Ratapan 5 - Eipomek

“Bico tenepsimince, ton ap teleb kipdeipnamsilyame,” nyabuka, Allah ati morobik yupu

¹ Se, na ni Allah Yahweh, ance arepsulumba, nun dam ikin ning pia weik usilya ning ara, eipsulume. Kanye ikin ning weik ubsuka deice arye, yuk nang nirya, nunti, ‘Sikda, teleb nang,’ kum tenesikirye, tuba si erebuka, kum kisinyake. Ati, ance nun tam dilyasimince, nunti ikin ning deibuka, malye kilisinyak ning ara, ance akunum elilyame.

² Nun ni yapu arye talilamik ning ara, nunti arepsiting bukni, nun dopropmanto ning nirya ara, yuk mutuku nang aryuk dolosinyake. Nun mutuku koprop nang, nun tam nang arye kum bukni, nunce kum bikamupu ninye asik nang, sikcuk nun aik ap, nun bona yala-yala nirya ap, yan wekuka dolosinyake.

³ Nun mal olan nang arye, nun ni yapu nirya akunum opsika ati, wini talak ara, nun nin yapu ara, youwak kilapu unyake. Nun ni yapu nirya ara, akunum obikba dibik ati, nunda kwaknamne mapu unyabe.

⁴ Nun din ning ap, mek ap, nun uku dan yo ap nirya ara, deknauk unyabe.

⁵ Nunda sapi basam dobuka, el un dam bukni, balye tam deice, ikin yo dobuka, ngang dam tapu kirikdongobikiba, ikin pil dolamle touk unyabe. Ara, yuk mutuku nang arye nunti, “Anggunda, nun piluk talye dopsululume,” nyabuka, ikin pil dinauk usinyake. Pil dipmasikiba, pil donmapyeura, pia mitang kilamsil touk, sikce nunti, “Pil donauk unamlulume. Didik sena pia meme,” nyasinyake.

⁶ Ikin kanye bobuka unyaba ati, nun din ning ara, mitik tonun upsile. Ati, nunda Mesir mutuku nang dam bibirye, din ning roti kwaning bepdebuka dinyabe. Aning atonun, Asyur mutuku nang dam babye bibirye, bepdebuka morobuka dinyabe.

⁷ Se, min talak ara, nun yok punun nang aryuk malye ulamik. Bukni, sik nirya diamikba, atalak nirya babye, sik kam tuba kum unyake. Ara, kam tuba kum unyak deiyok ara, sikce malye ulamik menenga deice arye, akunum dibik. Dibik bukni, nun atalak tuba kam unyap nang ara, sik min talak ulamik nang arye, malye ulamik ning ati, menenga dolon ning ara, nun wini dolonyabe.

⁸ Nun yo bok deice arye dekububa, nun pil melibuka dolamsik nang ara, sikce tamubuka ninye deiyok kibuka talipsikce, nunti ikin pil dinauk usinyake. Sikce nunti talipsikce, usinyak nang ara, yuk nang arye, melibuka kum lyepmanto usinyake.

⁹ Amutuku asik dobuka unyabak arye, mutuku tukwak tam din ning lilbibye talak ara, akata mutuku noutam ara, nun mal olan nang arye yanuka, nun ona ati kalekmasikirye, ya dobuka osinyake. Ati ara, amutuku tukwak arye, din ning ati elbana ara, pia ilil usulule.

¹⁰ Tonda, nun din ning ara, tuba patanauk usulule. Winisilya deice arye, nun nong bol babye, uku dimalirye, buppu weik ulamle touk usulule.

¹¹ Yerusalem mutuku noutam unyak kilapu, nunce dobupu kilapu ara, nun mal olan nang arye, nun osinyak tam nang arye, ubula dobuka neika manyake. Aning atonun tonda, Yehuda mutuku noutam unyak wel kilapu babye, nun olyangasikirye, yanuka ubula dobuka, neika manyake.

¹² Nun ti deiyok kibuka talisinyak nang nirya ara, nun mal olan nang arye tomobuka bobikirye, yo deice deibuka kirik kwetebuka onyake. Nun mal olan nang arye, nun deiyok koubuka talisinyak wisi-wisi nang, yupu nyasiknyak deiyok nang ati, “Anggunda talye nang, nun lik,” nyabuka, si erebuka, ton pia kum kinyake.

¹³ Nun mapu wel nang ara, gandum duk teikna pil ara, weik ikin ninguk dikceba, pil donyake. Tonda, nun mapu wel nang ara, uku dan yo ati, weik yo koubuka tomolamicak, sakuka oplyeba mitang ulule.

¹⁴ Nun tam wisi-wisi nang ara, ton ap weik asik dobuka, tiriklamupu bublan dam ara, mambul yupu sisikna ati, pia kum kukuka wekelbanyake. Tonda, anyasik noutam ara, nun tam wel nang arye, bung-bung ana oceba, lelim nyaplyeba, mot ton nyanmakcebuk, kum kekenyabe.

¹⁵ Nun kanye talima noutam teleb ulamsuk ning ara, akunum kum kipdeipsukba, talima uk disulule. Aning atonun, kanye deibuka, mot nyalamupu ning ara, tamubuka malye kanye bobupu arye, enganauk unyabe.

¹⁶ Min talak, nunda eren nang atonun ulamupubuk, nun mutuku ulamik nang arye, nunti si erelilamsikce, si erebuka kina ati, urasin teleb ning, nun kisok deice delilamsik. Bukni wini talak ara, nun babye malye una menenga arye, aning sakukba, nun dam ikin ning yayukba doprobupu. Ati, sikce nunti, kum si eresinyake. Akunum bataksike.

^17-18 Sion mutuku, nang ton kum unyak ati, akunum batakikba, asik oldemuk ubukce, pia tunim nyabuk. Winibukba, bai tam ulamle yu kamuk ukirye, banauk unyake. Winiceba, nun talima pia uk disulule. Tonda, nunda enganauk upyeba, nun asing maka balosilirye, nun asing nirya ara, akunum kupsuke.

¹⁹ Bukni, nun ni Allah Yahweh, ance nunti, pia mikip arye talipsuluma atonun, doupnamle talak nirya babye, Ance nunti, pia talinamsilame. Aning-aning nirya talibuka unamlam ning ara, pia ati aunamle. Pia winipmanto kum ulule.

²⁰ Aning ati ara, nun ni Allah, ance nunda yata ning deiyok ati, wini talak noutam nirya ara, pia bataksulum do? Ance nunti, pia akunum lubakipsulum do?

²¹ Se, nun ni Allah Yahweh, nunda an damuk tamubuka boyasiminyeba, yabirye, neikauk unamabe. Aning ara, pia patasulule. Ance nunti, minop talak teleb kipdeiamsulumba, ulamupu atonun, wini talak babye, teleb kipdeipsiminyeba, telebuk unamabe.

²² Aninguk kum bukni, ance nunti pia bataknamsilam do? Ance nunti, yu weik ukululce, wasilyam ning ara, bataknamsilam do? Pia yu unamkil do?