Roma 14 - Eipomek

Weik arye diba tenenyak ninye ap, mitik tonun aryuk diba tenenyak ninye ap ati, nyabuk yupu

¹ Ura, yuk yupu ton nyapnusine. Mitik anunuk diba teneplinye biti ara, “Telebe,” nyabuka, neikauk unamlulume. Anye birye, ‘Se, aning ara winibuka winipnyopura, Allah arye wenepnamnil do, kum do?’ tenen, teniltonauk unyak bukni, aning ati ara, nun nirya arye tonok kanye tonok bobuka, ansinibuka kum unyaba ati ara, aning nirya ati derelana ap, yupu si dalana ap una ara pia meme. Ayala ning Atonun ton nyapnusine.

² Ara, tonoknye el diba tenelya deice arye, din ning aning-aning nirya talye luparabuka dilirye, ‘Se, nara pia malye winipmana do, kum do?’ tenen, el kanye kum teniltolule. Bukni, yuknye bira, el diba tenelul ning ara, mikip mitik tonun ulula anya arye, el kanye arye, ‘Kume, nara, mula yala nirya diptinye bukni, tuku ning yala nirya ara kum diptinye. Tup ning din ara malye winipnyake,’ tenelule.

³ Utenelul bukni, teleb ninguk dilulnye birye, mula uk dilulnye biti, ‘Bicoe, anye bira, winiryuk mi atonunye ulule,’ kum tenenamle. Aning atonun, mula uk dilulnye birye, tup ning aning-aning nirya ap, aning-aning nirya ap, dilulnye biti, ‘Se, anye bira tup ning yala nirya dilula ati, elda pia malye ulule,’ kum tenenamle. Deiyok ara, tup ning dilulnye babye, mula dilulnye babye, Allah elce kanye deibukce, akunum lyebuka ati nyapsine. ‘Ninye arye dilamak ning ara mambul weik ulule,’ tenena meme.

⁴ Ati, anggunda yata deiyok ati, yuknye el pil melinanye biti, wenebuka yupu lepsisikuka bokeiptum do? Kume, apil melinanye el deiyoknye biryuk, “Anye bira pia teleb, anye bira malye,” nyabuka, yupu lepsisikuka bokeiptue. Sik talye nang arye yupu lipsisikuka bokolina pia meme. Ati, aning-aning nirya dilulnye babye, mula yala dilulnye babye, diba teneprikirye, kanye lamapdongobuka, dakeiyam asa neika dukdongobuka unamrake. Aning ara nun deiyoknye Allah, el mikip deice arye, melisilya ati, telebuk ubuka unamrake.

⁵ Aning atonun, tonye birye el tenelula ara, ‘Kume, asum ara pia weik mambul bukni, yuk sum ara mambul kume,’ tenelule. Bukni, yuknye bira, ‘Kume, asum-asum nirya ara mambul kume. Yuk sum nirya ara atonun sum ulule,’ tenelule. Wininyaba bukni, yata nang do nirya, sik bidamang kanye talima pum tam arye, ‘Aning ara winiptinye do, aning ara kum winiptinye do?’ tenen, aning nirya ati, ‘Teleb ning ara, ani. Malye ning ara, ani’ tenen, teneipdebuka akunum tenebikcopura, akunuma, tuba tonap pia kum teniltonamake.

⁶ Ura, tonoknye birye, ‘Asum ara mambul,’ tenelinye bira, ‘Aning winipniba Allah arye nati, kanye deipnamnil’ tenen, ulule. Tup ning dilulnye birye, tup ning dipnulye talak ara Allah ati, “Telebe,” nyabuka morolula anya arye, elda, ‘Winipnyopura, Allah arye kanye deipnamnile’ tenen, tup ning dilule. Aning atonun, tup ning kum dilulnye babye, ‘Allah arye kanye deipnamnil’ tenen, tup ning aning-aning nirya kum dilirye, Allah ati, “Telebe,” nyabuka morolule. Aning kum dilulnye babye, aning dilulnye babye, sik abitinye nang nirya arye Allah ati el si ererurake.

⁷ Yata ninye do nirya arye, nun bidamang kanye delilana ati kum kam unyabe. Tonda, nun yuk kum dibinyabe.

⁸ Anang nirya ara, Allah el na tenen ninyeuk unyaba ati, elcuk talisulula anya arye, kam unamap talak babye, dipnamap talak babye, ‘Winipniba, Allah arye kanye deipnamnil’ tenen, wininyabe. Tonda, ‘Na wininye ning nirya deice arye el siuk erenamne’ tenen, pia pi dobuka pirinyabe. Ati nun nirya ara, kam unyap talak babye, dipnamap talak nirya babye, elcuk talisilya deice arye, el na tenen ninyeuk unyabe.

⁹ Ura, el na tenen ninyeuk unyabe nyapmasin deiyok ara, talye ati kum nyapsine. Kristus dibuk bukni, ila tuba tamubuka kam bukuk. Ara, ‘Akunum dibilamice ninye babye, kam tuba unyak ninye babye, sik nirya ara, naryuk talinirye, sik weik Ninye Deiyoknye erebuka unamne’ tenen, dibuk bukni, tamubuka kamuk ulule.

¹⁰ Aning ati ara, sikce yuk diba tenenyak ninye nirya ati, yata deiyok ati, “Sikda malye wininyake,” nyabuka wenepmunce, yupu lipsisikuka bokolinamlum do? Tonda, yata deiyok ati, sik diba tenebikce unyak ninye, anggun weit yapu atonun nang ati, ‘Kume, anang ara, nun wininyap ning atonun kum wininyaka anya arye, nunda weik mambul nang unyap bukni, sikda mambul kum nang unyake,’ tenelulum do? Kume, na kayapo, Allah arye ninye im sirya, mutuku sirya nirya ati, yupu lepsisikuka bokeipnamsil talak ara, el Yupu Lepsisikuka Bokolina Deiyoknye, el teleb buna ning deice bukliba, nun nirya asukumuk yanuka tikibirye, nun winilamepye ning ati laka nyabibyeba, elce, “Aning telebe, aning ara malye,” nyabuka, yupu lepsisikuka bokeipnamsila ati nyapsine.

¹¹ Allah yupu noutamak nabi Yesaya birye sekiamuk yupu ton laka nyapnusine. Ayupu ara ani. ‘Allah arye nyabuk, “Na dipkoprop unye touk, anyapnusin yupu ara aminyan talak dipkoprop wininamle. Aminyan talak yata mutuku ninye do, sik nirya arye na si erena ap, na amu tam unyak ninye nirya ap ati, gutam tuku dipdongobuka na siuk erenamniyake. Sik nirya winikirye, nati, nyanamake. ‘Dipkoprop anye bira, Allah ulule. Nun nirya ara malye nanguk unyabe,’ nyabuka, na si erenamniyake.” Allah arye nyabuk.’ (Yesaya 49:18; 45:23)

¹² Anyabuk yupu ara, aupsuka anya arye, ayupu deice arye kel kinyabe. Nun tukwak ninye nirya arye winilamubu ning nirya ati, laka nyabibyeba, Allah arye, “Aning telebe, aning ara malye,” nyabuka yupu lipsisikuka bokeipnamsile.

¹³ Winipnamsila ati ara, nun bidamang aryuk, nun kayapo nang nirya ati, “Anda telebnye, anda malinye,” nyabuka, yupu lipsisikuka kum bokolilanamabe. Aning kum bukni, pia moubuka tenenamlulume. Ara, ‘Se, na kwit birye na wininye ning eipnilya deice arye, el kanye talima se tenepliba, malye uplyak’ tenen, kanye moubuka, diksukumuk wininamlulume. Malye winin ning tonok ning babye pia kum wininamlulume.

¹⁴ Na Paulus bira, nun Deiyoknye Yesus ap, kanye talima dukdongobuka ununa ati, ayupu ara nyapsine. Ara dipkoprop na kele. Ara, na kanye pia ton kum bokoltonulule. Yata yala din ning do nirya ara, telebuk ulule. Aning-aning nirya dobuka dibibya babye, Allah arye, ‘Aning ara malye,’ kum tenesulule. Aning nyapmasin bukni, yatanye do nirya, el kanye talima pum tam arye, ‘Adin ning ara, malye ninguk ulula ati kum diptinye,’ teneptopura, anye birye winibuka tenelula anya arye, elcuk aning kum diptue. Elti ara, adin ning ara, malye ning atonun ulule.

¹⁵ Bukni, sikda din ning tonok yala ninguk dibikiba, sik kayapo arye, ‘Se, aning ara kum dipmating’ tenen, anggun kwit capu nang kanye talima uk dilule. Ati ara, ‘Allah elce derepsilyak’ tenen, malye kanye bopmunya deice arye, pia bico tenen, moubuka kum melilalulume. Anggunce din ning aning-aning nirya dimunya deice arye, yuk nang sik diba tenebuka unyak nang ara, sik weit yapu atonun nang unyaka anya arye, sik kanye talima malye ulina meme. Anggun weit yapu atonun ninye ara, talye nang kume. Ara Kristus arye, ‘Aninye nirya ara lyepnamne’ tenen, dibuka anya arye, sikda weik mambul ninye unyake. Ati anggun weit yapu atonun ninye ati, anggunce malye ulina pia meme nyapsine.

¹⁶ Anggunce, ‘Adin ning nirya talye luparabuka dina telebe,’ tenelulum bukni, anggun winipmunya deice arye, yuk nang eipsikirye, malye winibikcopura, yuk nang arye anggunti, “Malye ulina deiyok nang ara, sik uka,” nyabuka, nyasinyake. Ati, ‘Nun deice ayupu nyapsicak’ tenen, kanye pia moubuka unamlulume.

¹⁷ Ayupu nyapmasina deiyok ara ani. Diba tenebibiba, Allah arye nun kanye talima talisiliba, el yupu kekebuka dobolbanyaba deice arye, weik mambul usilye ning ara, din ning ap, mek ap, talye luparabuka dina meme. Aning ara kum bukni, weik mambul ning ara, Allah El Dib Kanye melisilya deice arye, diksukum una ap, ninye yuk nang ati, bico tenena ap, tonda ninye ati pin-pin asa arye kanye deibuka kanye lamapdongobuka arye neika una ap, anirya ara weik mambule.

¹⁸ Yata ninye do nirya, arup arye nyapmasin touk, winibikirye, Kristus el amu tam ubuka, elti, pil dolamunyopura, Allah arye anggunti kanye delinamsile. Tonda, yuk nang nirya arye anggunti, “Sik wininyak ning nirya ara, telebuka,” nyabuka, si erenamsiake. Ati ara, Allah El Dib Kanye melisilya deice arye, diksukum winina ap, yuk nang ap kanye deibuka namin asa arye dukdongobuka neika una ap, pin-pin kanye deibuka, melilana ap, anirya ara weik mambule nyapmasine.

¹⁹ Anyapmasin yupu nirya ati ara, ayupu ton nyapnusine. Asum-asum nun nirya arye, ‘Yata teleb ning winiptibyeba, nun diba tenenyap nang nirya arye, kanye deibuka namin asa arye neika unamap do?’ tenen, pia pi dobuka pirilenamlulume. Tonda, anggun nirya arye, ‘Telebuk winibirye, nun kanye talima kwa dipdabiba, nun kanye talima ap, nong ap nirya ara, wisipnamsil’ tenen, pirilenamlulume.

²⁰ Allah arye yuk nang, sik kanye talima noutam teleb pil akunum domuk ning ara, anggunce aning-aning nirya talye luparabuka dimunya deice arye, malye kum kililalulume. Ara, yuk nang arye, ‘Aning dibibyopura, Allah derepsilyake,’ tenenyak bukni, anggunce, ‘Kume, anirya babye, talye luparabuka dina teleb’ tenen, dimunya deice arye, anang anggun kanye tenen ning nirya malye kipdeipmunba, sik malye winibikcopura, ara pia malye winilulume nyapsine. Allah el kanye ara, ‘Ninye ara din ning aning-aning nirya, talye luparabuka dina telebe,’ tenelule. Bukni, yuk nang arye, ‘Adin ning ara malye ning,’ tenebice bukni, anggunce talye luparabuka dimunya deice arye, sik kanye talima pum tam malye kipdeipmunba, sikce malye winibikcopura, ara malye winimunya ati nyapsine.

²¹ Teleb ning ara, basam tup dina do, ninye kanye walwalana mek, anggur mek dina do, yata winin ning aning-aning nirya, winibibya deice arye, sik diba tenenyak ninye eipsikirye, ‘Malye kanye bobikirye, aninye sik malye winibicak’ tenen, pia kanye moubuka telebuk upmunce, aninguk talibuka unamlulume.

²² Anggun nirya arye, Allah ati akunum diba tenepmunce, yuk-yuk moromunya deice arye, ‘Aning ara dina telebe, aning ara dina kume,’ tenenamlulume. Akunum moubuka tenepmunyopura, talye kanye lamapdongobuka unamlulume. Allah arye nun tenenyap ning nirya, elcuk akunum kel kisulula anya arye, yuk ninye ati, “Nara, wininuna ati ara, anggunda wininamlulume,” nyabuka laka nyana ap, peterena ap pia kum wininamlulume. Yata ninye do nirya arye, sik kanye talima pum tam arye, ‘Aning dina telebe, aning ara dina meme,’ tenelamak touk, aninguk winibikirye kum batakikcopura, sik kanye talima pum tam tenen ning nirya ara, ‘Se, na malye winipmane’ tenen, malye kanye kum bonamake. ‘Aning ara teleb’ tenen, diba tenelamak touk, teleb ninguk wininyaka ati ara, anang arye sik malye kum winililanyake. Aninguk kanye deibuka telebuk unamake.

²³ Bukni, anggun kanye talima pum tam ara, ‘Adin ning dipnyopura, Allah arye wenepnamnil do, kum do?’ tenen, kanye bokoltonauk usulul bukni, talye luparabuka dipmunyopura, malyeuk wininamlume. Deiyok ara ani. Anggunce, ‘Adin ning ara teleb’ tenen, diba teneptumce, aning dobuka dipmunyopura, teleb unamlum bukni, kanye boktopsiliba, ‘Dauplye, malye ning babye, talye luparabuka dipnune’ tenen, talye luparabuka dipmunyopura, malye unamlume. Aning atonun, yata wirin ning do nirya ati, nun kanye talima pum tam arye, ‘Aning ara dipkoprop teleb’ tenen, diba kum tenebibirye, ‘Malye winiptibya babye, talye luparabuka dauplye,’ tenena ara, malyeuk wininamlume. Ati aning ara winina meme, nyapsine. Na Paulus arye nyapsine.