Roma 10 - Eipomek

“Diba tenebibya deice aryuk, Allah el kanye aryuk, ‘Sikda diksukum ninye unyake,’ nyabuka teleb ulisulule,” nyabuk yupu

¹ Na kayapo, na Paulus birye na yala nang, Israel yala ninye ati tenepnirye, Allah pia moronun ning ara nyapnusine. Ara, ‘Allah arye Israel ninye lyepnamne’ tenen, pataniliba Allah moronune.

² Sik wininyak ning ara na kele anya arye, narye laka nyapsitinye. Sik Israel ninye ara, ‘Allah ap kanye talima dukdongobuka unamap’ tenen, pia pi deibukap, pil weik donyak bukni, aning ara pia mikip weik pirilamica babye, weik kel bikna deice kum unyake. Talye walwal arye wininyake.

³ Allah arye ninye lyena ati, “Sikda teleb ninye unyake,” nyabuka, diksukum kilisilya deiyok ning ara, moubuka kum kel kiyamika anya arye, sikce, ‘Nun diksukum kilina ati, nun bidamang aryuk piripdebirye, pil weik donamape’ tenen, talye pil weik dolamik. Winibuka pirilamika deice arye, diksukum una deiyok ning, Allah arye akunum kintinipsuk ning ara, yaniltalamikce talyauk ulamik. Adeice arye, Allah el amu tam kum ulamika ati, el kanye aniryuk diksukum una deiyok ning arisilye ning ara, kum dololamik.

⁴ Allah arye utenepsuke. ‘Kristus dipnamla deice arye, Musa sekamuk mem yupu noutamak nyalul ning nirya ara, Yesus Kristus arye kum kibuka deiplirye, sirya daknamle. Kristus arye apil doplirye, akunum sirya daklyopura, yata ninye do nirya, Kristus ati diba tenebica deice arye, “Sikda diksukum ninye unyake,” nyabuka teleb kipdeipnamsine,’ Allah arye tenyamsuke.

“Mutuku sirya, im sirya nirya noutamak unyak ninye kan-kan ak, Allah arye ninye weik arye lyelosulule,” nyabuk yupu

⁵ Minop talak Musa birye, nyabuk. ‘Allah arye, “Aning ara wininamlulume, aning ara kum wininamlulume,” nyabuka mem yupu arepsuk ning moubuka kekeplirye, dobolbalinye bira, kam pia unamle. Yatanye do nirya, amem yupu moubuka talilirye, dobolbalya deice, Allah arye anye biti, “Elda diksukum ulule,” nyabuka teleb ulinamle, Musa birye nyabuk.’ (Imamat 18:5)

^6-7 Musa birye nyabuk bukni, yata ninye do nirya, ‘Kristus ati diba tenebibya deice aryuk, Allah arye diksukum ninye kipdeipnamsile’ tenen, diba tenenyap ninye ara, Allah yupu noutamak sekik yupu nyasilye touk nyanyabe. Ayupu ara ani. ‘Anggun kanye talima pum tam ara, ayupu nyana meme. Yatanye birye im deice welebitu do? Yatanye birye tukwak noutamak koluktu do? Ayupu ara nyana meme.’ (Ulangan 30:12-13) Im deice welebana ning ara, ‘Kristus arye lyena ning arepsutu’ tenen, Kristus dobuka tukwak mutuku boyangana ati nyapsine. Tonda, tukwak mutuku noutamak koluka bana ning ara, sik akunum dibilamik ninye kan-kan arye, Kristus kam bukeipnirye, el dobuka tuku deice tuba tamubuka boyangana ati, na Paulus birye nyapsine.

⁸ Ayupu bitinye ara, pia kum nyanamap bukni, diba tenebupa deice, Allah arye nunti, “Sikda diksukum ninye unyake,” tenebuka teleb kibuka deipsuk ninye ara, ayupu nyanyabe. Ara, ‘Allah arye ninye lyena ati nyasulul yupu ara, akunum dam usulule. Ayupu ara, anggun talima pum tam akunum ulule. Anggun yupu kopropa aryuk, “Nun ni Allah lyepsilyame,” nyabuka moroptume.’ (Ulangan 30:14) Ayupu nyanyabe. Nyanyaba deice, “Anggun yupu kopropa aryuk nyaptume,” nyapmasin yupu ara, yuk yupu kume. Ara, nunce peterenyap yupu, “Yesus ati diba tenebibya deice, Allah arye lyelosulule,” nyabuka, peterenyap yupu ati nyapmasine.

⁹ Ayupu ara, nyapnusine. Ara, anggun yupu kopropa deice ap, anggun bidamang si bam bol deice ap aniryuk, “Yesus ara dipkoprop nun Weik Deiyoknye ulule,” nyabuka, teniltona kum diparyuk, laka arye nyaplum bukni, anggun kanye talima pum tam arye, ‘Yesus akunum dibuk bukni, Allah arye Yesus ati dipkoprop tuba tamubuka kam bukdeibuk’ tenen, diba tenepmunyopura, akunuma, dipkoprop Allah arye lyepnamsile.

¹⁰ Aning ara, talye ati kum nyapsine. Kume. Deiyok ara ani. Ara, anggun kanye talima pum tam diba tenepmunyopura, Allah arye anggunti, “Sikda diksukum ninye unyake,” nyabuka, el kanye aryuk teleb ulisulule. Tonda, anggun yupu kopropa deice ap, anggun bidamang si bam bol deice ap arye, “Yesus ara nun Deiyoknye usulule,” nyabuka ninye kekenak arye, lakak nyapmunyopura, Allah arye lyelosulule.

¹¹ Aning ara, Allah el yupu noutamak, nabi Yesaya birye sekamuk touk, dipkoprop ulule. Ayupu ara ani. ‘Elda pia dipkopropnye ulula anya arye, elti, diba tenebice ninye nirya ara, na Allah arye dipkoprop lyepnamne. Aning ara nong upnamle anya arye, sikce diba tenebikcopura, aminyan talak, ‘Se, nun talye ninguk diba telamubu’ tenen, anggun talima pia uk kum dinamsile. Dipkoprop Allah arye aninye lyepnamle. Ati, ‘Se, talye ninguk diba tenebupe’ tenen, alye pia kum dakanamake.’ (Yesaya 28:16)

¹² Ayupu noutamak arye, “Yata ninye do nirya,” nyabuka ara, talye ati kum nyabuk. Kume, nun Yahudi yala ninye babye, sik Yahudi yala kum ninye babye atonun tenesulule. Nun Weik Deiyoknye Allah, elda tonoknye uka. Ninye mutuku-mutuku nirya atonun, ‘Elce melibuka lyelonamsil’ tenen, el siuk nyabuka, elti, moronyak ninye nirya ara, teleb kibuka weika arye melisulule.

¹³ Winisilya deiyok ara aupmale. Minop talak nabi Yoel birye ayupu sekamuk. ‘Yata ninye do nirya, ‘Allah elce lyepnamsil’ tenen, nun Deiyoknye el siuk nyabuka, elti, moronyak ninye nirya ara, dipkoprop Allah arye lyepnamle.’ (Yoel 2:32)

¹⁴ Aning ati ara, mambul yupu ton nyapsine. Ninye im sirya, mutuku sirya nirya atonun unyake. Anye Yesus ati min kum diba tenebikcopura, yata ubuka, ‘Elce lyepnamsil’ tenen, el si nyabuka moropting do? Kume. Tonda, yuk nang arye, aninye ati, Yesus el si ap, el yupu ap min kum peterebikiba, kum kekebice talak ara, yata wiribuka elti, diba teneptinge do? Tonda, yuk nang arye, el yupu min kum dobuka kum peterepra bice talak ara, Yesus arye ninye lyena ati, el laka teleb yupu ara yata ubuka kekeptinge do?

¹⁵ Tonda, sik peterelbana deiyok nang ati, yuk nang arye, ‘Sik peterelbanamak’ tenen, anang sik melina ning ap, melibuka kum doprobikirye, anang dobuka kum dopkwetebicopura, yata ubuka peterelbiting do? Kume, aning nirya kum winipmanto. Allah yupu noutamak sekeipsik touk, ‘Allah arye ninye lyena ati, el laka teleb yupu peterena ati, ayupu dobuka boyasice nang ara, sik yan babye urasin pia teleb ulule, tenenyabe.’ (Yesaya 52:7)

¹⁶ Ura, Allah arye ninye lyena ati, el laka teleb yupu dobuka peterelbalamik bukni, Israel ninye nirya ara, ayupu ati diba tenebuka kum dololamik. Aning ara, nabi Yesaya birye sekamuk yupu deice kel kinyabe. Ayupu ara ani. ‘Yesaya birye, “Se na nio, an yupu ara nunce dobuka peterelamububa, ninye mitik anun aryuk diba tenenyake.” Yesaya birye nyabuk.’ (Yesaya 53:1)

¹⁷ Aning ati ara, nun kele. Allah el laka teleb yupu, ninye lyena ati nyasilye yupu ara, peterena nang arye peteresikceba, kekenyapa deice arye, diba tenena deiyok ning tenebuka kel kinyabe. Allah arye ninye lyena ati nyasulul yupu ara, Kristus el yupu peteresikceba, kekenyapa deice arye, moubuka kel kibibirye diba tenenyabe.

¹⁸ Aning nyapmasin bukni, ayupu ton asipdesine. Sik Israel ninye ara, Allah arye ninye lyena ati nyasilye yupu, kum kekelamik do? Kume, dipkoprop yuk nang arye peterelamikba, kekelamik. Aning ara anyapnusin yupu deice arye kel kinyabe. ‘Sik peterepra banyak nang, sik yupu ara im sirya, mutuku sirya nirya peterelbalamik. Sik yupu ara, ‘Mutuku sirya, im sirya unyak ninye nirya kekenamak’ tenen, akunum peterepra banyake.’ (Mazmur 19:4)

¹⁹ Tonap asipdesine. Sik Israel ninye ara, Allah yupu kekelamik bukni, ‘Deiyok ani’ tenen, moubuka kum tenelamik do? Kume, kekelamik bukni, Allah yupu noutamak ara, anyapnusin yupu ton aupmale. Minop talak ning ara, Musa birye ayupu sekamuk. ‘Sik Israel yala ninye arye, yuk bai tam atonun, karen mutuku atonun unyak ninye ati, ‘Anggunda talye nang uka,’ tenebuka nyamunye bukni, narye aninye ati teleb updeipnyopura, anggun Israel yala ninye arye, aning eipmunyopura, anggunce, ‘Se, yuk yala ninye ara, yata ati teleb updeiple do? Kume, nunda teleb updeipsuturye, lyepsitue’ tenen, malye kanye bobuka, sik yuk mutuku ninye ati, yu tenebuka talima wilibuka unamlume. Aning atonun, na Allah unye ning moubuka min kum kekenyak ninye bukni, narye aninye ati teleb updeipnyopura, anggun Israel ninye arye, ‘Se, yata deiyok ati do?’ tenen, sik yuk mutuku ninye ati yu upliba, malye kanye bonamlume. Na Allah arye nyapsine.’ (Ulangan 32:21)

²⁰ Tonda, nabi Yesaya birye, sik Israel yala kum ninye ati, sekeibuk yupu ara ani. ‘Allah arye nyabuk. ‘Nun ap, Allah ap, talima dukdongobuka neika utibye’ tenen, patalamukba, kum elamnik ninye unyak bukni, wini talak ara, aninye na yupu kel bikicopura, na mapu kopropa akunum unyake. Tonda, sikce, ‘Se Allah arye melibuka lyepsitue’ tenen, kum morolamnik ninye ulamik bukni, ‘Aninye arye na wininye ning kel kekepnamak’ tenen, na bidamnye arye akunum lakak kipdasiba, sik aninye arye wini talak nati akunum moubuka kel kininyake. Na Allah arye nyapne.’ (Yesaya 65:1)

²¹ Bukni, nabi Yesaya birye Israel yala ninye ati, ayupu sekeibuk. “Na Allah arye anggun Israel ninye ati nyapsine. ‘Aninye ara na mapu unyakba, narye melipnamne’ tenelamsirye, ‘Na dam yanamak’ tenen, na taruk anggun dam yangalisunun bukni, anggunda ilil pia kum kanye weik ninye umunce, na yupu kekena kumce, nati yaniltanauk unululume.” Allah arye nyabuk. (Yesaya 65:2) Aning ati, na Paulus birye nyapsine. Israel ninye arye, Allah el yupu kekenyak bukni, tuba-tuba ilil pia kum kanye ubikirye, yaniltanauk unyake.