusalem mutuku unyak ninye sik melina ati arilamik yo bok, narye dobuka, arilbinaman’ tenen, Yerusalem mutuku binamane.

²⁶ Yerusalem mutuku binamana ara talye ati kume. Deiyok ara, sik Makedonia tam diba tenenyak ninye ap, tonda Akaya tam unyakce, diba tenenyak ninye ap nirya arye, ‘Yerusalem mutuku diba tenebuka unyak ninye kan-kan noutam arye, pia bona utotoa kum ninye sik melinamabe’ tenen, sik yo bok bulubuka delilamik.

²⁷ Sik nirya arye kanye deibuka yo bok bulubuka delilamik bukni, na kanye ara, ‘bita moubuka delilamik ara, pia telebe,’ tenepse. Ara sik Yahudi yala ninye, sik diba tenelamik ninye arye, Allah yupu dobuka, sik Yahudi yala kum ninye unyak mutuku binuka peterelamik. Makedonia mutuku ninye ap, Akaya mutuku ninye ap, sik nirya ara, Yahudi yala kum ninye bukni, peterelamik yupu kekelamikce, diba tenelamik. Ati, sik Yahudi yala kum ninye arye, Yahudi yala diba tenelamik ninye kan-kan bukni, Yerusalem mutuku unyak bona utotoa kum ninye melina ati, yo bok bulubuka delilamik. Abulubuka delilamik ning ara, bita moubuka delilamik. Wini talak ayo bok arepnamak ning ara, telebe nyapne. Winibuka wininamake ati, na kanye deipne.

²⁸ Sik yo bok bulubuka delilamik ning dobuka arepnikiba, Yerusalem mutuku unyak bona utotoa talina kum ninye ati arilbanamne anya arye, apil akunum dobuka sirya daknyopura, Spanyol mutuku binamne. Spanyol mutuku binamne talak ara, bisik noutamak ara, anggun Roma mutuku ululum ninye ati dilyanamsine.

²⁹ Na kele. Anggun mutuku Roma yanamne talak ara, Kristus weika arye teleb kipdeipniliba, telebuk unirye anggun dam dilyanamsine. Na kanye talima pum tam ara, teleb un ning kum suknamnila ati ara, na ap anggun ap neika unamaba deice arye, Allah arye anggun Roma mutuku ululum ninye ati pia teleb ulinamsile.

³⁰ Ura, amapo. Nun Deiyoknye Yesus Kristus el si deice ap, Allah El Dib Kanye arye melisiliba, bico tenelanyaba deice ap arye, ayupu ara mikip arye nyapsine. Anggunce nati Allah moronumnya deice arye, na ap, anggun ap, pia pi dobuka neika pil donauk unamabe.

³¹ Nati, Allah moronamnulum ning ara nyapnusine. Ara, Yerusalem mutuku binamne mutuku ara, Yudea tam noutam unyakce, ‘Diba kum tenenyak ninye arye, na nong deice ikin ning deipnikirye, opnikcak’ tenen ati, ‘Allah arye Paulus lyepnamle’ tenen, Allah moronamnulume. Tonda, Makedonia tam ap, Akaya tam ap unyakce diba tenenyak ninye arye, bulubuka delilamik yo bok arepnik ning ara, ‘Yerusalem mutuku diba tenenyak ninye ati arepniba, doprobicopura, kanye deibuka unamak’ tenen, Allah moronamnulume.

³² Tonda, ‘Paulus ara Allah arye tenelamuk touk, elce melibuka uruna ati, nun mutuku, Roma yalyeura, el ap, nun ap, kanye deibuka neika unamaba deice arye, el talima ap, nun talima ap kwa dib danamap’ tenen, Allah moronamnulume.

³³ Narye anggunti Allah morosunun ning ara, tonok ning tonap nyapnusine. Ara, ‘Walana ap, olana ap, ikin kanye bona ap nirya kumce, kanye deibuka teleb una ati, deiyok ning arisilya deiyoknye bira, Allah ulula anya arye, el ap, anggun nirya ap, kanye talima dukdongobuka neikauk umunyopura, telebuk unamlum’ tenen, Allah morosunune. Na Paulus arye, anggun Roma mutuku umunye ninye ati nyapsine.