Roma 13 - Eipomek

Ninye deiyok nang arye, nyanyak yupu kekebuka, sik amu tam una ati, nyabuk yupu

¹ Ura, na kayapo, yuk yupu ton nyapnusine. Tukwak mutuku ninye deiyok nang kibuka unyak ninye nirya ara, Allah arye ninye deiyok nang erepdeipliba, unyaka ati, yata nang do, anggun nirya ara, ninye deiyok nang sik amu tam umunce, anang sik nyanyak yupu uk kekebuka dobolbanamlulume. Ninye deiyok nang kina ara, Allah elcuk bokuka arilula ati, ninye deiyok nang nirya ara, Allah elce erebuka delilula deice arye talisinyake.

² Aning ati ara, yatanye do nirya, ninye deiyok nang arye nyasinyak yupu ati moubuka kum kekeplirye, ‘Malye winipnun’ tenen, sik yupu yaniltalulnye bira, el winilya deice, Allah arye erebuka delilul ning ati yanilule. Ati, ninye deiyok nang yupu ati yaniltanyak ninye ara, sik wininyak ning deice arye, malye winililanyake. Ati, aninye nirya ara, sikce, sik bidamang nong deiceuk wenen ning delilanyake.

³ Aning ati ara, sik teleb winin ninguk talibuka wininyak ninye ara, ‘Ninye deiyok nang arye wenebuka opsicak’ tenen, ilil kum unyake. Bukni, malye wininyak ninyeuk ara, ninye deiyok nang ati, ‘Se, anang arye wenebuka opsicak’ tenen, ilil unyake. Ara, ‘Se, na ilil una kumce, teleb kanye bobuka uptinye’ tenen, patalul ninye nirya ara, adiparyuk dipkoprop teleb winin ninguk wininamlulume. Winipmunyopura, ninye deiyok nang arye anggunti, ‘Sikda teleb nanguk unyake,’ tenepsikirye, kanye deibuka si erenamsiake.

⁴ Ayupu nyapmasina deiyok ara ani. Allah arye ninye deiyok nang nirya ati, ‘Sik adeiyok nang arye ninye nirya ati, moubuka teleb ulinamak’ tenen, erebuka delilula ati, nyapmasine. Aning ati ara, anggun malye winipmunyopura, dipkoprop ilil unamsile. Sik ninye deiyok nang arye, malye wininyak ninye ati wenebuka onyake. Winibuka sik apil dona deiyok nang unyaka anya arye, talye sik bidamang aryuk tenebuka kum unyake. Talye ati kum unyake. Ayupu nyapmasina deiyok ara ani. Allah arye ninye deiyok nang nirya ati utenyamuk. ‘Ninye arye malye winibikiba, na yu upnilyopura, ninye deiyok nang ara, na melin nang unyakce, malye winin ninye nirya ati, wenebuka onamake’ tenen, erelilule.

⁵ Aning ati ara, anggun nirya arye ninye deiyok nang sik amu tam umunce, sik yupu moubuka kekepmunce, unamlulume nyapsine. Wininamluma deiyok ara, ‘E, malye winipnyopura, wenebuka opnicak,’ tenena ati kume. Adeiyok ara aupmal bukni, ton deiyok ara, anggun kanye talima pum tam arye, ‘Ninye deiyok nang amu tam una ara telebe,’ tenena ning nirya ara, anggunce akunum moubuka kel kiluluma ati, winibuka wininamlulume nyapsine.

⁶ Atonun ning ara, pemerintah deiyok nang arye, “Pajak ati yo bok arenamsulume,” nyabuka morosinyaka ara, kekebuka arenamlulume. Ara talye ati kume. Aninye deiyok nang ara, Allah el amu tam ninye melin nang atonun unyakce, sik pil don talak nirya ara, ninye nirya ati talinyakce, ninye deiyok nang piluk donyake. Yuk yala pil ton talibuka kum donyake.

⁷ Yata deiyok ninye do nirya ati, anggunce, “Amutuku una ati pajak umum areplulume,” nyabikcopura, adiparyuk arenamlulume. Sikce, “Abona dolona ati, pajak tabakna yo bok ton areplulume,” nyabikcopura, arenauk unamlulume. Aning atonun, ninye deiyok nang nirya awininyak touk, ‘Anggunda mambule’ tenen, sik amu tam umunce, sikti, pia moubuka si erenamlulume.

“Yesus Kristus arye dolyanamsil sum ara, dam upmasila ati, bico tenelamunce, melilanauk unamlulume,” nyabuk yupu

⁸ Anggunce yuk nang ati moropmunyeba, sik ning yo bok do, yuk ning do, arepsikcopura, anggunti, “Narye tamubuka arepnamkinca,” nyabuka, talye nyaltakana meme. ‘Dawaplye, aminyan talakuka’ tenen, kum bataknamlulume. Dipkoprop sikce arepsice touk, adiparyuk tamubuka pununauk unamlulume. Tonok ning ton kanye talima lamapdongobuka namin asa arye, ‘Na kwit kopropa ati, talye sirya daknirye arepnune’ tenen, kum arilanamlulume. Aning ara, nunce yuk ninye nirya ati, pia bico tenebuka, kanye talima arelanauk unamabe. Ara talye ati kum nyapsine. Allah arye, “Aning ara wininamlulume, aning ara kum wininamlulume,” nyapdeibukba, Musa birye sekamuk mem yupu weik aupmal bukni, ayupu nirya deiyok ning ansinibuka sirya dakna ati ara, anggunce yuk nang ati, bico tenebuka melinauk unamlulume. Winipmunyopura, ikin yupu sirya dakna atonun wininamlulume.

⁹ Allah arye, “Aning ara wininamlulume, aning ara pia kum wininamlulume,” nyapdeibukba, Musa birye sekeiyamsuk mem yupu ara, ayala-ayala nirya weik aulul bukni, ayupu nirya deiyok ning ara, weik mambul ning tonok usulule. Ara kanye delilana ap, melilana ap nyabuk. Ura, “Yuk nang domikce kilapu, talye yolana pia meme. Yuk nang, sik talinyak ning ati, ‘Se, aning ara, nauk taliptinye’ tenen, se tenebuka mambul kirikna meme,” ayupu nirya nyapdeiyamsuk bukni, ayupu nirya weik deiyok ning ara nyapnusine. Ara, Allah yupu deice seklamik touk ulule. Ayupu ara ani. ‘Allah arye nyabuk, “Anggunce anggun bidamang ati kanye deibuka melilamunya atonun, anggunce yuk nang ati, bico tenebuka melilanauk unamlulume.” Allah arye nyabuk.’ (Imamat 19:18)

¹⁰ Yatanye do nirya, yuk ninye ati bico tenebuka melilinye birye, yuk nang ati malye kum ulinamle. Ati ara, ayupu nyapsine. Musa birye sekeiyamsuk yupu weik aubuk bukni, ayupu nirya deiyok ning ara, ninye ati bico tenebuka melipdanuka winin ning ati nyapsine. Aning nirya talibuka winipmunce, teleb ubuka winimunyopura, Musa birye sekiamuk mem yupu aning-aning nirya ati ara, sirya dakna atonun akunum wininmalume.

¹¹ Yuk ninye nirya ati, kanye talima arepsiliba, melilanauk wininamlum talak noutam nirya ara, wini talak ikin usilye ning ara, pia tenenamlume. Ara, nun deiyok koubuka diba tenyamubu talak ara, Yesus arye lyebuka dolyanamsil talak ara, mitik dam uamuk bukni, wini talak ara, pia dam unmale ati, ninye arye sik mangkau kanye bobuka, malamaka atonun ululum ninye nirya ara, buklulume.

¹² Wini talak ara domon yupu ton nyapnusine. Ara, lukunyan inipmalye talak, ninye mapmaca bereklamle touk, akunum unmala ati, kunukna noutam arye malye-malye winilamikce ning nirya ara, batakibirye, dirin ninguk talibuka diksukumuk winipribapya deice arye, ting ongolamak touk kibuka ubirye, pia kaliknauk unamabe.

¹³ Winibibyopura, keting noutam deice arye teleb winilamak touk, ‘Talya luba kibuka winipnune,’ tenena kumce, diksukumuk wininamabe. Ara, sal ap, kilapu ap, yupa weik bulubikirye, talye yolalamak ning ap; ninye arye kanye walwalana mek dinyakba, kanye wangalamak atonun una ap; kil ubula talye-talye yolalamak ning ap; pia malye-malye ning uk, talye luparabuka winilamak ning aning-aning nirya ap; kanye talima wililanyakce, kanye tenebuka, yuk-yuk bongdalanyak ning ap; yuk nang sik ning ati, ‘Se, nara aninguk winiptinye’ tenen, kanye se tenenyak ning ap; anirya ara kum wininamabe.

¹⁴ Amalye winin ning nirya ara, pia kum wininamap bukni, nunda, ninye arye winiryuk baju ongolamak touk, nun Deiyoknye Yesus Kristus ap, neika kanye talima dukdongobuka umunyopura, Yesus el ulamle touk unamlume. Tonda, min diba kum tenyamubu talak arye, nun kanye talima pum tam malye ning patalamsuk ning ara, ila tuba tonap patapsiliba tenemunya babye, pia kum wininamlulume. Amalye winin ning ati, tuba tenebuka kum wininamlulume.